Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha  |  N.° 1 2016

 MIRUKU SA KHALAI SEIYO SINIVARELEYA MUTEKO OLELO-VA

Muhixankiheyeke

Muhixankiheyeke

MALAKIHERYO A BIIBILIYA: “Muhèteteye [mwaha wa] ekumi anyu”.Matheyo 6:25, Biblya Exirima.

Ele enitaphulela aya: Yesu aahilavula moolumo awo okathi aalavula awe mwaha awe oniitthaniwa Olaleerya Vamwaako. Disionaario mmosa onitthokiherya myaha sa Biibiliya, onihimya wira nuulumo na eGriki noowi ‘weteteya’ wala ‘ovelavela’, nintaphulela “oxankiheya mwaha wa ohaawa, etala ni mixankiho sikina sinimphwanya mutthu khula nihiku”. Nave-tho, ninhela muhina oxankiheya ni itthu sinrowa wiiraneya muhoolo. Okhala wene, khahiyo vootthekeya oxankiheya ni itthu sootthuneya sa okumi ni ophavela wira ale anaaphenta ahu akhaleke saana. (aFilipi 2:20) Masi vaavo Yesu aahimyale awe wira “muhukhuwé”, aaphavela onitumererya wira nihixankeke mootepana mwaha wa itthu sinrowa wiireya meelo, maana opaka eyo pooti onaakha ohakalala nirina ahu olelo-va.Matheyo 6:31, 34.

Niireke miruku iya sinnivareleya muteko olelo? Tthiri vannireerela wiiwelela miruku iya sa Yesu. Mwaha aya? Iliivuru sikina sinihimya wira vaavo mutthu onixanka awe mootepana, muupuwelo ni ottoopare awe onniweha-weha mowaakuveya khula etthu enimwiiraneela, nto mukhalelo owo pooti “omukumiherya [mutthu owo] iretta ntoko, makhwatta ahinvola, iretta sa murima ni iphumu”.

Yesu aahooniherya mathowa anikhaliherya osyaka oxankiheya mootepana, vaavo aakonhe awe wira: “T’ani a nyuwo, ni weteteya wawe, onwerya orakamiha hatá vakhani olekela w’ekumi awe?” (Matheyo 6:27) Tthiri, oxankiheya mootepana khonrowa orakamiha wala olokiherya okumi ahu hata mwa esekuntu emosa. Ohiya-vo, ikwaha sinceene itthu khasiniiraneya ntoko nuupuwela ahu. Musomi mmosa, onihimya so: “Oxankiheya mootepana ni itthu sa muhoolo ori ohonona okathi paahi; maana ikwaha sinceene khasinikhumela itthu soohiloka ntoko nuupuwela ahu”.

Exeeni enrowa onikhaliherya osyaka oxankiheya? Wanipacerya, omuroromela Muluku. Okhala wira Muluku onnaavaha soolya axipalame ni onniwariha ithutu sa mutakhwani, nto owo onimwaakhaliherya atthu yaale animuroromela ni onimwaavaha itthu sootthuneya sinaathowa. (Matheyo 6:25, 26, 28-30) Ya nenli: Muxankeke ni itthu sa olelo vaava paahi. Yesu aahimmye so: “Muhukhuwé nnihiku n’omelo . . . Vanaphiyerya khula nihiku ohaweliwa waya”. Tthiri “khula nihiku” sookhala mixankiho saya.Matheyo 6:34.

Wiiwelela miruku sa Yesu onoonikhaliherya osyaka mixankiho sinceene. Ohiya-vo, onooniphwanyiha omaaleleya, eyo piiyo, “murettele wa Muluku”.aFilipi 4:6, 7.