Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Dezembro 2017

Anamuyari​—Mwaakhaliherye Aniinyu Okhalana Ankhili “Amphwanyiha Wòpowa”

Anamuyari​—Mwaakhaliherye Aniinyu Okhalana Ankhili “Amphwanyiha Wòpowa”

“Okhuma enamwane anyu, mosuwela solempwa sowarya: seiyo sinniwerya wovahani ankhili, yawo amphwanyiha wòpowa”.​—2 TIMÓTHEYO 3:15.

ISIPO: 1, 41

1, 2. Exeeni eniwiiriha anamuyari akina oxanka, okathi anaaya aniphavela aya wiivahererya wa Yehova ni obatiziwa?

IKONTO sinceene sa atthu animusoma Biibiliya, anniivahererya wa Yehova ni annibatiziwa. Anamunceene a yaawo, amiravo anihuuwa imusi sa maKristau ni anithanla orumeela saana okumi aya. (Esalimo 1:1-3) Akhala wira mwa namuyari, woonasa wene munnilipelela wira muhoolo mwaninyu onoobatiziwa.​—Mulikanyiherye ni 3 Yohani 4.

2 Hata vari siiso, munnixanka. Waaniheryasa munnaaweha amiravo akina anibatiziwa, masi nuuvira okathi enapacerya ohoverya akhala wira tthiri anoowerya weettela malakiheryo a Nuulumo na Muluku. Akina aahiya ekeekhai. Nto waaniheryasa munuupuwela wira mwaninyu onirowa opacerya omurumeela Yehova masi nuumala-vo ophenta wawe ekeekhai omaleke. Woonasa wene onrowa olikanaka ni maKristau makina a eseekulu yoopacerya a wÉfeso. Yesu aahimmye so:  “Nyuwo mohiya ophenta warinanyu wopajeryani”. (Wisupulula 2:4) Munrowa omukhaliherya sai mwaninyu olipiha ophenta wawe ni ‘wunnuwa mpakha wopowa’? (1 Pedru 2:2) Ntakiheryo na Timootheyo pooti oniixuttiha etthu.

“MOSUWELA SOLEMPWA SOWARYA”

3. (a) Waari okathi xeeni Timootheyo aapacenrye awe osuwela sowiixuttiha sa Yesu? Exeeni aapaka awe ni itthu aixutta awe? (b) Itthu xeeni tthaaru Paulo aahimmye awe wira Timootheyo aahikhalana?

3 Murummwa Paulo aahixukurya epooma ya oListra, ekwaha yoopacerya mwaakha wa 47. Woonasa wene, waari okathi yoowo Timootheyo aapacenrye awe osuwela sowiixuttiha sa Yesu. Okathi owo Timootheyo ari mmiravo. Nto nuuvira iyaakha piili aahipacerya weetta mikwaha ni Paulo. Nuuvira iyaakha 16, Paulo aahimulepela epaphelo Timootheyo ohimyaka so: “Mulipiheryeke sothene sixuttalyanyu, seiyo sakhenlyanyu ni wamini wolipa: tthiri muhasuwela atthu yoxuttihaleni. Okhuma enamwane anyu, mosuwela solempwa sowarya [Soolempwa sa eHéberi]: seiyo sinniwerya wovahani ankhili, yawo amphwanyiha wòpowa mwaha w’omwamini Kristu Yesu”. (2 Timótheyo 3:14, 15) Nwehe wira Paulo aahimmye wira Timootheyo (1) aanisuwela soolempwa sowarya, (2) aahikhalana waamini woolipa, ni (3) aahikhalana ankhili yaaphwanyiha woopowa mwaha womwaamini Kristu Yesu.

Hata amiravo acikhaani, anoowerya wiixutta voohimya sa atthu ni sowiiraneya sa mBiibiliyani

4. Itthu xeeni munirumeela anyu wira mwaakhaliherye aniinyu? (Nwehe elatarato yoopacerya.)

4 Sintoko namuyari, nyuwo muniphavela wira mwaninyu osuwele soolempwa sowaarya, seiyo olelo-va sinihela muhina Soolempwa sa eHeeberi ni Soolempwa sa eGriki. Hata amiravo acikhaani, anoowerya wiixutta voohimya sa atthu ni sowiiraneya sa mBiibiliyani. Mutthenkeso wa Yehova onnikumiherya iliivuru, ibroxura, ni iviidiyu seiyo anamuyari akhanle aya oorumeela wira yaakhaliherye anaaya. Itthu xeeni siromoliwe siniphwanyaneya nttaava nanyu? Mwaninyu ohaana osuwela sowiixuttiha sa mBiibiliyani wira olipihe wataana wawe ni Yehova.

“WAMINI WOLIPA”

5. (a) Exeeni yaamukhalihenrye Timootheyo okhalana “wamini wolipa”? (b) Ninsuwela sai wira Timootheyo aahikhalana waamini woolipa?

5 Khivaniphiyerya paahi owiixuttiha anamwane voohimya sa atthu ni myaha sa mBiibiliyani. Muupuweleke wira Timootheyo aahiixuttihiwa wira okhalane “wamini wolipa”. Timootheyo aanisuwela Soolempwa sa eHeeberi ‘okhuma enamwane awe’, eyo piiyo okhuma okathi ari awe mwaana mwaamukhaani. Masi, owo aahaana okhalana “wamini wolipa” wira okupali wira Yesu aari Mesiya. Nto waamini woolipa wa Timootheyo waahimwiiriha obatiziwa ni ovaraka hoothe ni Paulo muteko wa omisionaario.

6. Munrowa omukhaliherya sai mwaninyu olipiha waamini wawe?

6 Munrowa omukhaliherya sai mwaninyu olipiha waamini wawe sintoko Timootheyo,  wira nave okhalane “wamini wolipa”? Mpixeke murima. Onitthuneya okathi wira waamini okhale woolipa. Hata nyuwo mwaaminiki etthu, khentaphulela wira mwaninyu nave onimwaamini. Khula mwaana ohaana orumeela osuwela wawe “othanla sorera ni sotakhala” wira olipihe omwaamini wawe Biibiliya. (Mmusome aHéberi 5:14) Ntoko namuyari, muhaana wiimananiha vanceene wira mmukhaliherye mwaninyu olipiha waamini wawe, vanceenexa okathi onookohaaweni itthu. Nrowe niwehe ntakiheryo na paapa mmosa.

7, 8. (a) Exeeni onipaka awe paapa mmosa wira ompixerye murima mwanawe okathi onimwiixuttiha awe?(b) Xeeni munitthuneya anyu waapixerya murima aniinyu?

7 Tomas, yoowo orina mwaaruusi a iyaakha 11, onihimya wira okathi mukina onnikohiwa ni mwanawe owo itthu ntoko iya: “Niireke Yehova orumenle othatuwa wira okumiherye okumi valaponi?” Aahiiso “xeeni nihinvotari ahu wira nimananihe olokiherya itthu?” Owo khonaakuva omuleela ele enireerela awe okupali. Tomas onnisuwela wira etthu enimukupaliha mutthu khahiyo omuukelela itthu ekwaha emosa, masi omuleela vakhaani-vakhaani.

8 Tomas nave onnisuwela wira ohaana opixa murima, wira omwiixuttihe mwanawe owo. Veekeekhai maKristau otheene ahaana opixa murima. (aKolosi 3:12) Tomas ooweha wira onitthuneya okathi ni ovaanela ikwaha sinceene ni mwanawe, wira omukhaliherye olipiha sookupali sawe. Owo ohaana ovaanela ni yena voohimya sa itthu oniixutta awe mBiibiliyani. Tomas onihimya so: “Miyo ni mwaaraka, okathi wotheene ninniphavela osuwela akhala wira mwanihu onnikupali tthiri ele eniixutta awe ni onnoona ovareleya waya muteko . Akhala wira onnipaka makoho, hiyo khaninkhumuwa. Ohimya ekeekhai, naamuxankiheyaka vaakhanle wira owo onneemererya itthu sotheene woohipaka makoho”.

Muhaana opixa murima wira mmukhaliherye mwaninyu olipiha waamini wawe Nuulumo na Muluku

9. Munrowa waakhaliherya sai aniinyu waamini Nuulumo na Muluku?

9 Vaavo anamuyari aniwiixuttiha aya anaaya moopixa murima, nuuvira okathi awo anoopacerya okhalana wiiwexexa ‘wulupalexa, worekamexa, wowunnuwexa ni wowixerya’ wa ekeekhai. (aÉfeso 3:18) Vannireerela owiixuttiha moovarihana ni iyaakha saya vamosa ni wiiwexexa waya. Nto yakhalana waamini woolipa, awo animoonaka okhweya waakiherya sookupali saya ni waaleela anaxikola akina. (1 Pedru 3:15) Mwa ntakiheryo, niireke aniinyu anniwerya omurumeela Biibiliya wira etthokiherye ele enimwiiraneela mutthu nuumala okhwa? Niireke annikupali moota Biibiliya onitthokiherya awe mwaha owo?  * (Nwehe enoota.) Tthiri, muhaana opixa murima wira mmukhaliherye mwaninyu olipiha waamini  wawe Nuulumo na Muluku. Masi eyo enookumiherya mireerelo.​—Otumererya 6:6, 7.

Nave ntakiheryo nanyu nooloka nnimwaakhaliherya aniinyu olipiha waamini waya

10. Etthu xeeni enitthuneya wira nwiixuttihe aniinyu?

10 Nave ntakiheryo nanyu nooloka nnimwaakhaliherya aniinyu olipiha waamini waya. Maama mmosa oniitthaniwa Estefania, orina anamwane araru athiyana, onihimya so: “Okhuma okathi anaaka yaarina aya iyaakha vakhaani, kaaniikoha so: ‘Kiireke miyo kinnaaleela anaaka ele enikiiriha okupali wira Yehova ookhala, onniniphenta ni onnipaka itthu mwa xariya? Anaaka anniweha wira tthiri miyo kinnimphenta Yehova?’ Awo khanrowa okhalana waamini woolipa akhala wira miyo nkirina nave”.

‘ANKHILI, ANIPHWANYIHA WÒPOWA’

11, 12. Ankhili anitaphulela exeeni? Ninsuwela sai wira mutthu khonikhalana ankhili mwaha wa wunnuwa paahi?

11 Nihoona wira Timootheyo (1) aanisuwela saana soolempwa sowaarya, ni (2)  aahikhalana waamini woolipa. Masi-tho Paulo aahihimya wira soolempwa sowaarya sammwiiriha Timootheyo okhalana ‘ankhili, aniphwanyiha wòpowa’. Nto Paulo aaphavela ohimya exeeni?

12 Evolume 3 ya eliivuru Estudo Perspicaz das Escrituras, enitthokiherya wira mBiibiliyani, nuulumo noowi ankhili nintaphulela “owerya orumeela saana osuwela ni wiiwexexa wira mutthu owerye ophuka mixankiho, osyaka ihasara, ophwanya soolukama, wala waakhaliherya atthu akina. Ankhili annivirikana ni ololo”. Biibiliya onihimya wira “ololo onàttamela murima wa mmiravo”. (Miruku 22:15, Biblya Exirima) Nto vaavo mwaninyu onrowa awe wunnuwaka, onookhalanaka ankhili. Mutthu onninnuwa momunepani mwaha woowi onnimoova Yehova ni onniphavela omwiiwelela. Masi iyaakha paahi khasimmwiiriha mutthu okhalana ankhili.—Musome Esalimo 111:10.

13. Amiravo anrowa okhalana sai ankhili amphwanyiha woopowa?

13 Amiravo oowunnuwa momunepani khanitthara soophavela saya aahiiso soophavela sa amiravo akhwaaya. Ntoko Biibiliya sinihimya awe, awo ‘khanveveleya ni opuruliwa n’ipheyo ya khula mwixuttiho’. (aÉfeso 4:14) Masi ‘annalimaleliha ankhili aya’ wira ‘asuweleke othanla sorera ni sootakhala’. (aHéberi 5:14) Nto awo annipaka soothanla sooloka, hata ahooniwaka ni anamuyari aya wala atthu akina. (aFilipi 2:12) Ankhili a moota owo, animwaakhaliherya anamwane wira yoopowe. (Musome Miruku 24:14.) Nto munrowa waakhaliherya sai aniinyu okhalana ankhili? Awo ahaana oweha ele enivaha anyu efaita. Nto, moolumo ni miteko sanyu, sooniheryeke wira munniimananiha weettela malamulo a Biibiliya.​—aRoma 2:21-23.

Xeeni vari aya vootthuneya anamuyari ovikaniha wiimananiha? (Nwehe ittima 14-18)

14, 15. (a) Munrowa omukhaliherya sai mwaninyu osuwela othanla ele eri yooloka ni yoohiloka? (b) Itthu xeeni sinireerela awe wuupuwela mmiravo oniphavela obatiziwa?

14 Wira aniinyu akhalane waamini woolipa, khivamphiyerya paahi waaleela ele eri  yooloka ni ele eri yoohiloka. Masi nvaaneleke naawo. Mpakeke makoho ntoko ala: ‘Xeeni Biibiliya onikhoottiha awe itthu sinikhala wira ti sooreera? Kinrowa okupali sai wira otthara malamulo a mBiibiliyani onookiphwanyiha mureerelo?’—Yesaya 48:17, 18.

15 Akhala wira mwaninyu oniphavela obatiziwa, mmukhaliherye wiiwexexa ele enitaphulela aya okhala murumeyi a Yehova. Mwaninyu owo onoonela sai obatiziwa? Xeeni vari aya vooloka obatiziwa? Mixankiho xeeni sinimphwanya ole obatiziwe? Xeeni mareeliho awo anivikana aya mixankiho? (Marko 10:29, 30) Ti vooloka wuupuwela makoho ala ohinatthi obatiziwa. Mmukhaliherye mwaninyu wuupuwelela mareeliho onrowa awe ophwanya mwaha womwiiwelela Muluku ni ele enrowa omukhumelela aahimwiiwelele. Nto eyo pooti omwiiriha okupali wira okathi wotheene ti vooloka weettela malamulo a Biibiliya.​—Otumererya 30:19, 20.

AKHALA WIRA MMIRAVO OBATIZIWE ONNIHOVERYA WAAMINI WAWE

16. Anamuyari apakeke exeeni akhala wira mwanaya onipacerya ohoverya ekeekhai?

16 Nlikanyihe wira mwaninyu onnipacerya ohoverya ekeekhai nuumala obatiziwa. Nto munrowa opaka exeeni? Mwa ntakiheryo, pooti wira mwaninyu onisiveliwa itthu sa olumwenku. Aahiiso, owo onoohoverya  akhala wira weettela malakiheryo a Biibiliya etthu yooloka tthiri. (Esalimo 73:1-3, 12, 13) Muupuweleke wira ele enrowa anyu opaka pooti omwiiriha mwaninyu omurumeela wala ohimurumeela Yehova. Khivanreerela onyakulihana nuuwo. Masi, mmukhaliherye woona wira munnimphenta ni muniphavela omukhaliherya.

17, 18. Anamuyari anrowa omukhaliherya sai mwanaya, akhala wira onnihoverya ekeekhai?

17 Mmiravo obatiziwe, ohiivahererya wa Yehova. Nto owo oomuleiherya omphenta ni omurumeela yena ovikana itthu sotheene. (Mmusome Marko 12:30.) Yehova onnoona wiivahererya okhala yooleiherya yootthuneya. Nto hiyo nave nihaana woonaka siiso. (Musuweli 5:4, 5) Mmuupuxerye mwaninyu voohimya sa yooleiherya opanke awe. Masi woopaceryani, musome myaha sa mutthenkeso ahu silepeliwe anamuyari. Moottharelana, mwa enamuna ni okathi wooreerela, mmuleele mwaninyu wira yoothanla epanke awe ti yuulupale. Masi amwiiwelela Yehova onimwaakhela mareeliho manceene.

18 Mwa ntakiheryo, wanikisa wa eliivuru Os Jovens Perguntam—Respostas Práticas, Evolume 1 ohaavo apendise oni “Os pais perguntam”. Epantte eyo ennivaha miruku soovareleya muteko. Eyo enihimya wira anamuyari ahaakuveke wuupuwela wira mwanaya khoniphavela ekeekhai. Masi ahaana osuwela toko ele enimwiiriha ohoverya ekeekhai. Mwa ntakiheryo, pooti wira onihapuxiwa ni ale aneettana awe, wala onoona wira khorina apatthani mmulokoni. Aahiiso, pooti uupuwelaka wira yena khonrowa owerya ovara saana muteko wa Yehova ntoko amiravo akina. Eliivuru eyo ennihimya-tho wira mwaninyu apacerya ohoverya ekeekhai, khentaphulela wira khoniphavela sookupali sanyu. Masi waaniheryasa, owo sinimphwanya mixankiho. Nave-tho, apendise owo onnivaha malakiheryo a moota anamuyari akhanle aya oomukhaliherya mwanaya onihoverya ekeekhai.

19. Anamuyari anrowa waakhaliherya sai anaaya okhalana “ankhili, yawo amphwanyiha wòpowa”?

19 Sintoko namuyari, mookhalana muritti ni eparakha ya waakhaliherya aniinyu “nwettihaka ni mwalakaka n’ikano s’Apwiya [Yehova]”. (aÉfeso 6:4) Eyo entaphulela wira muhaana owiixuttiha aniinyu ele Biibiliya onihimya awe ni waakhaliherya okupali itthu aniixutta aya. Vaavo waamini waya onrowa aya olipa, awo anoothanla wiivahererya wa Yehova ni omurumeela ni murima aya wotheene. Nto Nuulumo na Yehova, munepa awe wootteela, ni wiimananiha wanyu, onimwaakhaliherya aniinyu okhalana “ankhili, yawo amphwanyiha wòpowa”.

^ etti. 9 Myaha siniitthaniwa Guias de Estudo sa eliivuru Biibiliya Onniixuttiha Exeeni?”, sinnaakhaliherya atthu otheene waahela muhina amiravo, wiiwexexa ni otthokiherya ikeekhai sa mBiibiliyani. Myaha iyo sinniphwanyaneya mattaava manceene. Murowe opuro oni: ENSINOS BÍBLICOS > GUIAS DE ESTUDO.