Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Janero 2017

Munoowerya Wiiyeviha Hata Mweehereriwaka

Munoowerya Wiiyeviha Hata Mweehereriwaka

“Mwetteke ni wiyeviha vamaithoni va Muluku”.MIKEYA 6:8.

ISIPO: 48, 1

1-3. Exeeni profeta aakhumme oYuda ahaapanke awe ni yaamukhumelenle exeeni? (Nwehe elatarato yoopacerya.)

MWENE YEROBOWAMU a wIsarayeli aahimpaka altari a muluku eethiru oBetheli. Yehova aahimuruma profeta a oYuda wira amuleele Yerobowamu muhupi woophukela. Profeta ole oowiiyeviha aahimwiiwelela Yehova ni aahimuleela mwene muhupi ole. Mwene aahinanariwa ni profeta ole, masi Yehova aahimukhapelela.1 Mamwene 13:1-10.

2 Yehova aahimuleela profeta ole wira ohilye aahiiso ohiwurye etthu muttetthe wa wIsarayeli ni okathi wootthika aahaana ovira ephiro ekina. Masi otthikelaka owaani, profeta ole aahimphwanya mulopwana oowuuluvala, yoowo anwonke, ohimyaka wira aahikhalana muhupi wa Yehova. Mulopwana ole oowuuluvala ahimulattula profeta wira orowe owannyawe wira alye ni awurye. Profeta ole khaamwiiwelenle Yehova ni aahirowa owannyawe mulopwana ole oowuuluvala. Nto Yehova khaasiveliwe. Otthikelaka owaani profeta ole aahiiviwa ni kharamu.1 Mamwene 13:11-24.

 3 Hiyo khaninsuwela etthu yaamwiirinhe profeta ole onwiriyana mulopwana ole oowuuluvala, omuhiya Yehova. Masi ninnisuwela wira khaavikaninhe ‘wetta mowiyeviha’. (Mmusome Mikeya 6:8.) MBiibiliyani, weetta ni Yehova onihela muhina omuroromela, olipana malakiheryo awe ni omwiiwelela. Mutthu oowiiyeviha onnisuwela wira ohaana onvekela Yehova moohihiyererya. Vaakhanle wira profeta ole aari oowiiyeviha, ammukoha Yehova akhala wira aahituruka malakiheryo anvanhe awe. Hiyo nave, okathi mukina ninnipaka soothanla sooxankiha ni woonasa wene khaninsuwela ele Yehova oniphavela awe wira nipake. Masi, akhala wira naatthu oowiiyeviha, nnonvekela Yehova malakiheryo awe wira nisyake soovonya suulupale.

4. Exeeni ninrowa ahu othokorerya mwaha ola?

4 Mwaha ovinre, nihiixutta ele wiiyeviha enitaphulela aya ni xeeni vanitthuneya aya wiiyeviha olelo-va. Masi ninrowa wuncererya sai wiiyeviha wahu? Nave mikhalelo xeeni saarowa weehererya wiiyeviha wahu, niire so, wooniherya akhala wira naatthu oowiiyeviha aahiiso nnaari? Nrowe nithokorerye mikhalelo miraru.Miruku 11:2.

OKATHI MAKHALELO AHU ANITURUKEYA AYA

5, 6. Barizilayi oonihenrye sai wiiyeviha?

5 Moota nnoonela ahu okathi mikhalelo ni miteko sahu siniturukeya aya, onimooniherya akhala wira naatthu oowiiyeviha. Nnoowerya wiixutta etthu ni ntakiheryo na Barizilayi, mpatthani oororomeleya a Mwene Davidi. Okathi Barizilayi aarina awe iyaakha 80, Davidi aahimulattula wira akhaleke empa ya mwene. Nnaamwi waari ottittimihiwa vanceene, Barizilayi aahimuleela mwene wira vaamuloka onvaha eparakha eyo mulopwana iitthaniwa Kimihami, yoowo woonasa wene aari mwaana a Barizilayi.—2 Samuweli 19:32-38.

6 Exeeni yaamwiirinhe Barizilayi okhootta nlattulo na mwene? Niireke aasyaka muritti aahiiso khaaphavela okukhumuwa? Nnaari, maana Barizilayi aari mutthu oowiiyeviha. Owo aanisuwela wira makhalelo awe yaahiturukeya ni aneemererya eyo. (Mmusome aGalasia 6:4, 5.) Ntoko Barizilayi, nihaana okhala oowiiyeviha. Ohiya owehexexa soophavela sahu aahiiso wiilikanyiha ni atthu akina, nihaana wiimananiha onvaha Yehova ele eniwerya ahu. Ela etthu yootepa otthuneya ovikana muritti wa vameekhaaya aahiiso ovuwa. (aGalasia 5:26) Akhala wira nnimwiiyeviha, nnoovaraka moowiirana ni anna ni arokora wira ninvuwiheke Yehova ni waakhaliherya atthu akina.1 aKorinto 10:31.

7, 8. Wiiyeviha onnikhaliherya sai ohiiroromela?

7 Vannixankiha okhala oowiiyeviha akhala wira noovahiwa miritti sinceene aahiiso owerya. Nave ninniixutta etthu ni ntakiheryo na Nehemiya. Okathi Nehemiya aiwale awe wira atthu a Muluku yaari oYerusalemu yaahikhalana mixankiho sinceene, owo aahimuxonttela Yehova wira aakhaliherye. (Nehemiya 1:4, 11) Yehova aahaakhula nivekelo na Nehemiya. Mwene Artaserse aahimukhaliha guvernatoro a mmuttettheni mwawe. Nnaamwi Nehemiya aarina owerya ni aari namuhakhu owo khairoromela. Owo aanitthara malakiheryo a Yehova ni aanisoma khula nihiku Nlamulo na Muluku. (Nehemiya 8:1, 8, 9) Nehemiya anaalamulela atthu anceene. Masi, owo khaarumeela okhulupale awe wira ophwanye mireerelo sawe paahi aahiiso waahasula atthu akina.Nehemiya 5:14-19.

 8 Ntoko Nehemiya, akhala wira ninnincereriwa miritti aahiiso muteko ahu onniturukeya, nihaana wiimananiha okhala oowiiyeviha. Hiyo khanimphavela ororomela owerya aahiiso osuwela wahu. Masi, mutthu aarowa opacerya sai wiiroromela? Mwa ntakiheryo, nkahaya mmuupuwele mutokweene mmosa onithokorerya myaha sa mmulokoni ohipacenrye ovekela. Nave munna aahiiso murokora onipaka yoothanla awe, nuumala-vo onanvekela Yehova wira oreelihe yoothanla eyo. Masi, mutthu oowiiyeviha khoniiroromela mmensawe, hata okathi onipaka awe etthu olimalenle awe. Khula okathi onnuupuwela wira mikhalelo sawe ni owerya wawe khonlikana ni Yehova. (Musome Miruku 3:5, 6.) Olelo-va, atthu anceene molumwenkuni toowiitthuna ni aniphavela okhala nipuro noopacerya. Masi, arumeyi a Yehova khanipaka eyo. Khanuupuwela wira aakhalana miritti siniwiiriha okhala atthu a faita waavikana amusi aya aahiiso anna a mmulokoni. Ohiya-vo, nihaana wuupuwela muteko ahu mmutthenkesoni mwa Muluku nivaraka vamosa ni anna ni arokora.1 Timótheyo 3:15.

OKATHI ONIVAANYIHIWA AHU AAHIISO OTTOTTOPELIWA

9, 10. Wiiyeviha onrowa onikhaliherya sai okathi onivaanyihiwa ahu aahiiso ottottopeliwa?

9 Okathi atthu akina annivaanyiha aya moohixariya, hiyo pooti onanariwa. Eyo yaahiraneya ni Hanna. Nnaamwi aaphentiwa  vanceene ni iyawe, Hanna khaahakalala. Owo aaniveehiwa khula okathi ni Peninna, yoowo aari namwaatteiwa awe. Hanna aaniphavela waayara anamwane masi khaayara. Nihiku nimosa, okathi ahaareere awe oriipiwa murima, aahirowa empa ya Muluku ovekela. Eli, yoowo aari Mukhulupale a Anamukuttho, okathi anwenha awe Hanna inlaka aahimootherya wira aaroohapaliwa! Masi Hanna khaananariwe vanceene. Owo aahimwaakhula Eli mwa nttittimiho. Muhoolo mwaya, Hanna aahipaka nivekelo nooniherya omwaamini ni omphenta wawe Yehova.1 Samuweli 1:5-7, 12-16; 2:1-10.

10 Wiiyeviha onoonikhaliherya ‘oxintta sotakhala niraka sorera’. (aRoma 12:21) Olumwenku ola wa Satana woosareya itthu sootakhala. Tivonto nihitikhineke akhala wira ninnithokoreriwa moohixariya. Nnaamwi itthu iyo siniirihaka onanariwa, nihaana owanana moonelo owo. (Esalimo 37:1) Masi vannitepa owereya akhala wira nookhalana muxankiho ni munna aahiiso murokora a mmulokoni. Akhala wira eyo enimwiiraneya, nihaana omutakiha Yesu. Biibiliya onihimya so: “Aruwaniwaka, owo kharuwana; ahaxiwaka, owo khupuwenle wunla ikuhu”. Ohiya vo “ahìvelela mmatatani mwawe ole onlamula n’ixariya”. (1 Pedru 2:23) Yesu aari oowiiyeviha ni aanisuwela wira Yehova aarowa omaliha ohixariya. (aRoma 12:19) Hiyo nave, nihaana wiiyeviha ni ‘ohalivela sotakhala ale annirela sotakhala’.1 Pedru 3:8, 9.

11, 12. (a) Ninrowa ovikaniha sai wiiyeviha okathi ninttottopeliwa ahu aahiiso onyoholeliwa? (b) Ninrowa wooniherya sai wira ninniiyeveiha mwa enamuna eniwara ahu ni wiitthokiha?

 11 Nave-tho, wiiyeviha wahu pooti weehereriwa okathi yoole atthu annittottopela aya aahiiso oninyoholela. Estheri aahittottopeliwa ni onyoholeliwa vanceene. Owo aari muthiyana ootepa oreera oPersia. Waahivira mwaakha Estheri oottaka makhura ooreeriha erutthu, vamosa ni athiyana akina yaaphavela-tho wiireeriha wira yooniweke saana ni mwene. Estheri taathanliwe ni mwene wira okhale pwiyamwene. Masi, nnaamwi aavahiwe eparakha ele owo khaixunnuwiha. Estheri khaaphavela mureerelo awe paahi. Owo aahivikaniha wiiyeviha, oreera murima ni ottittimiha.Estheri 2:9, 12, 15, 17.

Niireke mawarelo ahu annooniherya wira ninnimuttittimiha Yehova ni atthu akina aahiiso anooniherya wira naatthu oohiiyeviha? (Nwehe ettima 12)

12 Akhala wira naatthu oowiiyeviha, ninrowa owaraka ni wiitthokiha mwa enamuna enooniherya waattittimiha akina ntoko siniittittimiha ahu. Ohiya owara niphavelaka ohimmwa, nihaana ophavela okhalana “murima womàla ni wa murettele”. (Mmusome 1 Pedru 3:3, 4; Yeremiya 9:23, 24) Moolumo ni miteko sahu sinimooniherya omutthu ahu. Mwa ntakiheryo, hiyo pooti owiiriha atthu onoonaka okhala ootepa otthuneya mwaha wa muteko onivara ahu, itthu sinisuwela ahu aahiiso atthu anaasuwela ahu. Nave hiyo pooti owiiriha atthu akina woona wira muteko nivanre mekhihu nnaamwi atthu akina anikhalihenrye ene. Masi nkahaya mmuupuwele Yesu. Owo anwerya owooniherya atthu wira aari oosuwelexa. Ohiya-vo, okathi wotheene aaniromola Nuulumo na Muluku. Khaaphavela wira atthu anvuwiheke. Khula okathi Yesu aaphavela wira atthu anvuwiheke Yehova.Yohani 8:28.

OKATHI ONIPAKA AHU SOTHANLA

13, 14. Wiiyeviha onnikhaliherya sai opaka soothanla sooloka?

13 Nihaana wiiyeviha okathi onipaka ahu soothanla, aahiiso okathi atthu akina anipaka aya soothanla sinnivara. Okathi murummwa Paulo aari awe oKesareya, aaphavela orowa oYerusalemu wira omalihe muteko aavahiwa awe ni Yehova. Masi profeta Haagabo aahimuleela Paulo wira arowa oYerusalemu aamutthukiwa. Nave woonasa wene aamwiiviwa. Anna yaahimuxonttela Paulo wira ohirowe. Masi Paulo aahithanla orowa oYerusalemu. Niireke Paulo aamwiiroromela? Nnaari, maana Paulo aari mutthu oowiiyeviha ni aanimuroromela Yehova. Nave anna ale yaari oowiiyeviha. Nto awo yaahikhaliherya yoothanla ya Paulo ni yaahimuhiya orowaka oYerusalemu.Miteko 21:10-14.

14 Wiiyeviha onoonikhaliherya opaka soothanla sooloka hata nihisuwelaka moota itthu sinrowa aya wiiraneya. Mwa ntakiheryo, woonasa wene nimphavela opacerya muteko wa orummwa wa okathi wotheene. Masi, exeeni enrowa oniiraneela nawereiwa? Ankhi okathi anamuyari ahu aniwereiwa aya anaphavela nikhaliheryo? Exeeni ninrowa ahu opaka nuuluvala vale? Hiyo khaninwerya waakhula makoho ala, hata nivekelaka aahiiso wuupuwelela. (Musuweli 8:16, 17) Masi akhala wira ninnimuroromela Yehova, ninrowa weemereryaka wira sookhala itthu sihiniwerya ahu. Nave ninrowa ovarerya mwaha owo, ovekela miruku ni opaka etthu yootthuneya, niire so, onvekela Yehova malakiheryo. Nuumala-vo nihaana otthara malakiheryo a munepa wa Yehova. (Mmusome Musuweli 11:4-6.) Yehova onooreeliha  soothanla sahu aahiiso pooti onikhaliherya waaturuka apalano ahu.Miruku 16:3, 9.

MOOTA WOWUNCERERYA WIIYEVIHA

15. Omuupuwelela Yehova onnikhaliherya sai ovikaniha wiiyeviha?

15 Ninrowa wuncererya sai wiiyeviha wahu? Ninrowa othokorerya inamuna xexe sinrowa onikhaliherya. Wanipacerya, nihaana omuupuwelela Yehova, ni wuupuwelela saana mikhalelo sawe. Vaavo nniilikanyiha ahu ni Yehova, ninnoona wira naatthu ooyeva ni ninsuwela itthu vakhaani paahi. (Yesaya 8:13) Muupuweleke wira nimmurumeela Muluku Oowerya Sotheene ohiya pinaatamu aahiiso nlaikha. Wuupuwelela eyo onoonikhaliherya wiiyeviha mmatatani mwa “Muluku òweryexa”.1 Pedru 5:6.

16. Wuupuwelela ophenta wa Muluku onnikhaliherya sai wiiyeviha?

16 Enamuna ya nenli ennikhaliherya wuncererya wiiyeviha wahu ti wuupuwelela moota Yehova onniphenta awe. Paulo aahilikanyiha muloko ni erutthu. Mipantta sotheene sa erutthu Yehova opanka awe, sookhalana efaita. (1 aKorinto 12:23, 24) Khula mmosa a hiyo ookhalana efaita wa Yehova. Owo khonnilikanyiha ni atthu akina ni khonihiya oniphenta hata nivonyaka. Tthiri ninkhala oovareleleya osuwela wira Yehova onniniphenta.

17. Ninrowa ottottela sai mureerelo oweha itthu sooloka sa atthu akina?

17 Enamuna ya neeraru enrowa onikhaliherya wuncererya wiiyeviha wahu ori oweha itthu sooloka sa atthu akina ntoko Yehova oniira awe. Ohiya okathi wotheene ophavela ohimmwa aahiiso waaleela akina etthu yoopaka, nihaana waavekela miruku ni weemererya moonelo aya. (Miruku 13:10) Ninnihakalala vanceene okathi anna ni arokora anivahiwa aya muritti wa vameekhaaya. Nave ninnimuxukhurela Yehova oneemererya omurumeela.1 Pedru 5:9.

18. Wiixuttiha yowuupuxerya ya murima ahu onnikhaliherya sai wuncererya wiiyeviha wahu?

18 Enamuna ya neexexe, enrowa onnikhaliherya wuncererya wiiyeviha wahu ori orumeela malakiheryo a Biibiliya wira niixuttihe yowuupuxerya ya murima ahu. Malakiheryo awo anninikhaliherya osuwela moonelo ni muupuwelo wa Yehova. Vaavo nniixutta ahu woona itthu mwa enamuna Yehova onoona awe, nnooweryaka opaka soothanla sinimuhakalaliha. Osoma, ovekela ni ovarihela muteko ele eniixutta ahu, yowuupuxerya ya murima ahu ennilipa. (1 Timótheyo 1:5) Nave-tho ninniixutta waahela akina nipuro noopacerya. Akhala wira nnoopaka eyo, Yehova ooleiherya wira onrowa omaliherya oniixuttiha ni onikhaliherya wira nincererye wiiyeviha wahu.1 Pedru 5:10.

19. Exeeni enrowa onikhaliherya okhala oowiiyeviha mahiku otheene?

19 Niireke munnimuupuwela profeta ole a oYuda nimuthokorenrye ahu wanipacerya wa mwaha ola? Owo aahiyeleela okumi awe ni wataana wawe ni Yehova okhala wira khoonihenrye wiiyeviha. Masi nnoowerya ovikaniha okhala oowiiyeviha okathi nneehereriwa ahu. Mwa ntakiheryo, arumeyi anceene a Yehova, annooniherya wira eyo enniweryaneya. Akhala wira nnootepaka omurumeela Yehova, ninrowa otepaka omuroromela. (Miruku 8:13) Nnaamwi nikhalanaka mixankiho, nnoowerya weetta ni Yehova. Tthiri ela eparakha yuulupale nrina ahu. Nto nrowe nipake khula etthu eniwerya ahu wira nivikanihe okhala oowiiyeviha ni weetta ni Yehova mahiku otheene.