Murowe mpantta wa sirimuhina

Murowe mpantta wa myaha sirimuhina

Anamoona a Yehova

Muthanle nttaava Emakhuwa

 MOONELO WA BIIBILIYA

Malaikha

Malaikha

Malaikha anniromoliwa vanceene muliivuruni, idesenyu, ni iviidiyu. Masi, malaikha ti pani, ni muteko xeeni anivara aya?

Malaikha ti pani?

ELE BIIBILIYA ONIHIMYA AWE

 

Ohinatthi Muluku opattuxa erimu, elapo ni apinaatamu oopacerya, aahipaka soopattuxiwa sa ankhili sihinooneya. Soopattuxiwa iyo ti soowerya waavikana apinaatamu, ni sinikhala opuro onikhala awe Muluku, weiwo apinaatamu ahiniwerya aya oweha. (Yobi 38:4, 7) Biibiliya onniitthana soopattuxiwa iyo okhala “minepa” ni “malaikha”.​—Esalimo 103:20. *

Malaikha ari makavi? Khareere waatta. Malaikha arukurenrye ehice ya Muluku ari “òhalikeleya, ikonto ikonto sene”. (Wisupulula 5:11) Moolumo oowi: “òhalikeleya, ikonto ikonto sene”, anooniherya wira malaikha khareere waatta!

“Miyo kahiweha-tho . . . malaikha manjene: awo yari òhalikeleya, ikonto ikonto sene. Yira erukurenryene ehije.​Wisupulula 5:11.

Miteko xeeni malaikha yaavara aya khalai?

ELE BIIBILIYA ONIHIMYA AWE

 

Malaikha yaanirumeeliwa sintoko anamitthaka a Muluku. * Awo anniromoliwa mBiibiliyani evaraka miteko sootikiniha sa Muluku. Muluku aahiruma nlaikha wira nimureelihe ni omuhiiha Abrahamu onvaha mwanawe Isakhi ntoko mukuttho. (Maphattuwelo 22:11-18) Nlaikha naahimukhumelela Moise eriyari ya mwiri waapatta mooro wira onvahe ihapari saarowa orukunuxa okumi awe. (Okhuma 3:1, 2) Okathi profeta Daniyeli aariheliwe awe mulittini mwa akharamu, ‘Muluku aahiruma nlaikha nawe, khutthukwa iyano s’akharamu’.​—Daniyeli 6:23.

“Nlaikha n’Apwiya nahimukhumelela [Moise], nòneyaka ntoko nlumi na moro, ovarelaka vamiwani”.​Okhuma 3:2.

 Miteko xeeni malaikha anivara aya vano?

ELE BIIBILIYA ONIHIMYA AWE

 

Hiyo khaninsuwela itthu sotheene malaikha anivara aya olelo-va. Masi, Biibiliya onooniherya wira awo vano anaakhaliherya atthu a murima wooloka osuwela itthu sinceene voohimya sa Muluku.​—Miteko 8:26-35; 10:1-22; Wisupulula 14:6, 7.

Nihiku nimosa vaavo muhavinre Yakobe aarupa awe, Yehova aahimwiiriha oweha malaikha ewelaka ni ekhuruwaka wiirimu ni “ewelelo”, yeemexiwe valaponi ni yaakwante erimu. (Maphattuwelo 28:10-12) Woonasa wene oloha iwe waahimwiiriha Yakobe oweha wira Yehova onniruma malaikha orwa valaponi wira yaakhaliherye apinaatamu oororomeleya, yaawo aniphavela okhaliheriwa. Ni hiyo-tho ninkupali siiso.​—Maphattuwelo 24:40; Okhuma 14:19; Esalimo 34:7.

“Ahona ewelelo yemexiwe vathí, wukhani waya wanikwata erimu: malaikha a Muluku yaniwelaka, yanikhuruwaka erakamelo yothene y’ewelelo eyo”.​—Maphattuwelo 28:12.

^ etti. 6 Biibiliya onihimya wira soopattuxiwa sikina saahikhootta omwiiwelela Muluku. Nto iyo siniitthaniwa “malaikha ótakhala”.​—Luka 10:17-20.

^ etti. 11 Nuulumo na eHeeberi ni eGriki nirumeeliwe ni Biibiliya noowi “nlaikha”, nintaphulela “namuhupi”.