Dzhielani Nṱha U Fulufhedzea Na U Hangwela Ha Yehova
“Ngauri Iwe Muṋe wanga, U wa vhuḓi na vhulenda; vhoṱhe vhané vha U lilela U vha ita nga vhuthu vhuhulu.”—PS. 86:5.
1, 2. (a) Ndi ngani ri tshi takalela khonani dzi fulufhedzeaho na dzi hangwelaho? (b) Ndi mbudziso dzifhio dzine ra ḓo dzi fhindula?
NI NGA ṱalusa hani khonani ya vhukuma? Muṅwe wahashu wa tshisadzini ane a pfi Ashley o ri: “Kha nṋe, khonani ya vhukuma ndi muthu ane a dzula e hone tshifhinga tshoṱhe nahone ane a ni hangwela musi ni tshi mu khakhela.” Roṱhe ri takalela khonani dzine dza fulufhedzea na dzi hangwelaho. Dzi ri thusa u pfa ro tsireledzea na u funwa.—Mir. 17:17.
2 Yehova ndi Khonani i fulufhedzeaho vhukuma na i hangwelaho u fhira muthu naho e ufhio. Zwi fana na zwe zwa ambiwa nga mupsalme musi a tshi ri: “Ngauri Iwe Muṋe wanga, U wa vhuḓi na vhulenda [kana lufuno lwa vhukuma]; vhoṱhe vhané vha U lilela U vha ita nga vhuthu vhuhulu.” (Ps. 86:5) Zwi amba mini u vha a fulufhedzeaho na a hangwelaho? Yehova u sumbedza hani dzenedzo pfaneleo dzavhuḓi? Nahone ri nga edzisa hani tsumbo yawe? Phindulo dzi ḓo ri thusa u funa nga ho dzikaho Yehova, Khonani yashu khulwane. Dzi ḓo dovha dza ri thusa u khwaṱhisa vhukonani hashu na vhaṅwe.—1 Yoh. 4:7, 8.
YEHOVA U A FULUFHEDZEA
3. Zwi amba mini u fulufhedzea?
3 U fulufhedzea ndi pfaneleo ine ya sumbedza vhukonani vhuhulwane, ine ya katela u ḓikumedza, u amba ngoho na u farelela nga ho khwaṱhaho. Muthu ane a fulufhedzea ha shanduki. Nṱhani hazwo, u dzhiela muṅwe muthu nṱha (kana tshiṅwe tshithu) nga lufuno, a vha na vhukonani ha tsini na onoyo muthu kana tshenetsho tshithu naho vhuimo vhu tshi konḓa. Vhukuma, Yehova ndi ene “a fulufhedzeaho” u fhira vhathu vhoṱhe.—Nzumb. 16:5.
4, 5. (a) Yehova u sumbedza hani u fulufhedzea? (b) Ri nga wana hani nungo nga u elekanya nga ha u fulufhedzea ha Mudzimu?
4 Yehova u sumbedza hani u fulufhedzea? Ha vhuyi a laṱedza vhagwadameli vhawe vha fulufhedzeaho. Muṅwe wa vhagwadameli vhawe, Khosi Davida, o khwaṱhisedza uri Yehova u a fulufhedzea. (Vhalani 2 Samuele 22:26.) Musi Davida a tshi khou lingwa, nga u fulufhedzea Yehova o mu livhisa, a mu tsireledza na u mu tshidza. (2 Sam. 22:1) Davida o vha a tshi zwi ḓivha uri u fulufhedzea kha Yehova zwo vha zwi sa katela maipfi fhedzi. Ndi ngani Yehova o fulufhedzea kha Davida? Ngauri Davida ene muṋe o vha e “muvhuya,” kana a tshi fulufhedzea. Yehova u takalela u fulufhedzea ha vhagwadameli vhawe, nahone u vha lifhela nga u fulufhedzea khavho.—Mir. 2:6-8.
5 Ri nga wana nungo nga u elekanya nga u fulufhedzea ha Yehova. Muṅwe wahashu a fulufhedzeaho ane a pfi Reed o ri: “Zwi a nthusa vhukuma musi ndi tshi vhala nga ha nḓila ye Yehova a shumisana na Davida zwifhingani zwi konḓaho. Naho Davida o vha e mushavhoni, a tshi dzula mabakoni, Yehova o dzula a tshi mu tikedza. Ndi wana zwenezwo zwi tshi nṱuṱuwedza vhukuma! Zwi nkhumbudza uri naho vhuimo vhu vhufhio, naho ho vhifha lungafhani, Yehova u ḓo ntikedza, tenda nda dzula ndi tshi fulufhedzea khae.” A zwi timatimisi uri na inwi ni ḓipfa nga nḓila i fanaho.—Vharoma 8:38, 39.
6. Yehova u sumbedza u fulufhedzea nga nḓila dzifhio nahone vhagwadameli vhawe vha vhuyelwa nga mini?
6 Ndi dzifhio dziṅwe nḓila dzine Yehova a sumbedza ngadzo u fulufhedzea? Ha shanduki kha zwilinganyo zwawe. U ri khwaṱhisedza nga uri: “Ni ḓo vhuya na kalaha ndi tshi ḓi ralo.” (Yes. 46:4) U dzula a tshi ita phetho dzo thewaho kha zwilinganyo zwawe zwi sa shanduki kha sia ḽa zwo lugaho na zwivhi. (Mal. 3:6) Zwiṅwe hafhu, Yehova u sumbedza u fulufhedzea nga u ita zwe a fulufhedzisa. (Yes. 55:11) U fulufhedzea ha Yehova hu vhuyedza vhagwadameli vhawe vhoṱhe vha fulufhedzeaho. Nga nḓila-ḓe? Musi ri tshi farelela kha zwilinganyo zwa Yehova, ri ḓo vha na vhungoho ha uri u ḓo ri fhaṱutshedza samusi o ri fulufhedzisa.—Yes. 48:17, 18.
EDZISANI U FULUFHEDZEA HA YEHOVA
7. Ndi ifhio iṅwe nḓila ine ra nga edzisa ngayo u fulufhedzea ha Mudzimu?
7 Ri nga edzisa hani u fulufhedzea ha Yehova? Iṅwe nḓila ndi u tikedza vhathu vha re kha vhuimo vhu konḓaho. (Mir. 3:27) Sa tsumbo, naa ni ḓivha muṅwe mu tendi nga inwi o kuleaho nungo, khamusi nga nṱhani ha thaidzo dza mutakalo, u pikiswa nga vha muṱa, kana vhushayanungo ha muthu nga eṱhe? Zwi nga vha zwavhuḓi u dzhia vhukando ha u mu khuthadza nga “mafhungo avhuḓi a u rudza mbilu.” (Sak. 1:13) * U ita zwenezwo zwi sumbedza uri ni khonani i fulufhedzeaho na ya vhukuma, ‘ine ya fhira wa hau.’—Mir. 18:24.
8. Ri nga edzisa hani Yehova kha u fulufhedzea mbinganoni?
8 Ri nga dovha ra edzisa u fulufhedzea ha Yehova nga u dzula ri tshi fulufhedzea kha vhane ra vha funa. Sa tsumbo, arali ri mbinganoni, ri a zwi ḓivha uri ri fanela u dzula ri tshi fulufhedzea kha mufarisi washu wa mbingano. (Mir. 5:15-18) Ngauralo, a ri iti naho tshi tshini tshine tsha nga ita uri ri ite vhuṱonḓolo. (Mat. 5:28) Zwiṅwe hafhu, ri sumbedza u fulufhedzea kha vhatendi nga riṋe nga u iledza u amba zwitshele kana u vha remba, ra hana u phaḓaladza eneo maambiwa a si avhuḓi kana u a thetshelesa.—Mir. 12:18.
9, 10. (a) Ndi nnyi ane ra fanela u dzula ri tshi fulufhedzea khae nga ho khetheaho? (b) Ndi ngani u dzula ri tshi thetshelesa ndaela dza Yehova zwi sa leluwi tshifhinga tshoṱhe?
9 Zwihuluhulu, ri ṱoḓa u dzula ri tshi fulufhedzea kha Yehova. Ri zwi itisa hani zwenezwo? Nga u lwela u vhona zwithu nga nḓila ine Yehova a zwi vhona ngayo—u funa zwine a zwi funa na u vhenga zwine a zwi vhenga—na u ḓifara nga nḓila yavhuḓi. (Vhalani Psalme ya 97:10.) Musi ri tshi ita uri mahumbulele ashu na maḓipfele ashu zwi tshimbidzane na zwa Yehova, ri ḓo sendamela kha u thetshelesa ndaela dzawe.—Ps. 119:104.
10 Ndi ngoho uri a zwi nga dzuli zwi tshi ri lelutshela u thetshelesa ndaela dza Yehova. Ri nga fanela u lwela u dzula ri tshi fulufhedzea. Sa tsumbo, vhaṅwe Vhakriste vha si ho mbinganoni vha nga takalela u vha mbinganoni, fhedzi a vha athu u wana mufarisi o faneleaho vhukati ha vhagwadameli vha Yehova. (1 Vhakor. 7:39) Muṅwe wahashu wa tshisadzini a songo vhingwaho a nga wana uri vhashumisani nae vha si Vhakriste vha nga lingedza u mu konanya na ane vha humbula uri a nga vha mufarisi o faneleaho. Wahashu wa tshisadzini a nga vha a tshi khou lwisana na vhuludu. Fhedzi, u ita vhuḓidini ha u ḓiimisela u dzula a tshi fulufhedzea kha Yehova. Naa a ri dzhieli nṱha tsumbo yo raloho ya ndeme ya u fulufhedzea? Vhukuma, Yehova u ḓo lambedza vhoṱhe vhane vha dzula vha tshi fulufhedzea khae hu sa londwi vhuleme naho vhu vhufhio.—Vhaheb. 11:6.
“Hu na ṱhama i sá ṱali, ine ya vhuya ya fhira wa hau.”—Mir. 18:24 (Sedzani phara 7)
“Ni hangwelane nga mbilu yoṱhe.”—Vhaef. 4:32 (Sedzani phara 16)
YEHOVA U A HANGWELA
11. U hangwela zwi amba mini?
11 Iṅwe ya pfaneleo dza Yehova dzi kungaho ndi u ḓiimisela hawe u hangwela. Zwi amba mini u hangwela? Zwi re zwone ndi uri zwi katela u hangwela mukhakhi arali hu na tshiitisi tshi pfalaho tsha u ita nga u ralo. Zwenezwo a zwi ambi uri muthu o hangwelaho u vhuyafhedza vhukhakhi kana u hanedza uri o khakhelwa. Nṱhani hazwo, ha mu fari nga mbilu. Maṅwalo a funza uri Yehova “o ḓiimisela u hangwela” vhane vha sumbedza u rembuluwa zwa vhukuma.—Ps. 86:5, vhambedzani NW.
12. (a) Yehova u sumbedza hani u hangwela? (b) Zwi amba mini u ‘hangwelwa zwivhi’?
12 Yehova u sumbedza hani u hangwela? Musi Yehova a tshi hangwela, u hangwela nga “huhulu”; u hangwela nga ho fhelelaho, lwa tshoṱhe. (Yes. 55:7) Ri zwi ḓivha hani uri Yehova u hangwela nga ho fhelelaho? Ṱolisisani khwaṱhisedzo i wanalaho kha Mishumo 3:19. (Vhalani.) Muapostola Petro o ṱuṱuwedza vha thetshelesi vhawe uri vha ‘rembuluwe nahone vha shandule matshilele avho.’ Musi muitazwivhi a tshi rembuluwa zwi tshi bva mbiluni, u ḓisola vhukuma nga vhukhakhi he a vhu ita. U ḓiimisela u sa dovha a ita tshivhi. (2 Vhakor. 7:10, 11) Zwiṅwe hafhu, u rembuluwa zwa vhukuma zwi ita uri muitazwivhi a ‘shandule matshilele’ awe, a litshe nḓila dzawe mmbi, a fungelele kha u takadza Mudzimu. Arali vhathetshelesi vha Petro vha ṱahulela honoho u rembuluwa ha vhukuma, mvelelo dzo vha dzi tshi ḓo vha dzifhio? Petro o amba uri vha ḓo ‘hangwelwa zwivhi’ zwavho. Mubulo wonoyo u bva kha ipfi ḽa Lugerika ḽine ḽa amba “u phumula, u thutha.” Ngauralo, arali Yehova a tshi hangwela, u phumula mulandu woṱhe. U hangwela nga ho fhelelaho.—Vhaheb. 10:22; 1 Yoh. 1:7.
13. Maipfi ane a ri, “zwivhi zwavho a thi tsha ḓo zwi elelwa” a ri khwaṱhisedza mini?
13 Ri zwi ḓivha hani uri Yehova u hangwela lwa tshoṱhe? Ṱhogomelani vhuporofita ha Yeremia malugana na mulanga muswa, we wa vhofhwa na Vhakriste vho ḓodzwaho, une wa ita uri u hangwela ha vhukuma hu konadzee kha vhane vha fulufhela kha tshirengululi. (Vhalani Yeremia 31:34.) Yehova o ri: “Ndi ḓo vha hangwela mulandu wavho, na zwivhi zwavho a thi tsha ḓo zwi elelwa.” Ngauralo, Yehova u a ri khwaṱhisedza uri arali a ri hangwela, ha nga vhuyi a humbula na u ri haṱulela tshivhi tshashu tshifhingani tshi ḓaho. Ha vusulusi zwivhi zwashu u itela u ri pomoka kana u dzulela u ri ṱarafa. Nṱhani hazwo, Yehova u hangwela zwenezwo zwivhi nahone a zwi hangwa—lwa tshoṱhe.—Vharoma 4:7, 8.
14. Ni nga wana hani khuthadzo nga u elekanya nga ha u hangwelwa nga Yehova? Ṋeani tsumbo.
14 Ri nga wana khuthadzo nga u elekanya nga ha u hangwela ha Yehova. Ṱhogomelani tsumbo i tevhelaho. Miṅwaha minzhi yo fhiraho, muṅwe wahashu wa tshisadzini ane ra ḓo mu vhidza Elaine o bviswa tshivhidzoni. Nga murahu ha miṅwaha yo vhalaho, a vhuyedzedzwa. O ri: “Naho ndo vha ndo ḓivhudza uri Yehova o nkhangwela, nda dovha nda vhudza na vhaṅwe, ndo vha ndi tshi dzulela u pfa u nga u kule na nṋe kana vhaṅwe vho vha vhe tsini nae nahone o vha e wa vhukuma khavho.” Naho zwo ralo, Elaine o wana khuthadzo nga u vhala na u elekanya nga ha zwifanyiso zwine Bivhili ya zwi shumisa u ṱalusa u hangwela ha Yehova. Elaine o dovha a ri: “Ndo pfa lufuno lwa Yehova na vhulenda hawe nga nḓila ye nda vha ndi sa athu vhuya nda i ṱhogomela na ḓuvha na ḽithihi.” O kwamea nga maanḓa nga haya maipfi: “Musi Yehova a tshi ri hangwela zwivhi, ri songo vhuya ra vhona u nga ri na dondo ḽa zwivhi zwo raloho vhutshilo hashu hoṱhe.” * Elaine o ri: “Ndo vha ndi sa tendi uri Yehova a nga nkhangwela nga ho fhelelaho, nahone ndo vha ndi tshi humbula uri ndi ḓo hwala muhwalo wonoyo vhutshilo hanga hoṱhe. Ndi a zwi ḓivha uri zwi ḓo dzhia tshifhinga, fhedzi ndi vho zwi pfa uri ndi vho thoma u sendela tsini na Yehova zwa vhukuma, nahone ndi pfa ndo rulwa muhwalo we nda vha ndo u hwala.” Ri shumela Mudzimu wa lufuno na a hangwelaho!—Ps. 103:9.
EDZISANI U HANGWELA HA YEHOVA
15. Ri nga edzisa hani u hangwela ha Yehova?
15 Ri nga edzisa u hangwela ha Yehova nga u hangwela vhaṅwe arali hu na tshiitisi tsha u ita nga u ralo. (Vhalani Luka 17:3, 4.) Humbulani uri musi Yehova a tshi hangwela, u hangwa zwivhi zwashu nga muhumbulo wa u sa dovha a ri vhona mulandu nga hazwo. Musi ri tshi hangwela vhaṅwe, na riṋe ri nga hangwa nga muhumbulo wa u sa dovha ra vusa eneo mafhungo tshifhingani tshi ḓaho.
16. (a) Naa u vha a hangwelaho zwi amba u vhuyafhedza vhukhakhi kana u tendela vhaṅwe vha tshi tamba nga riṋe? Ṱalutshedzani. (b) Ri fanela u ita mini u itela u hangwelwa nga Mudzimu?
16 U vha a hangwelaho a zwi ambi u vhuyafhedza vhukhakhi kana u tendela vhaṅwe vha tshi tamba nga riṋe. Fhedzi zwi amba u sa fara muthu nga mbilu. Zwi swayeaho ndi uri u itela u hangwelwa nga Yehova Mudzimu, ri fanela u edzisa u hangwela hawe musi ri tshi shumisana na vhaṅwe. (Mat. 6:14, 15) Hafhu u pfela vhuṱungu ha Yehova zwi mu sudzulusela uri a zwi humbule uri “ri luruli.” (Ps. 103:14) Ndi ngoho uri u pfela vhuṱungu zwi tea u ri sudzulusela u lavhelela uri vhaṅwe vha ḓo ri khakhela, ra vha hangwela zwi tshi bva mbiluni.—Vhaef. 4:32; Vhakol. 3:13.
U nga ri thabelo dzashu dza u hangwela dzi nga vha dzi bvaho mbiluni (Sedzani phara 17)
17. Ndi mini zwine zwa ḓo ri thusa arali ro vhaiswa nga mutendi nga riṋe?
17 Vhukuma, a zwo ngo leluwa tshifhinga tshoṱhe u hangwela. Na vhaṅwe vhaḓodzwa vha Vhakriste vha ḓanani ḽa u thoma vho wana zwi khaedu u tandulula thaidzo dzavho. (Vhafil. 4:2) Arali ro no vhuya ra vhaiswa nga mutendi nga riṋe, ndi mini zwine zwa ḓo ri thusa? Ṱhogomelani tsumbo ya Yobo. Yobo o pfa vhuṱungu musi vhathu vhane vha ḓivhidza “khonani” dzawe—Elifasi, Bilidada, na Tsofari—vha tshi mu pomoka. (Yobo 10:1; 19:2) Yehova o fheleledza o kaidza vhenevho vhapomoki. Mudzimu o vha laedza uri vha ye kha Yobo vha ṋekedze tshiṱhavhelo tsha zwivhi zwavho. (Yobo 42:7-9) Fhedzi Yehova o dovha a ṱoḓa uri Yobo a ite tshiṅwe tshithu. Tsho vha tshi mini? Yehova o livhisa Yobo uri a rabelele vhapomoki vhawe. Yobo o ita zwe a vhudzwa nga Yehova nahone Yehova a fhaṱutshedza Yobo nge a sumbedza muya wa u hangwela. (Vhalani Yobo 42:10, 12, 16, 17.) Ndi ifhio ngudo ine ra i guda? U rabelela muthu we a ri khakhela zwi tshi bva mbiluni zwi nga ri thusa uri ri si mu fare nga mbilu.
BVELANI PHANḒA NI TSHI DZHIELA NṰHA PFANELEO DZA YEHOVA NGA VHUḒALO
18, 19. Ri nga bvela hani phanḓa ri tshi dzhiela nṱha vhumuthu ha Yehova vhu kungaho?
18 Zwo ri homolosa vhukuma u ṱolisisa masia o fhamba-fhambanaho a vhumuthu ha Yehova ha lufuno. Ro zwi vhona uri u a dzhenea, ha ṱaluli, u na mafunda, u a humbulela, u a fulufhedzea nahone u a hangwela. Vhukuma, ri tshee ro tou amba nga ha zwithu zwiṱuku-ṱuku. Ri ḓo takala musi ri tshi guda zwo engedzeaho nga ha Yehova u ya nga hu sa fheli. (Muh. 3:11) Ri tendelana na muapostola Paulo we a ṅwala uri: “Lupfumo, vhuṱali, na nḓivho zwa Mudzimu ndi zwihulwane”—ri si tsha amba lufuno na dziṅwe pfaneleo dza rathi dze ra dzi ṱolisisa.—Vharoma 11:33.
19 U nga ri roṱhe ri nga bvela phanḓa ri tshi dzhiela nṱha vhumuthu ha Yehova vhu kungaho. Ri nga ita zwenezwo nga u guda pfaneleo dzawe, ra dzi sumbedza, na u dzi shumisa vhutshiloni hashu. (Vhaef. 5:1) Musi ri tshi ita nga u ralo, ri ḓo tendelana ri sa timatimi na mupsalme we a imba a ri: “Nṋe ndi ḓifhelwa nga u vha tsini na Mudzimu.”—Ps. 73:28.
^ par. 7 U itela u wana nyeletshedzo dzi thusaho kha enea mafhungo, sedzani thero ine ya ri “Naa No No Ṱuṱuwedza Naho E Nnyi Zwenezwino?” kha Tshiingamo tsha ḽa 15 January, 1995 na kha tshiṱoho tshine tsha ri “Ṱuṱuwedzani Lufunoni na Kha Mishumo Mivhuya—Nga Nḓila-ḓe?” kha Tshiingamo tsha ḽa 1 April, 1995.
