Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Julyo 2017

Mathowa Xeeni Anniiriha Onvuwiha Yehova?

Mathowa Xeeni Anniiriha Onvuwiha Yehova?

“Aleluya! . . . Etthu yophwanela omuttottopela Muluku ahu”.​—ESALIMO 147:1.

ISIPO: 9, 152

1-3. (a) Waaniheryasa, Esalimo 147 yaalempwale silini? (b) Esalimo 147, enniixuttiha exeeni?

IKWAHA SINCEENE, ninninvuwiha mutthu mwaha wa ele onihimya awe aahiiso onipaka awe ennisivela. Tthiri, ninniphavela vanceene onvuwiha Yehova Muluku ahu! Nto vaavo vaniweha ahu itthu sootikiniha sipanke awe, ninninvuwiha Yehova mwaha wa owerya wawe, nave ninninvuwiha mwaha wa oniphenta wawe, onivahaka mukuttho wowoopola wa Mwanawe.

2 Vaavo ninsoma ahu Esalimo 147, ninnoona wira ole olempe aaniphavela vanceene onvuwiha Yehova. Nave-tho, aahaatumererya akina wira anvuwiheke Muluku.​—Musome Esalimo 147:1, 7, 12.

3 Hiyo, khannimusuwela oratteene ole olempe Esalimo 147. Masi waaniheryasa, mulipa-olempe esaalimo ela, aakhanle okathi yoole aIsarayeli yaatthikenle aya oYerusalemu nuumala Yehova owoopola oBabilonia. (Esalimo 147:2) Nave nasaalimo aahinvuwiha Yehova mwaha woowi atthu a Muluku yaahitthikela elapo aya wira amukokhoreleke. Nasaalimo onnooniherya mathowa makina anniiriha onvuwiha Yehova. Mathowa xeeni? Mathowa xeeni aniwiirihani ohimya wira: “Aleluya!”, aahiiso ‘Mmuttottopele Muluku’?​—Esalmo 147:1.

YEHOVA ONNAAHAKALALIHA ARIIPIWE MURIMA

4. Vaavo aIsarayeli yoopoliwe aya ni Mwene Kiro, yoonenle sai ni nthowa xeeni?

4 Nkahaya muupuwele moota yaari aya aIsarayeli weepotthani oBabilonia. Ale yaatthukwenle, yaananyohola ariki: “Munìpele isipo s’elapo anyu!” Masi aYuda khiyaarina mathowa oohakalala. Maana Yerusalemu, yoowo aahakalaliha vanceene aahipwetexiwa. (Esalimo 137:1-3, 6) Okhala wira aYuda yaahiriipiwa murima, nto yaahaana olipihiwa. Masi ntoko siisaale nuulumo na Muluku naahimmye aya, Yehova aahaakhaliherya atthu awe. Moota xeeni? Kiro, mwene a oPersia, aahimuxintta Babilonia ni khulavula voohimya sa Yehova oriki: “Awo àkiruma watekela emp’aya oYerusalemu”. Nave Kiro aahaaleela aIsarayeli wira: “Tani a nyuwo ari a nloko na Yuda? Apwiya Muluku anyu ekhale ni nyuwo. Mutthikele elapo anyu!” (2 Wahala 36:23) Tthiri, moolumo ala yahaalipiha vanceene aIsarayeli yaari oBabilonia!

5. Exeeni nasaalimo ohimmye wira Yehova oniwerya opaka?

5 Khahiyo wira Yehova aalipinhe aIsarayeli ntoko nloko paahi, masi aahimulipiha khula mwIsarayeli. Olelo-va, Yehova onipaka etthu emosaru. Olavulaka voohimya sa Muluku, nasaalimo aahimmye so: “Onimwahakalaliha aripiwe murima: onovoniha makhwatt’aya”. (Esalimo 147:3) Okathi oniwereiwa ahu aahiiso ooriipiwa murima, nikupaliki wira Yehova onninikhapelela. Maana Yehova onniphavela vanceene onimaaliha ni ovoniha makhwatta a mmuupuweleloni mwahu. (Esalimo 34:19; Yesaya 57:15) Yehova onninivaha ankhili ni ikuru wira niwerye oxintta khula muxankiho onniphwanya.​—Yakobo 1:5.

Yehova onniphavela vanceene onimaaliha wira nikhaleke saana

6. Esalimo 147:4, ennikhaliherya sai? (Nwehe elatarato yoopacerya.)

6 Moottharelana, nasaalimo aahiweha wiirimu ni khuhimya wira Yehova ‘onnalikela itheneri sothene siryaya’ ni ‘onnìhana khula etheneri ni nsina naya’. (Esalimo 147:4) Nnaamwi nasaalimo aaweha itheneeri, owo khaasuwela mwaattelo wa itheneeri iyo. Olelo-va, masientista annisuwela wira egalaaxia ahu, sookhala itheneeri ibilyau sinceene. Tthiri wiirimu, sookhala itrilyau sinceene sa igalaaxia! Tivonto, apinaatamu khaniwerya okontari itheneeri sotheene, masi Mpattuxa ahu onniwerya. Mwekeekhai, Yehova onnisuwela oratteene ni onnivaha nsina khula etheneeri. (1 aKorinto 15:41) Okhala wira Muluku onnisuwela khuta etheneeri, nto owo onnoosuwelani. Tthiri, okathi wotheene Yehova onnisuwela opuro ori anyu, moonelo anyu ni itthu sinoothowani!

7, 8. (a) Exeeni Yehova onisuwela awe voohimya sa hiyo? (b) Nvahe ntakiheryo nnooniherya wira Yehova onninoonela othunku.

7 Yehova onnisuwela mixankiho sanyu, nave ookhalana owerya wira ookhaliheryeni oxintta mixankiho iyo. (Musome Esalimo 147:5.) Nyuwo pooti woona wira muxankiho anyu wootepa wunnuwa ni wira khamunwerya oxintta. Muluku onnisuwela wira sookhala itthu sihinwerya ahu ni wira “hiyo ná ntthupi pahi”. (Esalimo 103:14) Okhala wira na atthu oohimalela, ikwaha sinceene ninnipaka soovonya simosaru, nto eyo pooti onivololiha. Tivonto, ikwaha sikina ninthanana ahu mwaha wa etthu ehimyale ahu, soophavela ni miyuupuwelelo soohiloka sirina ahu! Nnaamwi Yehova ohikhulumuwaka aahiiso wooceya, owo onnisuwela moonelo ahu.​—Yesaya 40:28.

8 Niireke mootoko woona owerya wa ntata na Yehova nookhaliheryakani oxintta mixankiho sanyu? (Yesaya 41:10, 13) Eyo yaahimwiiraneela pioneera oniihaniwa Kyoko. Nuumala murokora ola orowa muttetthe aathanleliwe awe olaleerya, owo aahooceya vanceene. Exeeni yaamukhaliherye Kyoko woona wira Yehova aanisuwela mixankiho sawe? Muloko aaronwe awe okhaliherya, yaahikhala atthu anceene yaamucalela. Nto Kyoko oona ntoko wira Yehova aamuleela so: “Kinnoophentani ohiya mwaha wookhala pioneera, masi mwaha wookhala mwanaka iivaherenrye wa miyo. Muhakalaleke mwaha wookhala Namoona aka!” Niireke Yehova ohookhaliherya woona wira ‘osuwela wawe khuna mukano’?

YEHOVA ONNINIVAHA ITTHU SINNITHOWA

9, 10. Etthu xeeni yootepa otthuneya Yehova onninivaha? Nvahe ntakiheryo.

9 Otheene ahu ninniphavela yoolya, soowara ni opuro wookhala. Woonasa wene munnixanka muupuwelaka moota woophwanya yoolya. Masi Yehova oopaka elapo ela wira eruweryeke yoolya enaaphiyerya atthu otheene, hata wa “axana ànakhuku anìnla”. (Musome Esalimo 147:8, 9.) Akhala wira Yehova onnaalyiha anakhuku, nikupaliki wira onrowa onivaha itthu sinnithowa.​—Esalimo 37:25.

10 Etthu yootepa otthuneya, okhala wira Yehova onninivaha itthu sinlipiha waamini wahu, ni ‘murettele awe, onvikana osuwela wa mutthu’. (aFilipi 4:6, 7) Munna oniihiwa Mutsuo ni mwaarawe yahoona wira Yehova aahaakhaliherya. Mwaakha wa 2011, vaavo tsunami aakhumelenle awe oJapão, Mutsuo ni mwaarawe yahoopowa mwaha woowela andar a eprediyu yaakhala aya. Nihiku nne, yaahipweteiwa mireerelo saya sotheene. Waahivira ohiyu wotheene ari ene andar a nenli, opuro wooriipela ni wooriirya. Voosiisu, awo yaahiphwanya etthu yaalipinhe. Aari Anuário das Testemunhas de Jeová de 2006. Vaavo yaakhununle aya eliivuru eyo, yaahiphwanya mwaha oni: “Os maiores Tsunamis já registrados”. Mwaha ole waalavula sa etetere yaakhumelenle oSumatra mwaakha wa 2004, tthiri ole aari tsunami ahaareere onyaanya itthu. Mutsuo ni mwaarawe yaahinla okathi yaasomme aya ele yaawiiranenle anna ni arokora. Nto yahoona wira Yehova aahaavaha nikhaliheryo yaaphavela aya. Nave Yehova aahaakhaliherya mwa inamuna sikina. Maana anna a ilapo sikina sa oJapão yaahaavaha yoolya ni ikuwo. Nave anna yaarummwale ni mutthenkeso wa Muluku, yahaalipiha vanceene. Mutsuo onihimya wira: “Koona ntoko wira Yehova aari ni hiyo okathi ole onikhaliheryaka. Tthiri eyo yaahinlipiha!” Wanipacerya, Muluku onninivaha etthu ennikhaliherya olipiha waamini wahu, nuumala-vo, onninivaha itthu sa werutthuni.

MUTTOTTELE MUREERELO NIKHALIHERYO NA MULUKU

11. Ninrowa ottottela sai mureerelo nikhaliheryo na Muluku?

11 Yehova ‘onnakhaliherya òwiyeviha’. Okhala wira onniniphenta, nto okathi wotheene onniphavela onikhaliherya. (Esalimo 147:6a) Ninrowa ottottela sai mureerelo nikhaliheryo nawe? Nihaana okhalana wataana wooloka ni yena. Wira nikhalane wataana iwo, nihaana wiiyeviha. (Sofoniya 2:3) Atthu oowiiyeviha annikupali wira Yehova onrowa omaliha ohixariya ni ohaawa. Tthiri Yehova onnisiveliwa ni atthu oowiiyeviha.

12, 13. (a) Nihaana osyaka exeeni wira Muluku onikhaliherye? (b) Yehova onisiveliwa ni atthu xeeni?

12 Nave, Biibiliya onihimya wira Muluku ‘onnayeviha òtakhala murima’. (Esalimo 147:6b) Tthiri khanniphavela wira eyo enikhumelele! Nimphavela wira Muluku onooniherye niphento nawe neekeekhai. Tivonto, nihaana onyokha ele eninyokha awe. (Esalimo 97:10) Mwa ntakiheryo, nihaana osyaka orupihana woohiloka. Eyo entaphulela wira nihaana osyaka khula etthu yaarowa oniiriha oraruwa, ohela muhina oweha epornografia. (Esalimo 119:37; Matheyo 5:28) Nnaamwi opaka eyo ovekelaka wiimananiha vanceene, ennikumiherya mareeliho a Yehova.

13 Khaninwerya oxintta ekhotto eyo ni ikuru sahu paahi. Nihaana omuroromela Yehova. Niireke Yehova onnisiveliwa akhala wira ninroromela nikhaliheryo na apinaatamu? Nnaari, maana Yehova khonsiveliwa ni “ikuru sa ikhavalo”. Niireke nihaana ororomela ikuru sahu aahiiso sa atthu akina? Nnaari, okhala wira Yehova “khanxikha ikuru s’anakhotto”. (Esalimo 147:10) Masi nihaana ovikaniha onvekela Yehova wira onikhaliherye ni omuxonttela wira nixintte sootteettheya sahu. Okathi wotheene Yehova onniphavela owiriyana mavekelo awo. Biibiliya onihimya so: “Apwiya annasuka ale anattittimiha: yale anroromela ophenta waya ohinimala”. (Esalimo 147:11) Okhala wira Yehova toororomeleya ni onniniphenta, ninnisuwela wira onrowa ovikanihaka onikhaliherya wira nixintte soophavela sahu soohiloka.

14. Nasaalimo aakupali exeeni?

14 Yehova onileiherya wira onrowa onikhaliherya okathi wa mixankiho. Vaavo aIsarayeli yaatthikenle aya oYerusalemu, nasaalimo aahuupuwela moota Yehova aakhalihenrye awe. Owo iipale so: “Apwiya àlipiha mikhora sanyu: ahareriha an’inyu mmuttettheni-mmo. Awo t’anikhaliha elapo anyu ni murettele”. (Esalimo 147:13, 14) Okhala wira Yehova aarowa olipiha mikhora sa epooma, eyo yaahimwiiriha nasaalimo ohoova etthu. Nave aanikupali wira Yehova aarowa waakhapelela atthu awe.

Nuulumo na Muluku ninrowa onikhaliherya sai okathi onixanka ahu? (Nwehe ittima 15-17)

15-17. Ikwaha sikina, muupuwelo xeeni onniphwanya, nto Yehova onrumeela sai Nuulumo nawe wira onikhaliherye? (b) Nvahe ntakiheryo nnooniherya moota nuulumo na Muluku ‘nimmwarelaya nananoru’.

15 Nyuwo pooti wuukhuwa mwaha wa mixankiho sanyu, masi Yehova onimoovahani ankhili wira muxintte. Olavulaka voohimya sa Muluku, nasaalimo aahimmye so: “Apwiya àruma molumo aya mulaponi: ehapari aya yomwarela nananoru”. Nuumala nasaalimo olavula etthapwe, okame ni epula ya maralala, owo onnikoha oriki: “Ti pani onwerya ovilela orirya waya?” Nave onnivikaniha ohimyaka wira Yehova ‘arumá nulumo nawe, etthapwe ennilakaseya: òpiha epheyo, màsi annivukuwa’. (Esalimo 147:15-18) Okhala wira Muluku onnisuwela khula etthu ni onniwerya olakaseiha etthapwe ni ovukula maasi, owo onnisuwela mixankiho sanyu ni onrowa wookhaliheryani oxintta.

Niireke munnoona wira Yehova onnaakuvela wookhaliheryani?

16 Olelo-va, Yehova onninlakiherya omurumeelaka Biibiliya. Nasaalimo ohimyale wira nuulumo na Yehova ‘ninnimwarela nananoru’ wira nnikhaliherye. Nave Muluku onninlakiherya mookhalela ni okathi wooreerela. Nkahaya muupuwele moota ninkhaliheriwa ahu ni Biibiliya, iliivuru sinikumiheriwa ni “murumeyi òroromeleya ni ànkhili”, JW Broadcasting, jw.org, axitokweene ni anna ni arokora! (Matheyo 24:45) Niireke munnoona wira Yehova onnaakuvela wookhaliheryani?

17 Murokora mmosa oniihaniwa Simone, aahoona moota Nuulumo na Muluku naamukhalihenrye aya. Owo oona wira khorina efaita ni wira Yehova khaasiveliwa ni yena. Masi, vaavo aakhulumunwe awe, Simone aahivikaniha onvekela Yehova omuxonttelaka wira omukhaliherye. Nave aahivikaniha omusoma Biibiliya. Simone onihimya so: “Okathi wotheene sinkiphwanya aya mixankiho kinnoona wira Yehova onnikilipiha ni onnikivaha malakiheryo”. Nto eyo yaahimukhaliherya okhalana moonelo wooloka.

18. Niireke munnoona wira Yehova ori ni nyuwo? Mathowa xeeni aniwiirihani ‘omuttottopela [Yehova] Muluku ahu’?

18 Nasaalimo aanisuwela wira wa maloko otheene valaponi, Yehova aahithanla nloko na aIsarayeli wira akhale atthu awe. Nto nloko na aIsarayeli paahi, ti naakhenle “masu” ni “ikano” sa Muluku. (Musome Esalimo 147:19, 20.) Olelo-va, nookhalana eparakha yuulupale ya wiihaneliwa nsina na Muluku. Tivonto, ninnixukhurela vanceene mwaha woomusuwela Yehova, Nuulumo nawe ninnilakiherya ni okhalana wataana wooloka ni yena. Ntoko ole olempe Esalimo 147, nyuwo mookhalana mathowa manceene wira ‘mmuttottopele [Yehova] Muluku ahu’, ni waatumererya atthu akina opaka etthu emosaru.