Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Feverero 2017

Ti Pani Anaahoolela Atthu a Muluku Olelo-va?

Ti Pani Anaahoolela Atthu a Muluku Olelo-va?

“Nkawupuweleni aholeli anyu”.AHÉBERI 13:7.

ISIPO: 43, 32

1, 2. Nuumala Yesu orowa wiirimu, exeeni woonasa wene arummwa yiikoha aya?

ARUMMWA a Yesu, yeemenle Vamwaako Olivera khiyanweha Mwiixuttihi ni mpatthani aya Yesu, owelaka wiirimu ni okhuneeliwaka ni meeku. (Miteko 1:9, 10) Mwa iyaakha piili, Yesu aahiwiixuttiha, waalipiha ni waahoolela awiixutti awe. Masi vano aahirowa. Nto yaarowa opaka exeeni?

2 Ohinatthi orowa wiirimu, Yesu aahaaleela awiixutti awe wira: Nyuwo “munrowa okhala anamon’aka oYerusalemu ni oYudeya wothene ni oSamariya, mpakha omalenle elapo”. (Miteko 1:8) Masi yaarowa owerya sai ovara muteko owo? Yesu aahaaleiherya wira munepa wootteela wa Muluku waarowa waakhaliherya. (Miteko 1:5) Nto ti pani aarowa waahoolelaka ni otthokiha muteko woolaleerya olumwenku wotheene? Arummwa yaanisuwela wira Yehova aahaarumeela apinaatamu wira yaahooleleke aIsarayeli khalai. Nto woonasa wene yaaniikoha akhala wira Yehova aarowa omuthanla muhooleli mukina.

3. (a) Nuumala Yesu orowa wiirimu, yoothanla xeeni yootepa otthuneya arummwa oororomeleya yaapanke aya? (b) Makoho xeeni ninrowa ahu waakhula mwaha ola?

 3 Moohipisa, nuumala Yesu orowa wiirimu, arummwa awe yaahitokosa Soolempwa, yaahinvekela Muluku nikhaliheryo, ni yaahimuthanla Mathiya wira omuranttele Yuda Isikaryoti wira akhale arummwa 12. (Miteko 1:15-26) Yehova ni arummwa yaahoona okhala wootthuneya othanliwa Mathiya. Nthowa xeeni? Maana arummwa yaahoona wira yahaana okhala 12. * (Nwehe enoota.) Yesu aahaathanla ni owiixuttiha atthareli awe wira avareke muteko wootepa otthuneya eriyari ya atthu a Muluku. Muteko xeeni? Ni moota xeeni Yehova ni Yesu yaakhalihenrye aya wira avare muteko owo? Olelo-va, marehereryo xeeni akhanle anlikana ni ale a okathi wa arummwa? Nave ninrowa ‘owupuwela sai aholeli ahu’ otepexa wene “murumeyi òroromeleya ni ànkhili”?aHéberi 13:7; Matheyo 24:45.

YESU TONIHOOLELA NIKHUURU NOOLAMULELA

4. Muteko xeeni arummwa ni axitokweene akina oYerusalemu yaarina aya?

4 Okhuma pentekoositi a mwaakha wa 33, arummwa yaahipacerya okhala ahooleli a muloko wa eKristau. Biibiliya onihimya wira: “Pedru ahemela vamosá n’akhw’awe ale mulokó ni mmosá”. (Miteko 2:14, 15) Atthu anceene yaakhanle nihiku nne yaahikhala maKristau. Nuumala-vo, maKristau ale masya “yanikhalela nthiti wiwa mixuttiho s’arummwa”. (Miteko 2:42) Arummwa yaahikhalana muritti wookhapelela musurukhu wa muloko, niire so, osuka ni moota woorumeela saana. (Miteko 4:34, 35) Nave, awo yaaniwiixuttiha atthu a Muluku ni waavekelela ahimyaka so: “Hiyo nnokhalela nthiti olompa n’ulaleya masu”. (Miteko 6:4) Nave yaanaaruma maKristau yaalimalenle wira yalaleeryeke mittetthe sikina. (Miteko 8:14, 15) Muhoolo mwaya, axitokweene akina oowoottihiwa yaahitakaahana ni arummwa wira ahooleleke muloko. Ntoko nikhuuru noolamulela, awo yaanivaha malakiheryo miloko sotheene.Miteko 15:2.

MaKristau a eseekulu yoopacerya yaahisuwela wira Yehova aanihoolela nikhuuru noolamulela, omurumeelaka Yesu

5, 6. (a) Moota xeeni munepa wootteela waakhaliherya aya anna a nikhuuru noolamulela? (Nwehe elatarato yoopacerya.) (b) Moota xeeni malaikha yaakhalihenrya aya nikhuuru noolamulela? (c) Moota xeeni Nuulumo na Muluku neettiha aya nikhuuru noolamulela?

5 MaKristau a eseekulu yoopacerya, yaanisuwela wira Yehova aanihoolela nikhuuru noolamulela, omurumeelaka Yesu. Masi yaasuwela sai? Etthu yoopacerya, munepa wootteela waahivaha owerya nikhuuru noolamulela. (Yohani 16:13) Nto maKristau otheene oowoottihiwa yaahaakhela munepa wootteela, otepexa wene arummwa ni axitokweene a oYerusalemu wira aweryeke ovara saana muteko aya ntoko ahooleli. Mwa ntakiheryo, mwaakha wa 49, munepa wootteela  waahaakhaliherya anna a nikhuuru noolamulela opaka yoothanla voohimya sa winnuwihiwa. Nto miloko saanitthara malakiheryo awo. Eyo yaahikumiherya mireerelo, maana miloko “sanlipiherya wamini: atthu òwamini yaninjerereya nihiku ti níhiku”. (Miteko 16:4, 5) Epaphelo yaalempwale ni nikhuuru noolamulela, yeeyo yaaroihiwe mmilokoni, yaatthokiherya mwaha wa winnuwihiwa, ninnoona wira nikhuuru noolamulela naahikhalana munepa wa Muluku ni naanooniherya mikhalelo ntoko ophenta ni waamini.Miteko 15:11, 25-29; aGalasia 5:22, 23.

6 Etthu ya nenli, malaikha yaanikhaliherya nikhuuru noolamulela. Mwa ntakiheryo nlaikha naahimuleela Kornelio wira akumane ni Pedru. Nuumala Pedru omulaleerya Kornelio ni amusi awe, awo yaahaakhela munepa wootteela, nnaamwi yaari oohinnuwihiwa. Nto Kornelio yoowo aari Mmalapo oohinnuwihiwa taapacenrye okhala muKristau. Nuumala arummwa ni anna akina wiiwa yowiiraneya ela, yaaheemererya yootthuna ya Muluku ni yaahiwaakhela saana Amalapo oohinnuwihiwa mmulokoni mwa eKristau. (Miteko 11:13-18) Ela enninikhaliherya woona wira malaikha yahikhaliherya ni nthiti muteko woolaleerya, yoowo waahooleliwa ni nikhuuru noolamulela. (Miteko 5:19, 20) Etthu ya neeraru, Nuulumo na Muluku naneettiha nikhuuru noolamulela. Tthiri alopwana ale yaanirumeela Soolempwa wira saakhaliherye opaka soothanla suulupale voohimya sa sookupali sa maKristau ni ovaha malakiheryo miloko.Miteko 1:20-22; 15:15-20.

7. Xeeni ohimyaka wira Yesu aanaahoolela maKristau a eseekulu yoopacerya?

7 Nnaamwi nikhuuru noolamulela naarina owerya mmulokoni, masi anna yaanisuwela wira Yesu Kristu taari Muhooleli aya. Awo yaasuwela sai? Murummwa Paulo aahimmye wira Kristu taathanla akina okhala ‘arummwa’. Nave aahimmye wira Kristu taari “murú” aahiiso Muhooleli a muloko. (aÉfeso 4:11, 15) Ohiya wiitthaneliwa nsina na murummwa mmosa, elakiheriwaka ni munepa wootteela, “awixutti [yaahipacerya] wihaniwaka aKristu”. (Miteko 11:26) Paulo aanisuwela wira aahaana otthara malakiheryo a Biibiliya yaavahiwa ni arummwa ni anna akina yaawo yaari ahooleli. Hata vari siiso, Paulo aahimmye so: “Kintthuna wira musuweleke etthu ila: Kristu ti murú w’atthu [alopwana] othene”. Nlamulo nna naahela muhina anna a nikhuuru noolamulela. Nto Paulo aahincererya oriki: “Muluku ti murú wa Kristu”. (1 aKorinto 11:2, 3) Moohaaniherya, Yehova aahimuthanla Mwanawe, Kristu Yesu okhala muhooleli a muloko.

“OLA KHAHIYO MUTEKO WA APINAATAMU”

8, 9. Muritti xeeni wootthuneya Munna Russell aarina awe?

8 Okhuma mwakha wa 1870, Charles Taze Russell ni apatthani awe akina, yaahipacerya omukokhorela Muluku moovarihana ni ele Biibiliya oniixuttiha awe ni waakhaliherya akina opaka etthu emosaru. Ela yaahela muhina waakhaliherya atthu yaalavula mattaava makina. Nto mwakha wa 1884, waahikhumelela mutthenkeso oniitthaniwa Zion’s Watch Tower Tract Society (Sociedade de Tratados da Torre de Vigia de Sião), nto Munna Russell aahikhala presidenti a mutthenkeso owo. * (Nwehe enoota.) Owo aanimutokosa Biibiliya ni khoova waaleela atthu akina wira soowiixuttiha  sa ikerexa ntoko amuluku araru ni ohikhwa wa erooho, khahiyo mwiixuttiho wa Biibiliya. Nave aahiixutta wira otthika wa Kristu waarowa okhala wohooneya ni ‘omala wa okathi w’amalapo’ waarowa okhala mwaakha wa 1914. (Luka 21:24) Munna Russell aahirumeela okathi, musurukhu ni ikuru sawe wira owiixuttihe ikeekhai iyo atthu akina. Nto vannooneya wira Yehova ni Yesu yaahimurumeela Munna Russell wira okhale muhooleli okathi wootepa otthuneya mwa sowiiraneya sa apinaatamu.

9 Munna Russell khaaphavela wira atthu anvuwiheke yena. Nto mwakha wa 1896, Russell aahilepa wira yena ni alopwana akina yaarina miritti khiyaaphavela ovuwihiwa. Nave awo khiyaaphavela ovahiwa masina a nttittimiho, nnakhala khiyaaphavela wira muloko wiitthaneliweke masina aya. Muhoolo mwaya, Russel aahimmye so: “Ola khahiyo muteko wa apinaatamu”.

“Murumeyi òroromeleya ni ànkhili”, egrupu yaamukhaani ya anna oowoottihiwa yaawo ari Nikhuuru Noolamulela

10. (a) Silini Yesu omuthanlale awe “murumeyi òroromeleya ni ànkhili”? (b) Mutthokiherye moota vaiwanyeihiwa aya ovirikana okhanle eriyari ya Nikhuuru Noolamulela ni Sociedade Torre de Vigia.

10 Munna Russell okhwiiye mwaakha wa 1916. Nto iyaakha tthaaru muhoolo mwaya, mwaakha wa 1919, Yesu aahimuthanla “murumeyi òroromeleya ni ànkhili”. Tiivi yaari yoolakela awe? Waavaha atthareli awe “yolya okathi aya”. (Matheyo 24:45) Okathi ole, egrupu yaamukhaani ya anna oowoottihiwa yaari oseedi ya olumwenku wotheene oBrooklyn, oNova York, yaanaavaha yoolya atthareli a Yesu. Nuuvira mwaakha wa 1940, iliivuru sahu saahipacerya orumeela nuulumo noowi “nikhuuru noolamulela”. Okathi ole, nikhuuru noolamulela naavara vamosa ni Sociedade Torre de Vigia de Bíblias e Tratados. Masi, mwaakha wa 1971, vahiiwanyeihiwa wira Nikhuuru Noolamulela ti noovirikana ni Sociedade Torre de Vigia, maana mutthenkeso ola waavara myaha sinivarihana ni malamulo a guvernu paahi. Nto okhuma okathi ole anna oowoottihiwa yanwerya wiirela mpantta paahi Nikhuuru Noolamulela ahikhanle madiretore a Sociedade. Mahiku ala, anna akina oophwanelela a “ipwittipwitthi sikina”, annirumeela ntoko madiretore a Sociedade ni mitthenkeso sikina sinirumeeliwa ni atthu a Muluku. Nto yookhumelela aya tiila: Nikhuuru Noolamulela ninniimananiha ovaha yoolya yomunepani ni malakiheryo a Biibiliya. (Yohani 10:16; Miteko 6:4) Erevista Owehaweha ya 15 a Julyo 2013, yaahitthokiherya wira “murumeyi òroromeleya ni ànkhili”, egrupu yaamukhaani ya anna oowoottihiwa yaawo ari Nikhuuru Noolamulela.

Nikhuuru noolamulela mwaakha wa 1950

11. Nikhuuru Noolamulela nimpaka sai soothanla?

11 Nikhuuru Noolamulela ninnipaka soothanla sootthuneya ntoko egrupu okathi anithukumana aya khula esumana. Mithukumano iyo sinnaakhaliherya ovaanela saana ni okhala oowiiraana. (Miruku 20:18) Khuuvo munna a Nikhuuru Noolamulela ori ootepa otthuneya waavikana akina, tivonto khula mwaakha munna mmosa tonihoolela mithukumano iyo. (1 Pedru 5:1) Nave eyo ti etthu eniiraneya ni ikomisau sotheene 6  sa Nikhuuru Noolamulela. Nave-tho khuuvo munna a Nikhuuru Noolamulela onoona wira tori muhooleli a annawe. Khula mmosa a anna a Nikhuuru Noolamulela annaakhela yoolya yomunepani enikumiheriwa ni otthara malakiheryo a murumeyi oororomeleya maana anamuteko.

Okhuma mwaakha wa 1919, othanliwa awe murumeyi oororomeleya ni ankhili, owo onnaavaha yoolya yomunepani atthu a Muluku (Nwehe ittima 10, 11)

TI PANI TTHIRI ORI “MURUMEYI ÒROROMELEYA NI ÀNKHILI?”

12. Makoho xeeni ninrowa ahu waakhula moottharelana?

12 Anna a Nikhuuru Noolamulela khahiyo toomalela ni khanuupuxeriwa ntoko atthu a khalai yaawo yuupuxeriwa ni Muluku. Awo annivonya vaavo antthokiherya aya ikeekhai sa mBiibiliyani aahiiso anivaha aya malakiheryo a mutthenkeso ahu. Mwa ntakiheryo, Índice das Publicações da Torre de Vigia, wookhala mpantta oni: “Esclarecimento de Crenças”, onitthokiheriwa aya marukunuxo apakiwe a omwiiwexexa wahu Biibiliya okhuma mwaakha wa 1870. Yesu khaahimmye wira murumeyi awe oororomeleya khaarowa ovonyaka okathi aarowa awe okumiheryaka yoolya yomunepani. Nto ninrowa waakhula sai nikoho na Yesu noowi: Ti pani tthiri ori “murumeyi  òroromeleya ni ànkhili?” (Matheyo 24:45) Itthu xeeni sinooniherya wira Nikhuuru Noolamulela ti murumeyi oororomeleya? Nrowe nthokorerye itthu tthaaru seiyo saakhalihenrye nikhuuru noolamulela okathi wa arummwa.

13. Munepa wootteela onaakhaliherya sai anna a Nikhuuru Noolamulela?

13 Munepa wootteela onnikhaliherya Nikhuuru Noolamulela. Munepa wootteela onnikhaliherya Nikhuuru Noolamulela wiiwexexa ikeekhai sa Biibiliya seiyo khalai sahaasuweliwa. Mwa ntakiheryo, nkahaya muthokorerye elista ya ikeekhai sa Biibiliya sitthokiheriwe, yeeyo eromonle ahu ottuli. Khuuvo pinaatamu mekhawe otonko wiiwexexa ni otthokiherya itthu “sotikiniha sa Muluku”! (Mmusome 1 aKorinto 2:10.) Nikhuuru Noolamulela ninnoona ntoko murummwa Paulo oona awe, yoowo aalempe so: “Hiyo khannilaleya itthu iya sa Muluku ni molumo aixuttihiwe n’usuwela w’atthu: nto ninlaleya ni molumo yixuttihiwahu” ni munepa wootteela. (1 aKorinto 2:13) Nuuvira iyaakha sinceene atthu a Muluku aryeene weepiphini ni ahirina malakiheryo ooloka, xeeni omwiiwexexa Biibiliya onitepa aya wuncerereya okhuma mwaakha wa 1919? Okhala wira Muluku onninikhaliherya orumeelaka munepa awe wootteela!

14. Moovarihana ni Wisupulula 14:6, 7, moota xeeni malaikha anaakhaliherya aya anna a Nikhuuru Noolamulela ni atthu a Muluku olelo-va?

14 Malaikha annikhaliherya Nikhuuru Noolamulela. Nikhuuru Noolamulela nookhalana muritti muulupale wowaavaha malakiheryo anamalaleerya anivikana imilyau 8 olumwenku wotheene. Nto exeeni eniiriha muteko ola okumiherya mireerelo? Okhala wira ninnikhaliheriwa ni malaikha. (Mmusome Wisupulula 14:6, 7.) Ikwaha sinceene, malaikha annaakhaliherya anamalaleerya orowa waalaleerya atthu yaawo yanvekela Muluku nikhaliheryo! * (Nwehe enoota.) Muteko woolaleerya ni wiixuttiha onnivikaniha wunnuwa ilapo seiye ninlupatthiwa ahu vanceene. Tthiri eyo enniweryaneya maana ninnikhaliheriwa ni malaikha.

15. Anna a Nikhuuru Noolamulela avirikanne sai ni ahooleli a itiini sowootha? Nvahe ntakiheryo.

15 Nuulumo na Muluku ninneettiha Nikhuuru Noolamulela. (Mmusome Yohani 17:17.) Nkahaya muthokorerye etthu yiiraneyale mwaakha wa 1973. Erevista A Sentinela 1 a Junyo a 1973, yaahikoha akhala wira “atthu yahaahiyale ompaha soona yaaniphwanela obatiziwa”. Nto erevista ela yaahaakhula wira moovarihana ni Biibiliya atthu awo khaniphwanelela. Erevista ele yaahiromola soolepa sinceene saatthokiherya wira mutthu yoole aahaattharuwa ompaha soona aahaana okumihiwa mmulokoni. (1 aKorinto 5:7; 2 aKorinto 7:1) Nave yaahitthokiherya wira malakiheryo ala khahiyo wira yaakhuma wa apinaatamu masi yaakhuma wa “Muluku, yoowo onilavula orumeelaka Nuulumo nawe noolempwa.” Khuuvo mutthenkeso mukina wa etiini onikupali moomalela Nuulumo na Muluku, hata opaka eyo orowaka okhala woovila wa atthu aya. Eliivuru ya etiini epakiwe niinano wEstados Unidos enihimya so: “Ahooleli a ikerexa annilokiherya soowiixuttiha saya wira sivarihaneke ni sookupali ni moonelo wa anamunceene a mukerexa mmo ni atthu akina”. Masi, Nikhuuru Noolamulela khanneettihiwa ni itthu sinaasivela anamunceene. Ohiya-vo,  anna awo aneettihiwa ni Nuulumo na Muluku, nto yooniheryaka wira Yehova tonaahoolela atthu awe olelo-va.

“NKAWUPUWELENI AHOLELI ANYU”

16. Enamuna xeeni emosa ninrowa ahu owuupuwelela anna a Nikhuuru Noolamulela?

16 Mmusome aHéberi 13:7. Biibiliya onihimya wira “nkawupuweleni aholeli anyu”. Enamuna emosa yoopaka eyo ori waavekelela anna a Nikhuuru Noolamulela. (aÉfeso 6:18) Anna awo aakhalana miritti sinceene, seiyo sinihela muhina ovaha yoolya yomunepani, ovaha malakiheryo a muteko woolaleerya olumwenku wotheene, osuka ni orumeela saana misonkheryo sinivahiwa mutthenkeso ahu. Tthiri nihaana waavekelela okathi wotheene!

17, 18. (a) Ninrowa otthara sai malakiheryo a Nikhuuru Noolamulela? (b) Moota xeeni muteko ahu woolaleerya onikhaliherya aya Nikhuuru Noolamulela ni Yesu?

17 Hiyo nave ninniwuupuwelela anna a Nikhuuru Noolamulela nittharaka soowiixuttiha ni malakiheryo annivaha aya. Nikhuuru Noolamulela ninninivaha malakiheryo nirumeelaka iliivuru sahu, mithukumano, asembeleya ni akongresu. Awo annaathanla axitokweene a esirkwiitu wira yaathanleke axitokweene ni arummwa oorumeela mmulokoni. Axitokweene a esirkwiitu ni a mmulokoni annooniherya wira annuupuwela Nikhuuru Noolamulela vaavo awo anitthara aya malakiheryo anivahiwa ni Nikhuuru nlo. Otheene ahu ninnooniherya omuttittimiha wahu Muhooleli ahu Yesu, vaavo ninwiiwelela ahu atthu onaarumeela awe olelo-va.aHéberi 13:17.

18 Enamuna ekina ekhanle ahu oowuupuwela anna a Nikhuuru Noolamulela, ori wiimananiha ovara muteko woolaleerya. Eliivuru ya aHéberi 13:7 ennaatumererya maKristau otakiha waamini wa ale anaahoolela. Nto Nikhuuru Noolamulela ninnooniherya waamini woolipa vaavo anilaleya aya mooluttuweliwa ihapari sooreera. Niireke ninnaakhaliherya anna awo muteko ola wootthuneya? Akhala wira ninnaakhaliherya, ninrowa otteeliwa murima okathi ninrowa ahu omwiiwa Yesu oriki: “Imara sothene samwirelanyu mmosá àxikhani ala, ari axinn’aka, mwakìrela yomi!”Matheyo 25:34-40.

19. Exeeni eniwiirihani olakela omutthara Yesu, Muhooleli ahu?

19 Nuumala Yesu otthikela wiirimu, owo khaanyanyanle atthareli awe. (Matheyo 28:20) Yesu aanisuwela wira munepa wootteela, malaikha ni Nuulumo na Muluku naahimukhaliherya waahoolela atthu a Muluku okathi aaryaawe valaponi. Owo onninvaha murumeyi oororomeleya ni a ankhili nikhaliheryo nimosaru. Nto Nikhuuru Noolamulela ninnivikaniha ‘omutthara mwapwittipwitthi’, eyo piiyo, Yesu “nipuro ti nipuro ninrowawe”. (Wisupulula 14:4) Tivonto, vaavo nintthara ahu malakiheryo a Nikhuuru Noolamulela, hiyo nimmutthara Muhooleli ahu Yesu. Moohipisa, Yesu onrowa onihoolela wira naphwanye okumi woohimala. (Wisupulula 7:14-17) Tthiri khuuvo muhooleli pinaatamu oniwerya oleiherya okumi woohimala!

^ etti. 3 Woonasa wene Yehova aaphavela wira arummwa akhale 12 wira akumiherye “miyala muloko ni mili [12]” sa Yerusalemu Musya. (Wisupulula 21:14) Tivonto, muhoolo mwaya vaahaatthuneya aya othanliwa mutthu mukina nuumala okhwa murummwa oororomeleya.

^ etti. 8 Okhuma mwaakha wa 1955 mutthenkeso ola oniitthaniwa Watch Tower Bible and Tract Society of Pennsylvania (Sociedade Torre de Vigia de Bíblias e Tratados de Pensilvânia).

^ etti. 14 Nwehe eliivuru ‘Dê Testemunho Cabal’ sobre o Reino de Deus, ipaaxina 58-59.