Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Agosto 2017

Ophenta—Mukhalelo Wootepa Otthuneya

Ophenta—Mukhalelo Wootepa Otthuneya

YEHOVA, aahimuupuxerya murummwa Paulo olepa mikhalelo 9, seiyo sinikumiheriwa ni munepa wootteela wa Muluku. (aGalasia 5:22, 23) Mikhalelo iyo sotheene siniihaniwa okhala yoowiima ya munepa wootteela. * (Nwehe enoota.) Yoowiima eyo ya munepa wootteela, eniirela mpantta “omutthu wa nanano”, yoowo maKristau anitthuneya aya owara. (aKolosi 3:10) Ntoko siisaale mwiri oniima aya mihokorokho sooloka akhala wira onnikhuwariwa saana, nnoowerya okhalana mikhalelo iyo sooreera akhala wira ninnikhaliheriwa ni munepa wootteela.​—Esalimo 1:1-3.

Mukhalelo woopacerya Paulo onilavula awe ti ophenta. Xeeni mukhalelo ola ori aya wootepa otthuneya? Paulo ohimmye wira ahaarina ophenta, owo khaarowa okhala “etthu”. (1 aKorinto 13:2) Masi, ophenta onitaphulela exeeni? Ninrowa wunnuuherya sai? Ni ninrowa wooniheryaka sai khula nihiku?

OPHENTA ONITAPHULELA EXEENI?

Nnaamwi vavilaka otthokiherya oratteene ele tthiri ophenta onitaphulela aya, Biibiliya onnitthokiherya moota mutthu oophenta onuupuwela awe ni onivara awe itthu. Mwa ntakiheryo, mutthu oophenta “t’òvilela, t’òwarumela akhw’awe” ni “onnitteliwa murima n’ikekhai”. Tthiri mutthu oophenta “onnakhurunuwela atthu othene, onnakupali atthu othene, onniroromela vohihiyererya, onnivilela sothene”. Nave, owo onnaareerela murima atthu akina, onnaakhapelela ni onnikhala mpatthani oororomeleya. Masi, mutthu ohimphenta, ta nrima, oowiixinnuwiha, oohiisuumaaliha, oowiitthuna ni oohilevelela. Ohiya wooniheryaka mikhalelo soohiloka ntoko iyo, hiyo nimphavela waaphentaka mwekeekhai atthu akina ni waareerela murima ‘nihiphavelaka murerelo ahu’.​—1 aKorinto 13:4-8.

YEHOVA NI YESU AAVAHA NTAKIHERYO NOOLOKA NA OPHENTA

Biibiliya onihimya wira “Muluku ophentá”. (1 Yohani 4:8) Itthu sotheene opanke awe sinnooniherya eyo. Yehova ohooniherya wira onnaaphenta vanceene apinaatamu omurumaka Yesu orwa valaponi wira ohaawe ni onikhwele. Tivonto murummwa Yohani ohimmye awe wira: “Mota Muluku ònihenryawe oniphenta wawe t’ula: Owo òmuruma Mwan’awe mmosene orwa vathí-va, wira hiyo nikhalane ekumi mwa yowo. Vano, ophenta ti nno: khanihiyó hiyo nimphentale Muluku, nto yowo t’oniphentale, khumuruma Mwan’awe ntoko mukuttho w’olivela itampi sahu”. (1 Yohani 4:9, 10) Okhala wira Muluku ooniphenta, nnooleveleliwa itampi sahu ni okhalana nlipelelo na okumi woohimala.

Nave Yesu ohooniherya waaphenta wawe apinaatamu, ovahaka okumi awe wira opake yootthuna ya Muluku. Nto Murummwa Paulo onnileela so: “Okhala wira Kristu ohìra otthuna wa Muluku, hiyo nokhalihiwa òwarya mwaha wa mukuttho w’erutthu ya Yesu Kristu, oìvaherenrye omosa pahi wa mahiku othene”. (aHéberi 10:9, 10) Khuuvo pinaatamu oonihenrye ophenta wuulupale. Yesu aahimmye so: “Khavo onaphenta akhw’awe vanjene onvikana ole onleva ekumi awe mwaha w’apatthani awe”. (Yohani 15:13) Niireke apinaatamu oohimalela, anoowerya  otakiha ophenta wa Yehova ni wa Yesu? Aayo! Vano, nrowe nthokorerye moota nikhanle ahu oopaka eyo.

“MWETTEKE MOPHENTANI”

Murummwa Paulo onnitumererya so: “Mwetteke mophentani, mana Kristu òniphenta hiyo, khuleva ekumi awe mwaha wa hiyo”. (aÉfeso 5:1, 2) Onitaphulela exeeni ‘wetta mophentani’? Onitaphulela waaphenta atthu akina okathi wotheene. Tthiri hiyo khannoothererya wira ninnaaphenta atthu akina. Miteko sahu sinnooniherya wira ninnaaphenta. Yohani olempe so: “An’aka òphentiwa: nihimphenté mukhw’ihu ni molumo òrera pahi: ophentana wahu okhaleke w’ekekhai”. (1 Yohani 3:18) Mwa ntakiheryo, hiyo ninnilaleya ‘ehapari yorera y’Omwene’ okhala wira ninnimphenta Yehova ni atthu. (Matheyo 24:14; Luka 10:27) Nave ‘ninnetta mophentani’ vaavo nimpixa ahu murima, oreera murima ni olevelela. Tthiri, ninnivarihela muteko miruku iya sa mBiibiliyani sini: “Ntoko Muluku òlevelenlyaweni nyuwo, siso-tho nyuwo mwaleveleleke akhw’inyu”​—aKolosia 3:13.

Vaavo nninvaha ahu miruku aahiiso ompwapwela mutthu, eyo khentaphulela wira khannimphenta. Mwa ntakiheryo, wira ammaalihe mwanaya oninla, anamuyari akina annipaka ele mwanaya onaavekela awe. Masi namuyari onimphenta tthiri mwanawe, khahiyo wira okathi wotheene onipaka ele mwanawe oninvekela awe. Mwa enamuna emosaru, nnaamwi Muluku ori ene oophenta, owo ‘onnapwapwela yale onaphentawe’. (aHéberi 12:6) Tivonto, ti vooloka ompwapwela mutthu akhala wira vannitthuneya. (Miruku 3:11, 12) Masi, muupuweleke wira otheene ahu na atthu oohimalela, nto okathi mukina ninnihiya wooniherya niphento. Nto otheene ahu nihaana wunnuuherya ophenta wahu. Masi, ninrowa owerya sai opaka eyo? Nrowe nthokorerye inamuna tthaaru.

NINROWA WUNNUUHERYA SAI OPHENTA?

Yoopacerya, munvekeleke Muluku wira oovaheeni munepa awe wootteela, yoowo onikumiherya ophenta. Yesu, aahimmye wira Yehova onnaavaha munepa awe wootteela ‘ale aninvekela’. (Luka 11:13) Tivonto, nikupaliki wira, navekela munepa wootteela ni weemererya wira onikhaliherye, ninrowa otepaka ophenta. (aGalasia 5:16) Mwa ntakiheryo, akhala wira mwa mutokweene a mmulokoni, nyuwo pooti ovekela munepa wootteela wira wookhaliheryeni okhala oophenta, vaavo munaavaha anyu miruku sa mBiibiliyani atthu. Aahiiso, akhala wira nyuwo mwa namuyari, pooti ovekela munepa wootteela wa Muluku wira wookhaliheryeni waalaka aniinyu muhinanariwe, masi moophenta.

Ya nenli, muhaana wuupuwela wira Yesu aanaaphenta atthu hata yaamuthokorerya moohixariya. (1 Pedru 2:21, 23) Vaavo mutthu onooveehaweni aahiiso woothokoreryani moohixariya, mwiikoheke so: ‘Aari mwa Yesu, aarowa opaka exeeni?’ Murokora oniihaniwa Leigh ohoona wira nikoho nna, ninnimukhaliherya wuupuwelela ohinatthi opaka etthu. Owo onihimya so: “Nihiku nimosa, namuteko mukhwaaka, aahimuroihela e-mail mutthu mukina naavarana ahu muteko okilavulaka moohiloka ni muteko kaavara aka. Etthu eyo yaahikiwereya vanceene. Masi, kaahiikoha so: ‘Kihaana opaka exeeni ni mutthu ole wira kimutakihe Yesu?’ Nuumala wuupuwelela ele Yesu aarowa awe opaka, kaahiliyala mwaha ole. Nto muhoolo mwaya, kaahisuwela wira mutthu ole aarina muxankiho muulupale wa okumi ni eetta oonyoonyiheya ene. Nto kaahoona wira ele aalempe awe khahiyo etthu aaphavela awe. Wuupuwelela ophenta wa Yesu, hata okathi aapaciwa awe, wookikhaliherya omphenta namuteko mukhwaaka ole”. Akhala wira nnoomutakiha Yesu, okathi wotheene ninrowa waaphentaka atthu.

Ya neeraru, nihaana wooniherya ophenta wekeekhai. Nlo niphento nnaasuwanyeiha atthareli eekeekhai a Yesu. (Yohani 13:34, 35) Yesu aahooniherya niphento nno ni oonivaha ntakiheryo nooloka. Moota xeeni? Yesu aahikhuma wiirimu ni “ahirula oMuluk’uwo” khurwa valaponi “mpakha okhwa” wira onoopole. (aFilipi 2:5-8) Vaavo nintakiha ahu ophenta wekeekhai wa Yesu, muupuwelo ahu ni moonelo ahu onrowa olikanaka ni wa Yesu, nave ninrowa  opwehaka opuro woopacerya soophavela sa atthu akina ohiya sawihu.

OPHENTA ONNIPHWANYIHA MIREERELO

Ophenta onniphwanyiha mireerelo sinceene. Nrowe nthokorerye mireerelo miili:

Mireerelo xeeni sinikhumelela mwaha wowooniherya ophenta?

  • ANNA A OLUMWENKU WOTHEENE: Okhala wira ninniphentana mukina ni mukhwaawe, ninnisuwela wira anna ni arokora a khula muloko anrowa onaakhela saana, olumwenku wotheene. Tthiri, eparakha yuulupale osuwela wira ninniphentiwa ni ‘anna a elapo yothene’! (1 Pedru 5:9) Ninniphwanya niphento nlo, eriyari ya Anamoona a Yehova paahi.

  • MURETTELE: “Mwakhelaneke n’uphenta”, opaka eyo, onninikhaliherya okhalana ‘murettele onnithukumanya’, eyo piiyo, oniiraaniha. (aÉfeso 4:2, 3) Mithukumano sa mmulokoni, asembeleya ni akongresu ninnoona murettele owo. Niireke khamuneemererya wira murettele onniniiraaniha, nnaamwi nikhalaka olumwenku ola wookawanyeya? (Esalimo 119:165; Yesaya 54:13) Vaavo ninkhalana ahu murettele ni atthu akina, ninnooniherya wira ninnaaphenta nto eyo ennimuhakalaliha Tiithi ihu a wiirimu.​—Esalimo 133:1-3; Matheyo 5:9.

“OPHENTA ONNATÀNIHA”

Murummwa Paulo olempe wira: “Ophenta onnatàniha”. (1 aKorinto 8:1) Eyo enitaphulela exeeni? Ekapiitulu 13 ya aKorinto oopacerya, yeeyo akina anihimya aya okhala “Nsipo Noophenta”, Paulo onnitthokiherya moota ophenta onnaataaniha aya. Mutthu oophenta, onniphavela mureerelo wa mukhwaawe. Nave onnaakhapelela saana atthu akina. (1 aKorinto 10:24; 13:5) Nave-tho, onniniiriha ocalana, othokoreryana, opixeryana murima ni oreerelana murima, nto eyo ennikumiherya imusi soophentana ni miloko sowiiraana.​—aKolosi 3:14.

Sookhala inamuna sinceene sa waaphenta atthu, masi omphenta wahu Muluku tori wootepa otthuneya, eyo piiyo, ophenta wootepa olipa. Nthowa xeeni? Nthowa noowi, omphenta wahu Muluku onniniiraaniha! Atthu a makhalelo otheene, makhuli ni malavulelo otheene annimukokhorela Yehova ni “murima mmosaru”. (Sofoniya 3:9) Nto otheene ahu, nrowe khula nihiku nooniheryeke mukhalelo ola wootepa otthuneya oniirela mpantta yoowiima ya munepa wootteela wa Muluku.

^ etti. 2 Ola mwaha woopacerya wa myaha 9 ninrowa ahu othokorerya mikhalelo sa yoowiima ya munepa wootteela.