Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Nvenye!  |  N.° 1 2017

Sistema Nervoso Entérico (ENS, enooniheriwa ni ekoore yooripelela) eri vamosa ni esistema digestivo

Niireke Sistema Nervoso Entérico “Ottoopare wa Nenli”?

Niireke Sistema Nervoso Entérico “Ottoopare wa Nenli”?

MURINA ottoopare mikavi? Mwiira “mmosa”, weeso muhaakhula saana. Masi sookhala isistema nervoso sikina mwerutthuni mwanyu. Wookhala mpantta mukina wa erutthu orina ineuroonio sinceene, nto masientista makina annihimya okhala “ottoopare wa nenli”. Mpantta owo ti sistema nervoso entérico, yoowo-tho onilempwa (ENS) nttaava na enkelexi. Owo khokhanle mmuruni, masi ori mmirimani mwanyu.

Wira eyoolya enilya ahu ekhalihiwe ikuru, ipantte sa mwerutthuni mwahu sihaana ovaraka muteko vamosa. Tivonto ottoopare woohiya muteko owo wira ovariweke ni ENS.

Nnaamwi ENS ohitikinihaka vanceene ntoko ottoopare, masi tooxankiha. Mwerutthuni mwa apinaatamu, ENS onnikhalana ineuroonio siniphiyerya okhuma 200 mpakha 600 imilyau sene. Egrupu eyo ya ineuroonio sootikiniha, eri musistema digestivo. Masientista anikupali wira vaakhanle wira ENS ori mottoopareni, nto mitika sawe saarowa okhala sootepa otikana. Moovarihana ni eliivuru The Second Brain (Ottoopare wa Nenli), ti vookhalela [sistema digestivo] ovaraka muteko mekhawe”.

“ELABORATOORIO YA MMIRIMANI”

Wira eyoolya ethote, enitthuneya otakaahereya saana okathi wooreerela ni oroihiwa opuro wooreerela. Prusoore oniitthaniwa Gary Mawe, aahimmye wira sistema digestivo ori ntoko “elaboratoorio ya mmirimani”. Moota itthu sinivara aya muteko ti vootikiniha vanceene. Mwa ntakiheryo, marupo ahu aakhalana iseelula sa vamekhaaya siniwerya osuwela itthu sooloka ni soohiloka sirina eya eyoolya enilya ahu. Eyo ennikhaliherya ENS othanla enzima xeeni sinrowa owerya weetheya eyoolya eyo, mwa enamuna erutthu eniwerya aya ottottela mureerelo. Nave-tho, ENS onnivara muteko wootthuneya wa osuwela akhala wira eyoolya elyiiye ahu ti yoonyuunya, nuumala-vo onnilokiherya saana.

Muupuweleke esistema digestivo ntoko efaabrika eniweheriwa ni ENS. Nto ENS owo onneettiha eyoolya eviraka esistema digestivo. Owo onniiriha mitika sa esistema digestivo ovaraana. ENS onnivirikaniha ilipelo ni moota mitika sa esistema digestivo sinivaraana aya, wira esistema yotheene evareke ntoko eliinya ya ikureya.

Nave ENS onnivara muteko wa okhapelela. Eyoolya enilya ahu pooti okhalana axiitthu oohiloka aniphwanyiha iretta. Tivonto, etthu yowiiraka ipursento 70 wala 80 sa iseelula siniitthaniwa linfócito, seiyo sinaakiherya iretta mweerutthuni mwahu, siniphwanyaneya mmirimani! Akhala wira muhoolya etthu erina axiitthu aniphwanyiha iretta, nto ENS onnikhapelela eruuthu ahu, iirihaka mmirimani oniwereya wira itthu iyo soohiloka sikhumele ota. Ti nthowa naya ikwaha sikina ninrapheya ahu wala ovaluwasa.

WIIWANANA ORATTEENE

Nnaamwi ENS ohivaraka muteko ni ottoopare, masi sinniiwanana okathi  wotheene. ENS onnikhaliherya vanceene olokiherya hormônio seiyo sinileela ottoopare voohimya sa okathi ni mwaattelo wa eyoolya mutthu ontthuneya awe olya. ENS onnileela ottoopare wira mutthu ola oovona, nto atepana olya, mutthu owo pooti opacerya omweetta murima.

Muhinatthi osoma erevista ela, woonasa wene mwanaanyiherya wira ottoopare ni esistema digestivo sinnivara muteko vamosa. Mwa ntakiheryo, mooweha wira okathi onilya ahu yoolya yoonuna vanikhala wira ninnitepa otteeliwa murima? Asomi anihimya wira mwaha woowi ENS anyu onnileela ottoopare wira muhoolya ‘etthu yooreera’, tivonto vanitteeliwa anyu murima. Ti nthowa naya vanikhala aya wira atthu waasivela olya soolya soonuna okathi aniriipiwa aya murima. Masientista anniphavelasa moota wowiiriha ENS ovara muteko mwa enamuna enaahakalaliha atthu ariipiwe murima.

Ntakiheryo nikina na wiiwanana okhanle eriyari ya ottoopare ni esistema digestivo, ti ele enihimya ahu wira mmirimani ononluma-mo. Eyo eniiraneya okathi ENS onihapuxa awe ephome yaarowa muniphuni wala munipwiipwini, vaavo ottoopare onoona aya owereya, nto onamwiiriha mutthu oriipiwa murima. Nave-tho eyo pooti okumiheryaka weettiwa murima, maana okathi wooriipiwa murima ottoopare onnimuruma ENS otthuka marupo. Nto asomi anihimya wira ovarihana nno wa ottoopare ni marupo onnikumiherya ele enisuwela ahu ntoko niphwanya.

Nnaamwi ENS okumiheryaka itthu iyo, masi khoniwerya wuupuwela wala woopakelani soothanla. Ohimya mookwasa, ENS khahiyo ottoopare. Khoniwerya wookhaliheryani opaka nsipo, osuwela musurukhu murina anyu obanko, aahiiso ompaka TPC. Hata vari siiso, ENS onnaatikiniha masientista, nave-tho itthu sinceene nlelo khasinsuweliwa. Nto, ekwaha ekina enrowa anyu olya, muhaana toko wuupuwela vahinatthi itthu sotheene ENS onrowa awe opaka mmirimani, ntoko namakhapelela, othotiha, ni wiiwanana ni ottoopare!