Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Abril 2017

Niireke Munepa Anyu Wowiivahererya Onninvuwiha Yehova?

Niireke Munepa Anyu Wowiivahererya Onninvuwiha Yehova?

“Mwattottopele Apwiya! . . . Atthu othene yahitthuka muloko votthuna waya”.​—MAKHULUPALE 5:2.

ISIPO: 150, 10

1, 2. (a) Elifazi ni Bildadi ahimmye wira Yehova onoonela sai muteko ahu? (b) Niireke Yehova onoonela siiso?

IYAAKHA 3.000 sivinre, alopwana araru yaahirowa omuxukurya murumeyi oororomeleya a Yehova iihaniwa Yobi. Vano Elifazi, ooTemani aahimukoha Yobi wira: “Mutthu onowerya omukhaliherya Muluku? Hatá musuweli onnìkhaliha mwanene pahi! Khino nanwerya sothene onnithokorerya orera wanyu murima? Walá oniphwanya-ni ni makhalelo anyu òloka?” (Yobi 22:1-3) Tthiri, Elifazi uupuwela wira khivaniweryaneya. Nto Bildadi a muttetthe wa oXuwa, aahincererya wira khivaniweryaneya Muluku owoona apinaatamu okhala anaxariya.​—Mmusome Yobi 25:4.

Mikhalelo sooloka ni itthu siniwerya ahu opaka sinikhuma wa Yehova ni owo onniweha moota ninrumeela ahu

2 Elifazi ni Bildadi yaaneererya omwiiriha Yobi woona wira omurumeela wawe Yehova khiwaarina efaita. Alopwana awo yaaphavela omwiiriha Yobi okupali wira khanrina efaita vamaithoni va Muluku, ntoko axikokho ni munku. (Yobi 4:19; 25:6) Niireke yaahimya eyo mwaha woowi yaari oowiiyeviha? (Yobi 22:29) Ekeekhai wira Yehova ti muulupalexa onivikana hiyo.  Nkahaya nuupuwele nri ene vasulu va mwaako aahiiso nri ene nviyawuni nto nnathurumela vaxanelani, nnimoona wira itthu siri vathi sinikhala saamukhaani ni sinikhala ntoko khasirina efaita. Niireke Yehova onoonela siiso wiimananiha wahu omurumeela ni okhaliherya Omwene? Nnaari! Yehova aahimuleela Elifazi, Bildadi ni Sofari wira yaalavula itthu sowootha. Nto Muluku aahihimya wira aanihakalala ni Yobi omuhimyaka okhala “murumeyi” awe. (Yobi 42:7, 8) Tivonto, nikupaliki wira apinaatamu oohimalela anoowerya “omukhaliherya Muluku”.

“OWO ONIPHWANYA-NI?”

3. Niireke Elihu aaphavela ohimya wira wiimananiha wahu omurumeela Yehova khorina efaita? Nto aaphavela ohimya exeeni?

3 Mmiravo Elihu aahiwiriyana oratteene ovaanela wa Yobi ni alopwana ale araru. Nuumala alopwana ale omaala, olavulaka sa Yehova, Elihu aahimukoha Yobi wira: “Mwakhalá òrera murima, owo oniphwanya-ni? Khino owo onakhela etthu yawinyu?” (Yobi 35:7) Niireke Elihu aaphavela ohimya wira wiimananiha wahu omurumeela Yehova khorina efaita? Nnaari. Maana Yehova khampwapwenle Elihu, ntoko aapwapwenle awe alopwana akina. Nave moonelo wa Elihu waahivirikana ni alopwana ale. Owo aahimmye wira Yehova khonlipa ni omukokhorela wahu. Okhala wira Yehova khiivo etthu enimuthowa. Khiivo enipaka ahu enrowa omwiiriha Yehova okhala oolipa aahiiso oothaaciri. Tthiri, mikhalelo sooloka ni itthu siniwerya ahu opaka sinikhuma wa Muluku, ni owo onniweha moota ninrumeela ahu.

4. Yehova onoonela sai vaavo nnaareerela ahu murima atthu akina?

4 Vaavo nnaareerela ahu murima arumeyi oororomeleya a Yehova, owo onoona ntoko wira nimmwiirela yena. Eliivuru ya Miruku 19:17, enihimya wira: “Oninvaha mmasikhini, onnimoliha Muluku, yowo onrowa omutthuvela”. Mwekeekhai, Yehova onnoona khula okathi nnaamorela ahu ikharari atthu akina. Nnaamwi ori ene Mpattuxa a olumwenku, Yehova onnoona miteko sininvarela ahu ntoko nnoomukophiha, nto onrowa onitthuvela ni itthu sinceene sooreera. Nave Yesu, Mwaana a Muluku, aahittittimiherya eyo.​—Mmusome Luka 14:13, 14.

5. Makoho xeeni anrowa ahu waakhula?

5 Khalai, Yehova aahimulattula profeta Yesaya, wira okhale namitthaka awe omurumeelaka mwa enamuna ya vameekhaaya. (Yesaya 6:8-10) Yesaya vootthuna vawe, aaheemererya nlattulo na Yehova oriki: “Miyo kiri va: kirumekeni”. Nave-tho, olelo-va Yehova onnaavaha eparakha apinaatamu oororomeleya ovara miteko sawe. Ikonto sinceene sa arumeyi a Yehova, annooniherya munepa mmosaru wa profeta Yesaya. Awo anneemererya omurumeela Yehova mwa inamuna soovirikana ni mapuro oovirikana, nave annivilela mixankiho ni mikhalelo soovirikana. Masi mutthu pooti wiikoha so: ‘Kinnisiveliwa ni eparakha erina aka ya  omurumeela Yehova, masi kiireke muteko oninvarelaka wookhalana efaita tthiri? Kiireke Yehova onoovara muteko awe, hata miyo kihikhalihenrye?’ Niireke mootoko wuupuwela siiso? Nrowe nthokorerye sowiiraneya sa Debora ni Baraki, arumeyi a khalai anli a Yehova, wira anikhaliherye waakhula makoho awo.

MULUKU ONNAALIPIHA MURIMA ATTHU OOWOOVA

6. Xeeni vaakhala aya wira aIsarayeli yaari ookhweya oxinttiwa ni anakhotto a Yabini?

6 Baraki aari nakhotto a wIsarayeli, nto Debora aari profeta. AIsarayeli yaahiviriha iyaakha 20, ‘ahaxiwaka ni opuheriwa’ ni mwene a aKaanani iihaniwa Yabini. Anakhotto a Yabini yaari oowali ni ootakhala, nto aIsarayeli yaakhala mmuttettheni yaanoova ni ophavela otthyawa. Anakhotto a Yabini yaahikhalana ikaaro 900 sa yuuma saarina icampeya, masi aIsarayeli khiyaarina ikapwitthi nnakhala ikaruma sowiixaakihana okhottoni.​—Makhulupale 4:1-3, 13; 5:6-8. * (Nwehe enoota.)

7, 8. (a) Wanipacerya, malakiheryo xeeni Yehova anvanhe awe Baraki? (b) AIsarayeli yaawenrye sai waaxintta anakhotto a Yabini? (Nwehe elatarato yoopacerya.)

7 AIsarayeli yaakhala ntoko tookhweya waaxintta naalikanyiha ni anakhotto a Yabini. Masi Yehova omurumeelaka profeta Debora aahimuleela Baraki wira: “Murowe, mwathukumanye omwako Tabori anakhotto ikonto mulokó [10.000], a nihimo na Nefetali ni a nihimo na Zabuloni. Miyo kinimoruhelani Sisera, mulupale ànakhotto a Yabini, vamosá n’atthu awe n’ikaro sawe, kàkumanihaka ni nyuwo omuró Kixoni: weiwo kinimovahani atthu awo mmatatani mwanyu”.​—Makhulupale 4:4-7.

8 Okhala wira yaahivekeliwa atthu oowiivahererya, anakhotto 10.000 yaahithukumana oMwaako Tabori. Nuumala-vo, Baraki ni anakhotto awe yaahirowa owana ni anyokhani aya oTaanaki. (Mmusome Makhulupale 4:14-16.) Niireke Yehova aahaakhaliherya aIsarayeli? Aayo. Maana mowaakuveya yaahirupa epula ya munamukhaya, nto opuro ole waawaniwa waahipakeya mattophe. Eyo yahaakhaliherya aIsarayeli oxintta. Okhala wira Baraki aahiwoomola anakhotto a Sisera ikiloomo 24, mpakha opuro wiihaniwa oHaroxethi-Goyimi. Okathi Sisera aatthyawa awe, nto ekaaro awe ya ekhotto yaahiphara mmattopheni. Sisera aahikhuruwa mukaaroni mwawe onatthyawa ni metto mpakha oSaanayimi, woonasa wene waattamela oKedexi. Opuro ole Sisera aaphavela wiipitha eheema ya muthiyana iihaniwa Yayeli. Okhala wira Sisera aahitemwa, nto aahirupa. Okathi aarupa awe, moolipa murima, Yayeli aahimwiiva. (Makhulupale 4:17-21) Tthiri, Yehova aahaakhaliherya aIsarayeli waaxintta awanani aya! * (Nwehe enoota.)

MOONELO WOOVIRIKANA WA MUTEKO WOWIIVAHERERYA

9. Exeeni eniixutta ahu Makhulupale 5:20, 21 voohimya sa ekhotto aIsarayeli yaawanne aya ni Sisera?

9 Ninniixutta itthu sikina silavuliwe ekapiitulu 4 ya Makhulupale, nisomaka ekapiitulu enittharelana, niire so, ekapiitulu 5. Makhulupale 5:20, 21 ninsoma so: “Wirimu itheneri sahiwana ekhotto: osulusulu itheneri  sahinvirikanya Sisera. Muró Kixoni wahakhupa ni màsi aya”. Niireke eyo enitaphulela wira malaikha yahaakhaliherya aIsarayeli okathi wa ekhotto aahiiso yaakhaliheriwe ni epula ya maralala? Biibiliya khonihimya etthu. Masi vanikhala wira Yehova aahiwoopola atthu awe orupihaka epula ya maralala opuro ni okathi wooreerela. Nto ikaaro iye 900 sa ekhotto khisaawerya weetta mowaakuveya. Makhulupale 4:14, 15, ninnoona wira Yehova onnivuwihiwa ikwaha tthaaru mwaha wa aIsarayeli oxintta. Khuuvo mmosa a anakhotto 10.000 oowiivahererya a Isarayeli, aavuwihiwe mwaha wooxintta.

10, 11. Muttetthe wa oMerozi waari opuro xeeni? Xeeni muttetthe ola ohalaka olamphwa?

10 Vano nrowe nithokorerye etthu yoovara murima. Nuumala aIsarayeli oxintta, Debora ni Baraki yaahinvuwiha Yehova. Awo yiipale so: “Nlaikha n’Apwiya nanikhuwela wira: ‘Mutakhalihe muttetthe w’oMerozi: mwatakhalihe atthu aya, mwalaphele, mana khiyàrwiye wakhaliherya Apwiya, wakhaliherya Apwiya n’anakhotto aya’”.​—Makhulupale 5:23.

11 Muttetthe wa oMerozi waari opuro xeeni? Khannisuwela saana. Masi olamphwa wa muttetthe wa oMerozi waahikhumela saana mpakha orimeelela mikano saya. Pooti wira atthu a oMerozi khayiivaherenrye wira amukhaliherye Baraki okhottoni. Okhala wira anakhotto oowiivahererya 10.000 yaahirowa owana ni aKaanani, nto atthu a oMerozi yaahiiwa wira anniphaveliwa atthu ookhaliherya. Aahiiso atthu oMerozi yaahisuwela wira Sisera aahitthyawela epooma aya wira Baraki ohimwiive. Woonasa wene, atthu a oMerozi yaahikhalana eparakha yonvara Sisera, masi khiyaapanke eyo. Nkahaya muupuwele anakhotto ootakhala atthyawaka iphiro sa muttetthe aya wira yoopole okumi aya! Awo yanwerya opaka sotheene yaawerya aya wira akhaliherye yoolakela ya Yehova. Nto yaapanke eyo yaamutthuveliwa. Masi nnaamwi yaarina eparakha yoomukhaliherya Yehova, awo khiyaapanke etthu. Vanikhala wira atthu a oMerozi yaari oovirikana ni Yayeli, yoowo aari oolipa murima.​—Makhulupale 5:24-27.

Nihaana ovarerya moota nnoonela ahu muteko nninvarela ahu Muluku

12. Waavirikanne sai moonelo wa atthu anilavuliwa Makhulupale 5:9, 10? Nto mwaha ola onnivara sai?

12 Makhulupale 5:9, 10, ninnoona wira moonelo wa atthu oowiivahererya 10.000 waahivirikana ni ale yahiivaherenrye. Debora ni Baraki yaahaavuwiha ‘makhulupale a Isarayeli: yawo yaronwe okhottoni votthuna waya’. Nave yaari oovirikana ni ale ‘yawela abùru òthiyana òttela’, yaawo yoona wira yaari ootepa otthuneya, ahinareerela wiivahererya. Atthu awo anihimmwa wira yaakilanthe “vakuwoni sorika”, ni ‘anetta mphironi’ apuhaka okumi. Nto yaahivirikana ni ale yiivaherenrye orowa ni Baraki owana ekhotto omyaakoni sa oTabori ni omuro Kixoni. Ale yaaphavela okumi wookhweya yaaleeliwe wira: “Mutthokelele etthu ila”. Yaahaana ovaha ephoole ni wuupuwela wira mwaha woohiivahererya muteko wa Yehova, yaahipweteiwa vaalupale. Nave-tho, olelo-va nihaana ovarerya moota nnoonela ahu muteko nninvarela ahu Muluku.

13. Moonelo wa atthu a nloko na Rubeni, Dani, ni Axeri waavirikanne sai ni Zabuloni ni Nefetali?

 13 Ale 10.000 yiivaherenrye yaahikhalana eparakha ya oweha miteko sa Yehova yoowo ori Namalamulela Muulupale. Nto yanwerya waaleela akina miteko sa Yehova ‘avuwihaka owerya’ awe. (Makhulupale 5:11) Ohiya-vo, nloko na Rubeni, Dani ni Axeri yaakhapelela paahi mihakhu saya, ntoko ipwittipwitthi, ikalawa, ni ipantari, ohiya oluttuweliwaka ni muteko wa Yehova. (Makhulupale 5:15-17) Masi khahiyo wira maloko otheene yaarina muupuwelo yoowo. Maana atthu a nloko na Zabuloni ni Nefetali “yahivelèla ekumi aya, ehovelelaka okhwa”, wira amukhaliherye Debora ni Baraki. (Makhulupale 5:18) Nnoowerya wiixutta etthu yuulupale ni miyoonelo iya soovirikana voohimya sa muteko wowiivahererya.

“MWATTOTTOPELE APWIYA!”

14. Ninrowa wooniherya sai wira ninnikhaliherya ehakhi ya olamulela ya Yehova olelo-va?

14 Olelo-va khannikhaliherya olamulelo wa Yehova niwanaka ntoko khalai. Masi nookhalana eparakha yookhaliherya moolipa murima muteko woolaleerya. Nto olelo-va, annitthuneya atthu anceene oowiivahererya wira akhaliherye muteko wa Yehova ovikana khalai. Mikhora soovirikana sihuleyale sa muteko wa Muluku wa okathi wotheene, sinnikeliwa ni anna, arokora ni amiravo ikonto sinceene. Mwa ntakiheryo, anamunceene anirumeela ntoko mapioneero, orumeela oBetheli, oteka Ipa sa Omwene ni annikhaliherya mithukumano suulupale sa esirkwiitu ni sa mittetthe. Axitokweene akina aniirela mpantta Igrupu sa Axitokweene Sinilavula ni Ixipitaali ni annilokiherya mithukumano suulupale. Nikupaliki wira Yehova onnixukhurela wiivahererya wahu wira nimurumeeleke khula muteko aahiiso opuro onitthuneya, nto khonirowa oliyala wiimananiha wahu.​—aHéberi 6:10.

Muhinatthi opaka yoothanla, muupuweleke ele enrowa aya okumiherya wa etthoko anyu ni muloko (Nwehe ettima 15)

15. Ninrowa osuwela sai wira khannikhalela nthiti muteko wa Yehova?

15 Nihaana ovarerya moota nnoonela ahu muteko wowiivahererya. Nihaana wiikoha  so: ‘Kinnimananiha ovara vanceene muteko wa Muluku? Kiireke kiniphavelexa mihakhu ohiya omurumeela Yehova? Aahiiso kinnivaha mireerelo saka wira kimurumeele Yehova, kitakihaka waamini ni olipa murima wa Baraki, Debora, Yayeli ni ale 10.000 yiivaherenrye? Kinuupuwela othaamela muttetthe aahiiso elapo ekina kiphavelaka ophwanya musurukhu munceene wira kithaaciri? Akhala wira ti siiso, kiireke kinninvekela Yehova wira okikhaliherye woona ele enrowa okhumelela wa etthoko aka ni muloko, akhala wira kinoothaama?’ * (Nwehe enoota.)

16. Okhala wira Yehova ookhalana itthu sotheene, etthu xeeni eniwerya ahu onvaha?

16 Yehova oonivaha nttittimiho nuulupale mwaha wooneemererya okhaliherya olamulelo awe. Okhuma okathi wa Adamu ni Eva, Diabo oniphavela wira apinaatamu otheene amutthareke yena amurukunuwelaka Yehova. Masi vaavo ninkhaliherya ahu olamulelo wa Yehova, hiyo ninnooniherya Satana wira nri mpantta wa Yehova. Waamini ni ororomeleya wahu onniniiriha onvarela muteko Yehova vootthuna wahu, nto eyo ennimuhakalaliha vanceene. (Miruku 23:15, 16) Muluku ahu onoowerya orumeela ororomeleya ni omwiiwelela wahu wira omwaakhule Satana yoowo oninveeha. (Miruku 27:11) Omwiiwelela Yehova, etthu eniwerya ahu onvaha, nto opaka eyo, ennimusivela ni omuhakalaliha vanceene.

17. Exeeni Makhulupale 5:31, enniixuttiha aya voohimya sa ele enrowa wiiraneya muhoolo?

17 Moohipisa, atthu otheene valaponi anrowa othanla okhaliherya olamulelo wa Yehova. Tthiri ninnilipelela okathi owo! Ninnoona ntoko Debora ni Baraki, yaawo yiipale so: “Siso ekhweke awanan’inyu othene nyuwo, Apwiya. Vano apatthan’inyu ekhalé ntoko nsuwa, ekhumaka ni warya waya wothene”. (Makhulupale 5:31) Exeeni enrowa okhumelela nuumala Yehova opwetexa olumwenku wa Satana? Okathi enrowa aya opacerya ekhotto ya Armagedoni, Yehova khonrowa waavekela atthu oowiivahererya wira amukhaliherye waapwetexa awanani awe. Masi, Yehova onrowa onileela wira “mwemele pahi, mwalitteke: munimona wopowa Apwiya anovahayani”. (2 Wahala 20:17) Olelo-va, nookhalana eparakha yuulupale ya okhaliherya olamulelo wa Yehova moolipa murima ni mooluttuweliwa.

18. Moota xeeni muteko anyu wowiivahererya, onaakhaliherya aya akina?

18 Debora ni Baraki yaahipacerya nsipo naya nooxintta anvuwihaka Yehova ohiya waavuwiha apinaatamu. Awo yiipale so: “Mwattottopele Apwiya! . . . Atthu othene yahitthuka muloko votthuna waya”. (Makhulupale 5:1, 2) Moolikanasa, vaavo nimmurumeela ahu Yehova khula opuro onitthuneya, ninniwiiriha atthu akina ‘wattottopela Apwiya’ Yehova!

^ etti. 6 Ecampeya, ekaruma enikhala ntoko mwaalo nto ikwaha sikina enipakiwa yoorakama ni yookhoropana. Icampeya saaheliwa mmarotani a ikaaro iye sa ekhotto. Nto saanikhaliherya owiiva awanani okathi seettihiwa aya.

^ etti. 8 Soohimmwa sikina sa yowiiraneya ela yoovara murima, siniphwanyaneya mwaha oni: ‘Kahikhumelela Ntoko Mama a Isarayeli’ erevista Owehaweha 1 a Agosto 2015, ipaaxina 12-15.

^ etti. 15 Nwehe mwaha oni: “Oxankiheya Voohimya sa Musurukhu”, erevista Owehaweha 1 a Julyo, 2015.