Pfukelani kha mafhungo

“Alfa na Omega” Ndi Nnyi Kana Ndi Mini?

“Alfa na Omega” Ndi Nnyi Kana Ndi Mini?

Bivhili i a fhindula

“Alfa na Omega” zwi ambela kha Yehova Mudzimu, Ramaanḓa oṱhe. Enea maipfi a bvelela luraru Bivhilini​—Nzumbululo 1:8; 21:6; 22:13. *

Ndi ngani Mudzimu a tshi ḓivhidza “Alfa na Omega”?

Alfa ndi ḽeḓere ḽa u thoma nahone Omega ndi ḽeḓere ḽa u fhedza kha alifabeta dza Lugerika, nahone Lugerika ndi luambo lwe lwa shumiswa nga maanḓa musi hu tshi shumiswa Bivhili ine ya vhidzwa Thestamennde Ntswa ine ya angaredza na bugu ya Nzumbululo. Nḓila ye enea maḽeḓere a Lugerika a dzudzanywa ngayo a fanyisela uri ndi ene e eṱhe wa u thoma na wa u fhedzisela. (Nzumbululo 21:6) U bva kale na kale o vha e Mudzimu Ramaanḓa oṱhe nahone u ḓo dzula e Mudzimu Ramaanḓa oṱhe lwa tshoṱhe. Ndi ene e eṱhe “tsha kale na kale na lini na lini.”​—Psalme ya 90:2.

Ndi nnyi “wa u thoma na wa u fhedzisela”?

Bivhilini i shumisa eneo maipfi i tshi ambela kha Yehova Mudzimu na kha Murwa wawe Yesu, fhedzi a tshi amba zwithu zwi sa fani. Ṱhogomelani tsumbo mbili.

  • Kha Yesaya 44:6, NW, Yehova u ri: “Ndi nṋe wa u thoma na wa u fhedzisela. Ndi nṋe Mudzimu ndi ndoṱhe.” Hafha Yehova u khou bvisela khagala uri ndi ene Mudzimu wa nga hu sa fheli a huna Muṅwe nga nnḓa hae. (Doiteronomio 4:35, 39) Kha haya mafhungo, maipfi ane a ri “wa u thoma na wa u fhedzisela” a amba zwi fanaho na “Alfa na Omega.”

  • U engedza henefho, maipfi ane a ri “wa u Thoma [pro’tos, hu si alfa] na wa u Fhedza [e’skha·tos, hu si omega]” a wanala kha Nzumbululo 1:17, 18 na kha 2:8. Kha hedzi ndimana, mafhungo adzo a sumbedza uri ane ha khou ambelwa khae o fa nahone nga murahu a vuswa. Nga zwenezwo, hedzi ndimana dzi nga si vhe dzi khou ambela kha Mudzimu ngauri ha athu u vhuya a fa. (Habakuku 1:12) Fhedzi Yesu o fa nahone a vuswa. (Mishumo 3:13-15) O vha muthu wa u thoma u vuswa sa tshivhumbeo tsha muya tshi sa fi, a yo tshila ṱaḓulu hune a khou tshila hone “lwa tshoṱhe.” (Nzumbululo 1:18; Vhakolosa 1:18) Nga murahu ha mvuwo yawe Yesu o ṋewa ndugelo ya vusa vhathu. (Yohane 6:40, 44) Nga zwenezwo ndi ene muthu wa u fhedza we Yehova ene muṋe a mu vusa. (Mishumo 10:40) Nga nṱhani ha zwenezwo, Yesu o tewa nga u vhidzwa u pfi “wa u Thoma na wa u Fhedza.”

Naa Nzumbululo 22:13 i ṋea vhuṱanzi ha uri Yesu ndi “Alfa na Omega”?

Hai. Muṅwali wa Nzumbululo 22:13 ha ngo ambiwa nga ho livhaho nahone yeneyi ndima yo ṅwalwa nga vhaṅwali vho vhalaho. Muprofesa William Barclay musi a tshi amba nga ha tshenetshi tshipiḓa tsha kha Nzumbululo o ṅwala uri: “Zwithu a zwo ngo ṅwalwa nga u tevhekana; . . . nga zwenezwo zwi a konḓa u ḓivha uri muṅwali ndi nnyi.” (The Revelation of John, Volume 2, Revised Edition, siaṱari 223) Nga zwenezwo, “Alfa na Omega” kha Nzumbululo 22:13 i nga ambela kha muthu we a ṋewa ḽeneḽi dzina huṅwe kha Nzumbululo​—Yehova Mudzimu.

^ phar. 3 Ḽo bvelela lwa vhuṋa kha Nzumbululo 1:11 kha Bivhili ya King James Version. Naho zwo ralo, kha vhunzhi ha ṱhalutshedzelo dza Bivhili dza musalauno ho bviswa eneo maipfi ngauri ha wanali kha maṅwalwa a kale a Lugerika fhedzi o dovha a dzheniswa kha maṅwe Maṅwalo.