Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 1 2016

Moota Wooxintta Miyuupuwelo sa Ohiivaha Efaita

Moota Wooxintta Miyuupuwelo sa Ohiivaha Efaita

KHUUVO onitthuneya okhapeleliwa vanceene onvikana mwaana. Okathi naayariwe ahu niinano, itthu sotheene naakhaliheriwa ni anamuyari ahu. Okathi naixutta ahu weetta, naanikumana ni atthu yaakhala ntoko oowoopiha. Awo yaaninoopiha masi naaniroromela wira anamuyari ahu yaari vakhiviru. Nto naanihiya woova okathi anamuyari ahu awo yaanivarela aya ntata.

Niri ene anamwane, okhala wahu saana waanilipa ni ophenta ni nikhaliheryo na anamuyari ahu. Khiivo etthu yoova ahu maana naanisuwela wira awo yaaniniphenta. Vaavo yaanittottopela aya mwaha woopaka saana itthu, naanilipa ni wiimananiha orowa vahoolo.

Okathi naapacenrye ahu wunnuwa, apatthani ahu nave yaaninikhaliherya. Naaniroromela okhala naawo, nave awo yaahinikhaliherya ohoova vanceene oxikola.

Tthiri, vaamureera vaakhanle wira anamwane otheene aninnuwa mwa enamuna eyo. Masi mooriipiha murima, anamwane akina khanikhalana apatthani, nave-tho anamwane anceene khanikhapeleliwa saana ni anamuyari aya. Melissa * onihimya so: “Okathi kiniweha aka ifootu sa emusi epakaka itthu hoothe, kinnuupuwela so: ‘Vaamureera vaakhanle wira emusi aka yaaniira siiso’”. Pooti wira ni nyuwo munuupuwela siiso.

MIXANKIHO SA OHUUWA EMUSI YOOHIPHENTA

Woonasa wene okathi mwannuwa anyu khamwaakhapeleliwa saana, ophentiwa, ni okhaliheriwa ntoko vaareerela aya. Pooti wira munnuupuwela okathi anamuyari anyu yaakhulana aya nto nuuvira okathi khumwalanasa. Woonasa wene nyuwo munniivaha nthowa. Aahiiso munnuupuwela okathi mwaaveehiwe anyu wala ohaaxiwa ni paapa anyu wala maama anyu.

Exeeni enipaka awe mwaana oninnuwa mwa enamuna eyo? Anamwane akina annilya mirette soohapala aahiiso ohapaliwa. Akina annikela egrupu ya amiravo ootakhala. Ohuuwa emusi yoohiphenta pooti omwiiriha mwaana mwammiravo  osiveliwaka voohiloka ni mutthu mukina ophavelaka ophentiwa. Masi osivelana iwo ikwaha sinceene khonipisa ni onnikumiherya mixankiho.

Nave-tho, amiravo ooyeveela yaawo animananiha osyaka mixankiho iyo, anninnuwa ahiivahaka efaita. Ana onihimya so: “Kuupuwela wira nkaarina efaita, maana eyo ti etthu amaama yaamakela aya ohimya okathi wotheene. Amaama khatonko okittottopela”.

Masi, khahiyo paahi anamwane tanixankiheya. Ikwaha sikina hiyo pooti oxankiheyaka mwaha wa omwalaniwa, wuuluvala, aahiiso makhalelo a erutthu ahu. Nto oxankiheya iwo pooti onaakha ohakalala wahu ni ohonona wataana wahu ni akina. Exeeni enrowa onikhaliherya?

MULUKU ONNINIKHAPELELA

Niroromeleke wira vanniweryaneya ophwanya nikhaliheryo. Muluku onniphavela tthiri onikhaliherya.

Muluku aahimuleela profeta Yesaya wira: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani. Ayo! Kinnovarelani ni ntata naka: kinniwakihani, kinniwòpolani”. (Yesaya 41:10, 13) Tthiri ti voomaaliha osuwela wira Muluku onnivarela ntata nahu mwa nthoonyeryo. Khanintthuneya woova!

Biibiliya onnaaromola arumeyi a Muluku yaawo yaaxankale masi khuxutta omuroromela Muluku. Hana, maama awe Samuweli, aaniixoona ohikhalana efaita mwaha woohiyara. Nto owo aaniveehiwa. Mwaha wa yeeyo, Hana aaniriipiwa murima vanceene ni ohiphavela olya. (1 Samuweli 1:6, 8) Masi nuumala onvekela Muluku, murima awe waahikhala saana.1 Samuweli 1:18.

Nasalimo Davidi, aanixanka vanceene mwaha wa woova. Owo aahilupatthiwa ni mwene Sawuli mwa iyaakha sinceene. Nnaamwi Davidi ooponwe mwa itthu sinceene saakhanle oopwetexa okumi awe, okathi mukina aanuupuwela wira mixankiho sawe khisaarowa omala. (Esalimo 55:4-6; 69:2) Hata vari siiso, owo aalempe so: “Kimpathikiru, kinnirupa ni murettele. Nyuwo pahi, Apwiya, munnikikhaliha òwitthyala sana”.—Esalimo 4:9.

Hana ni Davidi yaahivahererya mixankiho saya wa Yehova, nto awo yaahoona wira Muluku aanaakhaliherya. (Esalimo 55:23) Olelo-va, hiyo ninrowa opaka sai eyo?

 INAMUNA TTHAARU SINROWA ONIKHALIHERYA

1. Mwiixutte omuroromela Yehova ntoko Tiithi.

Yesu aahittittimiherya wira nihaana omusuwela “Muluku mmosáru èkekhai”. (Yohani 17:3) Murummwa Paulo aahinlipiherya wira: “Muluku khankhala ottaiwene ni hiyo”. (Miteko 17:27) Yakobo aalempe wira: “Mmwattameleke Muluku: Muluku onowattamelani”.Yakobo 4:8.

Osuwela wira Tiithi ahu a wiirimu onniniphenta ni onikhapelela, nivalo nootthuneya ninnikhaliherya oxintta miyuupuwelo sa oxankiheya. Ekeekhai wira pooti ovira okathi wira nikhalane nroromelo nlo, masi anamunceene ahoona nikhaliheryo nno. Caroline, onihimya so: “Okathi kaapacenrye aka omuroromela Yehova, kaahoona wira kaahikhalana Tiithi kaawerya aka omuleela miyuupuwelo saka. Eyo yaahikilipiha vanceene”.

Rachel, onnuupuwelela oriki: “Yehova onnikikhaliherya vanceene okathi kiniriipiwa aka murima mwaha woohikhala hoothe ni anamuyari aka. Miyo kinnilavula ni yena ni onvekela nikhaliheryo. Nto owo onnikikhaliherya tthiri”. *

2. Waaphwanya apatthani animphenta Yehova.

Yesu aahiwiixuttiha atthareli awe oriki: “Othene mw’àxinna”. (Matheyo 23:8) Yesu aaphavela wira atthareli awe eekeekhai ephentaneke mukina ni mukhwaawe wira ekhale emusi yuulupale ya omunepani.Matheyo 12:48-50; Yohani 13:35.

Miloko sa eKristau sa Anamoona a Yehova sinnimananiha okumiherya wiiwanana ni ophentana ntoko emusi ya omunepani. (aHéberi 10:24, 25) Anamunceene anniweha wira mithukumano sa mmulokoni siri ntoko murette onimukhaliherya mutthu oriipiwe murima.

Eva, oni: “Kaahikhalana mpatthani aka a mmulokoni aiwexexa mixankiho saka. Owo aanikiwiriyana, okisomela Biibiliya, ni ovekela ni miyo. Nave aanikiiriha woona wira nkaakhanle mekhaka. Owo aanikikhaliherya ohula murima aka. Mwaha wookikhaliherya, kaahipacerya wiivaha efaita”. Rachel, onihimya-tho so: “Kaahaaphwanya ‘amaama ni apaapa’ mmulokoni. Tthiri mpatthani ole aahikiiriha woona wira kaaniphentiwa”.

 3. Mwaareereleke murima ni waaphenta akina.

Waaphenta akina ni waareerela murima onnilipiha wataana wahu. Yesu aahimmye wira: “Mulipa-òvaha [onnihakalala vanceene] onvikana mulipa-òvahiwa”. (Miteko 20:35) Tthiri, vaavo nniimananiha ahu waaphenta akina, awo-tho anniniphenta vanceene. Yesu aahihimya-tho wira: “Mwavaheke akhw’inyu: siso [‘atthu anrowa woovahani’, Tradução do Novo Mundo]”.Luka 6:38.

Okathi onaaphenta ahu akina ni ophentiwa naawo, ninnihakalala vanci. Biibiliya oni: “Ophenta khummala-tho”. (1 aKorinto 13:8) María, onihimya so: “Koosuwela wira miyuupuwelo sikina soohiloka kirina aka khahiyo sookhalela. Masi, kinnaavya enamuna yowaakhaliherya akina wira kiliyale miyuupuwelo saka. Nto ikwaha sinceene kinnihakalala vaavo kinipaka aka etthu wira kaakhaliherye atthu akina”.

ELAPO YOOROROMELEYA

Itthu tthaaru simanle ahu oromola, khahiyo ntoko maxitta. Masi iyo sinnikhaliherya tthiri. Caroline oni: “Nlelo kinnikhalana miyuupuwelo sa oxankiheya”. Masi, vano kinnoona wira ka mutthu a faita tthiri. “Koosuwela wira Muluku onnikikhapelela, ni kookhalana apatthani anceene eekeekhai, yaawo-tho ankilipiha”. Rachel, onuupuwela-tho siiso. Owo oni: “Ikwaha sikina kinniriipiwa murima, masi kookhalana emusi ya omunepani ya anna ni arokora yaawo anikikhaliherya ophwanya ohakalala ni woonaka itthu mwa enamuna yooloka. Ohiya-vo, kookhalana Tiithi a wiirimu yoowo kinivaanelana aka mahiku otheene. Eyo ennikilipiha vanceene”.

Biibiliya onnilavula sa elapo esya ya muhoolo, yeeyo otheene ahu nihinrowa ahu woovaka etthu

Masi yookhala-tho etthu ekina yoororomeleya. Biibiliya onnilavula sa elapo esya ya muhoolo. Okathi owo woova wotheene onoomala. Mwa elapo esya Muluku oleihenrye awe “khula mutthu onokhala ni murettele vamuttutthini wa mimanka sawe, mukhitte mwa mikhaju sawe: khavo onrowa wavelaveliha”. (Mikeya 4:4) Okathi owo, khaavo onrowa onoopopihaka. Hata “itthu sivinre sinoliyaliwa khuluwi”. (Yesaya 65:17, 25) Muluku ni Mwanawe, Yesu Kristu, anooruuha “exariya”. Nto eyo enookumiherya “witthyala ni mukhaliheryo wa mahiku othene”.Yesaya 32:17.

^ etti. 5 Masina otheene aaturukiwa.

^ etti. 21 Anamoona a Yehova annaavaha atthu aniphavela omwaattamela Muluku yoosoma ya Biibiliya ehinliviwa etthu.