Pfukelani kha mafhungo

Ni Nga Tshila Hani Lwa Tshoṱhe?

Ni Nga Tshila Hani Lwa Tshoṱhe?

Phindulo i bvaho Bivhilini

Bivhili i fhulufhedzisa u ri: “Ane a ita zwine Mudzimu a zwi funa u ḓo dzula e hone lini na lini.” (1 Yohane 2:​17) Mudzimu u ṱoḓa ni tshi ita mini?

  • Gudani nga ha Mudzimu na Murwa wawe , Yesu. Musi Yesu a tshi khou rabela Mudzimu o ri: “Uri vha wane vhutshilo vhu sa fheli, vha fanela uri vha ḓivhe iwe Mudzimu wa ngoho u woṱhe, vha ḓivhe na Yesu Kristo we wa mu ruma.” (Yohane 17:3) Ndi mini zwine zwa katelwa kha ‘uri ri ḓivhe’ Mudzimu na Yesu? Ri nga vha ḓivha nga u guda Bivhili na u shumisa mulaedza wayo vhutshiloni hashu. * Bivhili i dzumbulula mahumbulele a Musiki washu, Yehova Mudzimu, ane a vha Muṋei wa vhutshilo. (Mishumo 17:24, 25) Bivhili i dovha ya ri vhudza nga ha Murwa wawe, Yesu, we a funza “mafhungo a vhutshilo vhu sa fheli.”​—Yohane 6:​67-​69.

  • Sumbedzani u vha na lutendo kha tshiṱhavhelo tsha tshirengululi tsha Yesu. Yesu o ḓa kha ḽifhasi “u shumela vhaṅwe na u ṋekedza vhutshilo hawe uri vhu vhe tshirengululi.” (Mateo 20:28) Tshiṱhavhelo tsha Yesu tshi rengululaho tsho vulela vhathu tshibuli tsha uri vha tshile lwa tshoṱhe Paradisoni kha ḽifhasi. * (Psalme 37:29) Yesu o ri: “Ngauri Mudzimu o funa shango zwihuluhulu a vhuya a kumedza Murwa wawe mubebwa e eṱhe, uri muṅwe na muṅwe ane a vha na lutendo khae a si fheliswe, fhedzi a wane vhutshilo vhu sa fheli.” (Yohane 3:​16) Ṱhogomelani uri huna zwinzhi zwine zwa ṱoḓea u fhira u sokou tenda kha Yesu. Ri fanela ‘u sumbedza u vha na lutendo khae,’ ra khetha u tshila u tendelana na pfunzo yawe na zwine Khotsi awe a zwi funa.​—Mateo 7:​21; Yakobo 2:​17.

  • Fhaṱani vhukonani ho khwaṱhaho na Mudzimu. Mudzimu u ṱoḓa ri tshi sendela tsini hawe nahone ra vha khonani yawe. (Yakobo 2:​23; 4:8) Mudzimu ndi wa lini na lini. A nga si vhuye a fa nahone u ṱoḓa na khonani dzawe dzi tshi tshila lwa tshoṱhe. Kha ipfi ḽawe, Mudzimu o sumbedza zwine a zwi ṱoḓa kha vhoṱhe vhane vha mu ṱoḓa: “Dzimbilu dzavho dzi ḓo tshila lini na lini.”​—Psalme 22:26.

Mahumbulele O Khakheaho Nga Ha U Tshila Lwa Tshoṱhe

Mahumbulele o khakheaho: Vhuḓidini ha vhathu vhu ḓo ita uri vha wane vhutshilo vhu sa fheli.

Ngoho: Naho vha zwa ngalafho vha tshi fhulufhedzisa u engedza vhutshilo ha vhathu, honoho vhuḓidini a vhu nga ḓo ita uri vha wane vhutshilo vhu sa fheli. Ndi Mudzimu fhedzi ane a ḓo ri ṋea vhutshilo vhu sa fheli, ngauri ndi ene “tshisima tsha vhutshilo.” (Psalme 36:9) O fhulufhedzisa u ri “lufu u ḓo lu lozwa tshoṱhe” nahone a ṋea vhutshilo vhu sa fheli kha vhathu vhoṱhe vha fhulufhedzeaho.​—Yesaya 25:8; 1 Yohane 2:​25.

Mahumbulele o khakheaho: Vhathu vhane vha ḓo tshila lwa tshoṱhe ndi vha dziṅwe tshaka fhedzi.

Ngoho: Mudzimu ha na tshiṱalula. Nga hu fanaho, “Kha tshaka dzoṱhe muthu ane a mu ofha nahone a ita zwo lugaho u a mu ṱanganedza.” (Mishumo 10:34, 35) Vhathu vha mirafho na mvelele dzo fhambanaho vhane vha thetshelesa Mudzimu vha nga tshila lwa tshoṱhe.

Mahumbulele o khakheaho: Vhutshilo vhu sa fheli vhu ḓo vha vhu sa takadzi.

Ngoho: U wana vhutshilo vhu sa fheli zwi bva ha Mudzimu, ane a ri funa nahone a ṱoḓa ri tshi takala. (Yakobo 1:​17; 1 Yohane 4:8) U a zwi ḓivha uri u itela uri ri takale, ri ṱoḓa mushumo une wa ri takadza. (Muhuweleli 3:​12) Mudzimu u fulufhedzisa uri vhoṱhe vhane vha ḓo tshila lwa tshoṱhe kha ḽifhasi vha ḓo fushea, vha ḓo vha na mushumo wa ndeme une wa ḓo vhuyedza vhone vhaṋe na vhane vha vha funa.​—Yesaya 65:22, 23.

Zwiṅwe hafhu, vhane vha ḓo tshila lwa tshoṱhe vha ḓo bvelaphanḓa vha tshi khou guda zwithu zwiswa nga ha Musiki wavho na nga ha mushumo wawe muhulwane wa u sika. O sika vhathu e na tshipikwa tsha uri vha tshile lwa tshoṱhe na uri vha gude nga hae, naho vha sa ḓo “ṱalukanya mishumo ye Mudzimu a i shuma, u ranga hayo na u vulea hayo.” (Muhuweleli 3:​10, 11) Nga zwenezwo, vhane vha ḓo tshila lwa tshoṱhe vha ḓo vha na zwithu zwi takadzaho zwine vha ḓo zwi guda na u zwi ita.

^ phar. 4 Ṱhanzi dza Yehova vha fara pfunzo ya Bivhili ya mahala. U itela u wana mafhungo o engedzeaho, ṱalelani vidio Pfunzo ya Bivhili I farwa hani?