Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Janero 2017

Xeeni Wiiyeviha Nlelo Oryaaya Wootthuneya?

Xeeni Wiiyeviha Nlelo Oryaaya Wootthuneya?

“Vari wiyeviha, ankhili ari vavo”.MIRUKU 11:2.

ISIPO: 38, 11

1, 2. Xeeni Muluku ohalaka omukhootta Sawuli? (Nwehe elatarato yoopacerya)

OKATHI Yehova aamuthanlale awe Sawuli okhala mwene, Sawuli aari oowiiyeviha. (1 Samuweli 9:1, 2, 21; 10:20-24) Masi nuumala okhala mwene, owo aahipacerya wiixinnuwiha. Okathi omosa anakhotto anceene aFilisti yaahirwa owana ni aIsarayeli. Profeta Samuweli aahimuleela Sawuli wira aamoorwa onvaha mukuttho Yehova. Masi, Samuweli ohinatthi ophiya, anakhotto aIsarayeli yaahipacerya woova ni anceene yaahimmwareela Sawuli. Owo khaapinxe murima, nto khaawenrye omulipelela Samuweli wira ovahe mukuttho, masi aahivaha mmensawe. Sawuli kheemereriwa ovaha mukuttho, nto nuumala ovaha mukuttho Yehova khaasiveliwe.1 Samuweli 13:5-9.

2 Nuumala Samuweli ophiya, aahimpwapwela Sawuli mwaha wa ohimwiiwelela Yehova. Masi Sawuli oona wira khaapanke etthu yoohiloka. Ohiya weemererya soovonya sawe, owo aahiwootherya atthu akina. (1 Samuweli 13:10-14) Okhuma okathi ole, Sawuli aahipaka itthu sikina sooniherya  wiixinnuwiha. Nto Yehova aahimukhootta ovikaniha okhala mwene. (1 Samuweli 15:22, 23) Wanipacerya Sawuli aari mutthu ooloka masi wookiseryani aari ootakhala.1 Samuweli 31:1-6.

3. (a) Exeeni atthu anceene anuupuwela aya voohimya sa wiiyeviha? (b) Makoho xeeni ninrowa ahu othokorerya?

3 Anamunceene olelo-va anoona wira khivaniweryaneya mutthu wiisumaliha ni okhalana okumi wooloka okathi omosaru. Awo anniihimya wira yooniweke okhala oovuwa waavikana akina. Mwa ntakiheryo, mulipa oovuwa onipaka ifilme ni oniirela mpantta epoliitika, onihimya so: “Okhala wene nkiniisumaaliha, nave nkinikhala-khala kiisumaalihaka”. Masi xeeni oryaaya vootthuneya maKristau okhala oowiiyeviha? Wiiyeviha onitaphulela exeeni? Mwaha ola, ninrowa waakhula makoho awo. Nto mwaha onittharelana, ninrowa woona moota woovikaniha okhala oowiiyeviha hata okathi wooxankiha.

XEENI WIIYEVIHA ORYAAYA WOOTTHUNEYA?

4. Wiisoona wala wiikuxererya onitaphulela exeeni?

4 Biibiliya onnooniherya wira wiiyeviha mukhalelo woovirikana ni wiisumaaliha. (Musome Miruku 11:2.) Davidi aahimuxonttela Yehova oriki: “Musuke murim’aka, ohisòné”. (Esalimo 19:14) Wiisoona aahiiso wiikuxererya onitaphulela exeeni? Onitaphulela opaka etthu eheemereriwa ahu aahiiso ehirina ahu ehakhi, waaniheryasa nipanke mwaha woohipixa murima aahiiso wiikuxererya. Mwaha woohimalela, okathi mukina ninnipaka itthu mowiisoona wala wiikuxererya. Masi ntoko noonale ahu ntakiheryo na Mwene Sawuli, nto akhala wira eyo ti yoolema ahu, Yehova khonrowa osiveliwa. Esalimo 119:21 enihimya wira Yehova ‘onimwapwapwela alipa-òwisòna’. Xeeni Yehova onipaka awe eyo?

Nakhala oowiiyeviha ninnooniherya wira ninnimuttittimiha Yehova

5. Xeeni wiikuxererya eryaaya etthu yootthekeya vanceene?

5 Wanipacerya, akhala wira ninnipaka etthu mowiikuxererya, nnooniherya wira khanimmuttittimiha Yehova Muluku ahu ni Namalamulela ahu. Yanenli, vaavo vanipaka ahu itthu sihirina ahu ehakhi, ikwaha sinceene ninrowa onyakulihanaka ni atthu akina. (Miruku 13:10) Yaneeraru, akina yasuwela wira noopaka etthu mowiikuxererya, hiyo pooti wiixoonaka okhala ntoko alolo. (Luka 14:8, 9) Tthiri ninnoona nthowa naya Yehova oniphavela awe wira niiyeviheke.

WIIYEVIHA ONITAPHULELA EXEENI?

6, 7. Wiisumaaliha onivarihana sai ni wiiyeviha?

6 Wiiyeviha onnivarihana ni wiisumaaliha. MuKristau oowiiyeviha khoniixinnuwiha, masi onniwoona akina okhala aalupale onvikana yena. (aFilipi 2:3) Mutthu oowiiyeviha okhala wene towiisumaaliha. Onnisuwela itthu sihiniwerya awe opaka ni mowiiyeviha onneemererya soovonya sawe. Owo onniwiriyana miruku sa atthu akina ni onniixutta etthu. Yehova onnisiveliwa vanceene ni mutthu oowiiyeviha.

7 Biibiliya onnooniherya wira mutthu oowiisumaaliha  onnisuwela itthu oniwerya awe ni ohiniwerya awe. Eyo ennimukhaliherya waattittimiha atthu akina ni waathokorerya mwa xariya.

8. Wira nivikanihe okhala oowiiyeviha, itthu xeeni nintthuneya ahu osyaka?

8 Moohisuwela, hiyo pooti opaka itthu sinooniherya wiixinnuwiha. Eyo eniweryaneya sai? Hiyo pooti opaceryaka wiixoona okhala a faita waavikana atthu akina, mwaha wa atthu nnasuwela ahu, aahiiso mwaha wookhalana miritti mmulokoni. (aRoma 12:16) Nave hiyo pooti opaka itthu niphavelaka ohimmwa paahi. (1 Timótheyo 2:9, 10) Waaniheryasa ninnipacerya waaleela atthu akina etthu anitthuneya aya opaka aahiiso ohipaka.1 aKorinto 4:6.

9. Moota xeeni atthu akina anipacerya aya wiixinnuwiha? Nvahe ntakiheryo na mBiibiliyani.

9 Hiyo pooti opacerya wiixinnuuha akhala wira khanniwerya okasoopa soophavela sahu soohiloka. Atthu anceene anniixinnuuha mwaha woowi aniphavela wiivuwiha, annaakhalela nrima atthu akina, aahiiso khanikasoopa onanariwa waya. Eyo yaahiiraneya ni atthu akina anilavuliwa mBiibiliyani, ntoko Absalomi, Oziya ni Nabukhodonosori. Yehova aahiwooniherya wira yahaana wiiyeviha.—2 Samuweli 15:1-6; 18:9-17; 2 Wahala 26:16-21; Daniyeli 5:18-21.

10. Xeeni ninsyaka ahu waaphukela akina? Nvahe ntakiheryo na mBiibiliyani.

10 Woonasa wene aakhala mathowa makina aniwiiriha atthu akina ohiiyeviha. Nkahaya muupuwele ntakiheryo na Abimeleki ni Pedru. (Maphattuwelo 20:2-7; Matheyo 26:31-35) Niireke atthu ala yaari owiixinnuwiha? Niireke khiyaasuwela itthu sotheene aahiiso yaapanke itthu moohuupuwela? Okhala wira hiyo khaninwerya osoma mirima sa atthu, nto khinnaaphukela akina.Mmusome Yakobo 4:12.

OPURO AHU MMUTTHENKESONI MWA MULUKU

11. Etthu xeeni enitthuneya ahu osuwela?

11 Mutthu oowiiyeviha, onnisuwela opuro awe mmutthenkesoni mwa Muluku. Yehova tootthokiheya. Owo onvaha khula mutthu mmulokoni opuro awe. Tivonto, otheene ahu naatthu ootthuneya. Yehova onvaha khula mutthu iparakha soovirikana ni osuwela ovara miteko soovirikana ni oneemererya wira nithanleke moota woorumeela. Akhala wira nnimwiiyeviha, nnoorumeelaka iparakha sahu mwa enamuna Yehova oniphavela awe. (aRoma 12:4-8) Noosuwela wira Yehova onilipelela wira nrumeeleke iparakha sahu mwa enamuna eninvuwiha ni waakhaliherya atthu akina.Mmusome 1 Pedru 4:10.

Ntakiheryo na Yesu ninniixuttiha exeeni, okathi miritti sahu siniturukeya aya? (Nwehe ittima 12-14

12, 13. Nuupuweleke exeeni akhala wira muteko oninvarela ahu Yehova onniturukeya?

12 Nuuvira wa okathi, muteko oninvarela ahu Yehova pooti oturukeya. Mwa ntakiheryo, nkahaya muupuwele itthu saamwiiranenle Yesu. Wanipacerya owo aakhala mekhawe ni Tiithi awe. (Miruku 8:22) Nuumala-vo, aahimukhaliherya Yehova opattuxa malaikha, olumwenku ni atthu. (aKolosi 1:16) Muhoolo mwaya, Yesu aahirummwa orwa valaponi. Aahiyariwa ntoko pinaatamu ni aahinnuwa. (aFilipi 2:7) Nuumala okhwa, Yesu aahitthikela wiirimu, nto mwakha wa 1914 Yesu ookhalihiwa Mwene a Omwene wa Muluku. (aHéberi 2:9) Muhoolo, nuumala omaliha olamulelo awe wa iyaakha ekonto emosa, Yesu onrowa onvahererya Omwene Yehova nto “Muluku onomaliherya oruma sothene”.1 aKorinto 15:28.

 13 Nave-tho, pooti onikhumelela marukunuxo manceene mookumini mwahu. Okathi mukina miritti sahu pooti oturukeya mwaha wa soothanla sahu. Mwa ntakiheryo, woonasa wene, khinaathenle masi vano noothela. Aahiiso nihaayara anamwane. Nave okathi mukina ninnipaka marukunuxo wira nimurumeeleke Yehova muteko wa orummwa wa okathi wotheene. Ikwaha sikina, mwaha wa itthu sinnikhumelela nto miritti sahu pooti oturukeya. Pooti wira ninniwerya ovara vanceene aahiiso khaninwerya ovara ntoko naaphavela ahu. Hata nryeene amiravo, nuuluvanle ene aahiiso nrine ene ekumi yooloka wala niwereyasiwaka, Yehova onnisuwela moota khula mutthu vaniwerya awe omurumeela. Owo khonlipelela wira nnoopaka itthu sihiniwerya ahu. Nave onnihakalala ni khula etthu enimpakela ahu.aHéberi 6:10.

14. Moota xeeni wiiyeviha onnikhaliherya aya okhala oohakalala okathi wotheene?

14 Yesu aanihakalala ni khula muteko aavahiwa awe ni Yehova, hiyo nave nnoowerya ohakalala ni miteko ninvahiwa ahu ni Yehova. (Miruku 8:30, 31) Mutthu oowiiyeviha, onnihakalala ni miteko ni miritti onivahiwa awe mmulokoni. Owo khoniwehexexa itthu sinipakiwa ni atthu akina. Ohiya-vo, onnisiveliwa ni muteko awe mmutthenkesoni mwa Muluku. Onnoona okhala eparakha enikhuma wa Yehova. Nave mutthu oowiiyeviha, onnaattittimiha atthu akina ni onnaakhaliherya moohakalala. Owo onnoona wira Yehova ohaavaha muteko aya.aRoma 12:10.

NOONIHERYEKE SAI WIIYEVIHA?

15. Ntakiheryo na Gedeyoni ninniixuttiha exeeni?

15 Gedeyoni oovaha ntakiheryo nooloka na wiiyeviha. Okathi Yehova aamuthanlale awe owoopola aIsarayeli wa anakhotto oMadiyani,  Gedeyoni aahimmye so: “Nloko naka ti noyevexa eriyari ya maloko a Manasé: vano miyo kòkiserya oyeva vatthokoni v’atithi aka”. (Makhulupale 6:15) Masi Gedeyoni aahimuroromela Yehova ni aaheemererya muteko aavahiwe awe. Nuumala-vo, Gedeyoni aaniphavela osuwela ele Yehova aaphavela awe, nto aahinvekela malakiheryo. (Makhulupale 6:36-40) Nnaamwi Gedeyoni aari mulopwana aikuru ni oolipa murima, owo aahikhalana ankhili ni aaniikasoopa. (Makhulupale 6:11, 27) Okathi atthu yaaphavela aya wira Gedeyoni okhale mwene aya owo aahikhootta. Nuumala opaka ele Yehova aavekenle awe, Gedeyoni aahitthikela owaani.Makhulupale 8:22, 23, 29.

16, 17. Moota xeeni mutthu oowiiyeviha oninnuwa awe momunepani?

16 Akhala wira mutthu onneemererya muritti musya aahiiso oniphavela okhaliherya vanceene mmulokoni, eyo khentaphulela wira owo khoniiyeviha. Biibiliya onihimya wira ti vooloka, arumeyi a Yehova wiimananiha waarumeela annaya ni wunnuwa momunepani. (1 Timótheyo 4:13-15) Niireke nihaana ovahiwa muritti musya wira ninnuweke momunepani? Nnaari. Otheene ahu nnoowerya wunnuuherya mikhalelo sahu sooloka ni osuwela orumeela saana itthu Yehova onivanhe awe wira nimurumeeleke ni naakhaliheryeke akina.

17 Ohinatthi weemererya muteko, mutthu oowiiyeviha onniimananiha oweha itthu sinivekeliwa awe. Onninvekela Yehova malakiheryo ni onnithokorerya mwaha owo wira owehe akhala wira onoowerya ovara muteko owo. Niireke onookhalana okathi ni ikuru wira ovareke itthu sikina sootthuneya? Akhala wira khoniwerya, niireke aakhala atthu akina akhanle oovara miteko sinivara awe vano? Nuumala wuupuwelela, mutthu oowiiyeviha onnisuwela wira khonrowa owerya okhapelela muritti owo. Akhala wira hiyo naatthu oowiiyeviha, nnookhootta muritti owo.

18. (a) Exeeni mutthu oowiiyeviha onipaka awe okathi onivahiwa awe muteko musya? (b) ARoma 12:3 onnikhaliherya sai okhala oowiiyeviha?

18 Yehova oniphavela wira ‘netteke ni wiyeviha’ ni yena. (Mikeya 6:8) Tivonto, okathi onivahiwa ahu muteko musya, ninniphavela malakiheryo awe ni onvekela wira onikhaliherye ntoko Gedeyoni aapanke awe. Nihaana wuupuwelela vanceene ele Yehova onnileela awe omurumeelaka Biibiliya ni mutthenkeso awe. Masi nuupuweleke wira khula etthu eniwerya ahu opaka mmutekoni mwa Yehova khahiyo mwaha wa owerya wahu, masi okhala wira Yehova toowiiyeviha ni onninikhaliherya. (Esalimo 18:36) Mutthu oowiiyeviha khonrowa ‘wìsona ovikana simphwanelawe’.—Mmusome aRoma 12:3.

19. Xeeni vanitthuneya ahu okhala oowiiyeviha?

19 Mutthu oowiiyeviha onnisuwela wira Yehova paahi tonireerela ovuwihiwa, okhala wira owo ti Mpattuxa ni Mukhulupale a olumwenku wotheene. (Wisupulula 4:11) Nakhala oowiiyeviha, nnoohakalalaka ni khula muteko oninvarela ahu Yehova. Nave ninrowa ottittimihaka moonelo ni muupuwelo wa anna ni arokora, nto eyo enoonikhaliherya okhala oowiiraana. Ohinatthi opaka etthu, mutthu oowiiyeviha onnuupuwela oratteene, wira osyake soovonya suulupale. Yehova onnisiveliwa vanceene ni atthu oowiiyeviha. Ti nthowa naya, oryaaya vootthuneya atthu a Muluku wiiyeviha. Mwaha onittharelana, ninrowa woona moota woovikaniha okhala oowiiyeviha okathi wa mixankiho.