Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Nvenye!  |  N.° 1 2017

 MWAHA WA VAKAAPANI | NIIREKE TTHIRI BIIBILIYA NUULUMO NA MULUKU?

Biibiliya​—Onnihimya Ekeekhai mwa Itthu Sotheene

Biibiliya​—Onnihimya Ekeekhai mwa Itthu Sotheene

Onnitthokiherya Saana Myaha sa Siensia

NNAAMWI Biibiliya ohikhanle eliivuru ya siensia, vaavo onilavula awe sa itthu sa ephattu, onihimya itthu sekeekhai. Muthokorerye matakiheryo manli: Moota enipakeya aya epula ni moota oninnuwa awe mwaana orupaliwe.

MOOTA ENIPAKEYA AYA EPULA

MAKHALELO A MEEKU NI EPULA

Biibiliya onihimya so: “Muluku t’oniweleliha màsi, athukumanyaka mmekuni, khutatuxa okhala mattonttoni èpula. Numalá onnimoriha màsi awo mmekuni”.​—Yobi 36:27, 28.

Biibiliya onnihimya itthu tthaaru siniiraneya wira epakeye epula. Vaavo vanoopa aya nsuwa, maasi (1) anniwelela. Nuumala-vo, maasi awo annirowa musulu ntoko etthapwe enapakeya (2) meeku. Moottharelana annikhala (3) epula, nto enamorela vathi. Hata vano, atthu anisoma makhalelo a meeku ni epula khanisuwela saana itthu sotheene siniiraneya wira epakeye epula. Mootikiniha, Biibiliya onnihimya wira: “Khavo onsuwela enamuna enettaya meku”. (Yobi 36:29) Mpattuxa onnisuwela moota enikhumelela aya epula ni aahikhalana ephoole yuulupale wira alipa yaamulepa Biibiliya elepe itthu soororomeleya ni sekeekhai. Nto aahipaka eyo nnakhala apinaatamu ahisuwelaka otthokiherya moovarihana ni siensia, moota itthu iyo siniiraneya aya.

MOOTA ONINNUWA AWE MWAANA ORUPALIWE

WUNNUWA WA MWAANA ORUPALIWE

Mwene Davidi yoowo olempe ipantte sikina sa Biibiliya aahimmye so: “Maitho anyu yaahikoona okathi kaarupaliwe aka. Ipantte sotheene sa erutthu aka saahilempwa muliivuruni mwanyu”. (Esalimo 139:16 Tradução do Novo Mundo). Olavulaka mwa nthoonyeryo, Davidi aahilavula voohimya sa moota oninnuwa awe mwaana orupaliwe, moovarihana ni malakiheryo alempwale “elivuru” yookhala ene, aahiiso palano. Mootikiniha, eliivuru eyo elempwale iyaakha 3.000 sivinre!

Paahi waattamela mwaakha wa 1860, musomi mmosa aitthaniwa Gregor Mendel, taasuwenle awe mapacereryo a genética. Nave-tho paahi mweeri wa Abril a 2003, anamatokosa tamalelinhe aya omusoma genoma humano, yoowo orina soohimmwa sotheene sa DNA. Nto DNA torina itthu sinitthuneya wira opakeye mutthu. Masientista anihimya wira moota atthokiheriwe aya makhalelo a genética mwerutthuni mwahu, onlikana ni moota anilempwa aya ni otthokiheriwa moolumo mudisionaariuni moovarihana ni ileetera saya. Moovarihana ni malakiheryo ale, ipantte sa erutthu ya mwaana, ntoko ottoopare, murima, masasu ni itthu sikina, sinninnuwa moovarihana ni okathi aya wooreerela. Soohimmwa siniphwanyaneya muhina mwa DNA a mutthu, sinnihimmwa okhala “eliivuru ya okumi”. Davidi aawenrye sai olepa itthu sekeekhai? Moowiiyeviha owo aahimmye so: “Eroho y’Apwiya yokirwela: molumo aya ari mwano mwaka”. *​—2 Samuweli 23:2.

 Onnitthokiherya Saana Iprofesia

TI VOOXANKIHA vanceene osuwela okathi ni moota omwene wala muttetthe mmosa onrowa aya ovuwa wala opwetexiwa. Masi Biibiliya aahihimya sa opwetexiwa wa iguvernu ni ipooma soowerya ni moota eyo yaarowa aya wiiraneya. Muthokorerye matakiheryo manli.

OHONONIWA WA BABILONIA

Mwa iseekulu sinceene, Babilonia a khalai yaari epooma yuulupale ya omwene woowerya wa epantte enikhuma nsuwa ya wAsia. Nave, yaari epooma yootepa wunnuwa olumwenku wotheene. Masi, sihalaka iyaakha 200, Muluku aahimuruma profeta Yesaya olepa wira mulopwana aitthaniwa Kiro taarowa omuxintta Babilonia, nave epooma eyo khiyaarowa okhaliwa-tho. (Yesaya 13:17-20; 44:27, 28; 45:1, 2) Niireke eyo yaahiiraneya tthiri?

SOOHIMMWA

Ohiyu omosa mweeri wa Outubro a 539 AEC, Kiro aahimuxintta Babilonia. Nuuvira okathi, miro saapakiwa iwoorotha saahihononeya mwaha wa ohikhapeleliwa. Vanihimmya wira eyaakha ya 200 EC, muttetthe ole waahithammwa. Olelo-va, Babilonia onnivikaniha okhala milepe. Sintoko Biibiliya aahimmye awe, Babilonia oopakeya “elapo yohiwa”.​—Yeremiya 50:13.

Mulipa-oomulepa Biibiliya aaphwannye woowi soohimmwa iye sekeekhai sa onyaanyiwa Babilonia? Biibiliya onihimya wira ‘Muluku tanvaherenrye Yesaya, mwana Àmosi’.​—Yesaya 13:1.

NIINIVE ONROWA OPAKEYA ‘OTHAKO WOWUMA’

Niinive, ekapitaali ya olamulelo ya wAsiria, yaanihimmwa okhala epooma yootepexa oreera. Epooma ele yaahikhalana iphiro suulupale, ijardim sa atthu otheene, itemplo, ni ipalaasiu suulupale. Masi profeta Sofoniya aahileiherya wira epooma ele yootepa oreera yampakeya ‘othako wowuma’.​—Sofoniya 2:13-15.

Niinive aahihononiwa moomalela ni anakhotto ootakaahana a oBabilonia ni oMedo, eyaakha ya 630 AEC. Moovarihana ni eliivuru emosa, epooma ele nuumala oxinttiwa, “yaahiviriha iyaakha 2.500 eliyaliwe ene”. Nave waahikhala okathi omosa atthu yaahoverya aya akhala wira tthiri Niinive aahikhala. Waattamela eyaakha ya 1850, alipa-anitokosa mapuro yaakhaliwa khalai, yaahithipa milepe sa oNiinive. Olelo-va, milepe iyo sinnimala wiiyiwa ni ohononiwa, nto eyo enniiriha mutthenkeso onikhapelela mihakhu sa khalai oniitthaniwa Fundo de Patrimônio Mundial, ohimya so: “Naahikhalane ephoole, milepe sihanle sa oNiinive wa khalai sinoomala-mala sotheene”.

Sofoniya aaphwannye woowi soohimmwa iye soororomeleya? Owo aaheemererya wira soohimmwa iye aaleeliwa ni Yehova.​—Sofoniya 1:1.

 Biibiliya Onnaakhula Makoho Ootthuneya a Mookumini

BIIBILIYA onnaakhula mootteeliha murima makoho ootthuneya a mookumini. Muthokorerye matakiheryo anittharelana.

XEENI OSANRE AYA OTAKHALA NI OHAAWA MULAPONI?

Biibiliya onnilavula vanceene voohimya sa otakhala ni ohaawa. Owo onitthokiherya so:

  1. ‘Akhala anihawa epuheriwaka ni atthu owerya’.​—Musuweli 8:9.

    Olamulelo wa apinaatamu oohiiwelela ni oohiroromeleya onnikumiherya ohaawa.

  2. “Oreriwa n’utakhaliwa khunimuthanla mutthu”.​Musuweli 9:11.

    Sookhumelela sootutuxerya, sintoko iretta sowoopiha, ihasara sa mikukutta, wala ihasara sa ephattu, pooti omphwanya khula mutthu ni khula opuro.

  3. “Mutthu mmosá pahi t’oruhale etampi mulaponi: etamp’iyo yoruha okhwa”.​—aRoma 5:12.

    Okathi aapattuxiwe awe mulopwana ni muthiyana oopacerya, apinaatamu yaari oomalela, nave okhwa khiwaakhanle. Etampi ekhumelenle moolumwenkuni nuumala apinaatamu ohimwiiwelela Mpattuxa aya.

Biibiliya khahiyo paahi onitthokiherya nthowa naya atthu anihaawa aya. Masi-tho, onnileiherya wira Muluku onoomaliha otakhala ni “onopuputtha maithori aya othene: khunrowa okhala-tho okhwa, nnákhala oripiwa murima, walá ikuttho nnákhala ohawa”.​—Wisupulula 21:3, 4.

EXEENI ENIMWIIRANEELA MUTTHU AKHWA?

Biibiliya onihimya wira wookhwaani mutthu khonuupuwela etthu. Musuweli 9:5, onihimya so: “Atthu akumi annisuwela wira anrowa okhwa, masi alipa-òkhwa khansuwela-tho etthu”. Mutthu akhwa-vale ‘sowupuwela sawe sothene sinnimala’. (Esalimo 146:4) Okathi ninkhwa ahu ottoopare ahu khonvara muteko, ohela muhina maitho, iphula, maaru ni nlumi. Khaninwerya opaka etthu wala wuupuwela.

Masi Biibiliya khahiyo paahi onihimya mukhalelo wa alipa-ookhwa. Owo onninivaha yoolipelela yoohakalaliha ya ohihimuxiwa.​—Hoseya 13:14; Yohani 11:11-14.

XEENI MULUKU AAPATTUNXE AWE APINAATAMU?

Moovarihana ni Biibiliya, Yehova aahimpattuxa mulopwana ni muthiyana. (Maphattuwelo 1:27) Mulopwana oopacerya Adamu, onnihimmwa okhala mwaana a Muluku maana aapattuxiwe ni Muluku. (Luka 3:38) Apinaatamu khapattuxiwe mahala, masi apattuxiwe  wira yaataaneke ni Tiithi aya a wiirimu ni ekhaleke mahiku ootheene moohakalala valaponi. Nto apinaatamu otheene aavahiwa mukhalelo wa owerya wiixutta voohimya sa Muluku. Biibiliya onihimya so: ‘Ooreeriwa taale anicalela soophavela saya sa omunepani’.​—Matheyo  5:3, NM

Ohiya-vo, Biibiliya onileiherya so: “Òreriwa toko t’ale anìwa molumo a Muluku, enettela”. (Luka 11:28) Biibiliya onniniixuttiha voohimya sa Muluku, nave-tho onninikhaliherya okhalana okumi wooloka vano ni okumi ohinimala muhoolo.

Mmusuwele Saana Mwaneene Biibiliya

NUUMALA oweha myaha sinceene siri mBiibiliyani, atthu imilyau sinceene olumwenku wotheene, aahoona wira Biibiliya khahiyo eliivuru pure ya khalai. Awo aakupali wira Biibiliya Nuulumo nowuupuxeriwa na Muluku, nenlo onirumeela awe wira olavule ni apinaatamu, woohelani muhina nyuwo! Biibiliya onnoolattulani wira mmusuwele Muluku ni mukhale mpatthani awe. Biibiliya onihimya so: “Mmwattameleke Muluku: Muluku onowattamelani”.​—Yakobo 4:8.

Ophavela omwiixutta oratteene Biibiliya onniphwanyiha mureerelo. Moota xeeni? Sintoko vaniweryaneya aya osuwela muupuwelo wa mwaneene eliivuru nisomaka eliivuru eyo, omusoma Biibiliya onninsuweliha muupuwelo wa mwaneene omukumihenrye, eyo-piiyo, Muluku. Muupuwele moota eyo enirowa aya wookhaliheryani. Munoosuwela miyuupuwelo sa mpattuxa anyu. Nave-tho Biibiliya onnihimya itthu ntoko:

  • Nsina na Muluku, ni mikhalelo sawe sooloka.

  • Nthowa naya Muluku aapattunxe awe apinaatamu.

  • Moota wookhala mpatthani a Muluku.

Niireke munniphavela wiixutta itthu sikina? Anamoona a Yehova anoohakalala wookhaliheryani. Awo anoopaka mareheryo wira emusomeke Biibiliya ni nyuwo moohiliva etthu. Eyo enimookhaliheryani omwaattamela mwaneene Biibiliya, Yehova Muluku.

Mwaha ola woothokorerya itthu sikina sinooniherya wira Biibiliya eliivuru ya Muluku. Wira musuwele soohimmwa sikina, nwehe muru 2 wa eliivuru Biibiliya Onniixuttiha Exeeni?, yoolaleiwa ni Anamoona a Yehova ni eniphwanyaneya-tho va www.jworg.org/vmw

Nyuwo pooti oweha eviidiyu eni Ti Pani Ori Mwaneene Biibiliya?, yeeyo eniphwanyaneya va www.jw.org/vmw

Murowe opuro oni: ILIIVURU > IVIIDIYU

^ etti. 10 ABiibiliya akina annooniherya wira nsina na Muluku ti Yehova.​—Esalimo 83:18.