Pfukelani kha mafhungo

“Khoṋo Dza Muvhuso” Ndi Mini?

“Khoṋo Dza Muvhuso” Ndi Mini?

Bivhili i a fhindula

“Khoṋo dza Muvhuso” dzi na maanḓa a u vulela vhathu uri vha “dzhene muvhusoni wa Mudzimu” (Mateo 16:19; Mishumo 14:22) * Yesu o ṋea Petro “khoṋo dza Muvhuso wa ṱaḓulu.” Zwenezwi zwi amba uri Petro o ṋewa maanḓa a u dzumbulula uri vhathu vha fulufhedzeaho vha nga dzhena Muvhusoni wa ṱaḓulu nge vha ṋewa muya mukhethwa wa Mudzimu.

Dzenedzi khoṋo dzo shumiswa kha vhonnyi?

Petro o shumisa maanḓa e a ṋewa nga Mudzimu u itela u vulela zwigwada zwiraru uri zwi dzhene Muvhusoni:

  1. Vhayuda na vhe vha rembulutshela kha Vhuyuda. Nga murahunyana ha u fa ha Yesu, Petro o ṱuṱuwedza gogo ḽa Vhayuda vha re vhatendi uri vha tende uri Yesu ndi ene we a khethiwa nga Mudzimu uri a vhuse Muvhusoni wawe. Petro o vha sumbedza zwine vha fanela u zwi ita u itela u tshidzwa. Nga zwenezwo, o vha vulela nḓila ya u dzhena Muvhusoni nahone vhathu vhanzhi vho “ṱanganedza eneo mafhungo.”​—Mishumo 2:38-41.

  2. Vhasamaria. Nga murahu, Petro o rumiwa na kha Vhasamaria. * O dovha a shumisa khoṋo ya Muvhuso musi ene na muapostola Yohane, vha tshi “vha rabelela uri vha wane muya mukhethwa.” (Mishumo 8:14-17) Zwenezwi zwo vulela Vhasamaria nḓila ya u dzhena Muvhusoni.

  3. Vhannḓa. Miṅwaha miraru na hafu musi Yesu o no fa, Mudzimu o dzumbululela Petro uri na Vhannḓa (vhathu vha si Vhayuda) vho vha vha tshi ḓo vha na tshibuli tsha u dzhena Muvhusoni. A tshi tendelana na zwenezwo, Petro o shumisa iṅwe ya khoṋo u itela u huwelela kha Vhannḓa, nga u ita zwenezwo, o vha vulela tshibuli tsha u wana muya mukhethwa, uri vha vhe Vhakriste nahone vha vhe miraḓo ya Muvhuso. ​—Mishumo 10:30-35, 44, 45.

Zwi amba mini u “dzhena Muvhusoni wa ṱaḓulu”?

Vhane vha “dzhena Muvhusoni wa ṱaḓulu” vha vha vhavhusi na Yesu ngei ṱaḓulu. Bivhili yo amba hu tshee nga phanḓa uri vha ḓo ‘dzula kha dzikhuluṋoni’ nahone vha “vhusa sa mahosi kha ḽifhasi.”​—Luka 22:29, 30; Nzumbululo 5:9, 10.

Mazwifhi nga ha khoṋo dza Muvhuso

Mazwifhi: Petro ndi ene ane a khetha vhane vha ya ṱaḓulu.

Ngoho: Bivhili i amba uri Yesu Kristo ndi ene “ane a ḓo haṱula vha tshilaho na vho faho,” hu si Petro. (2 Timotheo 4:1, 8; Yohane 5:22) Ngoho nda ya uri, Petro o amba uri Yesu ndi ene “we a rumiwa nga Mudzimu uri a vhe muhaṱuli wa vha tshilaho na vho faho.”​—Mishumo 10:34, 42.

Mazwifhi: Ḽiṱaḓulu ḽo lindela Petro a tshi nanga uri u ḓo shumisa lini khoṋo dza Muvhuso.

Ngoho: Musi Yesu a tshi khou amba nga ha khoṋo dza Muvhuso, o vhudza Petro uri: “Zwoṱhe zwine wa zwi vhofha kha ḽifhasi zwi ḓo vha zwo no vhofhiwa ngei ṱaḓulu, zwine wa ḓo vhofholola kha ḽifhasi zwi ḓo vha zwo no vhofhololwa ngei ṱaḓulu.” (Mateo 16:19) Naho vhaṅwe vha tshi vhona u nga zwenezwi zwi amba uri ndi Petro we a vha a tshi dzhia phetho nga ha zwa ṱaḓulu, maiti a Lugerika lwa kale a sumbedza uri Petro o vha tshi ḓo dzhia phetho musi ho no dzhiiwa phetho ngei ṱaḓulu. *

Huṅwe Bivhili i sumbedza uri Petro o vha e na fulufhelo ḽa u ya ṱaḓulu musi a tshi shumisa khoṋo dza Muvhuso. Sa tsumbo, o vha a tshi khou ita zwe Mudzimu a mu vhudza musi a tshi shumisa khoṋo ya vhuraru.​—Mishumo 10:19, 20.

^ phar. 3 Nga zwiṅwe zwifhinga, Bivhili i shumisa ipfi “khoṋo” u itela u fanyisela maanḓa na vhuḓifhinduleli.​—Yes 22:20-22; Nzu 3:7, 8.

^ phar. 7 Vhasamaria vho vha vhe na vhurereli ho fhambanaho na ha Vhayuda, fhedzi vha tshi tevhedza dziṅwe pfunzo na maitele zwi re kha Mulayo wa Mushe.

^ phar. 15 Sedzani notsi dza u guda dza Mateo 16:19 kha New World Translation of the Holy Scipruters (Study Edition) nga Luisimane.