Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Agosto 2017

Niireke Munoowerya Olipelela Moopixa Murima?

Niireke Munoowerya Olipelela Moopixa Murima?

“Nyuwo-tho nvileleke”.​—YAKOBO 5:8.

ISIPO: 35, 139

1, 2. (a) Exeeni ekhanle ooniiriha okoha wira: “Mpakha lini?” (b) Olelo-va, matakiheryo a arumeyi oororomeleya a khalai annilipiha sai?

“MPAKHA lini?” Nna nikoho naapakiwe ni maprofeta oororomeleya, Yesaya ni Habakuki. (Yesaya 6:11; Habakuki 1:2) Okathi Mwene Davidi aalempe awe Esalimo 13, aahipaka nikoho nimosaru ikwaha xexe. (Esalimo 13:2, 3) Nave, Yesu aahaakoha atthu oohaamini, oriki: “Mpakha lini?” (Matheyo 17:17) Olelo-va, hiyo-tho pooti opaka nikoho nimosaru.

2 Exeeni ekhanle ooniiriha okoha wira: “Mpakha lini?” Eyo pooti wiiraneya okathi yoole nniireliwa ahu etthu yoohiloka. Aahiiso okathi oniwereiwa ahu wala mwaha wa wuuluvala. Nave, hiyo pooti okhulumuwa mwaha woowi ninkhala “mahiku òxanka” ni oovila weettiherya. (2 Timótheyo 3:1) Nave-tho, mukhalelo woohiloka wa atthu  a olumwenku ola, pooti onikhulumula aahiiso onivololiha. Masi, ti voolipiha osuwela wira Yehova khaapwapwenle arumeyi awe oororomeleya mwaha woopaka nikoho nlo.

3. Exeeni enrowa onikhaliherya okathi wootepa oxankiha?

3 Exeeni enrowa onikhaliherya okathi nnoona ahu wira vannivila ovilela? Yakobo, munnawe Yesu, aahuupuxeriwa olepa so: “Axinn’aka: mulipihe murima, nvilelaka mpakha orwa w’Apwiya”. (Yakobo 5:7) Tivonto, otheene ahu nihaana opixa murima. Masi, opixa murima ontaphulela exeeni? Ninrowa wooniherya sai opixa murima?

OPIXA MURIMA ONTAPHULELA EXEENI?

4, 5. (a) Opixa murima ontaphulela exeeni ni ninrowa wooniherya sai? (b) Yakobo onitthokiherya sai opixa murima? (Nwehe elatarato yoopacerya.)

4 Biibiliya onihimya wira opixa murima yoowiima ya munepa wootteela wa Muluku. Tivonto, nikhaliheriwaka ni munepa wa Muluku, nnoowerya opixa murima okathi wootepa oxankiha. Opixa murima, yoovaha enikhuma wa Muluku, nto vaavo nimpixa ahu murima, ninnooniherya omphenta wahu Yehova ni atthu akina. Tthiri opixa murima onnilipiha niphento nrina ahu ni annihu. (1 aKorinto 13:4; aGalasia 5:22) Opixa murima ontaphulela exeeni? Ontaphulela okhalana moonelo wooloka vaavo ninvilela ahu mixankiho moohooceya. (aKolosi 1:11; Yakobo 1:3, 4) Nave, opixa murima onoonikhaliherya ovikaniha ororomeleya wa Yehova hata nrina ene mixankiho. Nave-tho onoonikhaliherya osyaka wunla ikuhu okathi ninhaaxiwa ahu. Biibiliya onihimya wira nihaana ovikaniha opixa murima. Tthiri, eyo ti etthu eniixutta ahu eliivuru ya Yakobo 5:7, 8. (Mmusome.)

5 Xeeni vanitthuneya ahu omulipelela Yehova waamaliherya anatiri awe? Murummwa Yakobo onnilikanyiha mukhalelo ahu ni mulimi. Nnaamwi mulimi iimananihaka waala mmiso awe, owo khoniwerya omeliha aahiiso winnuwiha mowaakuveya. Masi ohaana olipelela moopixa murima “ipyó sorera sa mmatta”. Moolikanasa, sookhala itthu sinceene nihinwerya ahu opaka vaavo vaniwehererya ahu okathi Yehova onrowa awe waamaliherya anatiri awe. (Marko 13:32, 33; Miteko 1:7) Ntoko mulimi, nihaana olipelela moopixa murima.

6. Exeeni eniixutta ahu ni ntakiheryo na profeta Mikeya?

6 Olelo-va, ntoko profeta Mikeya, ninnivilela mixankiho sinceene. Mikeya aakhanle okathi wa olamulelo wa Mwene Akhazi. Owo aari mwene ootepa otakhala. Nto atthu anceene yaanivaha ni waakhela makhwankwa. Tivonto, itthu saahitepa onanara mpakha Biibiliya ohimya wira atthu ale ‘yanirattela wira sotakhala’. (Mmusome Mikeya 7:1-3.) Mikeya aanisuwela wira khaawerya orukunuxa mukhalelo ole. Nto, exeeni aapanke awe? Owo onihimya wira: “Vano miyo kinnawehererya Apwiya: kinnimuroromela Muluku, Mòpoli aka. Muluku ak’owo onokakhula”. (Mikeya 7:7) Ntoko  Mikeya, nave hiyo nihaana ‘wawehererya Apwiya’.

7. Nipakeke exeeni okathi nimmulipelela ahu Yehova waamaliherya anatiri awe?

7 Akhala wira waamini wahu onoolikana ni wa Mikeya, nnoowerya omulipelela Yehova. Mukhalelo ahu khonlikana ni nakrime oriheliwe mukhatteya, yoowo onlipelela nihiku onrowa awe wiiviwa. Nakrime ole ohaana olipelela hata ohiphavelaka. Mukhalelo ahu ti woovirikana ni nakrime owo! Maana hiyo ninnimulipelela Yehova okhala wira ninnisuwela wira okathi wooreerela onrowa waamaliherya anatiri awe ni onivaha okumi woohimala! Tivonto, ninniwerya ‘ovilela [moohakalala] mohawani mothene’. (aKolosi 1:11, 12) Vaavo vaniwehererya ahu, nihaana osyaka wunlaseya nuupuwelaka wira Yehova onnipisa. Nave Yehova, onoosiveliwa akhala wira khanninlaseya.​—aKolosi 3:12.

MATAKIHERYO A ATTHU OOPIXA MURIMA

8. Alopwana ni athiyana oororomeleya a khalai anniixuttiha exeeni?

8 Exeeni enrowa onikhaliherya ovikaniha owehererya? Nkahaya niwuupuwele alopwana ni athiyana oororomeleya a khalai, yaawo yaamulipelela Yehova waamaliherya anatiri awe. (aRoma 15:4) Vaavo ninthokorerya ahu matakiheryo aya, nihaana woona okathi ovinre alipelelaka, etthu yaawiiriha olipelela ni moota Yehova aareelinha awe mwaha wa opixa waya murima.

Abrahamu aahaana olipelela iyaakha sinceene ohinatthi oyariwa Esawuu ni Yakobe, axisulu awe (Nwehe ittima 9, 10)

9, 10. Iyaakha kavi saavinre, Abrahamu ni Sara amulipelelaka natiri a Yehova?

 9 Nrowe nthokorerye ntakiheryo na Abrahamu ni Sara. Mwaha ‘wowamini’ ni opixa murima, awo yaahaakhela itthu ‘saleiheriwaya’. Biibiliya onihimya wira nuumala ‘Abrahamu owehererya’ moopixa murima, Yehova aahimuleiherya omureeliha ni omukhaliha tiithi a nloko nuulupale. (aHéberi 6:12, 15) Xeeni Abrahamu aatthuneya awe opixa murima? Mwaha woowi, wanvira okathi munceene natiri ole ohinatthi omaliheriwa. Nihiku 14 na Nisani na mwaakha 1943 ohinatthi Kristu orwa, Abrahamu ni Sara ni atthu otheene a vatthokoni vawe, yaahilapuwa Muro Eufrate ni okela Elapo Yooleiheriwa. Masi saahivira iyaakha 25 Abrahamu ohinatthi omuyara mwanawe iitthaniwa Isakhi, nave saahivira iyaakha 60 Abrahamu olipelelaka oyariwa Esawuu ni Yakobe, axisulu awe.—aHéberi 11:9.

10 Niireke Abrahamu aahaakhela Elapo Yooleiheriwa? Nnaari, maana Biibiliya onihimya wira Yehova “khanvanhe nno elapo y’okhala yawawe, nnákhala ematta yamukhanixa: masi ahimulaiherya wira arowa onvaha yowo n’osùlu awe elapo yela, wira ekhale yawaya, nnamwi okathi uwo Abrahamu aharina mwana”. (Miteko 7:5) Okhuma nihiku Abrahamu aalapunwe awe Muro Eufrate, saahivira iyaakha 430 wira osuulu awe okhale nloko naarowa okhalaka elapo yooleiheriwa.​—Okhuma 12:40-42; aGalasia 3:17.

11. Exeeni yaamwiirinhe Abrahamu ovikaniha olipelela ni aareelihiwe sai?

11 Abrahamu aahivikaniha olipelela maana aanikupali wira Yehova onnaamaliherya anatiri awe. Nave, Abrahamu aanimwaamini Yehova. (Mmusome aHéberi 11:8-12.) Abrahamu, aahivikaniha olipelela moohakalala hata aahaarowa waaweha yiiraneyaka anatiri otheene aamaneliwe awe ni Muluku. Nkahaya muupuwele moota Abrahamu onrowa awe ohakalala okathi onrowa awe ohihimuxiwa wira okhaleke mparayiisu valaponi. Mwekeekhai, onrowa otikhina okathi onrowa awe osoma mBiibiliyani mweettelo awe ni wa emusi awe. * (Nwehe enoota.) Tthiri, onrowa ohakalala vanceene osuwela wira mweettelo awe wookhaliherya ommaliherya natiri a Yehova voohimya sa Mesiya aaleiheriwe! Nikupaliki wira onoosiveliwa osuwela wira olipelela wawe wookhaliherya vanceene.

12, 13. Xeeni Yosefe aatthuneya awe opixa murima, ni moonelo xeeni wooloka aarina awe?

12 Yosefe, musulu awe Abrahamu, aahaana olipelela moopixa murima. Maana aahithokoreriwa moohixariya. Wanipacerya, annawe yaahimutumiha ntoko epottha, orina ene iyaakha 17. Nuumala-vo, aahootheriwa omutuphela mwaara a pwiyawe, ni aahiriheliwa mukhatteya. (Maphattuwelo 39:11-20; Esalimo 105:17, 18) Nnaamwi Yosefe  aari murumeyi oororomeleya a Muluku, aakhala ntoko wira aamuhukhummwa ohiya oreelihiwa. Masi nuumala iyaakha 13, itthu saahiturukeya. Maana, Yosefe aahikumihiwa mukhatteya khukhala mukhulupale a nenli oowerya wEjiitu.—Maphattuwelo 41:14, 37-43; Miteko 7:9, 10.

Yosefe, aanisuwela wira Yehova onniwerya sotheene ni wira vannireerela tthiri olipelela mareeliho a Yehova

13 Niireke othokoreriwa moohixariya waahimwiiriha Yosefe onanariwa? Niireke oona wira aahinyanyaliwa ni Yehova? Nnaari. Maana Yosefe aari mutthu oopixa murina. Nto exeeni yaamukhalihenrye? Etthu yaamukhalihenrye waari omwaamini Yehova. Nave aanisuwela wira Yehova onniwerya sotheene. Ninnoona eyo ni moolumo awe ani: “Muhòvé! Miyo nkihiyó Muluku. Nyuwo mwahìwanana okìrela etthu yotakhala: masi Muluku òrukunuxa otakhala iwo, khukhala oreriwa. Siso Muluku òhòpola nloko nulupale, ntoko sinìraneyaya olelo va”. (Maphattuwelo 50:19, 20) Yosefe aanisuwela wira vaanireerela tthiri olipelela mareeliho a Yehova.

14, 15. (a) Munoonela sai opixa murima wa Davidi? (b) Exeeni yaamukhalihenrye Davidi olipelela moopixa murima?

14 Nave-tho, Mwene Davidi aahihaaxiwa vanceene. Ori ene mmiravo, Yehova aahimuthanla Davidi wira okhale mwene a Isarayeli. Masi Davidi aahaana olipelela iyaakha 15, wira okhale mwene a nihimo nawe. (2 Samuweli 2:3, 4) Okathi owo, Davidi aahaana otthyawa-tthyawa ni wiipitha mwaha wa Mwene Sawuli, yoowo aaphavela omwiiva. * (Nwehe enoota.) Nto eyo yaahimwiiriha Davidi ohikhalana empa. Maana aakhala elapo ekina aahiiso mmakhukuni ni mutakhwani. Muhoolo mwaya, nnaamwi Sawuli iiviwe okhottoni, nlelo Davidi aahaana olipelela iyaakha 7 wira okhale mwene a nloko na Isarayeli.​—2 Samuweli 5:4, 5.

15 Exeeni yaamukhalihenrye Davidi olipelela moopixa murima? Owo onnaakhula esaalimo 13, yeeyo onikoha awe ikwaha xexe oriki: “Mpakha lini?” Davidi onihimya wira: “Tthirí miyo kinniroromelexa okiphenta wanyu: kitteliweke murima, kopoliwaka ni nyuwo. Kimphavela watthapela Apwiya, kiwipelaka sorera sikìrenlyaya”. (Esalimo 13:6, 7) Davidi aanisuwela wira Yehova toororomeleya ni aanimphenta. Owo aanuupuwela okathi Yehova aamukhalihenrye awe ni aanilipelela okathi Yehova aarowa awe omaliha mixankiho sa Davidi. Nave, Davidi aanisuwela wira avikaniha opixa murima, aamureelihiwa ni Yehova.

Yehova khonnivekela opaka etthu yena ohiniphavela awe opaka

16, 17. Moota xeeni Yehova ni Yesu Kristu yoonihenrya aya opixa murima?

 16 Yehova khonnivekela opaka etthu yena ohiniphavela awe opaka. Nave, owo oovaha ntakiheryo nuulupalexa na opixa murima. (Mmusome 2 Pedru 3:9.) Mwa ntakiheryo, ejardim ya wEedeni, Satana aahimootherya Yehova wira onipaka itthu moohixariya. Nto Yehova ‘onniwehererya’ moopixa murima, okathi nsina nawe ninrowa aya otteelihiwa. Eyo enrowa okumiherya mareeliho manceene wa ale “anetta emuroromelaka Muluku”.​—Yesaya 30:18.

17 Nave-tho, Yesu aahaana olipelela moopixa murima. Okathi aari awe valaponi, owo aahiroromeleya mpakha okhwa wawe. Mwaakha wa 33, nuumala ophiya wiirimu, Yesu aahinvahererya Yehova esisapo ya mukuttho aavanhe awe. Hata vari siiso, aahaana olipelela mpakha mwaakha wa 1914 wira opacerye olamulela ntoko Mwene. (Miteko 2:33-35; aHéberi 10:12, 13) Nave, Yesu ohaana olipelela mpakha omala Olamulelo awe wa Iyaakha Ekonto Emosa, wira apwetexiwe awanani awe. (1 aKorinto 15:25) Tthiri, ohaana olipelela okathi munceene. Masi ti vooloka ovikaniha olipelela.

EXEENI ENROWA ONIKHALIHERYA?

18, 19. Exeeni enrowa onikhaliherya ovikaniha opixa murima?

18 Moohaaniherya, Yehova oniphavela wira nipixeke murima ni ovikaniha olipelela. Exeeni enrowa onikhaliherya opaka eyo? Nihaana ovekela munepa wootteela wa Muluku. Muupuweleke wira, opixa murima yoowiima ya munepa wootteela wa Muluku. (aÉfeso 3:16; 6:18; 1 aTesalonika 5:17-19) Nto, mmuxontteleke Yehova wira ookhaliheryeni ovilela moopixa murima!

19 Niireke munnuupuwela etthu yaamukhalihenrye Abrahamu, Yosefe ni Davidi ovikaniha opixa murima, okathi yaamulipelela aya Yehova waamaliherya anatiri awe? Tthiri, waamini ni omuroromela waya Yehova ti waakhalihenrye. Awo khahiyo yuupuwela mureerelo aya paahi. Wuupuwelela itthu saakhumelenle, onoonikhaliherya ovikaniha opixa murima.

20. Exeeni elakenle anyu opaka?

20 Tthiri, nnaamwi niwananaka mixankiho, noolakela ovikaniha ‘owehererya’ aahiiso opixa murima. Ikwaha sikina hiyo pooti okoha wira: “Apwiya, kìreke siso mpakha lini?” (Yesaya 6:11) Masi nikhaliheriwaka ni munepa wootteela wa Muluku, nnoowerya omutakiha profeta Yeremiya ni ohimya wira: “Miyo kinnilipa n’Apwiya: tivo vanaroromelaka”.​—Wikhupanyerya 3:21, 24.

^ etti. 11 Eliivuru ya Maphattuwelo sookhala ikapiitulu 15 sinitthokiherya okumi wa Abrahamu. Nave, Soolempwa sa eGriki sa eKristau sinnimulavula Abrahamu ikwaha 70.

^ etti. 14 Nuumala olamulela iyaakha piili nnimeya, Yehova aahimukhootta Sawuli. Masi, ohinatthi okhwa Sawuli aahivikaniha olamulela iyaakha sinivikana 38.​—1 Samuweli 13:1; Miteko 13:21.