Phindulo i bvaho Bivhilini

 Bivhili a i ambi nga ha Euthanasia. a Fhedzi zwine ya zwi amba nga ha vhutshilo na lufu zwi ita uri ri kone u vha na mavhonele o teaho. U vhulaya muthu a zwi ṱanganedzei, fhedzi a hu na ṱhoḓea ya u ita zwo kalulaho u itela u engedza vhutshilo ha muthu ane na khou mu vhona uri a nga si tsha tshila.

 Bivhili i ṱalusa Mudzimu sa Musiki washu, ane a vha “tshisima tsha vhutshilo.” (Psalme ya 36:9; Mishumo 17:28) Vhutshilo ndi ha ndeme vhukuma phanḓa ha Mudzimu. Nga nṱhani ha zwenezwo, Mudzimu ha ṱoḓi uri muthu a vhulaye muṅwe kana u ḓivhulaya. (Ekisodo 20:13; 1 Yohane 3:15) Zwiṅwe hafhu, Bivhili yo sumbedza uri ri fanela u lwela u tsireledza vhutshilo hashu na ha vhaṅwe. (Doiteronomio 22:8) Zwi tou vha khagala uri Mudzimu u ṱoḓa ri tshi dzhiela nṱha tshifhiwa tsha vhutshilo.

Hu pfi mini arali muthu a tshi khou lwala lwa u fa?

 Bivhili a i tendi uri muthu a vhulaye muthu naho onoyo muthu a tshi khou lwala lwa u fa. Tsumbo ya Khosi Saulo wa Isiraele i tikedza zwenezwo. Musi o huvhadzwa vhukuma nndwani, o humbela mufari wawe wa mapfumo uri a mu vhulaye. (1 Samuele 31:3, 4) Onoyo munna o hana. Fhedzi muṅwe munna o ḓiita u nga ndi ene o vhulayaho Saulo. Davida we a vha e na mahumbulele a fanaho na a Mudzimu o vhona onoyo munna mulandu wa malofha.​—2 Samuele 1:6-16.

Naa hu na tshifhinga tshine muthu a tea u engedzelwa vhutshilo hawe?

 Musi zwi tshi tou vha khagala uri muthu u khou fa, Bivhili a i ambi uri ni tea u ita mini u itela u engedza vhutshilo hawe. Nṱhani hazwo, Bivhili i ṋea mavhonele o teaho. Lufu ndi swina ḽashu ḽihulwane, masiandoitwa a tshivhi. (Vharoma 5:12; 1 Vhakorinta 15:26) Naho ri tshi khou lwala, a ro ngo fanela u o fha lufu ngauri Mudzimu o fhulufhedzisa uri u ḓo vusa vho faho. (Yohane 6:39, 40) Muthu ane a ṱhonifha vhutshilo, u sumbedza u vhu dzhiela nṱha nga u ṱoḓa thuso ya khwine ya ngalafho. Fhedzi zwenezwi a zwi iti uri ni khethe ngalafho ine ya ḓo ita uri hu engedzwe vhutshilo ha muthu ane a khou fa.

Naa u ḓivhulaya ndi tshivhi tshi sa hangwelwi?

 Hai, Bivhili a i ambi uri u ḓivhulaya ndi tshivhi tshi sa hangwelwi. Naho u ḓivhulaya hu tshivhi tshi hulwane, b Mudzimu u a pfesesa zwiitisi zwine zwa nga ita uri muthu a ḓivhulaye, zwi ngaho sa, thaidzo ya muhumbulo, mutsiko wo kalulaho kana ndi vhulwadze vhune ha lwaliwa nga vhathu vha haṋu. (Psalme ya 103:13, 14) U khuthadza vho tsikeledzeaho a tshi shumisa Bivhili. Zwiṅwe hafhu, Bivhili i amba uri hu ḓo vha na “mvuwo ya vho lugaho na vha songo lugaho.” (Mishumo 24:15) Zwenezwi zwi sumbedza uri hu na fhulufhelo ḽa uri hu ḓo vuswa na vhathu vho itaho tshivhi tshihulwane, u katela na vhe vha ḓivhulaya.