Ndi Nnyi Ane A Fanela U Gudisa Vhana Nga Ha Mudzimu?
“Mufunziwa ha fhiri mufunzi; na o vuledzaho a funzwa zwoṱhe, u ḓo ḓi tou lingana na mufunzi wawe.”—LUKA 6:40.
VHABEBI vhanzhi vha vhona u nga a vha fanelei u gudisa vhana vhavho nga ha Mudzimu. Vha nga humbula uri a vha na nḓivho yo teaho kana uri a vha ḓivhi zwithu zwinzhi nga ha vhurereli lune vha nga vha vhadededzi vhavhuḓi. Nga mulandu wa zwenezwo, vha litshedzela mashaka kana muṅwe murangaphanḓa wa vhurereli wonoyu mushumo.
Nga zwenezwo, ndi nnyi ane a nga gudisa zwavhuḓi vhana ngoho ya vhurereli na matshilele o teaho? Ṱolisisani zwine Bivhili ya zwi amba nga ha mafhungo enea ni dovhe ni zwi vhambedze na zwe vhaṅwe vhaṱoḓisisi vha zwi tumbula.
Mushumo Wa Khotsi Ndi Ufhio?
Zwine Bivhili ya zwi funza: “Na inwi vho-khotsi, ni songo sinyusa vhana vhaṋu, vha aluseni nga u vha laya na u vha kwengweledzela zwa Murena.”—Vha-Efesa 6:4.
Zwe zwa tumbulwa nga vhaṱoḓisisi: Vhokhotsi vha vhuyelwa hani arali vha fhisetshela zwa vhurereli? Thero ine ya ri Fathers’ Religious Involvement and Early Childhood Behavior, yo gandiswaho nga 2009, yo amba uri: “U vha na vhurereli zwi nga thusa vhanna uri vha vhe vhokhotsi vha khwine. Vhurereli vhu a tikedza na u langa vhathu, nahone vhu vha ṋea pfunzo na vhulivhisi malugana na nḓila ine vha fanela u tshila ngayo.”
Bivhili i ombedzela ndeme ya tshipiḓa tsha khotsi tsha u alusa na u funza vhana. (Mirero 4:1; Vha-Kolosa 3:21; Vha-Heberu 12:9) Fhedzi naa yeneyo nyeletshedzo i a shuma ṋamusi? Nga 2009 Yunivesithi ya Florida yo phaḓaladza thero ine ya haseledza nḓila ine vhokhotsi vha kwama ngayo vhana vhavho. Vhaṱoḓisisi vho wana uri vhana vhane vhokhotsi avho vha thusa u vha alusa vha anzela u vha vhathu vha pfelaho vhuṱungu na vhane vha ḓifulufhela. Vhana vha vhatukana vho vha vha tshi thetshelesa nahone vha vhasidzana vho dzika. Zwi tou vha khagala uri nyeletshedzo ya Bivhili i kha ḓi shuma.
Mushumo Wa Mme Ndi Wa Ndeme Lungafhani?
Zwine Bivhili ya zwi funza: “U songo nyadza mulayo wa mme-au.”—Mirero 1:8.
Zwe zwa tumbulwa nga vhaṱoḓisisi: Nga 2006 bugu ine ya pfi Handbook of Child Psychology yo amba uri: “Nga u tou angaredza, vhomme vha fhedza tshifhinga tshi ṱoḓaho u vha phesenthe dza 65 na dza 80 vhe na vhana vhavho u fhira vhokhotsi, nahone zwenezwi ndi zwithu zwo ḓoweleaho mashangoni manzhi.” Samusi ṅwana a tshi fhedza tshifhinga tshilapfu nga u ralo na mme awe, kuambele kwavho, zwiito zwavho na mavhonele avho zwi a kwama vhukuma nyaluwo yawe.
Musi mme na khotsi vha tshi farisana u itela u funza vhana vhavho mafhungo-ngoho a Mudzimu, vha vha ṋea zwifhiwa zwivhili zwa ndeme. Tsha u thoma, vhana vha vha na tshibuli tsha u vhumba vhukonani na Khotsi avho wa ṱaḓulu vhune ha ḓo vha vhuyedza vhutshiloni havho hoṱhe. Tsha vhuvhili, vhana vha guda kha tsumbo dzavho nḓila ine munna na mufumakadzi vha fanela u shumisana ngayo u itela u swikelela zwipikwa zwa ndeme. (Vha-Kolosa 3:18-20) Naho vhaṅwe vha tshi nga thusa mme na khotsi, ndi vhuḓifhinduleli ha vhabebi u funza vhana vhavho nga ha Mudzimu na nga nḓila ine Mudzimu a ṱoḓa muṱa u tshi tshimbidzwa ngayo.
Naho zwo ralo, vhabebi vha fanela u funza vhana nga nḓila-ḓe? Ndi maitele afhio ane a shuma?
