Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2017

“Ophentana . . . W’ekekhai, Woneyeke ni Miteko”

“Ophentana . . . W’ekekhai, Woneyeke ni Miteko”

“Nihimphenté mukhw’ihu ni molumo òrera pahi: ophentana wahu okhaleke w’ekekhai, woneyeke ni miteko sahu”.​—1 YOHANI 3:18.

ISIPO: 3, 50

1. Tuuvi ori muthinto muulupalexa wa ophenta? Munrowa otthokiherya sai? (Nwehe elatarato yoopacerya.)

YEHOVA tori Maphattuwelo a ophenta. (1 Yohani 4:7) Muthinto muulupalexa wa ophenta tuule onitthokiheriwa mBiibiliyani. MBiibiliyani, muthinto owo wa niphento, onihimmwa okhala a·gaʹpe, nuulumo na eGriki. Ophenta iwo pooti ohela muhina osiveliwa vanceene mutthu owo ntoko mmusi awe. Onooniheriwa ni miteko sooloka siniwiirela ahu akina. Ophenta iwo tonniiriha owiirela akina itthu soorera. Muthinto owo wa niphento onninihakalaliha vanceene.

2, 3. Yehova owoonihenrye sai apinaatamu waaphenta mwekeekhai?

2 Yehova aahooniherya waaphenta apinaatamu, hata ohinatthi waapattuxa Adamu ni Eva. Owo oopaka elapo ya vathi mwa enamuna yaarowa aya okhalana khula etthu yootthuneya mookumini. Yehova khopanke elapo wira owo okhaleke-mo. Onipakenle hiyo. Nuumala omaliha opaka elapo ya vathi, aahaapaka apinaatamu, khwaavaha nlipelelo na okhalaka mahiku otheene mparayiisu mulaponi.

 3 Muhoolo mwaya, Yehova aahooniherya waaphenta wawe vanceene apinaatamu, mwa enamuna yuulupalexa. Nnaamwi Adamu ni Eva yaamutthekenle Muluku, owo aanisuwela wira anamwane akina a Adamu yaarowa omphentaka yena. Tivonto aahipaka marehereryo wira onvahe Mwanawe ntoko mukuttho wowoopola. (Maphattuwelo 3:15; 1 Yohani 4:10) Okhuma okathi Yehova aaleihenrye awe yowoopola, vaakhala ntoko wira mukuttho owo waahivahiwa. Nto sivinre ene iyaakha 4.000, Yehova aahaavaha apinaatamu mwanawe. (Yohani 3:16) Tthiri ninnimuxukhurela vanceene Yehova mwaha wooniphenta!

Nooniheryeke ophenta hata vahikhweyaka

4. Ninsuwela sai wira apinaatamu oohimalela anoowerya wooniherya ophenta wekeekhai?

4 Niireke nnoowerya wooniherya ophenta wekeekhai nnaamwi niri ene atthu oohimalela? Aayo, nnoowerya. Yehova onipanke ailikanyihaka mmensawe, tivo ninwerya ahu omutakiha. Khivanikhweya wooniherya ophenta wekeekhai okathi wotheene, masi vanniweryaneya. Abeli aahooniherya omphenta Muluku, vaavo anvahale awe itthu sootepa otthuneya aarina awe. (Maphattuwelo 4:3, 4) Nowe aahooniherya ophenta wekeekhai vaavo aavikaninhe awe olaleerya ihapari sa Muluku mwa iyaakha sinceene, hata atthu yahaaphavela onwiriyana. (2 Pedru 2:5) Nave-tho Abrahamu aahooniherya wira aanimphenta Muluku ovikana itthu sotheene, vaavo aalakenle awe onvaha mwanawe Isakhi ntoko mukuttho. (Yakobo 2:21) Hiyo-tho nimphavela wooniherya ophenta wekeekhai, ntoko alopwana ale oororomeleya yoonihenrye aya, hata vahikhweyaka.

OPHENTA WEKEEKHAI EXEENI?

5. Ninrowa wooniherya sai ophenta wekeekhai?

5 Biibiliya onihimya wira nihaana wooniherya ophenta wahu, ohiya ni “molumo òrera pahi: ophentana wahu okhaleke w’ekekhai, woneyeke ni miteko sahu”. (1 Yohani 3:18) Niireke eyo enitaphulela wira nihimuleeleke mutthu wira ninnimphenta? Nnaari. (1 aTesalonika 4:18) Eyo enitaphulela wira khivaniphiyerya paahi ohimya wira “kinnoophentani”. Nihaana wooniherya ni miteko sahu. Mwa ntakiheryo, nasuwela wira annihu wala arokorihu kharina yoolya wala soowara, khivaniphiyerya paahi waamorela ikharari. (Yakobo 2:15, 16) Vamosaru, okhala wira ninnimphenta Yehova ni apinaatamu, nto khaninvekela paahi wira atthu anceene akhalihereke muteko woolaleerya, masi hiyo nihinavara muteko owo.​—Matheyo 9:38.

6, 7. (a) ‘Ophenta wohotha’ exeeni? (b) Muhimye matakiheryo a ophenta wowootha.

6 Murummwa Yohani ohimmye wira nihaana ophentana ‘mwekekhai ni miteko sahu’. Tivonto, ophenta wahu ohaana okhala ‘ophenta wohotha’. (aRoma 12:9; 2 aKorinto 6:6) Ikwaha sikina mutthu pooti wiipakelela wooniherya niphento. Masi niireke niphento nlo ti nekeekhai? Etthu xeeni eri vamurimani vawe? Khivaniweryaneya okhalana ophenta wowoothererya. Ophenta wowoothererya ti weethiru.

7 Nrowe nithokorerye matakiheryo vakhaani a ophenta wowoothererya. Okathi  Satana aalavunle awe ni Eva oJardim ya wEdeni, ele aahimmye awe yaakhala ntoko etthu yooreera. Masi sowiira sawe sahooniherya wira khahiyo siiso. (Maphattuwelo 3:4, 5) Okathi David aari awe mwene, aahikhalana mpatthani awe aitthaniwa Ahitofeli. Masi Ahitofeli aahimoototha Davidi ophavelaka mureerelo awe paahi. Sowiira sawe sahooniherya wira khahiyo aari mpatthani eekeekhai. (2 Samuweli 15:31) Olelo-va, anammwareya ni atthu akina anikumiherya okawanyeya mmulokoni, annirumeela ‘molumo òrera ni òwepesa’. (aRoma 16:17, 18) Pooti woothereryaka wira annaathokorerya akhwaaya, masi aphavelaka mureerelo aya paahi.

8. Niikoheke exeeni?

8 Ophenta wowoothererya ti wowuuliha muru, maana onirumeeliwa wira awokiweke atthu. Ekeekhai wira nnoowerya onwoka pinaatamu, masi khivaniweryaneya onwoka Yehova. Yesu aahimmye wira ale anaawoka akhwaaya, nrowa ohukhummwa vanceene. (Matheyo 24:51) Okhala wira na arumeyi a Yehova, hiyo khanimphavela okhala anawoothe. Tivonto nikoheke so: ‘Ophenta waka ti wekeekhai, wala kiniphavela mureerelo aka paahi?’ Nrowe nthokorerye inamuna 9 nikhanle ahu owooniherya ‘ophenta wohotha’.

NOONIHERYEKE SAI OPHENTA‘NI MITEKO NI MWEKEKHAI’?

9. Ophenta wekeekhai onrowa oniiriha opaka exeeni?

9 Muhakalaleke waavarela muteko akina hata atthu ahiwehaka enivara anyu. Nihaana ophavela owiirela akina itthu sooloka, hata ohikhanle mutthu onrowa osuwela. (Mmusome Matheyo 6:1-4.) Ananiya ni Safira khiyaarina muupuwelo wooloka. Okathi yaavanhe aya musurukhu aya, awo yaaphavela wira atthu akina asuwele. Yaahootha wira yaavanhe musurukhu wotheene, nto ehukhumu yahaaphwanya, maana awo yaamootha. (Miteko 5:1-10) Masi vakhala wira ninnaaphenta tthiri annihu, nnoosiveliwaka owiirela itthu sooreera, nihiphavelaka wira atthu akina asuwele. Hiyo pooti wiixutta etthu ni ntakiheryo na anna anikhaliherya Nikhuuru Noolamulela okumiherya yoolya yomunepani. Awo khaniphavela okupaliwa ni atthu, tivonto khanaaleela atthu miteko atonko aya okhaliherya.

Muhakalaleke waavarela muteko akina hata atthu ahiwehaka enivara anyu

10. Ninrowa waattittimiha sai akina?

10 Mwaattittimiheke atthu akina. (Mmusome aRoma 12:10.) Yesu aahaattittimiha arummwa awe, vaavale aarapihale awe inawu saya. (Yohani 13:3-5, 12-15) Nihaana wiimananiha vanceene wira niiyeviheke ntoko Yesu ni naavareleke muteko akina. Okathi ole, arummwa a Yesu khiyaasuwela nthowa naya Yesu aapanke awe ele, masi nuumala waakhela munepa wootteela yaahiiwexexa saana. (Yohani 13:7) Enamuna emosa ya waattittimiha atthu akina ori ohuupuwela wira na atthu ootepa otthuneya mwaha wa ihuweliho sahu, mihakhu sirina ahu aahiiso miritti sahu sa vameekhaaya. (aRoma 12:3) Khinnaakhalela nrima akina yaattottopeliwaka, masi ninnihakalala  naawo, hata noonaka wira ni hiyo-tho naaniphwanela ottottopeliwa.

11. Nthowa xeeni vanireerela aya waattottopela atthu ni murima wotheene?

11 Mwaattottopeleke akina ni murima wotheene. Mwaattottopeleke akina. Ninnisuwela wira ottottopela onnaalipiha atthu. (aÉfeso 4:29) Masi hiyo nihaana wiimananiha wira moolumo ahu ekhumeke vamurimani, ohiya olavula itthu moonyoholela. Nihaanyoheleleke atthu, masi nihisyakeke waavaha miruku akina vaatthuneyaka. (Miruku 29:5) Naarowa okhala anawoothe, vakhala wira ninnaattottopela atthu aryeene vaavo, masi yaahikhale khiyaalavula moohiloka. Niphento na murummwa Paulo naari nekeekhai. Okathi aalepenle awe epaphelo maKristau a oKorinto, aahaattottopela mwaha wa itthu sooreera yaapaka aya. (1 aKorinto 11:2) Masi okathi vaatthuneya aya waavaha miruku, owo aanaavaha ni aanaatthokiherya saana mathowa ene.​—1 aKorinto 11:20-22.

Ninniwooniherya annihu niphento ni owaakhela, vaavo vanaakhaliherya ahu okathi anitthuneya aya nikhaliheryo (Nwehe ettima 12)

12. Ninrowa wooniherya sai ophenta wekeekhai okathi oniwaakhela ahu aletto?

12 Nwaakheleke aletto. Yehova onninruma waatthukulela matata annihu ni arokorihu. (Mmusome 1 Yohani 3:17.) Masi nihaana okhalana mathowa ooloka okathi oniwaakhela ahu akina. Pooti wiikoha so: ‘Kiireke owannyaka kinaalattula paahi apatthani aka wala yaale arina miritti mmulokoni? Kinaalattula yaale paahi kinuupuwela aka wira nave awo-tho anookittikiherya? Aahiiso kinnaalattula anna ni arokora ahinaasuwela aka saana ni ahinrowa owerya okittikiherya itthu siwiirenle aka?’ (Luka 14:12-14) Nkahaya muupuwele ela: Mwaarowa woonela sai vaakhanle wira munna onnoovekelani nikhaliheryo na musurukhu, mwaha woowi ookhala nakoso ohimweettenle saana? Wala vaakhanle wira moomulattula munna vatthokoni vanyu, masi owo khooxukhurenleni? Muupuweleke ele Yehova onihimya awe: “Mwakhelaneke vaté vanyu, muhàpanaka”. (1 Pedru 4:9) Nnoohakalala naavahaka ni murima wotheene.​—Miteko 20:35.

13. (a) Exeeni eniwerya weehererya ophenta wahu wekeekhai? (b) Exeeni nikhanle ahu oopaka wira naakhaliherye ale arina mikhalelo soolosowa?

13 Mwaakhaliheryeke ale ootteettheya. Yooruma ya mBiibiliyani yoowi, “mwakhaliheryeke ale òlosowa, mwavileleke atthu othene”, pooti weehererya ophenta wahu wekeekhai. (1 aTesalonika 5:14) Anna anceene yaarina waamini woolosowa khalai, vano waamini waya woolipa. Masi akina nlelo anitthuneya waavilela ni waakhaliherya. Ninrowa waakhaliherya sai? Hiyo pooti omurumeela Biibiliya wira naalipihe, waalattula wira nalaleerye hoothe aahiso  waawiriyana mixankiho saya paahi. Nave khanimphavela waavaha masina annihu oowi, ale “toolosowa”, wala ale “toolipa”. Masi nihaana osuwela wira khula mutthu ookhalana mikhalelo sawe soolipa ni soolosowa. Hata murummwa Paulo aaheemererya wira aahikhalana mikhalelo soolosowa. (2 aKorinto 12:9, 10) Otheene ahu ninnitthuneya okhaliheriwa ni olipihiwa ni akina.

14. Nipakeke exeeni wira nikhalaneke murettele ni annihu?

14 Mphaveleke murettele. Murettele orina ahu ni annihu khonithummwa ni musurukhu. Hata noonaka wira nihiireliwa etthu moohixariya, nihaana wiimananiha ophavelasa murettele. (Mmusome aRoma 12:17, 18.) Akhala wira noolavula aaahiiso opaka etthu enimunanara munna, nihaana onvekela musammaha. Masi nihaana opaka eyo mwekeekhai. Mwa ntakiheryo, ohiya ohimya wira “mukisaamihe moonaka wira kihootthekelani”, nto nihaana weemererya ottheka wahu, khiyahimya so: “Mukisaamihe mwaha wa woowereyani ni moolumo aka”. Mukasamentoni, murettele ti wootepa otthuneya. Ti vootthekeya vanceene, vakhala wira anamathelana annithokoreryana saana vari atthu akina, masi yakhala mekhaya khanlavulihana, anniruwanana wala omanana.

15. Ninrowa wooniherya sai wira ninnilevelela ni murima wotheene?

15 Muleveleleke ni murima wotheene. Akhala wira nootthekeliwa, ninnilevelela ni oliyala etthu eyo. Nihaana opaka eyo hata mutthu owo ohisuwelaka wira oonitthekela. Nihaana ‘ovilelana mukina ni mukhw’awe, nakhelanaka n’uphenta, nthokoreryaka okhapelela wiwanana omosaru onvahiwahu n’iroho yowarya ni murettele onnithukumanya’. (aÉfeso 4:2, 3) Nalevelela mwekeekhai, khaninrowa omakelaka wuupuwela etthu ele niireliwe ahu, maana ole omphenta “khanùpuwela sotakhala sìreliwawe”. (1 aKorinto 13:4, 5) Akhala  wira nimmakela wuupuwela yootakhala yiireliwe ahu, pooti ohonona waataana wahu ni muuna wala murokora ni Yehova. (Matheyo 6:14, 15) Ninnooniherya wira noolevelela ni murima wotheene, vaavo vaninvekelela ahu ole onitthekenle.​—Luka 6:27, 28.

16. Nooneleke sai miritti sa vameekhaaya mmutekoni mwa Yehova?

16 Muhiphaveleke mureerelo anyu. Ninrowa wooniherya sai wira ophenta wahu ti wekeekhai, okathi onaakhela ahu muritti wa vameekhaaya mmutekoni mwa Yehova? Nihaana otthara miruku sa mBiibiliyani sini: “ahikhale omphavela oreriwa wawe, nto aphaveleke sinaphwanyiha oreriwa akhw’awe”. (1 aKorinto 10:24) Mwa ntakiheryo, okathi wa asembeleya ni kongresu, anamathoonyerya tanipacerya ophiya mapuro ale anamunceene ahinatthi ophiya. Nto awo yanwerya opacerya othanla mapuro ooloka wira akilaathi ni amusi aya. Masi, anceene a anna ala, anithanla mapuro ookiserya. Nto awo annooniherya ophenta wekeekhai. Munrowa otthara sai ntakiheryo naya nooloka?

17. MuKristau apaka etampi yuulupale, ophenta wekeekhai onrowa omwiiriha opaka exeeni?

17 Muhimyeke ni muttharuweke itampi munipaka anyu muhooniwaka. MaKristau makina anipaka itampi suulupale anneererya wiipithiha. Woonasa wene anuuliwa muru wala khaniphavela waanyoonyiha atthu akina. (Miruku 28:13) Masi wiipithiha etampi khahiyo wooniherya niphento, maana eyo ennimukumiherya maxakha namattheka owo ni atthu akina. Sai-sai? Okhala wira Yehova pooti ohiya oreeliha muloko ni munepa awe wotteela, nto eyo enimwiiriha ohikhala murettele mmulokoni mmo. (aÉfeso 4:30) Akhala wira muKristau onnipaka etampi yuulupale, ophenta wekeekhai onoomwiiriha olavulana axitokweene wira amukhaliherye.​—Yakobo 5:14, 15.

18. Xeeni ophenta wekeekhai oryaaya wootepa otthuneya?

18 Ophenta ti mukhalelo wootepa otthuneya ovikana mikhalelo sotheene. (1 aKorinto 13:13) Onnaakhaliherya atthu waasuwela atthareli a Yesu eekeekhai, ni ale animutakiha Yehova, yoowo ori Maphattuwelo a ophenta. (aÉfeso 5:1, 2) Paulo aahimmye wira ahaarina ophenta, weeso khaarowa okhala etthu. (1 aKorinto 13:2) Nto otheene ahu nthipeleleke wooniherya ophenta, ohiya ni “molumo” paahi, masi-tho ni ‘ekekhai ni miteko sahu’.