Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Nvenye!  |  N.° 1 2017

 MWAHA WA VAKAAPANI | NIIREKE TTHIRI BIIBILIYA NUULUMO NA MULUKU?

Biibiliya Niireke Tthiri ‘Upuxeriwe ni Muluku’?

Biibiliya Niireke Tthiri ‘Upuxeriwe ni Muluku’?

MUNNIKUPALI wira Biibiliya Nuulumo na Muluku? Wala munuupuwela wira eliivuru erina miyuupuwelo sa apinaatamu paahi?

Mwaha ola onnikumiherya ovaanyihana hata eriyari ya atthu yaale aniihimya okhala maKristau. Mwaakha wa 2014, wEstados Unidos, nuumala okohiwa atthu anceene yaihimya okhala maKristau, anamunceene yaanikupali wira “Biibiliya onnaakhaliherya omusuwela saana Muluku”. Hata vari siiso, eriyari ya atthu 5 yaakohiwe, mutthu mmosa aanimoonela Biibiliya okhala eliivuru ya “ihantisi sa khalai ni myaha sowoothiwa silempwale ni atthu”. Miyuupuwelo iyo soovirikana, sinniiriha oxankiha osuwela yootaphulela yekeekhai ya nuulumo na mbiibiliyani noowi ‘upuxeriwe’.​—2 Timótheyo 3:16.

NINTAPHULELA EXEENI NUULUMO NOOWI ‘UPUXERIWE’?

Biibiliya orina iliivuru 66 saamukhaani, seiyo silempwale ni atthu oowiiraka 40 mwa iyaakha sowiiraka 1.600. Nto akhala wira Biibiliya olempwale ni atthu, moota xeeni ‘upuxeriwe awe ni Muluku’? Nuulumo noowi ‘upuweriwe ni Muluku’ nintaphulela wira ihapari atthu ale yaalepa aya yaarummwa ni Muluku. Biibiliya onihimya wira “atthu ale, yalavunle ni nsina na Muluku, yanettihiwa n’Iroho Yowarya”. (2 Pedru 1:21) Mwa masu ookwasa, Muluku aarumeela ikuru sawe sihinooneya, eyo piiyo, munepa wootteela wira aaleele ihapari sawe alopwana ale yaalepa iliivuru sa Biibiliya. Eyo enlikana ni patarau onimuruma namuteko awe olepa epaphelo. Mwaneene epaphelo ele tuule orumme olempwa, ohiya ole onilepa.

Atthu akina yaamulepa Biibiliya yaaleeliwa ni nlaikha itthu yaarowa aya olepa. Akina yoonihiwa ni Muluku. Ikwaha sikina, Muluku aanaaleela ihapari iyo moolohani. Ikwaha sikina Muluku aaniweemererya alipa-oolepa orumeela masu aya wira elepe ihapari sawe, masi okathi mukina Muluku taaleela khula nuulumo yaarowa aya orumeela. Ikwaha sotheene iyo, alipa-oolepa awo yaalepa miyuupuwelo sa Muluku, ohiya sawaya.

Exeeni ennikupaliha wira tthiri Muluku taaleela etthu yoolepa alipa-oomulepa Biibiliya? Muthokorerye mathowa mararu annikupaliha wira Biibiliya onikhuma wa Muluku.