Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Outubro 2017

Nyuwo mwaanisuwela?

Nyuwo mwaanisuwela?

Xeeni Yesu aakhoottihenrye awe atthareli awe olapha?

NLAMULO na Moise naaniweemererya atthu olapha ikwaha sikina ehimyaka so: “kinnimulaphela Muluku”, wala “kinnilipela mwa nsina Yehova”. Masi, okathi wa Yesu, olapha yaari yoolema yuulaanne eriyari ya aYuda nto awo yaanilaphela khula etthu yaahimya aya. Awo yaanipaka eyo ephavelaka olipiherya etthu yaahimmye aya. Awo yaanilapha wira etthu yaahimya aya ekupaliwe okhala ekeekhai, masi Yesu ikwaha piili aahihimya wira yoolema ele yaari yoohiloka. Owo aahimmye so: “Olavula wanyu okhaleke ‘ayo!’, walá ‘nnari!’”​—Matheyo 5:33-37; 23:16-22.

Dicionário Teológico do Novo Testamento”, onihimya wira Talmude aahiiso Iliivuru sa khalai sa aHéberi, sinninikhaliherya oweha moota yoolema ele yuulanne aya, vaavo aYuda yaaphavela aya wooniherya wira moolumo aya yaari a ekeekhai. Ninnisuwela eyo mwaha woowi Talmude onnihimya itthu sinceene saakhanle oomwiiriha mutthu waakhwaniherya wala ohaakhwaniherya olapha wawe.

Yesu khahiyo aari mutthu oopacerya wooniherya wira olapha etthu yootthekeya. Mwa ntakiheryo, Mulipa oolepa sowiiraneya sa aYuda, Flávio Josefo aahilepa voohimya sa etiini emosa ya aYuda yaawo yahaalapha. Atthu a etiini eyo yaakupali wira olipela wala olapha yaari etthu yootakhala ovikana wootha. Awosa yuupuwela wira akhala wira mutthu onnilapha wira atthu akina emukupali, eyo enooniherya wira mutthu owo nawoothe. Mwa ntakiheryo yoolepa ya Osuwela (23:11) yeeyo eri egrupu ya Iliivuru sa apócrifo, wala iliivuru sihinkupaliwa okhala Nuulumo na Muluku, enihimya so: “Mutthu onlapha imara sinjene onninjererya sottheka sawe”. Yesu aahikhoottiha olapha mwaha wa itthu soohikhala sa faita. Akhala wira okathi wotheene ninhimya ekeekhai, khanintthuneya olapha wala olipela wira atthu akupali ele enihimya ahu.