Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2017

Mphaveleke Mihakhu Sekeekhai

Mphaveleke Mihakhu Sekeekhai

“Muhakhu wotakhala wa vathí, mwiphavelelaneke apatthani”.​—LUKA 16:9

ISIPO: 32, 154

1, 2. Olumwenku ola wootakhala, xeeni okathi wotheene anrowa aya okhalaka atthu oohaawa?

OLELO-VA, khoreere othowa musurukhu. Mwa ntakiheryo, ti voovila amiravo anceene ophwanya muteko. Atthu akina annileva okumi aya arowaka ilapo soothaaciri. Nave ilapo soothaaciri khareere atthu oohaawa. Tthiri olumwenku wotheene athaaciri anootepa othaaciri ni atthu oohaawa anootepa ohaawa. Moovarihana ni erelatoorio emosa ya niinaano, muhakhu wa atthu vakhaani ari valaponi, moohipisa onrowa olikanaka ni muhakhu wa atthu akina otheene. Moohaanyiherya, vaavo atthu akina antepa aya okhalana musurukhu munceene, ibilyau sinceene sa atthu anootepa ohaawa. Tthiri Yesu aanisuwela eyo, tivonto aahimmye awe wira: “Alipa-òhawa munokhalana eriyari anyu mahiku othene”. (Marko 14:7) Xeeni ohikhala exariya iwo ohireere aya valaponi?

2 Yesu aanisuwela wira, Omwene wa Muluku paahi tonrowa omaliha olumwenku wa nakoso. Biibiliya onnooniherya wira “anamarotta” aahiiso olumwenku wa nakoso onivara vamosa ni anapoliitika ni ahooleli a itiini yaawo aniirela mpantta olumwenku wa Satana. (Wisupulula 18:3) Ekeekhai wira atthu a Muluku aawerya ovalaana moomalela ni etiini yoowootha ni epoliitika. Hata vari siiso, atthu anceene a Muluku khaniwerya ovalaana moomalela ni olumwenku wa nakoso wa Satana.

3. Mwaha ola, ninrowa othokorerya makoho xeeni?

3 Ntoko maKristau ekeekhai nihaana ovarerya moota nnoonela ahu olumwenku wa nakoso. Wira nipake eyo, nihaana wiikoha so: ‘Kinrowa orumeela sai itthu sa werutthuni wira kooniherye wira kinniroromeleya wa Muluku? Kinrowa osyaka sai otepa wiikeliha olumwenku wa nakoso? Olelo-va, matakiheryo xeeni anooniherya wira atthu a Muluku annimuroromela yena?’

MURUMEYI MULAVILAVI

4, 5. (a) Exeeni yaamwiiranenle murumeyi aahimmwale ni Yesu? (b) Yesu aatumerenrye opaka exeeni atthareli awe?

4 Mmusome Luka 16:1-9. Nlikanyiho na Yesu voohimya sa murumeyi mulavilavi, nihaana oniiriha otheene ahu wuupuwelela saana. Murumeyi ole aahootheriwa ohonona muhakhu wa pwiya awe, nto pwiya awe khulakela omoomola. * (Nwehe enoota.) Masi murumeyi ole aahiira etthu “ya miruku”. Maana ohinatthi woomoliwa muteko, aahaapaka apatthani wira amukhaliherye oomoliwa omutekoni. Xeeni Yesu ohalaka olavula nlikanyiho nle? Niireke aaphavela wira awiixutti awe apakeke itthu soohixariya wira akhaleke saana? Nnaari. Okhala wira eyo etthu enipaka aya atthu a elapo ela. Masi Yesu aaphavela owiixuttiha etthu yootepa otthuneya.

5 Yehova ni Yesu, ti apatthani ahu a wiirimu. Masi Yesu aanisuwela wira ntoko murumeyi ole aaphwanyiwe maxakha mootutuxerya, atthareli anceene a Yesu waarowa waaxankihaka okhala olumwenku ola. Tivonto aalenle awe wira: “Muhakhu wotakhala wa vathí, mwiphavelelaneke apatthani”. Nthowa xeeni? Nthowa noowi, vaavo mihakhu iyo simmala aya, apatthani awo a wiirimu, “ewakheleleni mpani mohimala”. Miruku sa Yesu, sinniixuttiha exeeni?

6. Ninsuwela sai wira olumwenku wa nakoso, khoniirela mpantta yoolakela ya Muluku?

6 Nnaamwi Yesu ahaatthokihenrye nthowa naya naamwiirinhe ohimya itthu sa werutthuni okhala ‘sotakhala’, Biibiliya onnooniherya wira ophavelasa musurukhu munceene moohixariya, khoniirela mpantta yoolakela ya Muluku. Mwa ntakiheryo, oJardim ya wEedeni, Yehova aahaavaha itthu sinceene Adamu ni Eva. (Maphattuwelo 2:15, 16) Muhoolo mwaya, vaavo Muluku aavanha awe munepa awe wootteela maKristau oowoottihiwa “khavo mutthu ahimya wira mihakhu sawe sari sawaweru pahi: sothene sarinaya sari s’atthu othene”. (Miteko 4:32) Profeta Yesaya aahihimya wira onookhala okathi apinaatamu otheene anrowa aya okhalana yoolya yinceene valaponi. (Yesaya 25:6-9; 65:21, 22) Awehereryaka ophiya okathi owo, atthareli a Yesu ahaana okhala a “miruku”. Okhala wira ahaana orumeela mihakhu sootakhala sa olumwenku ola, nave okathi omosaru, omuhakalaliha Muluku.

 ORUMEELA MIHAKHU SOOTAKHALA MWA MIRUKU

7. Miruku xeeni Yesu onivanha awe eliivuru ya Luka 16:10-13?

7 Mmusome Luka 16:10-13. Murumeyi aalavuliwe ni Yesu aahaapaka apatthani orumeelaka mihakhu sootakhala. Masi, Yesu aaphavela wira atthareli awe yaapakeke apatthani eekeekhai a wiirimu. Nave aaphavela wira enamuna anirumeela aya mihakhu sootakhala, yooniheryeke wira anniroromeleya wa Muluku. Ninrowa opaka sai eyo?

8, 9. Nvahe matakiheryo anooniherya wira atthu akina annirumeela moororomeleya mihakhu saya sootakhala.

8 Vaavo ninvaha ahu musurukhu ahu wira nikhaliherye muteko woolaleerya waalavuliwe vahinatthi ni Yesu, enamuna emosa enooniherya ahu wira ninnirumeela moororomeleya mihakhu sahu. (Matheyo 24:14) Mwaaruusi mmosa a wÍndia, aahihiya othuma ibrinketo wira oweryeke osuka musurukhu owo mukoofirini mwawe. Vaavo ekoofiri ele yaasanrye aya, aahivaha musurukhu wotheene aathukumannye awe wira orumeeliwe muteko woolaleerya. Munna mukina a wÍndia, ookhalana ematta ya ikole. Nto, oovaha ikole sinceene opuro ontaphuleliwa iliivuru sa nttaava Malaiala. Okhala wira anna annirumeela ikole, munna ole, onnoona yoovaha awe okhala yootepa otthuneya ovikana ovaha musurukhu. Eyo enamuna yooloka ya waarumeela “ankhili”. Moolikanasa, anna a oGresia annivaha emusi ya oBetheli makhura, ekeexo ni soolya sikina.

9 Munna mukina a oSiri Lanka, ohooliha opuro awe wira sipakiweke mithukumano sa mmulokoni ni asembeleya ni ohooliha empa awe wira ekhaliweke ni arumeyi a Muluku a okathi wotheene. Nnaamwi anna ale ahirina musurukhu munceene, annaakhaliherya vanceene anamalaleerya oothoiwa a mapuro ale. Mapuro yaale muteko ahu onikhoottihiwa aya, anna annirumeela ipa saya wira sipakiweke mithukumano. Eyo ennaakhaliherya mapioneero ni ale oothoiwa okhalana opuro wa mithukumano ohinaalukariwa.

Atthu a Muluku annirumeela mireerelo saya wira yaakhaliherye akina

10. Ovaha onikumiherya mireerelo xeeni?

10 Matakiheryo ala annooniherya wira atthu a Muluku ‘anniroromeleya n’itthu sikhanixa’. (Luka 16:10) Maana annirumeela mireerelo saya wira yaakhaliherye akina. Apatthani awo a Yehova anoonela sai wiimananiha waya? Awo annihakalala vanceene osuwela wira vaavo anivaha aya, annithukumanya muhakhu “w’ekekhai” wiirimu. (Luka 16:11) Murokora mmosa onnivaha moohicompela musurukhu awe wira okhaliherye Omwene. Owo onnihimya mireerelo oniphwanya awe oriki: “Kinnoona wira vaavo kinitepa aka ovaha itthu sa werutthuni, kinnitepa waareerela murima atthu akina. Nto kinnaapixerya murima ni waalevelela atthu akina ni owerya ovilela onyoonyihiwa ni weemererya miruku kinivahiwa aka”. Atthu anceene ahoona wira ovaha onnaakhaliherya.—Esalimo 112:5; Miruku 22:9.

11. (a) Ninwooniherya sai “ankhili” vaavo ninvaha ahu? (b) Olelo-va, exeeni anipaka aya atthu a Muluku? (Nwehe elatarato yoopacerya.)

11 Nave ninnooniherya wira nookhalana “ankhili”, vaavo ninrumeela ahu mireerelo sahu wira naakhaliherye atthu nnaalaleerya ahu. Nave, hata nihiweryaka orumeela ntoko pioneero, aahiiso othaamela muttetthe woothowa anamalaleerya, nnoowerya okhaliherya. (Miruku 19:17) Mwa ntakiheryo, musurukhu onivaha ahu onnikhaliherya opakiwa iliivuru, muteko woolaleerya ni oroihiwa iliivuru iyo mittetthe soohaawa seiyo atthu anceene aniixutta aya ekeekhai. Ilapo ntoko oCongo, oMadagarcar ni oRuanda, aBiibiliya annitumihiwa musurukhu munceene. Okathi mukina Biibiliya mmosa onnitumihiwa musurukhu oniliviwa namuteko esumana aahiiso mweeri ntero. Mwa iyaakha sinceene, annihu ahaana othanla omuthuma Biibiliya aahiiso othuma yoolya. Vano, mwaha wa musurukhu onivahiwa ni anna akina onnikhaliherya ‘olikana’, wira mutthenkeso wa Yehova waataphuleleke ni waakawela Biibiliya atthu a khula emusi ni ale anaasomiha ahu Biibiliya. (Mmusome 2 aKorinto 8:13-15.) Tivonto, ale anivaha ni ale anivahiwa annikhala apatthani a Yehova.

NINROWA OSYAKA SAI OTEPA WIIKELIHA OLUMWENKU WA NAKOSO?

12. Abrahamu oonihenrye sai wira aanimuroromela Muluku?

12 Nave-tho, nnoowerya okhala apatthani a Yehova akhala wira nnoosyaka wiikeliha olumwenku ola wa nakoso nnaphavela muhakhu “w’ekekhai”. Eyo ti etthu Abrahamu mulopwana oororomeleya aapanke awe. Okhala wira Abrahamu aahimwiiwelela Yehova, aahithaama elapo yoothaaciri ya Uri orowaka okhala muheemani maana aaphavela okhala mpatthani a Yehova. (aHéberi 11:8-10) Okathi wotheene aanimuroromela Muluku ohiya mihakhu. (Maphattuwelo 14:22, 23) Yesu aahaatumererya akina otakiha waamini wa Abrahamu. Mukwaha mmosa aahimuleela mmiravo thaaciri wira: “Mwatthunaka okhala òrera murima vomalela, murowé, mwatumihe sothene sirinanyu: musurukhu ene mwavahe alipa-òhawa. Siso munokhalana muhakhu wirimu. Numalá, murwé, mukitthareke”. (Matheyo 19:21) Mmiravo ole khaarina waamini ntoko wa Abrahamu. Masi yaahikhala atthu akina yaamuroromela Muluku.

13. (a) Miruku xeeni Paulo anvanha awe Timootheyo? (b) Olelo-va, ninrowa ovarihela sai muteko miruku sa Paulo?

13 Timootheyo aari mulopwana oowaamini. Nuumala Paulo omuhimya Timootheyo okhala “nakhotto òroromeleya a Yesu Kristu”, Paulo aahimuleela wira: “Ole onetta okhottoni, atthuna omusiveliha kapitau awe, khanetetela miteko sihikhanle s’ekhotto”. (2 Timótheyo 2:3, 4) Olelo-va, atthareli a Yesu waahela muhima arumeyi anivikana emilyau emosa anivara muteko wa Muluku wa okathi wotheene, annivarihela muteko miruku sa murummwa Paulo. Awo annisyaka wiikeliha anakoso ootakhala a olumwenku ola. Maana annuupuwela malakiheryo ala: “Mulipa-òkopha epotthá y’ole omukophenlyawe”. (Miruku 22:7, Biblia Solempwa sa Muluku) Satana oniphavela wira nirumeeleke ikuru sahu ni oviriha okathi munceene niirelaka mpantta olumwenku awe wa nakoso. Atthu akina annikopha musurukhu munceene wira athume empa, ekaaro, aliverye osoma waya aahiiso ekasamento. Naahivahe ephoole, hiyo pooti ohiwerya oliva musurukhu owo mwa iyaakha sinceene. Ninniwooniherya ankhili vaavo vanikhweiherya ahu okumi ahu, osyaka okopha ni orumeela musurukhu vakhaani. Napaka eyo, ninrowa omurumeela Muluku ni osyaka okhala epottha ya olumwenku ola wa nakoso.—1 Timótheyo 6:10.

14. Exeeni elakenle ahu opaka? Nvahe matakiheryo.

14 Wira nivikanihe okhweiherya okumi ahu, nihaana opweha Omwene wa Muluku opuro woopacerya. Anamathelana amosa yaanimweetta nakoso oniphwanyiha musurukhu munceene. Masi yaaniphavela otthikela muteko wa Muluku wa okathi wotheene. Tivonto, yaahimuhiya nakoso aya, yaahitumiha ekalawa aya ni mireerelo sikina. Nuumala-vo, yaahiivahererya okhaliherya otepa eseedi ya olumwenku wotheene ya Anamoona oWarwick, Nova York. Eyo yaahaahakalaliha maana yaavara vamosa oBetheli ni mwanaya ni mutthepa aya. Nave anamathelana ale yaahikhalana eparakha yoovara isumana vakhaani ni anamuyari a mutthepa aya, yaawo yaakhalihenrye oteka eseedi ya oWarwick. Pioneera a oColorado, wEstados Unidos da América, aahiphwanya muteko obanko aavara awe okathi vakhaani. Mapatarau awe yaanisiveliwa ni muteko awe, nto yaahinvekela wira ovareke okathi wotheene ahimyaka wira yaarowa omulivaka musurukhu munceene ovikana ole aakhela awe. Masi, okhala wira muteko ole khiwaarowa omweemererya okhalela nthiti olaleerya, murokora ole aahikhootta. Ala matakiheryo vakhaani paahi, anooniherya wiimananiha wa arumeyi a Yehova. Vaavo ninlakela ahu opweha nipuro noopacerya Omwene wa Muluku, eyo ennooniherya wira ninnivaha efaita mihakhu sekeekhai ni wataana wahu ni Muluku, ovikana itthu sa werutthuni.

OKATHI SINIMALA AYA MIHAKHU

15. Mihakhu xeeni sinikumiherya ohakalala wuulupale?

15 Okhalana mireerelo sa werutthuni, khontaphulela wira mutthu owo onneemereriwa ni Muluku. Masi Yehova onnaareeliha ale ari “athajiri ni miteko saya sorera”. (Mmusome 1 Timótheyo 6:17-19.) Mwa ntakiheryo, murokora Lucia aahisuwela wira elapo ya wAlbânia aathowa anamalaleerya. * (Nwehe enoota.) Nto aahithaama wItália mwaakha wa 1993 orowaka wAlbânia. Nnaamwi ahaarina muteko, owo aanikupali wira Yehova ammukhaliherya. Aahiixutta nttaava na wAlbânia ni oowiixuttiha Biibiliya atthu anivikana 60 mpakha obatiziwa. Waaniheryasa khanitonko owiixuttiha Biibiliya atthu anivikana 60. Masi, khula etthu enipaka ahu wira naakhaliherye akina omusuwela Yehova ni okhala mpatthani awe, etthu enrowa ahu ovahaka efaita mahiku otheene.—Matheyo 6:20.

Khula etthu nnimpakela ahu Yehova ni Omwene awe enooniphwanyiha ohakalala vanceene

16. (a) Exeeni enrowa wiiraneya ni olumwenku wa nakoso? (b) Nto nooneleke sai itthu sa werutthuni?

16 Yesu aahooniherya saana wira olumwenku ola wa nakoso onrowa omala. Moone wira Yesu aahimmye wira: ‘Muhakhu . . . womalelani’, ohiya ‘akhala wira onimoomalelani’. (Luka 16:9) Mahiku ala ookiserya, ibanko sikina sinnipwata ni ilapo sikina sookhalana muxankiho muulupale wa othowa musurukhu. Nave moohipisa itthu pooti otepa otakhala. Okhala wira mutthenkeso wa epoliitika, wa itiini ni wa nakoso oniirela mpantta olumwenku wa Satana, sotheene iyo sinrowa opwetexiwa. Profeta Ezekiyeli ni Sofoniya yaahihimya vahinatthi wira eweero ni eparatha yeeyo eniphavelaxiwa olumwenku ola wa nakoso, khenrowa okhalana efaita. (Ezekiyeli 7:19; Sofoniya 1:18) Naarowa woonela sai wanikisa wa olumwenku ola noona wira noorumeela moohikhalela mihakhu sekeekhai mwaha wa itthu sootakhala? Niireke naarowa woona ntoko mulopwana aamananinhe othukumanya musurukhu munceene, masi oona wira musurukhu ole khorina efaita? (Miruku 18:11) Nave itthu sa werutthuni sa olumwenku ola sinrowa omala. Tivonto ela eparakha erina anyu ya orumeela itthu sa werutthuni wira mwaapake apatthani a wiirimu. Tthiri khula etthu nnimpakela ahu Yehova ni Omwene awe enooniphwanyiha ohakalala vanceene.

17, 18. Exeeni enlipelela aya apatthani a Muluku?

17 Momweneni mwa Muluku khuuvo onrowa waalukariki empa aahiiso okopha musurukhu. Yoolya enrowa waatta ni khavanrowa otthuneyaka waaliva mameediku aahiiso othuma mirette. Tthiri apatthani a Yehova anookhalana yoolya yinceene. Eweero, eparatha ni mihakhu sikina sinrowa orumeeliwaka wira sireerihe elapo, ohiya waathaaciriha atthu akina. Ikaruma soolokexa sintekeliwa empa ntoko, ithaapwa, maluku ni iyuuma khasinrowa otumihiwaka, masi ninrowa orumeelaka wira nipakeke ipa sooreera. Okhala wira apatthani ahu a wiirimu anniphavela onikhaliherya, nto khaninrowa waaliva etthu. Tthiri itthu sotheene valaponi sinrowa okhala sawihu.

18 Eyo enrowa okhala etthuvo yuulupalexa wa ale anaapaka apatthani a wiirimu. Anamakokhorela a Yehova valaponi anrowa otthapa vaavo anrowa aya wiiwa masu a Yesu ani: “Rwakani, nyuwo murerihiwe n’Atithi. Mwakhele Omwene olokiheriwanyu okhuma opattuxiwa w’olumwenku”.—Matheyo 25:34.

^ etti. 4 Yesu khaalavunle akhala wira murumeyi ole aamootheriwa aahiiso nnaari. Okhala wira nuulumo noowi “anihonona” nri eliivuru ya Luka 16:1, pooti otaphulela mutthu ohimya itthu soohikhala sa ekeekhai. Tivonto, Yesu onittittimiherya awe miruku sa murumeyi ole, ohiya etthu yiirinhe woomoliwa omutekoni.

^ etti. 15 Yowiiraneya ya mweekumini ya Lucia Moussanett yaakumiheriwe erevista Despertai! 22 a Junyo 2003 ipaaxina 18-22.