Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Janero 2017

Nvaheke Efaita Eparakha ya Othanla Mootaphuwa

Nvaheke Efaita Eparakha ya Othanla Mootaphuwa

“Vavo vankhalaya eroho [ya Yehova], vavo-tho onniphwanyaneya otaphuwa”.2 AKORINTO 3:17.

ISIPO: 31, 32

1, 2. (a) Nlavulaka sa othanla mootaphuwa, miyuupuwelo xeeni atthu anceene arina aya? (b) Biibiliya onniixuttiha exeeni sa othanla mootaphuwa, ni makoho xeeni ninrowa ahu othokorerya?

OKATHI aapaka awe yoothanla awe, muthiyana mmosa aahimuleela mpatthani awe wira: “Muhaatte sookikoha, mukileele etthu ene paahi wira muhikixankihe”. Muthiyana ole aaphavela oleeliwa etthu yoopaka, ohiya orumeela othanla wawe mootaphuwa, niire so, eparakha evahiwa awe ni Mpattuxa awe. Ankhi nyuwo? Niireke munnisiveliwa opaka soothanla aahiiso munaahiya atthu akina apakaka soothanla sanyu? Munoonela sai othanla mootaphuwa?

2 Nlavulaka sa othanla mootaphuwa, atthu aakhalana miyuupuwelo soovirikana. Akina anihimya wira khivaniweryaneya othanla mootaphuwa maana Muluku oolepa sotheene sinrowa oniiraneela. Akina anihimya wira vanniweryaneya othanla mootaphuwa akhala wira nneettela murima ahu. Masi Biibiliya onihimya wira Muluku oonipattuxa khunivaha owerya ni otaphuwa wira nipakeke soothanla sahu. (Mmusome Yoxuwa  24:15.) Nave-tho, mBiibiliyani ninniphwanya waakhuliwa wa makoho ala: Niireke othanla wahu mootaphuwa wookhalana mukano? Ninrowa orumeela sai otaphuwa wahu wira nipake soothanla? Soothanla sahu sinooniherya sai wira ninnimphenta vanceene Yehova? Ninrowa ottittimiha sai soothanla sa atthu akina?

YEHOVA NI YESU ANNIIXUTTIHA EXEENI?

3. Yehova onirumeela sai otaphuwa wawe woomalela?

3 Okhala wene Yehova torina otaphuwa woomalela. Masi hiyo nnoowerya wiixutta moota onirumeela awe otaphuwa wawe. Mwa ntakiheryo, Yehova aahaathanla aIsarayeli okhala ‘nloko nawe’ na vameekhaaya. (Otumererya 7:6-8) Owo aahikhalana mathowa wira opake eyo. Maana Yehova aaphavela ommaliherya natiri ammanenle awe mpatthani awe Abrahamu. (Maphattuwelo 22:15-18) Nave-tho, okathi wotheene Yehova onnirumeela otaphuwa wawe moophenta ni mwa xariya. Ninnoona eyo mwa enamuna aalaka awe aIsarayeli okathi yahaamwiiwelela aya. Okathi yaattharuwa aya ni murima wotheene, Yehova aanaamorela ikharari ni waaphenta. Owo aahimmye wira: “Miyo kinimwatthikiherya atthu aka wa miyo: kinimwaphenta ni murim’aka wothene”. (Hoseya 14:4) Tthiri, Yehova oonivaha ntakiheryo nooloka orumeelaka otaphuwa wawe wira aakhaliherye atthu akina!

Ohinatthi orwa valaponi, Yesu aahithanla ovikaniha okhala oororomeleya wa Muluku, ni okhootta omutthara Satana okathi ammwarenle awe Yehova

4, 5. (a) Ti pani opacenrye ovahiwa ni Muluku othanla mootaphuwa, nto aarumenle sai? (b) Nikoho xeeni ninreerela ahu wiikoha?

4 Yehova oothanla opaka malaikha ni apinaatamu ni ohaavaha othanla mootaphuwa. Wanipacerya, Yehova ampanke Yesu. Nto ampanke ailikanyihaka mwaneene ni onvaha othanla mootaphuwa. (aKolosi 1:15) Yesu onrumeela sai otaphuwa wawe? Ohinatthi orwa valaponi, Yesu aahithanla ovikaniha okhala oororomeleya wa Muluku, ni okhootta omutthara Satana okathi ammwarenle awe Yehova. Nave, okathi Yesu aaryaawe valaponi, aahithanla okhootta soweeha sa Satana. (Matheyo 4:10) Nto ohiyu ole aarowa awe wiiviwa, Yesu aahilavula wira aaphavela opaka yootthuna ya Tiithi Awe. Yesu aahimmye wira: “Tithi! Mwatthuná, mukakiherye ohawa waka nno. Nto, ehireyé ntoko sintthunaka miyo: yireye ntoko sintthunanyu nyuwo”. (Luka 22:42) Niireke vanniweryaneya tthiri omutakiha Yesu, nrumeelaka othanla wahu mootaphuwa wira ninvuwihe Yehova ni opaka yootthuna awe?

5 Aayo, vanniweryaneya omutakiha Yesu maana Muluku onipattunxe ailikanyihaka mwaneene. (Maphattuwelo 1:26) Masi hiyo khanrina otaphuwa moomalela ntoko Yehova. Nuulumo na Muluku ninnitthokiherya wira Yehova oohela mukano otaphuwa wahu ni oniphavela wira neemereryeke mikano iyo. Mwa ntakiheryo, vatthokoni, athiyana ootheliwa ahaana owiiwelela axiiyaya ni anamwane ahaana owiiwelela anamuyari aya. (aÉfeso 5:22; 6:1) Niireke othanla wahu mootaphuwa onnitthara mikano iyo? Ti vootthuneya osuwela waakhuliwa wa nikoho nna okhala wira  eyo tenrowa oniiriha ophwanya okumi woohimala.

ORUMEELA SAANA AAHIISO MOOHILOKA OTHANLA MOOTAPHUWA

6. Nvahe ntakiheryo nnooniherya otthuneya waya otaphuwa wahu okhalana mukano.

6 Niireke otaphuwa orina mukano ti wekeekhai? Aayo! Moota xeeni? Okhala wira mikano sinninikhapelela. Mwa ntakiheryo, mutthu pooti othanla weettiha ekaaro orowaka epooma yoorakamela. Masi nkahaya muupuwele mweettaka estrada ehirina malamulo ni khula mutthu uupihaka ekaaro awe ni eettihaka mpantta oniphavela awe. Niireke mwaarowa okhala oovareleleya weettiha ekaaro anyu estrada ntoko eyo? Nnaari. Maana malamulo aahiiso mikano tootthuneya wira atthu otheene akhalane otaphuwa wekeekhai. Nrowe nithokorerye matakiheryo vakhaani a Biibiliya anooniherya moota mikano sivahiwe ahu ni Yehova sinnikhaliherya aya.

7. (a) Adamu aavirikanne sai ni inama? (b) Mutthokiherye enamuna emosa Adamu aarumenle awe othanla wawe mootaphuwa.

7 Okathi Yehova ampattunxe awe mulopwana oopacerya Adamu, aahinvaha eparakha emosaru aavanhe awe malaikha, eyo piiyo, eparakha ya othanla mootaphuwa. Masi Muluku khaavahale axinama eparakha ya othanla mootaphuwa. Adamu aarumenle sai oratteene othanla wawe mootaphuwa? Adamu aahikhalana muteko woohakalaliha wa ovaha masina inama. Muluku ‘ahiroiha oholo wa mutthu, wira osuwele masina owo akelawe ovaha’. Nuumala Adamu oweha khuta enama, aanivaha nsina naaphwanela. Yehova khaarukununxe masina Adamu aathanlale awe. Ohiya-vo, “siso saromolenlyawe mutthu khul’etthu ekumi, nenlo pi nsina naya”.Maphattuwelo 2:19.

8. Moota xeeni Adamu yahaarumenle aya saana othanla mootaphuwa ni exeeni ekhumelenle?

8 Yehova aahinvaha Adamu muritti woowiiriha elapo okhala eparayiisu, nto aamulenle so: “Mwayareke an’inyu, munjerereyeke: musareyeke mulaponi mothene. Mwettiheke elapo yothene. Mukhaleke axinene ihopa sa mphareya n’axipalame a musulu n’inama sothene sinetta vathí”. (Maphattuwelo 1:28) Masi Adamu aahithanla olya muhokorokho wookhoottihiwa, nto mwaha woopaka eyo Adamu aahitupha mikano aavahiwa awe ni Yehova. Okhala wira Adamu khiyaarumenle saana othanla mootaphuwa, apinaatamu annihaawa mpakha olelo-va. (aRoma 5:12) Nrowe nuupuwelele itthu soohiloka sikhumelenle mwaha wa yoothanla ya Adamu. Eyo enoonikhaliherya orumeela saana otaphuwa wahu ni nnimweemereryaka mikano Yehova onivanhe awe.

AIsarayeli yaahithanla okhala atthu a Muluku ni yaaheemererya mikano Muluku aavanhe awe

9. Yoothanla xeeni Yehova aavanhe awe aIsarayeli ni yaamuleihenrye opaka exeeni?

9 Adamu ni Eva ahaaraviha apinaatamu otheene etampi ni okhwa. Masi nlelo nookhalana eparakha ya orumeela saana yoovaha ya othanla mootaphuwa. Ninniweha eyo moota Yehova aathokorerya awe nloko na aIsarayeli. Yehova aahaavaha eparakha yoothanla okhala nloko nawe na vameekhaaya aahiiso nnaari. (Okhuma 19:3-6) Nloko nne naahithanla okhala atthu a Muluku ni yaaheemererya mikano Muluku aavanhe awe. Awo yaahimmye so: “Sothene Apwiya  sinnihimeryaya, nnamwettela”. (Okhuma 19:8) Mooriipiha murima, muhoolo mwaya atthu ale khiyaa tthunne opaka ele yaamuleihenrya aya Yehova. Tthiri ntakiheryo naya ninniniixuttiha etthu yuulupale. Tivonto otheene ahu nrowe niimananihe ovaha efaita eparakha ya othanla mootaphuwa, nivikanihaka onvarexexa Yehova ni wiiwelela malamulo awe.1 aKorinto 10:11.

10. Matakiheryo xeeni ari aHéberi ekapiitulu 11, anooniherya wira apinaatamu oohimalela anoowerya orumeela othanla mootaphuwa wira anvuwiheke Muluku? (Nwehe elatarato yoopacerya.)

10 AHéberi ekapiitulu 11, ninniphwanya masina 16 a alopwana ni athiyana oororomeleya yaathanlale ottittimiha mikano yaavahiwa aya ni Yehova. Nto awo yaahitthuveliwa vanceene ni yaahikhalana nlipelelo nooloka na muhoolo. Mwa ntakiheryo, Nowe aahikhalana waamini wuulupale ni aahithanla wiiwelela malakiheryo aavahiwa awe ni Muluku a moota wooteka ekalawa, yeeyo yaarowa woopola emusi awe ni atthu yaarowa oyariwa muhoolo. (aHéberi 11:7) Abrahamu ni Sara yaahimwiiwelela Muluku khukhuma arowaka elapo Muluku aaleihenrye awe waavaha. Nnaamwi vaari siiso, awo “yanwerya ohokolowela” epooma ya Uri, masi awo khiyaatthunne, maana yaawehexexa itthu yaaleiheriwe aya ni Muluku. Biibiliya onihimya wira “yaninkheliwa n’ilapo yootepa orera”. (aHéberi 11:8, 13, 15, 16) Moise aahikhootta mihakhu sa wEjiitu masi “owo ahithanla ohaxiwa vamosá n’atthu a Muluku, khukhotta opuha okathi vakhaaani n’itthu sotakhala”. (aHéberi 11:24-26) Nrowe otheene ahu ntakihe waamini wa alopwana ni athiyana ala oororomeleya nirumeelaka saana eparakha ya othanla mootaphuwa wira nipake yootthuna ya Muluku.

11. (a) Mareeliho xeeni anikhumelela mwaha wa othanla mootaphuwa? (b) Exeeni eniwiirihani orumeela saana othanla mootaphuwa?

11 Vaamukhweyaka mutthu mukina opaka soothanla sahu, masi khinaarowa ophwanya ohakalala mwaha wa othanla mootaphuwa. Moota xeeni? Biibiliya onnitthokiherya eliivuru ya Otumererya 30:19, 20. (Mmusome.) Eversiikulu 19 ninnoona wira Muluku ahaavaha aIsarayeli eparakha ya othanla. Nto eversiikulu 20 ninniixutta wira Yehova aahaavaha eparakha ya wooniherya omphenta waya. Nave hiyo nnoowerya othanla omukokhorela Yehova. Nave-tho, nookhalana eparakha yuulupale ya orumeela othanla wahu mootaphuwa wira ninvuwihe Yehova ni wooniherya wira ninnimphenta vanceene.

MURUMEELEKE SAANA OTHANLA MOOTAPHUWA

12. Exeeni ehinireerela ahu opaka ni othanla wahu mootaphuwa?

12 Nkahaya muupuwele munvanhe ene mpatthani anyu etthu ya faita. Mwaarowa woonela sai, akhala wira etthu munvanha anyu oorihela vakokholani, aahiiso munimphwanya orumeelaka wira aahaaxeke atthu akina? Tthiri mwaamuriipiwa murima. Mwa enamuna emosaru, Yehova oonivaha eparakha ya othanla mootaphuwa. Yehova onniriipiwa murima, aawehaka atthu akina ahirumeelaka saana otaphuwa waya ni apakaka soothanla soohiloka aahiiso yaahaaxaka atthu akina. Biibiliya onihimya wira “okathi wokiserya” atthu yaarowa okhalaka “òhixukhuru”. (2 Timótheyo 3:1, 2) Masi, ninrowa wooniherya sai wira ninnixukhurela eparakha nivahiwa ahu ni Yehova? Nave ninrowa osyaka sai orumeela moohiloka othanla mootaphuwa?

13. Mwa enamuna xeeni ninrowa ahu osyaka orumeela moohiloka otaphuwa wahu?

13 Otheene ahu nookhalana eparakha ya  waathanla apatthani ahu, mawarelo, wiitthokiha ni matthekulelo ahu. Masi, nihirumeeleke otaphuwa wahu wira nipakeke soothanla sihinimusivela Muluku aahiiso otthara sowiira sa atthu a olumwenku ola. (Mmusome 1 Pedru 2:16.) Ohiya orumeela othanla wahu mootaphuwa wira nipakeke itthu soohiloka, nihaana orumeela wira ‘ninvuwiheke Muluku’.1 aKorinto 10:31; aGalasia 5:13.

14. Xeeni nintthuneya ahu omuroromela Yehova okathi ninrumeela ahu othanla wahu mootaphuwa?

14 Yehova onihimya so: “Ti miyo Apwiya Muluku anyu, kiniwixuttihani wira mphwanyeke sorera: ti miyo kiniwettihani ephiro ela erinanyu otthara”. (Yesaya 48:17) Hiyo nihaana omuroromela Yehova ni weemererya mikano onivanhe awe, wira nipake soothanla sooloka. Moowiiyeviha nihaana weemererya wira “mutthu khansuwela emalelo awe: owo khanwerya wettiha mavalo awe”. (Yeremiya 10:23) Okhala wira Adamu ni aIsarayeli oohiroromeleya yaaniikupali, awo yaahitupha mikano yaavahiwa aya ni Yehova. Nto nihaana wiixutta ni ntakiheryo naya noohiloka. Ohiya wiiroromela, nihaana ‘waroromela Apwiya ni murim’ahu wothene’.Miruku 3:5.

MUTTITTIMIHEKE OTHANLA MOOTAPHUWA WA ATTHU AKINA

15. Malakiheryo aniphwanyaneya aGalasia 6:5 anniixuttiha exeeni?

15 Hiyo nihaana ottittimiha otaphuwa wa atthu akina ni waahiya apakaka soothanla saya. Nthowa xeeni? Okhala wira otheene ahu nookhalana eparakha ya othanla mootaphuwa, khontaphulela wira okathi wotheene maKristau anrowa opakaka soothanla simosaru. Eyo enihela muhina soothanla sahu voohimya sa mweettelo ni okokhorela wahu. Nihaana wuupuwela malakiheryo  aniphwanyaneya aGalasia 6:5. (Mmusome.) Akhala wira ninnisuwela wira khula muKristau onookohiwa mwaha wa soothanla sawe, nto nnoottittimihaka othanla mootaphuwa wa atthu akina.

Nihaana opaka soothanla sahu, nihaakhanyereryaka atthu akina opaka soothanla simosaru (Nwehe ettima 15)

16, 17. (a) Moota xeeni othanla mootaphuwa waarya aya mwaha muulupale Muloko wa oKorinto? (b) Paulo aakhalihenrye sai maKristau ale, ni exeeni eniixutta ahu?

16 Vano, nrowe nthokorerye ntakiheryo na mBiibiliyani nnooniherya nthowa naya nintthuneya ahu ottittimiha othanla mootaphuwa wa anna. MaKristau a muloko wa oKorinto yaaninyakulihana mwaha wa okhuura enama yaavahiwe mukuttho amuluku eethiru yeeyo yaatumihiwa omerkaatu. Yowuupuxerya ya murima ya maKristau makina yaaniweemererya okhuura enama ele, maana yaanisuwela wira amuluku eethiru khahiyo etthu. Masi, atthu ale khalai yaakokhorela amuluku awo eethiru, yoona wira okhuura enama ele yaarowa olikanaka ni waakokhorela amuluku awo. (1 aKorinto 8:4, 7). Ola waari muxankiho muulupale, maana waamukawanya muloko ole. Nto Paulo aakhalihenrye sai maKristau ale ophuka mwaha ole wootthuneya?

17 Wanipacerya, Paulo aahuupuxerya igrupu iye piili sa maKristau wira yoolya khahiyo etthu yaarowa olipiha wataana waya ni Muluku. (1 aKorinto 8:8) Moottharelana, Paulo aahaalopola wira “otaphuwa” waya ohihonone yowuupuxerya ya murima ya ale yaari ootteettheya. (1 aKorinto 8:9) Muhoolo mwaya, Paulo ahaalela ale yaarina yowuupuxerya ya murima yootteettheya wira ahaaphukeleke ale yakhuura enama ele. (1 aKorinto 10:25, 29, 30) Tivonto, myaha sinivarihana ni okokhorela, khula muKristau ohaana opaka soothanla sawe. Masi nihaana ottittimiha otaphuwa wa anna okathi nimpaka ahu soothanla sahu hata myaha seiye nnoona ahu okhala saamukhaani.1 aKorinto 10:32, 33.

18. Munrowa wooniherya sai wira munnivaha efaita eparakha ya othanla mootaphuwa?

18 Yehova oonivaha eparakha ya othanla mootaphuwa, yeeyo ennivaha otaphuwa wekeekhai. (2 aKorinto 3:17) Ninnivaha efaita eparakha ela okhala wira enniniiriha opaka soothanla sinooniherya wira ninnimphenta vanceene Yehova. Nto nrowe nivikanihe opaka soothanla sininvuwiha Yehova ni ottittimiha soothanla sooloka sa atthu akina, vaavo anirumeela aya eparakha ya othanla mootaphuwa.