U TSHILA SA VHAKRISTE

Tshipiḓa Tshiswa Tsha Muṱangano Wa Vhukati Ha Vhege

TAMBANI

U thoma nga January 2018, muṱangano wa vhukati ha vhege u ḓo katela notsi na zwifanyiso zwa u guda zwine zwa vha kha online study edition ya New World Translation of the Holy Scriptures (nwtsty), naho study edition tshi sa athu u vha hone nga luambo lwaṋu. Ri na vhuṱanzi ha uri eneo mafhungo a ḓo ita uri ni lugiselele miṱangano nga nḓila i bvelelaho. Zwa ndeme vhukuma ndi uri zwi ni sendedze tsini-tsini na Khotsi ashu wa lufuno, Yehova!

NOTSI DZA U GUDA

Notsi dza u guda dzi ri thusa u pfesesa vhubvo, fhethu na luambo lwo shumiswaho kha ndimana dza Bivhili.

Mateo 12:20

Luvhone lu nyengaho: Lammba ndi luvhone lwo ḓoweleaho lwo itwaho nga boḓelo ḽine ḽa ḓadziwa nga mapfura. Thambo ya lammba i kokodza mapfura u itela uri ḽi funge. Ipfi ḽa Lugerika ḽine ḽa ri “luvhone lu nyengaho” ḽi nga ambela kha thambo ine ya duba vhutsi nga uri i kha ḓi nyenga, fhedzi khavhu yo fhela kana yo tsimiwa. Vhuporofita ha Yesaya 42:3 ho dzula ho amba nga nḓila ine Yesu a pfela ngayo vhuṱungu. A nga si vhuye a tsima ṱhase i kha ḓi nyengaho ya fulufhelo ḽa vhathu vha ḓiṱukufhadzaho na vho tsikeledzeaho.

Mateo 26:13

Ngoho: Nga Lugerika, a·menʹ, ḽine nga Luheberu ḽa vha ’a·menʹ, zwine zwa amba “kha zwi ralo” kana “ngoho”. Kanzhi musi Yesu a tshi amba na musi a tshi funza nga ha vhuporofita kana mafulufhedziso, o vha a tshi thoma nga yeneyi mibulo u itela u ombedzela vhungoho hazwo. Kha maṅwalo makhethwa, nḓila ye Yesu a shumisa ngayo maipfi “ngoho” kana amen, yo vha yo khethea. Wonoyo mubulo wa Yesu u tshi shumiswa lunzhi-lunzhi u fana na kha evangeli ya Yohane, wo ṱalutshedzelwa sa “ngoho ngoho.”—Yoh 1:51.

MEDIA

Zwiṋepe, dzi artwork, vidio dzi si na maipfi na dza zwipopai, zwoṱhe zwi ṱalutshedza mafhungo a bvaho Bivhilini.

Betfage, Thavha ya Miṱwari na Yerusalema

Heyi vidio pfufhi i sumbedza nḓila i yaho Yerusalema i tshi bva vhubvaḓuvha, u bva muḓanani wa et-Tur une wa humbulelwa uri ndi muḓi wa Betfage, u swika fhethu hu re nṱhesa kha Thavha ya Muṱwari. Muḓi wa Bethania u vhubvaḓuvha ha Betfage kha lurumbu lwa Thavha ya Miṱwari. Musi vhe Yerusalema, Yesu na vhafunziwa vhawe vho vha vha tshi anzela u eḓela muḓini wa Bethania, hune ṋamusi ha ḓivhiwa sa muḓi wa el-ʽAzariyeh, dzina la Luarabu ḽine ḽa amba uri “Muḓana Wa Lazaro.” A zwi timatimisi uri musi e henefho, Yesu o vha tshi dzula hayani ha Marita, Maria na Lazaro. (Mat 21:17; Mar 11:11; Luk 21:37; Yoh 11:1) Musi Yesu a tshi bva hayani ha havho a tshi ya Yerusalema, a nga kha ḓi vha o shumisa nḓila i fanaho na yo sumbedzwaho kha vidio. Yesu a nga kha ḓi vha o shumisa yeneyo nḓila nga 9 Nisan 33 C.E., musi a tshi ya Yerusalema a tshi bva Betfage o ṋamela mbongolana.

Nḓila i bvaho Bethania i tshi ya Betfage
Betfage
Thavha ya Miṱwari
Muedzi wa Kidironi
Thavha ya Thembele

Tshibigiri Kha Rambo ḽa Tshirethe

Hetshi tshifanyiso tshi sumbedza rambo ḽa tshirethe ḽo ombelwaho nga tshibigiri tshine nga vhulapfu tsha vha senthimithara dza 11.5. Ḽeneḽo rambo ḽo wanala nga 1968 ngei devhula ha Yerusalema nahone vha wanulusa uri ḽeneḽo rambo ndi ḽa tshifhingani tsha musi hu tshi vhusa Vharoma. Heḽi rambo ḽi sumbedza vhuṱanzi ha uri zwibigiri zwi nga vha zwo vha zwi tshi shumiswa u ombela kha danda muthu o haṱulelwaho lufu. Hetshi tshibigiri tshi nga vha tshi tshi fana na zwe zwa shumiswa nga maswole a Vharoma musi a tshi ombela Yesu kha danda. Ḽeneḽo rambo ḽo wanala ngomu ha bogisi ḽo itwaho nga tombo ḽine ḽa vhidzwa ossuary, ḽe ḽa vha ḽi tshi shumiswa u dzhenisa marambo a muthu musi ṋama yo no sina. Zwenezwo zwi sumbedza uri muthu we a vhulawa kha danda o vha a tshi nga vhulungwa.—Mat 27:35.

Ṱhanzi dza Yehova