Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Feverero 2017

Yoolakela ya Yehova Enimwiiraneya!

Yoolakela ya Yehova Enimwiiraneya!

“Wira akivarele muteko wupuwenlyaka, yowo ontthunaka omaliherya; wira apake sitthokelenlyaka, seiyo sinrowaka osinsa”.YESAYA 46:11.

ISIPO: 147, 149

1, 2. (a) Etthu xeeni Yehova onisuwelinhe awe? (b) Yooleiherya xeeni eniphwanyaneya eliivuru ya Yesaya 46:10, 11 ni 55:11?

MASU oopacerya a Biibiliya tookhweya wiiwexexa, ni aakhalana yootaphulela yuulupale: “Wopajerani, Muluku opattunxe erimu n’ilapo ya vathí”. (Maphattuwelo 1:1) Hiyo ninniwerya oweha itthu vakhaani Muluku opattunxe awe moolumwenkuni, ni ninsuwela itthu vakhaani voohimya sa erimu, omwaleya aahiiso okokola ni ikuru siniihaniwa força de gravidade. (Musuweli 3:11) Masi Yehova oonisuweliha yoolakela awe wa apinaatamu ni elapo. Owo ohaapattuxa apinaatamu ailattanihaka mwaneene ni aaphavela wira akhaleke moohakalala valaponi. (Maphattuwelo 1:26) Nto apinaatamu yaarowa okhala anamwane a Yehova ni owo aarowa okhala Tiithi aya.

2 Ekapiitulu ya neeraru ya Maphattuwelo, ninsoma wira yoolakela ya Yehova yaahivaanyihiwa. (Maphattuwelo 3:1-7) Masi, khuuvo muxankiho Yehova ohinwerya awe ophuka. Nto khuuvo mutthu oniwerya okhoottiherya wiiraneya yoolakela awe. (Yesaya 46:10, 11; 55:11) Tthiri ninnikupali wira yoolakela ya Yehova enrowa wiiraneya okathi wooreerela!

3. (a) Ikeekhai xeeni sootthuneya sinnikhaliherya wiiwexexa muhupi wa Biibiliya? (b) Xeeni ola oryaaya okathi wooreerela othokorerya soowiixuttiha iyo? (c) Makoho xeeni ninrowa ahu othokorerya?

 3 Moohaanyiherya, hiyo ninnisuwela yoolakela ya Muluku wa apinaatamu ni elapo, nave ninnisuwela muteko Yesu orina awe wira yiiraneye yoolakela eyo. Iya ikeekhai sootthuneya sa mBiibiliyani, nave ikeekhai soopacerya nniixutta ahu okathi nimpacerya ahu osoma Nuulumo na Muluku. Nto nimphavela owiixuttiha atthu akina ikeekhai iya sootthuneya. Tthiri nookhalana eparakha yuulupale yoopaka eyo okathi ola, vaavo ninrowa ahu waalattulaka atthu wira arwe Wuupuwelela Okhwa wa Kristu. (Luka 22:19, 20) Akhala wira animoorwa nihiku nlo nootepa otthuneya, awo anrowa wiixutta itthu sinceene voohimya sa yoolakela ya Muluku. Tivonto ola okathi wooreerela wuupuwelela makoho ooloka anirowa ahu orumeela wira naalipihe atthu awo. Mwaha ola, ninrowa othokorerya makoho ala mararu: Tiivi eri yoolakela ya Muluku wa apinaatamu ni elapo? Exeeni ehikhumenle saana? Xeeni mukuttho wowoopola wa Yesu, oryaawe muhulelo onikhaliherya wiiraneya yoolakela ya Muluku?

TIIVI YAARI YOOLAKELA YA MULUKU?

4. Moota xeeni soopattuxiwa ‘sinlaleyaya ovuwa wa Muluku’?

4 Yehova ti Mpattuxa muulupalexa. Nto itthu sotheene opattunxe awe sinnooniherya wira ookhalana osuwela wuulupale. (Maphattuwelo 1:31; Yeremiya 10:12) Oreera ni otthokiheya wa soopattuxiwa onniixuttiha exeeni? Nniixutta wira itthu sotheene Yehova opattunxe awe, okhuma iye sootepa oyeva ni iye suulupalexa ti sootthuneya. Nave, munoonela sai okathi munuupuwela anyu eseelula ya mutthu, aahiiso muninweha anyu mwaana oyariwe niinano ni okathi nsuwa ninkela aya? Ninnitikinihiwa ni itthu iyo okhala wira Yehova onipattunxe mwa enamuna eniwerya ahu osuwela itthu sootepa oreera.Musome Esalimo 19:2; 104:24.

5. Etthu xeeni Yehova opanke awe wira soopattuxa sawe sotheene sikhaleke moovarihana?

5 Mwa miruku, Yehova oovaha mikano soopattuxa sawe sotheene. Owo oopaka malamulo a ephattu ni malamulo a mweettelo wooloka. Malamulo awo annikhaliherya itthu sotheene molumwenkuni weetta saana. (Esalimo 19:8-10) Khula etthu molumwenkuni yookhalana muteko ni opuro aya. Mwa ntakiheryo, ikuru siniitthaniwa lei de gravidade sinnikhaliherya erimu ni elapo okhala mapuro aya ni iphareya ohivikana mikano saya. Nto sahaakhanle ikuru iyo sa gravidade khivaaweryaneya atthu aahiiso inama okhala valaponi. Mikano Yehova opanke awe valaponi sinooniherya wira oopattuxa olumwenku mwa enamuna yootthokiheya. Eyo enooniherya wira ookhalana yoolakela wa apinaatamu ni elapo. Okathi nnaalaleerya ahu atthu, nohaana waakhaliherya omusuwela Mpattuxa a olumwenku ola wootikiniha.Wisupulula 4:11.

6, 7. Itthu xeeni sa faita Yehova aavanhe awe Adamu ni Eva?

6 Yehova aaphavela wira apinaatamu akhaleke valaponi mahiku otheene. (Maphattuwelo 1:28; Esalimo 37:29) Nave Yehova toovaha, owo aahaavaha Adamu ni Eva itthu sinceene sa faita. (Mmusome Yakobo 1:17.) Yehova aahaavaha othanla mootaphuwa ni owerya wa wuupuwelela, ophenta  ni waapaka apatthani. Mpattuxa aanilavula ni Adamu onvahaka malakiheryo a moota woopaka itthu sooloka. Adamu yaahiixutta moota woowiikhapelela, okhapelela inama ni elapo. (Maphattuwelo 2:15-17, 19, 20) Yehova aahaavaha Adamu ni Eva owerya wa olawiha itthu, okwata, oweha, wiiwa ni woona wunkhela wa itthu sooloka Yehova aapakenle awe. Mwa enamuna ela, yaamusiveliwaka okhala moohakalala mParayiisu mme. Nave Adamu ni Eva yaahikhalana muteko munceene woohakalaliha. Nto awo yanwerya ovikaniha wiixutta ni osuwela itthu isya okumi aya wotheene.

7 Etthu xeeni ekina yiirela mpantta yoolakela ya Muluku? Yehova aahaavaha Adamu ni Eva eparakha ya waayara anamwane oomalela, niire so, oohittheka. Nto anaaya yaamwayaraka anamwane, mpakha osareya atthu valaponi. Yehova aaphavela wira anamuyari yaaphenteke anaaya, ntoko owo aaphenta awe anaawe ale oopacerya ni oomalela, Adamu ni Eva. Yehova aahaavaha apinaatamu elapo ela ni itthu sotheene sooreera sikhanle mulaponi-mu. Nto awo yaarowa okhalaka valaponi-va mahiku otheene.Esalimo 115:16.

EXEENI EHIKHUMENLE SAANA?

8. Xeeni Muluku ohalaka waavaha Adamu ni Eva nlamulo nimphwanyaneya eliivuru ya Maphattuwelo 2:16, 17?

8 Mooriipiha murima itthu khisaakhumenle ntoko Yehova aaphavela awe. Exeeni yiiraneyale? Yehova aahaavaha Adamu ni Eva nlamulo nookhweya wira asuweleke mikano sa otaphuwa waya. Owo aahimmye so: “Munowerya olya mihokorokho sothene siri mmatta-mu: muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maphattuwelo 2:16, 17) Nlamulo nna khahiyo naari noovila wiiwexexa. Nave khahiyo wira naari noovila wiiwelela, maana saahikhala mihokorokho sikina sinceene mujardim mme.

9, 10. (a) Exeeni Satana aamoothenrye awe Yehova? (b) Adamu ni Eva yaathanlale opaka exeeni? (Nwehe elatarato yoopacerya.)

9 Satana Diabo aahirumeela enowa wira onwoke Eva wira ohimwiiwelele Tiithi awe, Yehova. (Musome Maphattuwelo 3:1-5; Wisupulula 12:9) Satana aahirumeela olavilavi ohimyaka wira anamwane a Muluku khiyeemereriwe olya khula “mihokorokho sa mirí sothene sa mmatta”. Nto waakhala ntoko aahimya so: ‘Munikhoottiheriwa opaka etthu muniphavela anyu?’ Nuumala-vo, Satana aahimuleela Eva oriki: “Nnari, khamunokhwa!” Tthiri waari wootha wuulupale. Nave ophavelaka omukupaliha Eva wira khaatthuneya onwiriyana Muluku, Satana aahimmye so: “Muluku orosuwela wira nihiku ninkelanyu olya, maitho anyu anotthukuwa”. Satana aahimmye wira Yehova khaaphavela wira awo alye muhokorokho ole, maana waamwaavaha osuwela ntoko wa Muluku. Wanikisa waya owo aahaawoka aaleiheryaka wira: “Nyuwo munokhala ntoko Muluku, musuwelaka oreriwa n’utakhaliwa”.

10 Nto Adamu ni Eva yaahaana othanla etthu yoopaka. Niireke yaarowa omwiiwelela Muluku aahiiso enowa? Mooriipiha murima, awo yaahithanla ohimwiiwelela Muluku. Adamu ni Eva yaahimukhootta Yehova okhala Tiithi aya, nto yaahithanla omutthara Satana. Nto vano awo yaahaana okhala ahikhaliheriwaka ni Yehova.Maphattuwelo 3:6-13.

11. Xeeni Yehova ohalaka ohaalevelela Adamu ni Eva mwaha wa etampi aya?

 11 Nuumala Adamu ni Eva ohiiwelela nlamulo na Muluku, awo khiyaavikaninhe okhala atthu oomalela. Ohiya-vo, yaahikhala awanani a Muluku okhala wira Muluku onninyokha itthu sootakhala. Nave, ‘maitho awe [Muluku] àtepa warya, ehiweryaka wona sotakhala’. (Habakuki 1:13) Vaakhanle wira Yehova khaahukhummu Adamu ni Eva mwaha wa etampi aya, soopattuxa sawe sotheene khisaarowa okhala saana. Maana malaikha ni apinaatamu yaarowa weettelaka murima aya ohiya otthara nuulumo nawe. Masi Yehova toororomeleya, nto khonikhala-khala ohononaka malamulo awe. (Esalimo 119:142) Nnaamwi Adamu ni Eva yaawerya othanla mootaphuwa, awo khiyaawerya osyaka sookhumelela sa ommwareela waya Yehova. Nto yaahikhwa, khutthikela vatthayani maana yaapattuxiwe erumeeliwaka etthaya.Maphattuwelo 3:19.

12. Exeeni yaakhumelenle anamwane a Adamu?

12 Nuumala Adamu ni Eva olya muhokorokho wookhoottihiwa, Yehova khaaweemerenrye-tho wiirela mpantta emusi awe. Owo aahiwoomola ojardim ya wEdeni, nto awo khiyaawerya-tho otthikela opuro ole. (Maphattuwelo 3:23, 24) Yehova aahaahiya wira ahaaweke mwaha wa yoothanla aya. (Mmusome Otumererya 32:4, 5.) Okhuma vaavo, awo khiyaawerya-tho otakiha moomalela mikhalelo sa Yehova. Adamu khahiyo paahi yaayelenle okumi aya wa muhoolo wooloka, masi-tho wa anaaya. Awo yaarowa waaravihaka anaaya ohimalela, etampi ni okhwa. (aRoma 5:12) Adamu ahaakhoottiherya anaaya eparakha ya okhalana okumi woohimala. Adamu ni Eva yaarowa waayaraka anamwane oottheka, nave osuulu aya waarowa waayaraka anamwane oottheka. Tthiri okhuma okathi yoole Satana aawiirihale awe Adamu ni Eva omutthekela Muluku, Diabo onneererya owiiriha apinaatamu otheene opaka etthu emosa-ru.Yohani 8:44.

YOWOOPOLA ENNINAATAANIHA NI MULUKU

13. Exeeni Yehova oniphavela awe ni apinaatamu?

13 Yehova onnivikaniha waaphenta apinaatamu. Nnaamwi Adamu ni Eva yammwarenle, Yehova aaniphavela wira apinaatamu akhale apatthani awe. Nave khaaphavela wira anamwane a Adamu akhwe. (2 Pedru 3:9) Tivonto, moohipisa Muluku aahipaka marehereryo wira apinaatamu atthikele okhalana wataana wooloka ni yena. Muluku aarowa opaka sai eyo, ohihononaka malamulo awe? Nrowe niwehe.

Nuumala Adamu ni Eva ommwareela, moohipisa Muluku aahipaka marehereryo wira apinaatamu atthikele okhalana wataana wooloka ni yena

14. (a) Moovarihana ni Yohani 3:16, exeeni Muluku opanke awe wira owoopole apinaatamu yoottheka ni okhwa? (b) Nikoho xeeni ninreerela ahu othokorerya ni atthu?

14 Mmusome Yohani 3:16. Atthu anceene nnaalattula ahu wira arwe Wuupuwelela Okhwa wa Yesu annisuwela saana eversiikulu ela. Masi moota xeeni mukuttho wowoopola wa Yesu onniphwanyiha aya okumi  woohimala? Hiyo nookhalana eparakha ya waakhaliherya atthu wiiwexexa waakhuliwa wa nikoho nno, vaavo nnaalattula ahu wira arwe Wuupuwelela Okhwa wa Yesu, niryeene omuthukumanoni okathi wa Wuupuwelela ni okathi onitthikela ahu waaxukurya. Vaavo anrowa aya wiiwexexaka yootaphulela ya yowoopola, anrowa woonaka moota Yehova onaaphenta awe vanceene apinaatamu ni miruku orina awe. Iponto xeeni sa yowoopola sinreerela ahu waatthokiherya?

15. Yesu aavirikanne sai ni Adamu?

15 Yehova onvaha mutthu oomalela aawerya ovaha okumi awe ntoko yowoopola. Mutthu owo oomalela aahaana ororomeleya wa Yehova. Nave aahaana ophavela ovaha okumi awe wira owoopole apinaatamu. (aRoma 5:17-19) Yehova aahithaamiha okumi wa Yesu wiirimu, yoowo ori yoopattuxiwa yoopacerya, wira oyariwe valaponi. (Yohani 1:14) Nto Yesu aari mutthu oomalela ntoko Adamu yaari aya oomalela ahinatthi ottheka. Masi moovirikana ni Adamu, Yesu aahiiwelela malamulo a Yehova, yaawo-tho Adamu yaavekeliwa aya. Hata okathi eehereriwa awe vanceene, Yesu aahivikaniha wiiwelela malamulo a Muluku.

16. Nthowa xeeni yowoopola eryaaya yoovaha yuulupale?

16 Okhwa wa Yesu ntoko mutthu, onoowerya owoopola apinaatamu mwa yoottheka ni okhwa. Yesu aahipaka oratteene itthu sotheene Adamu yaavekeliwa aya opaka, masi khuhipaka. Nave Yesu aari mutthu oohittheka, aahiroromeleya ni aahimwiiwelela Muluku moomalela. (1 Timótheyo 2:6) Yesu oonikhwela, nto mukuttho awe ohaavaha alopwana, athiyana ni anamwane otheene eparakha ya okhalana okumi woohimala. (Matheyo 20:28) Tthiri mukuttho wowoopola wa Yesu, ti  muhulelo onikhaliherya wiiraneya yoolakela ya Muluku.2 aKorinto 1:19, 20.

YEHOVA OOHULA MUKHORA WIRA NIMUHOKOLOWELE

17. Exeeni yowoopola eniwerya aya opaka?

17 Yehova oonivaha yowoopola, nnaamwi vahaakhweyale opaka eyo. (1 Pedru 1:19) Owo onniniphenta vanceenexa mpakha onivaha Mwanawe a vameekhaawe wira onikhwele. (1 Yohani 4:9, 10) Tivonto, Yesu ookhala tiithi ihu nipuro na Adamu. (1 aKorinto 15:45) Yesu oonivaha ohiya paahi eparakha ya okhalana okumi woohimala, masi-tho eparakha ya wiirela mpantta emusi ya Muluku. Yowoopola enimwaakhaliherya apinaatamu okhala oomalela, ni Yehova onrowa oweemererya otthikela wiirela mpantta emusi awe, ohitthekelaka malamulo awe. Nkahaya muupuwele okathi atthu otheene animuroromela Yehova anrowa aya okhala oomalela! Wanikisa waya, atthu otheene valaponi ni wiirimu anrowa okhala emusi yowiiraana. Otheene ahu ninrowa okhala anamwane a Muluku.aRoma 8:21.

18. Okathi xeeni Yehova onrowa awe ‘omaliherya oruma sothene’?

18 Nnaamwi anamuyari ahu oopacerya yaamukhoottale Yehova, masi Yehova khohiyale waaphenta atthu ni ohaavaha yowoopola. Nave hata niryeene atthu oohimalela, Satana khoniwerya onikhoottiherya okhala oororomeleya wa Yehova. Orumeelaka yowoopola, Yehova onrowa onikhaliherya okhala anaxariya. Nkahaya muupuwele ohakalala ninrowa ahu okhalana okathi “mutthu ti mutthu onimona Mwana, anamwamini yowo” onrowa awe okhalana okumi woohimala! (Yohani 6:40) Tthiri Tiithi ihu oophenta ni amiruku, onrowa omaliherya yoolakela awe, ni waakhaliherya apinaatamu otheene okhala oomalela. Nto Yehova “onomaliherya oruma sothene”.1 aKorinto 15:28.

19. (a) Oxukhurela wahu yowoopola oniiriheke opaka exeeni? (Nwehe ekaaxa eni: “ Nrowe Nivikanihe Owaavya Atthu Aniphwanelela”.) (b) Mwaha onittharelana ninrowa othokorerya exeeni?

19 Oxukhurela wahu yowoopola ohaana oniiriha waaleela atthu akina voohimya sa yoovaha ela yooreera. Atthu ahaana osuwela wira orumeelaka yowoopola, Yehova ohaavaha apinaatamu otheene eparakha ya okhala moohimala. Masi yowoopola enninikhaliherya mwa inamuna sikina. Maana ennilokiherya myaha Satana okumihenrye awe oJardim ya wEdeni. Mwaha onittharelana ninrowa othokorerya moota enipaka aya eyo.