Pfukelani kha mafhungo

Bivhili I Ri Mini Nga Ha U Fhiswa Ha Mufu?

Bivhili I Ri Mini Nga Ha U Fhiswa Ha Mufu?

Bivhili I A Fhindula

Bivhili a i ambi nga ho livhaho nga ha u fhisa mufu. Bivhilini a huna mulayo une wa amba nga ha u vhulunga kana u fhisa mufu.

Bivhili i amba nga ha zwiitea zwa musi vhashumeli vha Mudzimu vha fhulufhedzeaho vha tshi khou vhulunga vha havho vho faho. Sa tsumbo, Abrahamu o ita vhuḓidini vhuhulwane ha u itela mufumakadzi wawe Sara vhiḓa.​—Genesi 23:​2-​20; 49:29-​32.

Bivhili i dovha ya amba nga ha vhaṅwe vha fulufhedzeaho vhe vha fhisa vho faho. Sa tsumbo, musi Khosi Saulo wa Isiraele na vharwa vhawo vhararu vha tshi vhulawa nndwani, zwitumbu zwavho zwo sala shangoni ḽa maswina avho nahone a zwo ngo fariwa nga nḓila yavhuḓi. Musi vhanna vha vhahali vha fhulufhedzeaho vha Isiraele vha tshi zwi pfa, vho ya vha dzhia tshitumbu tsha Saulo na zwa vharwa vhawe, vha zwi fhisa nahone vha vhulunga masalela. (1 Samuele 31:​8-​13) Bivhili i sumbedza uri yeneyo yo vha i nḓila i ṱanganedzeaho ya u swiṱa maselela a vhenevho vhanna.​—2 Samuele 2:​4-6.

Mazwifhi o ḓoweleaho nga ha u fhiswa ha mufu

Mazwifhi: U fhisa tshitumbu zwi sumbedza u tshi nyadza.

Ngoho: Bivhili i amba uri vho faho vha vhuyelela buseni, zwine zwa vha zwithu zwine zwa itea nga lwa nzulele kha tshitumbu musi tshi tshi sina. (Genesi 3:​19) U fhisa zwi ita uri tshitumbi tshi ṱavhanye u vha miḽora kana buse.

Mazwifhi: Zwifhingani zwa Bivhili, ho vha hu tshi fhiswa zwitumbu zwa vhathu vha sa takalelwi-ho nga Mudzimu.

Ngoho: Zwitumbu zwa vhaṅwe vhathu vhe vha vha vha sa fulufhedzei, sa Akani na muṱa wawe, zwo fhiswa. (Yoshua 7:​25) Naho zwo ralo, ho vha hu si na mulayo nga hazwo, vho vha vha tshi zwi ita nga u funa. (Doiteronomio 21:22, 23) Samusi zwo ṅwalwa mathomoni, na zwitumbu zwa vhaṅwe vhathu vha fhulufhedzeaho, sa Yonathani murwa wa Khosi Saulo, zwo fhiswa.

Mazwifhi: U fhisa tshitumbu zwi ita uri Mudzimu a si vuse onoyo muthu o faho.

Ngoho: Musi hu tshi ambiwa nga mvuwo ya vho faho, Mudzimu a nga kona u vusa muthu hu sa londwi uri o tou vhulungwa, u fhiswa, u xela lwanzheni kana o ḽiwa nga zwipuka zwa ḓaka. (Nzumbululo 20:13) Wa Ṱaḓulu-Ṱaḓulu u a kona u dovha a sika muvhili muswa wa muthu.​—1 Vhakorinta 15:35, 38.