Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2017

Moota Sowoonihiwa sa Zakariya Sinnikhaliherya Aya

Moota Sowoonihiwa sa Zakariya Sinnikhaliherya Aya

“Muhokolowele wa miyo: vano miyo kinohokolowela wa nyuwo”.​ZAKARIYA 1:3.

ISIPO: 6, 20

1-3. (a) Okathi Zakariya aapacenrye awe olaleya iprofesia, makhalelo a atthu a Muluku yaari sai? (b)  Xeeni Yehova aavekenle awe atthu omuhokolowela?

ZAKARIYA aahoonihiwa itthu sookuxa murima: Eroolu yaavava musulu, muthiyana aari muttankani, athiyana anli yaavava yaawo yaarina mapupha ntoko a anaphipi. Iya ti itthu sikina sookuxa murima Zakariya aawenhe awe. (Zakariya 5:1, 7-9) Xeeni Yehova aamoonihenrye awe profeta awe itthu iye sookuxa murima? Makhalelo a aIsarayeli yaari sai okathi ole? Nave ninrowa ottottela sai mureerelo sowoonihiwa iye olelo-va?

2 Eyaakha ya 537 ohinatthi Kristu oyariwa, atthu a Yehova yaahihakalala vanceene. Awo yammalaru otaphuliwa weepotthani oBabilonia, nuuvira iyaakha 70. Yaahitteeliwa murima otthikela oYerusalemu wira yateke-tho etemplo ni otthikela omukokhorela Yehova opuro ole. Nuuvira eyaakha emosa, aIsarayeli yaahithipa malitti a etemplo. Atthu yaahihakalala  vanceene, ni “yanikhuwela vanjene, onyakula waya wanìwanyeya ottaiwene”. (Ézira 3:10-13) Masi moohipisa yaahikhumelela anyokhani yahaasiveliwa ni muteko ole. AIsarayeli yaahitteettheya mpakha ohiya muteko ole wooteka etemplo. Nuumala-vo awo yaahiluttuweliwa oteka ipa saya ni olima imatta saya. Saahivira iyaakha 16 etemplo ya Yehova ehimalihiwe. AIsarayeli yaanitthuneya wuupuxeriwa wira emuhokolowele Yehova ni ahiye ophavela mureerelo aya paahi . Yehova aaphavela wira atthu awe amukokhoreleke mooluttuweliwa ni moolipa murima.

Yehova oneemererya paahi okokhoreliwa ni murima wotheene

3 Tivonto, eyaakha ya 520, Yehova aahimuruma profeta Zakariya owuupuxerya atthu nthowa naya aakuminhe awe oBabilonia. Nsina na Zakariya nintaphulela wira: “Yehova Aahiwuupuwela”. Nnaamwi aIsarayeli yaaliyanle itthu sooreera Yehova aawiirenle awe, Muluku aaniwuupuwela. (Mmusome Zakariya 1:3, 4.) Yehova aahileiherya waakhaliherya ottikiherya okokhorela wekeekhai. Masi owo aahaalopola wira paahi aarowa weemya okokhorela waya vakhala wira awo yammukokhorela ni murima aya wotheene. Nrowe nithokorerye yowoonihiwa yaneethanu namosa ni neethanu nenli ya Zakariya. Ninrowa wiixutta moota Yehova aakhalihenrye awe aIsarayeli ni moota sowoonihiwa iye piili sinnikhaliherya aya olelo-va.

MULUKU ONIMWAAPHUKELA ANAWIIYE

4. Exeeni Zakariya aawenhe awe mwa yowoonihiwa awe ya neethanu namosa? Xeeni eroolu ele yaalempwale aya ipantte soopiili? (Nwehe elatarato yoopacerya 1.)

4 Ekapiitulu 5 ya Zakariya enipacerya ni yowoonihiwa yoohilimaleliwa. (Mmusome Zakariya 5:1, 2.) Zakariya aahiweha eroolu yaavava musulu. Eroolu eyo, mpantta aya woorakama waarina imeeturu 9, ni mpantta wookhuveya waarina imeeturu 4 nnimeya. Eyo yaari yoohuleya, ni yaahilempwa etthu. (Zakariya 5:3) Ihapari saalempwe saari soophukela. Khalai, atthu okhalawene yaalepa epantte emosa paahi ya eroolu. Masi eroolu ele yaahilempwa ipantte soopiili maana ihapari iye saari sootthuneya vanceene.

MaKristau ahaana osyaka wiiya (Nwehe ittima 5-7)

5, 6. Yehova onoonela sai wiiya?

5 Mmusome Zakariya 5:3, 4Apinaatamu otheene animwaakhula wa Muluku mwaha wa miteko saya, vanceenexa arumeyi a Muluku okhala wira aniitthaneliwa nsina nawe. Awo annimphenta yena ni annisuwela wira wiiya onnihonona nsina nawe. (Miruku 30:8, 9) Atthu akina woonasa wene anuupuwela wira wiiya khahiyo etthu yootthekeya vakhala wira aroovelavela. Masi hata ekhanle ene mathowa, mutthu yoole oniiya onnooniherya wira owo oniphenta soophavela sawe onvikana Yehova, nsina nawe ni Malamulo awe.

6 Mooweha wira Zakariya 5:3, 4 onihimya wira ‘otakhaliwa onokela mpani mwanawĩye’ ni onookhala memmo “mpakha okomola” empa eyo? Yehova onniwerya wooniherya ni ophukela etthu yoohiloka enipakiwa ni atthu awe. Hata nawiiye owo oweryaka owiipithiha mapoliisia, mapatarau awe, axitokweene a mmulokoni wala amusi awe, owo khonwerya onvitherya Yehova. Muluku  onoopaka sotheene wira owooniherye atthu otheene aniiya. (aHéberi 4:13) Tthiri ninnihakalala okhala ni atthu aniimananiha vanceene okhala oororomeleya “mwa sotheene”.​—aHéberi 13:18.

7. Ninrowa osyaka ophukeliwa mwaha wa itthu silempwale murooluni yaavava?

7 Okhala wene, wiiya onnimunanariha Yehova. Eparakha yuulupale osuwela ni weettela malamulo a Yehova yaawo annikhaliherya osuwela itthu sooloka aahiiso soohiloka ni otthara mweettelo onvuwiha nsina nawe. Opaka eyo nnoosyaka maphukelo Yehova onirowa awe waaruuhela atthu yaale ahinimwiiwelela.

MMUTAPHULEKE NATIRI ANYU “MAHIKU OTHENE”

8-10. (a) Olapha ontaphulelani? (b) Etthu xeeni Zedekiya ahaapanke awe?

8 Moottharelana, eroolu yaavava musulu yaahooniherya soolopola yaaroiheliwa atthu yaale yaaromola nsina na Muluku ‘elaphaka sowotha’. (Zakariya 5:4) Olapha ti enamuna ya olipiherya etthu mutthu ohimmye awe, wala yooleiherya yekeekhai yoowi mutthu owo onoopaka wala khompaka etthu eyo.

9 Olapha mwa nsina na Yehova etthu enireerela opakiwa ni ephoole yuulupale. Hiyo ninniixutta etthu ni ele yaamwiiranenle Zedekiya, mwene ookiserya a oYerusalemu. Zedekiya aahilapha mwa nsina na Yehova wira aarowa omwiiwelelaka mwene a oBabilonia. Masi Zedekiya khaamalelinhe yooheiherya awe. Ti maana aya Yehova aahimmye awe wira Zedekiya aarowa ‘okhwela oBabilonia, mulaponi mwa mwené anvahale ehije: [okhala wira ] aahiveha watàna wapakalyawe n’uwo, khuhonona molumo alamphyawe”.​—Ezekiyeli 17:16.

10 Mwene Zedekiya aahilapha mwa nsina na Muluku, nto Yehova aalipelela wira  owo ampaka ele aaleihenrye awe. (2 Wahala 36:13) Masi Zedekiya khaapanke aaleihenrye awe ni aahivekela nikhaliheryo wEjiitu wira aaxintte aBabilonia. Mooriipiha murima anakhotto a wEjiitu khiyaawerya omukhaliherya.​—Ezekiyeli 17:11-15, 17, 18.

11, 12. (a) Etthu xeeni yootepa otthuneya eleihenrye ahu? (b) Okumi ahu onrowa wooniheryaka sai wira nihiivahererya wa Muluku?

11 Etthu yaamukhumelenle Zedekiya enniniixuttiha wira Yehova onniiwa itthu ninleiherya ahu. Wira nimuhakalalihe yena nihaana waakhwaniherya sooleiherya sahu. (Esalimo 76:12) Yooleiherya yootepa otthuneya nikhanle ahu oopaka ti wiivahererya wahu wa Yehova. Okathi nniivahererya ahu wa Yehova ninnimulaiherya wira ninrowa omurumeelaka hata sinikhumelelaka mixankiho.

12 Ninrowa opaka sai etthu nimulaihenrye ahu Yehova? “Mahiku othene” sinniniphwanya soweeha. Enamuna ninvilela ahu sooweha iyo ennooniherya akhala wira wataana wahu ni Yehova ti woolipa wala nnaari. (Esalimo 61:9) Mwa ntakiheryo, munrowa opaka exeeni akhala wira mutthu onivarana anyu muteko wala osomana oxikola onnipacerya owooniheryani wira onnootthunani? Niireke munookhootta yoweeha eyo ni munimooniherya wira muniphavela omwiiwelela Yehova? (Miruku 23:26) Wala munrowa opaka exeeni akhala wira khamurina mmusi ori mwekeekhaini? Niireke munninvekela Yehova wira ookhaliheryeni ovikaniha weettela malakiheryo a eKristau? Hata sookhumelelakani mixankiho, niireke munnimuxukhurela Yehova mahiku otheene mwaha wa ophenta wawe ni malakiheryo awe? Niireke munniivaha okathi wira mmusome Biibiliya mahiku otheene? Tthiri hiyo nooleiherya opaka itthu iyo okathi naivaherenrye ahu wa Yehova. Okathi nnimwiiwelela ahu yena ni murima wotheene, hiyo ninnimooniherya Yehova wira ninnimphenta ni na arumeyi awe. Okumi ahu wotheene onnooniherya wira nimmukokhorela Muluku. Nave mwaha wookhala arumeyi oororomeleya a Yehova, owo ooleiherya onivaha okumi wooloka muhoolo.​—Otumererya 10:12, 13.

Yehova onniniixuttiha, wira nihaana ovara ele emuleihenrye ahu

13. Exeeni nniixutta ahu ni yowoonihiwa ya neethanu namosa ya Zakariya?

13 Yowoonihiwa ya neethanu namosa ya Zakariya enninikhaliherya osuwela wira omphenta Yehova onitaphulela osyaka wiiya wala omaleliha sooleiherya sahu. Nihiixutta wira hata aIsarayeli yaapaka itthu sinceene soohiloka, Yehova khaahononne yooleiherya awe ni khaanyanyanle atthu awe. Owo aanisuwela wira awo yaari mmaxakhani mwaha woorukureriwa ni awanani aya. Orumeelaka ntakiheryo nawe, Yehova onniniixuttiha wira nihaana waakhwaniherya sooleiherya sahu. Nave hiyo pooti okupali wira owo onoonikhaliherya opaka eyo. Enamuna emosa Yehova onnikhaliherya awe ti onivaha yoolipelela ya muhoolo. Moohipisa, owo onrowa omaliha otakhala valaponi. Yowoonihiwa  enittharelana ya Zakariya nnimwiixutta voohimya sa yoolipelela eyo.

YEHOVA ONNIMUKUMIHA MUTAKHALI

14, 15. (a) Exeeni Zakariya aawenhe awe mwa yowoonihiwa awe ya neethanu nenli? (Nwehe elatarato yoopacerya 2.) (b) Aathoonyeryani muthiyana aari muttankani? Xeeni nlaikha naakhunenle aya ettanka eyo?

14 Nuumala Zakariya oweha eroolu yaavava, nlaikha naahimuleela wira: “Muttukhule maitho”. Zakariya aahiweha “ettanká” wala mutthanka. (Mmusome Zakariya 5:5-8.) Ettanká eyo yaahikhuneeliwa ni mukhuneelo wa eyuuma. Okathi yaatthukuliwe aya, Zakariya aahimoona muthiyana okilanthi ene muhina. Nlaikha nle naahimuleela Zakariya wira muthiyana ole aathoonyerya “etampi ya atthu”. Nkahaya muupuwele moota Zakariya oovale awe okathi anweha awe muthiyana ole omananihaka okhumela ota! Masi nlaikha moohipisa naahiphinyeerya muhina ni naahiwala ettanka ele ni ekhuneelo ele ya eyuuma. Eyo entaphulelani?

15 Yowoonihiwa ya Zakariya enninroromeliha wira Yehova khonirowa weemererya otakhala eriyari ya atthu awe. Vaavo Yehova onweha awe etthu yoohiloka, owo onnikumiha moohipisa. (1 aKorinto 5:13) Nlaikha naahooniherya eyo okathi naakhunenle aya ettanka ni ekhuneelo yoolemela.

Yehova aahileiherya oreeriha okokhorela wawe (Nwehe ittima 16-18)

16. (a) Exeeni yiiraneyale ni etthanka? (Nwehe elatarato yoopacerya 3.) (b) Athiyana yaarina mapupha yaaroihale woowi ettanka?

16 Moottharelana, Zakariya aahaaweha athiyana anli yaarina mapupha manli oolipa yaalikana ni mapupha a anaphipi. (Mmusome Zakariya 5:9-11.) Athiyana ale khiyaalikana ni muthiyana ootakhala ari muttankani. Erumeelaka mapupha aya oowerya,  awo yaahikuxa ettanka ele yaarina “etampi ya atthu” ni yaahiroiha opuro mukina. Awo yaaroihale woowi? Yaaroihale elapo ya oSineyari, yeeyo yaasuweliwa okhala oBabilonia. Xeeni awo yaarowanne aya opuro ole?

17, 18. (a) Xeeni oBabilonia waari aya opuro wooreerela oroihiwa “etampi ya atthu”? (b)Exeeni mulakenle anyu opaka?

17 AIsarayeli a okathi wa Zakariya woonasa wene yaanisuwela nthowa naya Babilonia waari aya opuro wooreerela orowaniwa “itampi sa atthu”. Awo yaanisuwela wira epooma ele yaari yootakhala, yaahisareya onamuttompe ni okokhoreliwa wa amuluku eethiru. Zakariya ni aYuda akina yaaroihiwe epooma ele yaahaana wiimananiha mahiku otheene wira ekhootte ohapuxiwa ni okokhorela wa ethiru. Nto yowoonihiwa ele yaahooniherya wira Yehova anwerya waakiherya okokhorela wekeekhai.

18 Yowoonihiwa ele nave yaaniwuupuxerya aYuda wira nave awo yaahikhalana muritti wa waakiherya okokhorela wekeekhai. Otakhala khoneemereriwa eriyari ya arumeyi a Muluku. Olelo-va, Yehova onniniroiha mmutthenkesoni mwawe memmo nnaakhela ahu niphento nawe ni nikhapelelo nawe. Otheene ahu nookhalana muritti wa okhaliherya wira mutthenkeso wa Yehova okhaleke wooreera. Ohikhaleke otakhala eriyari ya atthu a Yehova.

ATTHU OOWAARYA ANNINVUWIHA YEHOVA

19. Sintaphulela exeeni olelo-va itthu sookuxa murima oonihiwe awe Zakariya?

19 Yowoonihiwa yaneethanu namosa ya Zakariya,yoolopola yuulupale wa ale anipaka itthu soohiloka. Yehova khonirowa weemererya wira otakhala ovikanihe. Okhala wira na arumeyi awe, nihaana onyokha opaka itthu sootakhala. Sowoonihiwa iye sinninlipiherya wira naimananiha vanceene omuhakalaliha Tiithi ahu oophenta Yehova, owo khonirowa onitakhaliha, masi onirowa onireeliha. Hata vavilaka ovikaniha okhalana mweettelo wooloka olumwenku ola wootakhala, nikhaliheriwaka ni Yehova nnookhumela saana! Ninsuwela sai wira okokhorela wekeekhai onoovikanihaka mahiku otheene? Vaavo nnaattamela ahu maxakha maalupale, ninrowa okupali sai wira Yehova onimwaakiherya mutthenkeso awe? Makoho awo ninrowa othokorerya mwaha onittharelana.