Murowe mpantta wa sirimuhina

Murowe mpantta wa menu a nenli

Murowe mpantta wa myaha sirimuhina

Anamoona a Yehova

Emakhuwa

Owehaweha (Onisommwa Mmulokoni)  |  Novembro 2017

Mwiipeke Voohakalala!

Mwiipeke Voohakalala!

“Etthu yorera owipela Apwiya”.​—ESALIMO 147:1.

ISIPO: 9, 138

1. Wiipa onniiriha opaka exeeni?

MULOPWANA mmosa oovuwa onipaka masipo ohimmye so: “Okathi muniiwa anyu moolumo, awo anniwiirihani wuupuwelela. Okathi munwiriyana anyu nsipo nlo ninniwiirihani opaka etthu enihimya aya. Masi okathi muniipa anyu moolumo, annoovarani murima”. Isipo sahu sinninvuwiha Tiithi ahu oophenta, Yehova. Sinniniiriha omwaattamela yena. Tivonto wiipa ori aya mpantta wootthuneya wa omukokhorela Muluku, hata niipaka mekhihu wala ni annihu.

2, 3. (a) Akina anoonela sai wiipa moowiiwanyeya mmulokoni? (b) Makoho xeeni ninrowa ahu othokorerya mwaha ola?

2 Niireke vannoosivelani wiipa moowiiwanyeya, vamosa ni muloko? Wala owuulihani muru? Ilapo sikina, alopwana annuuliwa muru vanceene wiipa isipo ohoolo wa atthu. Etthu eyo pooti ohonona muloko wotheene, vanceenexa vakhala wira axitokweene annoovelela wiipa moowiiwanyeya, wala animakela ovara itthu sikina okathi oniipiwa aya isipo.​—Esalimo 30:13.

3 Wiipa oniirela mpantta muulupale omukokhorela Yehova. Tthiri khanimphavela okhumela ota okathi oniipiwa aya isipo  mmuthukumanoni. Tivonto nihaana wiikoha so: ‘Kinoonela sai wiipa mmuthukumanoni? Kipake exeeni vakhala wira kinnoovelela wiipa ohoolo wa atthu? Nave kipake exeeni wira kiipeke isipo ni murima wotheene?’

WIIPA ONIIRELA MPANTTA OKOKHORELA WEKEEKHAI

4, 5. Mareheryo xeeni a wiipa yaakhanle otemplo khalai?

4 Okhuma khalai arumeyi a Yehova annimuttottopela Yehova ni isipo. Okathi aIsarayeli yaari aya oororomeleya, okokhorela waya waahela muhina omwiipela isipo Yehova. Mwa ntakiheryo, okathi Davidi aalokiherya awe otthukuleliwa etemplo, owo aahaathanla aLevi 4.000 wira anvuwiheke Yehova ni isipo. Mwa atthu ala, 288 ‘yanirattela owipela Apwiya’.​—1 Wahala 23:5; 25:7.

5 Wiipa ni woopa ikaruma sa isipo saahiirela mpantta nihiku noopacerya otthukuleliwa etemplo. Biibiliya onihimya so: “Alipa-òwopa n’alipa-òwipa yahattottopela Apwiya ni wavuwiha ni nsu nimosa. Siso, okathi warumaya malope ni xittattha ni malapa, awo yanatthapela Apwiya, . . . [nto] ovuwa w’Apwiya wahisarya mpani mwaya”. Tthiri eyo yaahilipiha waamini wa aIsarayeli!​—2 Wahala 5:13, 14; 7:6.

6. Mareheryo xeeni a wiipa ni woopa ikaruma, Nehemiya aapanke awe okathi aari awe guvernatoro a oYerusalemu?

6 Okathi Nehemiya aatthokinhe awe aIsarayeli wira ateke ixiri sa oYerusalemu, nave-tho aahaatthokiha aLevi wira yiipeke isipo ni woopa ikaruma sa isipo. Nto okathi waatthapeliwa aya omalihiwa otekiwa ixiri, atthu yaahihakalala mwaha wa isipo siipiwa. Nehemiya aahithanla “maloko manli a alipa-òwipa”. Khula egrupu ya alipa-oowiipa, yaaniipa yeettaka vasulu va ixiri iye, sittharaka ipantta soovirikana mpakha okumana eriyari aya, waattamela waari etemplo. Onyakula waya waaniiwanyeya ottaiwene. (Nehemiya 12:27, 28, 31, 38, 40, 43) Tthiri Yehova aahihakalala vanceene owiiwa arumeyi awe anvuwihaka ni isipo, voohakalala.

7. Yesu oonihenrye sai wira wiipa ohaana okhala epantte yootthuneya ya omukokhorela Muluku?

7 Okathi Yesu aari awe valaponi, nlelo isipo saaniirela mpantta muulupale okokhorela wekeekhai. Muupuwele etthu yiiraneyale ohiyu yoole Yesu aiviwe awe. Nuumala Yesu opaka Yoolya ya Ohiyu ya Apwiya ni awiixutti awe, otheene aya yaahiipa isipo sininvuwiha Yehova.​—Mmusome Matheyo 26:30.

8. Ntakiheryo xeeni maKristau oopacerya avanhe aya voohimya sa onvuwiha Muluku ni isipo?

8 MaKristau a eseekulu yoopacerya yaahivaha ntakiheryo nooloka voohimya sa onvuwiha Muluku ni isipo. MaKristau awo khiyaamukokhorela Yehova mutemplo, masi yaathukumana mmaitthokoni. Nnaamwi mapuro awo yahaari maalupale ni ooreerexa ntoko etemplo, masi awo yaanimwiipela Yehova masipo ni murima aya wotheene. Murummwa Paulo aahaahimeerya annawe aKorinto oriki: “Mwixuttihaneke, mulakiheryaneke n’ankhili othene. Mutthapeleni Muluku: mwipeleni ni murim’anyu wothene mw’eroho isipo ni masalmo òtthapa”. (aKolosi 3:16) Isipo siri eliivuru ahu ya masipo sihaana wiipiwa ‘n’utthapa’. Masipo awo aniirela mpantta “yolya [enivahiwa] okathi aya” ni “murumeyi òroromeleya ni ànkhili”.​—Matheyo 24:45.

 MUNROWA OWERYA SAI WIIPA MUHOOVELELAKA?

9. (a) Xeeni akina anoovelela aya wiipa moohakalala mmulokoni ni mithukumano suulupale? (b) Nimwiipeleke sai isipo Yehova, ni ti pani anireerela ohoolelaka? (Nwehe elatarato yoopacerya.)

9 Itthu xeeni woonasa wene siniwiirihani woovelela wiipa? Woonasa wene emusi anyu wala nloko nanyu khanirina yoolema ya wiipa. Wala mwaha wa owiiwa atthu anirattela wiipa muraadioni aahiiso TV, nyuwo munnuuliwa muru okhala wira khamuniipa siiso. Masi otheene ahu nihaana onvuwiha Yehova ni isipo. Tivonto, muhaana ovarelela saana eliivuru anyu ya isipo, weemexa muru, ni wiipa voohakalala! (Ézira 3:11; musome Esalimo 147:1.) Inupa sinceene sa Omwene vano sookhalana TV wala projetor, onikhweiherya otthara saana moolumo a isipo sahu. Nwehe-tho wira mahiku ala, eprograma ya Exikola ya Orummwa wa Omwene ya axitokweene ennihela muhina wiipa isipo. Eyo enooniherya wira ti vootepa otthuneya axitokweene ohoolelaka wiipa isipo mmuthukumanoni.

10. Nuupuweleke exeeni akhala wira ninnoovelela wiipa mowiiwanyeya?

10 Atthu anceene annoovelela wiipa mowiiwanyeya mwaha woowi anoova waanyakula akina wala anoona wira nsu naya ti noonanara. Masi muupuwele ela: Othene ahu ninnivonya ni moolumo ahu, masi eyo khennooceliha olavula. (Yakobo 3:2) Nto niireke nnoohiyererya wira nsu nahu noohimalela nnooceelihe onvuwiha Yehova ni masipo?

11, 12. Exeeni enrowa onikhaliherya wiipa saana?

11 Woonasa wene ninnoovelela wiipa mwaha woowi khaninsuwela moota wowiipa. Masi sookhala itthu saamukhaani nikhanle ahu oopaka wira niweryeke wiipa saana. *​—Nwehe enoota.

 12 Wira nwerye wiipa ni nsu nowiiwanyeya, muhaana toko wiixutta omumula saana. Sisaale ntoko energia eniwerya aya ompattiha luuxu, nto omumula wanyu onnivaha ikuru nsu nanyu, okathi onilavula anyu wala wiipa. Muhaana wiipa mowiiwanyeya, ntoko muniira anyu mwaalavulaka, wala ovikana-vo. (Nwehe malakiheryo anivahiwa eliivuru Beneficie-se da Escola do Ministério Teocrático, ipaaxina 181 mpakha 184, vathi va muru mwaamukhaani oni “Controle correto da respiração”.) Tthiri Biibiliya ikwaha sikina onnaatumererya arumeyi a Yehova omwiipela isipo “n’utteliwa murima”.​—Esalimo 33:1-3.

13. Mutthokiherye moota mukhanle anyu oowiipa mohoovelela.

13 Okathi onimulompa anyu Muluku vatthokoni wala munisoma anyu mekhinyu, mweererye opaka ela: Muthanle nsipo nimosa nintepa woosivelani eliivuru ahu ya isipo. Musomeke moolumo aya mowiiwanyeya ni muhoovelelaka. Moottharelana, muromole mowiiwanyeya moolumo otheene ekwaha emosa, muhimumulelaka. Nuumala-vo, Mwiipe moolumo awo mwa enamuna emosaru. (Yesaya 24:14) Nsu nanyu ninrowa okhala noolipa, nto eyo etthu yooreera. Muhuuleliwe muru mwaha wookhalana nsu noolipa!

14. (a) Waathama vanceene onrowa onikhaliherya sai okathi oniipa ahu? (Nwehe ekaaxa “ Moota Wowiipa Saana”) (b) Malakiheryo xeeni a moota woolokiherya nsu munoona anyu okhala oovarela muteko?

14 Wira mwiipeke saana, muhaana waathama saana. Nto okathi muniipa anyu muhaana waathama vanceene ovikana okathi onilavula anyu. Masi akhala wira nsu nanyu khanlimpe ni ti noonyakulexa, munrowa opaka exeeni? Mweererye otthara malakiheryo ari epaaxina 184 ya eliivuru Beneficie-se da Escola do Ministério Teocrático, ekaaxa eni “Como Superar Problemas Específicos”.

MWIIPEKE MASIPO NI MURIMA WOTHEENE

15. (a) Mwaakha wa 2016, etthu xeeni yaakumiheriwe muthukumano wa mwaakha? (b) Xeeni ehalaka okumiheriwa eliivuru esya ya isipo?

15 Mwaakha wa 2016, atthu otheene yaarowenle muthukumano wa mwaakha yaahihakalala vanceene vaavo munna Stephen Lett a Nikhuuru Noolamulela aahimmye awe okumiheriwa eliivuru esya ya isipo, erina muru oni “Nimwiipele Yehova Voohakalala”. Munna Lett aahitthokiherya wira nthowa nimosa niirinhe okumiheriwa eliivuru esya ya  isipo, mwaha woowi ookumiheriwa Biibiliya musya a Tradução do Novo Mundo da Bíblia Sagrada. Nto eliivuru ela esya ya isipo yookumihiwa moolumo ahiniphwanyaneya-tho Biibiliya ola musya. Nave-tho ahincereriwa masipo makina anilavula sa muteko woolaleerya ni yowoopola. Ohiya-vo, okhala wira wiipa oniirela mpantta muulupale omukokhorela wahu Yehova, nto Nikhuuru Noolamulela naaphavela opaka eliivuru ya isipo yoolokexa. Tivonto, ekaapa aya enoolikana ni ekaapa ya Biibiliya Tradução do Novo Mundo.

16, 17. Itthu xeeni sikina siturukiwe eliivuru esya ya isipo?

16 Wira ekhweyeke orumeela, masipo a eliivuru ela esya athukumanyiwe moovarihana ni mwaha ene. Mwa ntakiheryo masipo 12 oopacerya animulavula Yehova, masipo 18 anittharelana animulavula Yesu ni yowoopola, ni ennivikaniha ni myaha sikina. Yookhala elista yoomalela ya myaha sotheene wanipacerya wa eliivuru ya isipo. Eyo enookhaliherya vanceene ophwanya nsipo mutthu oniphavela awe. Mwa ntakiheryo, enimwaakhaliherya anna anilavula myaha othanla nsipo nooreerela mwaha owo.

17 Wira yaakhaliherye atthu otheene wiiwexexa saana muhupi wa nsipo ni wiipa ni murima wotheene, moolumo makina a isipo kamosa-kamosa aaturukiwa. Moolumo vano  ahinirumeeliwa vanceene aaturukiwa. Nave-tho nsipo nenlo mwa nttaava na enkelexi naarina muru oni “Ohaawa moovilela”, vano muru aya oni “Nooniheryeke Ovilela”, ni moolumo makina aaturukuwa. Nave-tho nsipo naarina muru wira “Musuke Murima Anyu” nooturukiwa, nto vano nni: “Nihaana Okhapelela Murima Ahu”. Xeeni nihalaka oturukiwa? Mwaha woowi, khalai vale okathi mutthu iipa awe nsipo nlo, vaakhala ntoko aaleela atthu akina etthu yoopaka. Woonasa wene eyo khiyaasivela atthu yaapacerya orweela mithukumano, amiravo ni axirokora okathi wa mithukumano sa mmulokoni, asembeleya ni kongresu. Tivonto anna aaturuka muru ni moolumo a nsipo nlo.

Mwiixutteke wiipa isipo sahu okathi wa omulompa Muluku vatthokoni (Nwehe ettima 18)

18. Xeeni vanitthuneya ahu wiixutta isipo sa eliivuru ahu esya? (Nwehe enoota.)

18 Isipo sinceene sa eliivuru “Nimwiipele Yehova Voohakalala” siri ntoko mavekelo. Isipo iyo pooti wookhaliheryani omuleela Yehova etthu eri vamurimani vanyu. Isipo sikina sinimookhaliheryani ovikaniha ‘ovara miteko sorera’. (aHéberi 10:24) Tivonto nihaana osuwela saana melodia, eyiipeliwo ni moolumo a isipo sahu. Etthu emosa enrowa onikhaliherya opaka eyo, ori waawiriyana anna ni arokora agravariwe yiipaka isipo iyo. Masipo awo oogravariwa anniphwanyaneya va jw.org. Nave-tho vaavo muniipa anyu masipo owaani, nto munimwiixutta moota wowiipa ni murima wotheene ni muhoovelelaka. *​—Nwehe enoota.

19. Vanrowa oweryaneya sai atthu otheene mmulokoni onvuwiha Yehova?

19 Muupuweleke wira wiipa oniirela mpantta muulupale omukokhorela wahu Yehova. Eri enamuna emosa ya omooniherya Yehova wira ninnimphenta ni omuxukhurela mwaha wa itthu sotheene onniirela awe. (Mmusome Yesaya 12:5.) Vaavo muniipa anyu moohakalala, munniwiiriha akina-tho wiipa moohakalala. Atthu otheene mmulokoni, amiravo, atthu oowuuluvala aahiiso asuwenle ekeekhai ninaano, anoowerya onvuwiha Yehova ni masipo. Nto muhooveleleke wiipa ni murima wotheene. Mwiiweleleke yooruma ya nasalimo ohimmye so: “Nwipele Apwiya”! Aayo, nimwiipele Yehova voohakalala!​—Esalimo 96:1.

^ etti. 11 Wira musuwele etthu enrowa wookhaliheryani olokiherya nsu nanyu, nwehe eprograma ya JW Broadcasting a Dezembro (mpantta oni DE NOSSO ESTÚDIO).

^ etti. 18 Khula asembeleya wala kongresu eprograma enipacerya ni muusika wa minutu 10, voosiisu ni othana. Muusika owo onninikhaliherya okhala oolikana wira niipe nsipo noopacerya ni owiriyana saana eprograma. Tivonto, okathi onipacerya aya muusika owo, niireke nikilanthe ene opuro ahu.