Murokora mmosa onikhala oColômbia oniihaniwa Nicole ohimmye so: “Okisivela Empa aka ya Omwene! Owo ti opuro kinikhala aka ni anna ni arokora.” Ankhi nyuwo, niireke munoonela siiso Empa anyu ya Omwene?

 Olumwenku wootheene, Anamoona a Yehova annithukumana Ipa sa Omwene soowiiraka 63.000. Ipa iyo, sinninikhaliherya omukokhorela Muluku ahu mwa enamuna yooloka. Masi sookhala inamuna sikina ninttottela ahu mureerelo Ipa sa Omwene. Pioneero rekulaari oniitthaniwa Davidi a oColômbia onihimya so: “Ipa sahu sa Omwene sinniiriha muhupi ninlaleya ahu okhala woovara murima. Atthu anrwa onixekurya annihakalala ni moota ninrattela ahu.” Masi ipa iyo kasinreera mekhaya-ru. Ninnivara muteko munceene wiira nirattele Ipa iyo sa Omwene. Muteko owo onivariwa sai?

Moota enilokiheriwa aya Empa ya Omwene

 Miloko sinthukumana Empa ya Omwene, ti sirina muritti wa okhapelela. Nto anna ni arokora annilimpari, olokiherya ni oweha itthu sikina sinipirisari olokiherya.

 ETepartameno yooteka ya muttetthe (LDC), ennikhaliherya miloko yaathanlaka anna wiira akhale matreinatoori a muteko woolokiherya. Khula treinatoori onnikhalana muritti wa olokiherya Ipa sa Omwene 6 wala 10. Owo onnixekurya miloko iyo ni onniwiixuttiha anamalaleerya moota woolokiherya. Savira iyaakha 3 owo onniweha itthu sinipirisari olokiheriwa ni okhapeleliwa.

 Anna ni arokora ennasivela vanceene etreinamento anivahiwa aya para olokiherya Empa ya Omwene. Murokora oniihaniwa Indhumathi onikhala wÍndia onihimya so: “Etreinamento yaari yoohakalaliha. Vaari vooreera wiixutta moota woolokiherya Empa ahu ya Omwene.” Munna oniihaniwa Evans onikhala oQuénia onihimya so: “Vaavo ninlokiherya ahu mixankiho saamukhaani sa Empa ahu ya Omwene, eyo enninikhaliherya osyaka okastari musurukhu munceene muhoolo.”

Musurukhu ene oniphwanyiwa woowi?

 Musurukhu onirumeeliwa vamwaakhani wiira elokiheriwe Empa ya Omwene, pooti okhala wa imilyau sinceene sa itoolari. a Eyo enivarihana ni muttetthe etekiwe aya, okathi ovinre etekiwe ene ni miloko sinirumeela Empa eyo ya Omwene. Musurukhu onirumeeliwa oniphwanyiwa woowi?

 Musurukhu onivahiwa moohikhanyereriwa, tonirumeeliwa para olokiheriwa ni oratteliwa Empa ya Omwene. Munna oniihaniwa Alexander onikhala oCazaquistão, ohimmye so: “Musurukhu mukina onivahiwa onnirumeeliwa para interneti, maasi ni energia. Nave mukina onnirumeeliwa wiira sithummwe iluuva, etinta, iprotuutu sa limpeesa ni itthu sikina.” Nave musurukhu mukina onihala onninviyariwa ofiliyaali wiira warumeeliweke para olokiheriwa Ipa sa omwene sa olumwenku wootheene.

Iproxeetu suulupale sa olokiheriwa Ipa sa Omwene

 Akhala wiira Empa ya Omwene enipirisari olokiheriwa, masi ikastu sene sinnivikana musurukhu onirumeeliwa mweeri mmosa aahiiso miraru, axitokweene annilavula ni treinatoori a eTepartameno yooteka ya muttetthe (LDC). Akhala wiira anna awo animweemererya, onrowa orumeeliwa musurukhu onivahiwa moohikhanyereriwa para olokiheriwa Ipa sa Omwene sa olumwenku wootheene. Mwaakha wa 2023, saahipakiwa Ipa sa Omwene soowiiraka imilyau 8.793. Nave waahirumeeliwa musurukhu waaphiyerya imilyau 76,6 sa itoolari (yoowo oniphiyerya 4 844 95,00MT). Nrowe niwehe matakiheryo manli.

 WAngola, Empa emosa ya Omwene yeeyo yaavirihale iyaakha 15 etekiwe ene, yaahikhalana mixankiho sinceene. Mwa ntakiheryo, ifiiyu sa energia saanipirisari oturukiwa, ipareti saahikhalana iraaxa nave mavisiinyu yaaninlaseya mwaha wa maasi yaawo yaamorela mukintaali mwaya okathi epula yaarupa aya. Nto wiira muxankiho ole omale, anna a LDC yaahikastari musurukhu 9 285 wa itoolari (yoowo oniphiyerya imiili 587 28,00MT). Mavisiinyu yaahixukhurela vanceene ni otikinihiwa moota muteko ole waavariwe aya.

 OPolónia, Empa emosa ya Omwene, yaanittonya vanceene nave itapeti saataliwe vathi saahihononeya. Nto anna a LDC yaaheemererya olokiheriwa vasulu va empa eyo ni oturukiwa itapeti saari vathi. Waahikastariwa musurukhu waaphiyerya 9 757, wa itoolari (yoowo oniphiyerya 617 130 25,00MT). Nto okhala wiira yoolokiheriwa, khonrowa ovariwa muteko munceene muhoolo.

Muteko wa olokiherya Ipa sa Omwene onninvuwiha Yehova

 Vaavo ninlokiherya ahu Ipa sa Omwene, ninnikhaliherya orumeeliwa saana musurukhu nave ipa iyo sinninvuwiha Yehova. Shaun munna yoowo onikhala oTonga, onihimya so: “Mwaha wa olokiheryaka, ninniwerya omukokhorela Yehova Empa ya omwene yooratteleya, yootthokiheya ni eri saana. Nave eyo enniwiiriha atthu anceene omusuwela Yehova muttetthe ninkhala ahu. Nave-tho, khannuuliwa muru waalattula atthu wiira arweele mithukumano sahu.”

Etthu xeeni mukhanle anyu oopaka wiira mukhaliherye?

 Ootheene ahu nnoowerya okhaliherya orattela ni olokiherya Empa ahu ya Omwene. Marino yoowo onaatreinari atthu olokiherya Ipa sa Omwene wAustrália, onihimya so: “Khula mmosa a hiyo, ookhalana eparakha ya okhaliherya orattela ni okhapelela Empa ya Omwene. Opaka eyo etthu yooloka maana ninnikhaliherya wiira musurukhu orumeeliweke oratteene ni mapuro onipirisariwa aya.”

 Joel, munna yoowo onikhala wÍndia, ni onisiveliwa olokiherya Ipa sa Omwene, onihimya so: “Vaavo kinivara aka ni anna ni arokora nenna-va, onnikikhaliherya wuupuwela moota ninrowa ahu okhalaka elapo esya.” Nicole nimulavunle ahu wanipacerya onihimya so: “Okathi anna yaalokiherya aya etuupu yaahononeyale, miyo kaahikhaliherya kilimpariki vathi vaanaanale. Nnaamwi kihikhanle miyo kaalokiherya etuupu ele, masi kaahikhaliherya wiira ehikhumelele ehasara.”

 Mwaaphavelaka okhaliherya muteko woolokiherya Empa anyu ya Omwene, mulavule ni mutokweene a muloko anyu. Nave musurukhu munivaha anyu wiira mukhaliherye olokiheriwa Empa anyu ya Omwene aahiiso sa olumwenku wootheene, wookhalana efaita. Musurukhu owo pooti ovahiwa ekaaxa eri Empa ya Omwene aahiiso esaiti donate.jw.org. Ninnixukhurela vanceene mwaha woovaha wanyu.