Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2017

Ikaaro ni Ekhara Sinimookhapelelani

Ikaaro ni Ekhara Sinimookhapelelani

“Itthu iya sothene sinrowa okhumelela mwaiwelelakaru ni murim’anyu wothene masu Àpwiya Muluku anyu”.​—ZAKARIYA 6:15.

ISIPO: 17, 136

1, 2. Makhalelo xeeni yaarina aya aYuda oYerusalemu, nuumala Zakariya wooniheriwa etthu ya neethanu nenli?

NUUMALA Zakariya woonihiwa etthu ya neethanu nenli, owo aahikhalana itthu sinceene sowuupuwelela. Masi khiivo etthu yaaturukeyale. Atthu anceene nlelo yaanipaka itthu sootakhala, nave etemplo oYerusalemu nlelo khiyaamalihiwe olokiheriwa. Xeeni aYuda ale yaakuvenle aya ohiya ovara muteko Yehova aavahale awe? Niireke yaahokolowenle oYerusalemu wira yaiphaveleleke mihakhu paahi?

2 Zakariya aanisuwela wira aYuda otheene yaatthikenle oYerusalemu yaari anamakokhorela a Yehova. Ti yaale ‘yavahiwe ni Muluku murima worera’, wira ahiye inupa saya ni anakoso aya oBabilonia. (Ézira 1:2, 3, 5) Anamunceene yaahihiya elapo yaalimalenle aya saana, khiyarowa elapo yahaatonko aya osuwela. AYuda ale yaanoona okhala vootthuneya vanceene olokiherya etemplo, nto khiyoovale weetta mukwaha ole woorakama wa ikiloomo 1.600, aviraka ephiro yoohiloka.

3, 4. Mixankiho xeeni yaaphwannye aya aYuda yaahokolowenle oYerusalemu?

 3 Nkahaya muupuwele mukwaha woorakama, okhuma oBabilonia arowaka oYerusalemu. Atthu ale yaahikhalana okathi munceene wira yuupuweleke ni alavuleke itthu voohimya sa okumi aya, opuro owo yaarowa aya othaamela. Ale oowuuluvala, woonasa wene yaanaaleela amiravo moota Yerusalemu ni etemplo awe yaarenre aya ehinatthi onyaanyiwa. (Ézira 3:12) Vaakhanle wira muntthuka muloko ni atthu ale, mwaarowa woonela sai nuumala oweha muttetthe wa oYerusalemu ekwaha yoopacerya? Niireke mwaamuriipiwa murima oweha milepe sowaatta malaxi ni ixiri soomora sene, ohela muhina iphaka suulupale seiyo khalai saari mikhora suulupale? Woonasa wene, mwaarowa olikanyihaka ixiri iye soopwexakasiwa ni ixiri suulupale sa oBabilonia. Masi aYuda khiyaakhulumunwe! Mwaha wa xeeni? Mwaha woowi okathi yeetta aya mukwaha akhumaka oBabilonia, Yehova aahaakhapelela ni waakhaliherya. Aphiyakaru oYerusalemu, awo yaahimuteka altari, opuro yoole waatekiwe etemplo, ni yaahipacerya ompaherya mikuttho Yehova khula nihiku. (Ézira 3:1, 2) Yaahisareya nthiti ni yaaniphavela ovara muteko. Vaakhala ntoko khiivo etthu wala mutthu aarowa waattikiherya ottuli.

4 Ohiya paahi oteka etemplo, aYuda yaahaana-tho oteka epooma ele ni inupa saya. Yaahaana waala imatta wira aphwanyeke yoolya. (Ézira 2:70) Vaakhala wira muteko yaarowa aya ovara khiwaareere. Moohipisa yaahiphiya awanani aya wira yaahiihe ovara muteko ole. Awanani awo, yaanaalupattha mwa iyaakha 15, nto vakhaani-vakhaani aYuda yaahipacerya okhulumuwa. (Ézira 4:1-4) Muxankiho mukina waakhumelenle eyaakha ya 522, vaavo mwene a oPersia aarumme awe wira muteko wa otekiwa ixiri sa oYerusalemu ohiiwe. Nto vaakhala wira epooma eyo khiyaarowa-tho otekiwa.​—Ézira 4:21-24.

5. Yehova aakhalihenrye sai arumeyi awe?

5 Yehova aanisuwela wira arumeyi awe yaahaana olipihiwa. Yehova aahinvaha Zakariya yowoonihiwa neethanu nenli wira aalipiherye atthu ale wira aanaaphenta ni aaniweha wiimananiha waya omurumeela. Owo aahilaiherya waakhaliherya, yahokolowela muteko aavahale awe. Voohimya sa oteka etemplo, Yehova aahimmye so: “Itthu iya sothene sinrowa okhumelela mwaiwelelakaru ni murm’anyu wothene masu Àpwiya Muluku anyu”.​—Zakariya 6:15.

ANAKHOTTO A WIIRIMU

6. (a) Yowooniheriwa ya neethanu neeraru ya Zakariya, yaapacenrye sai? (Nwehe elatarato yoopacerya.) (b) Xeeni ikhavalo iye saarina aya ikoore soovirikana?

6 Yowoonihiwa ya neethanu neeraru ya Zakariya ti yaari yootepa olipiha ovikana sotheene. (Mmusome Zakariya 6:1-3.) Nkahaya muupuwele ele Zakariya aawehale awe. “Eriyari ya miyako [miili] s’aboronze”, saahikhuma ikaaro xexe sa khavalo. Ikhavalo saya saarina ikoore soovirikana, nto vaanikhweya waahiyaniha ale yeettiha. Nto Zakariya aahikoha oriki: “Ikaro iye sinthonyerya-ni?” (Zakariya 6:4) Hiyo-tho ninniphavela osuwela etthu eyo, maana yowoonihiwa ele enninivara.

7, 8. (a) Miyaako iye miili sinithoonyerya exeeni? (b) Xeeni siri aya sa eboronze?

 7 MBiibiliyani, miyaako pooti othoonyeryaka omwene wala olamulelo. Miyaako Zakariya aawehihiwe awe, sinlikana ni iye sinromoliwa eprofesia ya Daniyeli. Mwaako mmosa onithoonyerya olamulelo wuulupale ni woohimala wa Yehova, nto mwaako mukina onithoonyerya Omwene wa oMesiya, yoowo onihooleliwa ni Yesu. (Daniyeli 2:35, 45) Okhuma elimwe ya 1914, vaavo Yesu aakhanle awe Mwene, miyaako iye sinnikhala vamosa ni sinnikhaliherya wiiraneya yoolakela ya Muluku valaponi.

Nlelo Yehova onnirumeela malaikha awe wira owaakihe ni aalipihe atthu awe

8 Xeeni miyaako iye siri aya sa eboronze? Eboronze eyuuma erina efaita yuulupale ni ti yowaarya. Khalai, Yehova aahaaruma aIsarayeli orumeela eyuuma eyo okathi yaateka aya etabernaakulu ni etemplo. (Okhuma 27:1-3; 1 Mamwene 7:13-16) Mwaha woowi miyaako iyo ti sa eboronze, ennilipiherya wira olamulelo woomalela wa Yehova ni Omwene wa oMesiya ti woolokexa, ni onirowa waaphwanyiha mireerelo apinaatamu anceene.

9. Ti pani ari anakhavalo, ni muteko aya tuuvi?

9 Ikaaro sa khavalo ni anakhavalo aya sinithoonyerya exeeni? Anakhavalo anithoonyerya malaikha, woonasa wene igrupu soovirikana sa malaikha. (Mmusome Zakariya 6:5-8.) Awo ‘anikhuma oholo w’Apwiya, anene èlapo yothene’, arowaka ovara muteko wootthuneya. Malaikha ale anirummwa orowa mapuro athanleliwe aya, wira yaakhapelele atthu a Muluku, vanceenexa oBabilonia, “epantte y’onikela epheyo”. Yowoonihiwa ela, yahaalipiherya arumeyi a Yehova wira khiyaarowa okhala-tho ipottha oBabilonia. Tthiri eyo yahaalipiha ale yaateka etemplo okathi ole wa Zakariya! Yaanisuwela wira awanani aya khiyaawerya waahiiha ovara muteko ole.

10. Eprofesia ya Zakariya ya ikaaro ni anakhavalo aya ennikhaliherya sai olelo-va?

10 Olelo-va, Yehova nlelo onnirumeela malaikha wira yaakhapelele ni waalipiha arumeyi awe. (Malakhiya 3:6; aHéberi 1:7, 14) Okhuma mwaakha wa 1919, okathi arumeyi a Yehova yaataphuliwe aya weepotthani ya oBabilonia Muulupale, awanani aya yaaheererya wiiriha okokhorela wekeekhai ohuulaane. (Wisupulula 18:4) Masi khaniwerya. Nto okhala wira malaikha annikhaliherya mutthenkeso wa Yehova, hiyo khannoova wira arumeyi a Muluku anooroihiwa-tho weepotthani wa Babilonia Muulupale. (Esalimo 34:8) Ohiya-vo, ninrowa otepaka ohakalala, nimukokhorelaka Yehova ni nthiti. Eprofesia ya Zakariya enninikhaliherya osuwela wira ninnikhapeleliwa ni miyaako iye miili.

11. Xeeni vahintthuneya ahu woova otupheliwa wa atthu a Muluku onrowa wiiraneya muhoolo?

11 Moohipisa, mitthenkeso sa epoliitika sa Satana sinimwiiraana wira seererye waapwetexa arumeyi a Muluku.  (Ezekiyeli 38:2, 10-12; Danieli 11:40, 44, 45; Wisupulula 19:19) Eprofesia ya Ezekiyeli, ennooniherya mitthenkeso iyo sikhuneelaka elapo ntoko meeku. Awo aneettiha ikhavalo, ananariwe ene, arwaaka waatuphela atthu a Muluku. (Ezekiyeli 38:15, 16) * (Nwehe enoota.) Niireke nihaana owoova atthu awo? Nnaari. Anakhotto a Yehova ari ni hiyo. Okathi wa maxakha maalupale, malaikha a Yehova anrowa owaakiha atthu awe ni waapwetexa otheene yaale anivaanyiha olamulelo wa Muluku. (2 aTesalonika 1:7, 8) Nlo ninrowa okhala nihiku noohakalaliha! Masi ti pani onrowa waahoolelaka anakhotto a wiirimu a Yehova?

YEHOVA ONNINWARIHA EKHARAMWENE NI NAMUKUTTHO AWE

12, 13. (a) Etthu xeeni Yehova aamurumme awe Zakariya opaka? (b) Ninsuwela sai wira mulopwana oniitthaniwa Yoophuwa onithoonyerya Yesu Kristu?

12 Zakariya paahi taawehale sowoonihiwa iye thanu neeraru. Masi aahipaka etthu akina yaawerya aya oweha, yeeyo yaarowa waalipiha atthu ale yaateka etemplo ya Muluku. (Mmusome Zakariya 6:9-12.) Alopwana araru, Helidayi, Tobiya ni Yedaya, yaahiphiya akhumaka oBabilonia. Yehova aahimuleela Zakariya wira okuxe eparatha ni eweero yaaruuhiwe ni alopwana ale ni opake “nleha”, wala ekhara. (Zakariya 6:11) Niireke ekhara eyo aarowa owarihiwa Zorobabeli, yoowo aari a nloko ya Yuda ni aari a emusi ya Davidi? Nnaari.  Yehova aahimuleela Zakariya wira onwarihe ekhara Muulupale a Anamukuttho, Yoxuwa. Woonasa wene, atthu yaaweha etthu ele yaahitikinihiwa vanceene.

13 Niireke Mukhulupale a Anamukuttho ole, Yoxuwa, aahikhala mwene mwaha woovahiwa ekhara? Nnaari. Yoxuwa khahiyo aari a nloko na Davidi, tivonto khaaphwanela okhala mwene. Owarihiwa wawe ekhara yaari ethoonyeryo ya etthu yaarowa wiiraneya muhoolo ni mwene ni namukuttho a mahiku otheene, yoowo oniitthaniwa Yoophuwa. Biibiliya onitthokiherya wira Yoophuwa ti Yesu Kristu.​—Yesaya 11:1; Matheyo 2:23.

14. Muteko xeeni Yesu onivara awe ntoko Mwene ni Mukhulupale a Anamukuttho?

14 Yesu ti Mwene ni Mukhulupale a Anamukuttho. Owo onnihoolela malaikha ni onnaakhaliherya arumeyi a Muluku okhala saana olumwenku ola wootakhala. (Yeremiya 23:5, 6) Moohipisa, Kristu onrowa oxintta maloko otheene, okathi onrowa awe okhaliherya olamulelo wa Muluku ni owaakiha atthu a Yehova. (Wisupulula 17:12-14; 19:11, 14, 15) Masi ohinatthi ophiya okathi owo, Yesu, wala Yoophuwa ookhalana muteko munceene.

OWO ONOOTEKA ETEMPLO

15, 16. (a) Olelo-va, atthu a Muluku alokiheriwe sai? Nto ti pani aalokihenrye? (b) Elapo ya vathi enrowa okhala sai nuumala Kristu olamulela Iyaakha Ekonto Emosa?

15 Vamosa ni okhala Mwene ni Mukhulupale a Anamukuttho, Yesu oovahiwa-tho muteko wa ‘oteka empa’ ya Yehova. (Mmusome Zakariya 6:13.) Mwaakha wa 1919, owo aahiteka etemplo ya Muluku, aataphulaka arumeyi a Muluku yaakhalihiwe ipottha sa sowiixuttiha sa etiini yoowoka, Babilonia Muulupale. Yesu aahilokiherya muloko ni aahimuthanla “murumeyi òroromeleya ni ànkhili”. Nikhuuru nla na anna oowoottihiwa ninnihoolela muteko onivariwa valaponi, mpantta wa etemplo yuulupale yomunepani. (Matheyo 24:45) Nave-tho Yesu onnaalokiherya atthu a Muluku, aakhaliheryaka omukokhorela Yehova mwa enamuna yooloka.—Malakhiya 3:1-3.

16 Yesu ni ale 144.000 anrowa okhala mamwene ni anamukuttho, anoolamulela mwa iyaakha ekonto emosa. Okathi owo, anrowa waakhaliherya apinaatamu okhala oomalela. Nuumala mamwene ni anamukuttho awo omaliha muteko aya, elapo yotheene enrowa okhaliwaka ni anamakokhorela a Yehova paahi. Nto, elapo  yotheene enrowa weettelaka okokhorela wekeekhai!

MUKHALIHERYEKE MUTEKO WOOTEKA

17. Muhupi xeeni woolipiha Yehova aavahale awe aYuda, nto eyo yaakhalihenrye sai?

17 Muhupi wa Zakariya waakhalihenrye sai aYuda okathi ole? Yehova aahilaiherya waakhaliherya ni owaakiha wira awerye omaliha oteka etemplo. Eyo yaahaavaha nlipelelo. Masi woonasa wene yaaniikoha moota muteko owo muulupale waarowa aya ovariwa ni atthu vakhaani paahi. Nto Zakariya aahaahimeerya etthu yaarowa omaliha ohoverya ni woova waya. Yehova aahimmye wira moolikanasa ni Helidayi, Tobiya ni Yedaya, ‘yamorwa atthu ankhala ottaiwene akhaliherye oteka empa y’Apwiya’. (Mmusome Zakariya 6:15.) AYuda yaanisuwela tthiri wira Yehova aanikhaliherya muteko aya. Moolipa murima, yaahitthikela oteka etemplo, nnaamwi mwene a oPersia aakhoottihale muteko owo. Okhoottihiwa iwo waalikana ni mwaako waari ohoolo wa aYuda, masi Yehova aahikumiha mwaako owo. Moohakalaliha, etemplo yaahimalihiwa otekiwa mwaakha wa 515, ohinatthi Kristu oyariwa. (Ézira 6:22; Zakariya 4:6b, 7) Moolumo a Yehova anithoonyerya etthu yuulupale eniiraneya mahiku ahu ala.

Yehova khonirowa oliyala muteko oninvarela ahu ni omphenta wahu! (Nwehe ittima 18, 19)

18. Eprofesia ya Zakariya 6:15 eniiraneya sai mahiku ahu ala?

18 Olelo-va, atthu imilyau sene annimukokhorela Yehova. Awo annihakalala onvaha Muluku itthu saya “sorera”, ntoko okathi aya, ikuru saya ni mireerelo saya. Mwa enamuna ela, awo annikhaliherya etemplo yuulupale yomunepani ya Yehova. (Miruku 3:9) Nto nikupaliki wira Yehova onnivaha efaita nikhaliheryo nahu. Munnuupuwela wira Heliday, Tobiya ni Yedaya yaahirwaana eparatha ni eweero, yeeyo Zakariya aapakenle awe ekhara? Ekhara ele yaari “nupuxeryo” na okhaliherya waya okokhorela wekeekhai. (Zakariya 6:14) Yehova khonirowa oliyala muteko oninvarela ahu ni omphenta wahu.—aHéberi 6:10.

Ninnihakalala wiirela mpantta mutthenkeso wooloka, woovareleleya, ni wa mahiku wotheene

19. Itthu ooniheriwe awe Zakariya sinnivara sai?

19 Mahiku ala ookiserya, arumeyi a Yehova annivara muteko muulupale. Eyo enniweryaneya okhala wira Yehova onnireeliha ni Yesu tonihoolela. Ninnihakalala wiirela mpantta mutthenkeso ola woororomeleya ni onrowa okhala mahiku otheene. Ninnisuwela wira yoolakela ya Yehova ya okhaliha okokhorela wooloka, enimwiiraneya. Tivonto, muhakalaleke ni muteko oninvarela anyu Muluku, ni ‘mwiweleleke ni murim’anyu wothene masu Àpwiya Muluku anyu’. Mwiira siiso, munrowa oreelihiwa ni Mwene ni Muulupale a Anamukuttho, Yesu Kristu, vamosa ni malaikha. Mwiimananiheke okhaliherya okokhorela wekeekhai. Yehova onrowa wookhapelelani olumwenku ola wootakhala, ni mookathi woohimala!

^ etti. 11 Wira mphwanye soohimmwa sikina, nwehe “Makoho Anikohiwa ni Ale Anisoma Irevista Sahu”, erevista Owehaweha ya 15 a Maio, 2015, ipaaxina 29-30.