MUSI ZWE VHA ZWI LAVHELELA ZWI SONGO TSHA ITEA

Nga 1925, vhunzhi ha Vhagudi vha Bivhili vho vha vho lavhelela uri ḽifhasi ḽi vhe Pharadiso. Ndi ngani? Wahashu Vho Albert Schroeder vhe nga murahu vha vha muraḓo wa Tshigwada tshi Langaho vho ri: “Ro vha ri tshi humbula uri vho ḓodzwaho vhe vha vha vha tshi kha ḓi vha hone kha ḽifhasi, vho vha vha tshi ḓo ya ṱaḓulu vha vhusa na uri vhanna vha fhulufhedzeaho vho faho vha ngaho sa Abrahamu, Davida na vhaṅwe vho vha vha tshi ḓo vuswa vha ranga phanḓa kha tshipiḓa tsha kha ḽifhasi tsha Muvhuso wa Mudzimu.” Fhedzi vhaṅwe vhahashu vho sinyuwa vhukuma nge zwenezwo zwithu zwi si itee.​—Mir. 13:12.

Naho hu songo tsha itea zwe Vhagudi vha Bivhili vha vha vho lavhelela uri zwi itee, vhunzhi havho vho bvela phanḓa vho farakanea nga mushumo wa u huwelela mafhungo maḓifha nahone vho zwi ṱhogomela uri vha na vhuḓifhinduleli ha u vha Ṱhanzi dza Yehova. Sa tsumbo, kha ri ambe nga ha mushumo we vha u ita u itela u phaḓaladza ngoho kha vhathu vhanzhi fhethu hu re kule.

HO FHAṰIWA ZWIṄWE ZWIṰITSHI ZWA RADIO

Ngauri ho vha na vhathu vhanzhi vhe vha thetshelesa tshiṱitshi tsha WBBR nga 1924, Vhagudi vha Bivhili vho mbo ḓi ita tshiṅwe tshiṱitshi tsha radio tshi re na maanḓa nga 1925 tsini na Chicago, Illinois. Tshenetsho tshiṱitshi tsho vha tshi tshi vhidziwa WORD. Vho Ralph Leffler vhe vha vha vhe muinzhiniara we a shuma kha u fhaṱa tshenetsho tshiṱitshi vho ri: “Vhathu vhane vha dzula kule vho vha vha tshi thetshelesa tshenetshi tshiṱitshi tsha WORD, nga maanḓa-maanḓa nga madekwana musi hu tshi khou rothola.” Sa tsumbo, hu na muṅwe muṱa une wa dzula Pilot Station, Alaska hune ha vha kule na tshiṱitshi tsha WORD nga khilomithara dzi fhiraho 5 000. Wonoyu muṱa wo thetshelesa iṅwe ya khasho dza u thoma dza tshenetshi tshiṱitshi. Nga murahu vho ṅwala vhurifhi vha tshi vhu ṅwalela vhathu vhe vha vha vha tshi khou shuma kha tshenetsho tshiṱitshi u itela u vha livhuwa nge vha vha thusa u guda zwo engedzeaho nga ha Mudzimu na Bivhili.

Tshiingamo tsha 1 December 1925 tsho ṱalutshedza uri ndi ngani vhathu vhanzhi na vhane vha dzula kule vho kona u thetshelesa tshenetsho tshiṱitshi. Tsho ri: “Tshiṱitshi tsha WORD ndi tshiṅwe tsha zwiṱitshi zwi re na maanḓa zwa Amerika. Tshi  a kona u fara kha ḽoṱhe ḽa Amerika, Cuba na tshipiḓa tsha devhula ha Alaska. Vhanzhi vhe vha vha vha sa athu vhuya vha pfa nga ha ngoho i re Bivhilini, vho guda zwo engedzeaho nge vha thetshelesa tshenetsho tshiṱitshi.”

Nga tshenetsho tshifhinga, Vhagudi vha Bivhili vho vha vha tshi khou ita vhuḓidini ha u shumisa radio u itela u huwelela mafhungo maḓifha ngei Canada. Nga 1924, Vhagudi vha Bivhili vho fhaṱa tshiṱitshi tsha radio tshine tsha pfi CHUC ngei Saskatoon, Saskatchewan. Tshenetsho tshiṱitshi tsho vha tshi tsha u tou thoma tshe tsha fhaṱiwa ngei Canada tshine tsha hasha zwithu zwa vhurereli. Nga 1925, tshenetsho tshiṱitshi tshiṱuku tsho tea u pfuluswa tsha iswa fhethu huhulwane. Nga wonoyo ṅwaha, tshenetsho tshiṱitshi tsho mbo ḓi vha madzinani a Vha Watch Tower Society nahone vha tshi pfulusela Regent Building he ha vha hu sietha ya kale ya ngei Saskatoon ye vha vha vho i renga vha i vusulusa u itela uri tshiṱitshi tshi vhe henefho.

Tshenetsho tshiṱitshi tsho thusa vhathu vhanzhi vhe vha vha vha tshi khou dzula ḓoroboni ṱhukhu na fhethu hu re mahayani ngei Saskatchewan u itela uri vha kone u pfa mafhungo maḓifha lwa u tou thoma. Sa tsumbo, kha iṅwe ḓorobo ye ya vha kule na tshenetsho tshiṱitshi, ho vha hu tshi dzula Vho Graham vhe vha pfa khasho ya tshenetsho tshiṱitshi, nga murahu vha ṅwalela u itela u humbela khandiso dzo thewaho Bivhilini. Wahashu Vho George Naish vha ri: “Musi vhenevha mufumakadzi vha tshi humbela uri ri vha thuse, zwo pfala zwo ṱavhanyiswa lwe ra vha rumela bugu dzoṱhe dza Studies in the Scriptures.” Hu sa athu fhela na tshifhinga, Vho Graham vho vha vha tshi vho phaḓaladza mulaedza wa mafhungo maḓifha a Muvhuso na kha zwipiḓa zwa kule vhukuma.

U SHANDULWA HA NḒILA INE RA PFESESA NGAYO ZWITHU

Tshiingamo tsha 1 March 1925 tsho vha tshi na thero ya ndeme i re na tshiṱoho tshine tsha ri “Birth of the Nation.” Ndi ngani yeneyo thero yo vha i ya ndeme? Ho fhela tshifhinga Vhagudi vha Bivhili vha tshi ḓivha uri Saṱhane u na ndangulo yawe. Kha yeneyo ndangulo, ho vha hu na madimoni ngei ṱaḓulu, vhurereli ha mazwifhi kha ḽifhasi, mabindu na mivhuso ya kha ḽifhasi. Naho zwo ralo, “mulanda a fhulufhedzeaho na wa vhuṱali” o shumisa yeneyi thero u itela u thusa vhahashu u pfesesa uri Yehova na ene u na ndangulo i sa fani na ya Saṱhane na uri ndangulo ya Yehova i lwisana na ya Saṱhane. (Mat. 24:45) Zwiṅwe hafhu, mulanda o dovha a ṱalutshedza uri Muvhuso wa Mudzimu wo thoma u vhusa nga 1914 nahone nga wonoyo ṅwaha, ho mbo ḓi vha na nndwa ngei ṱaḓulu, Saṱhane na madimoni awe vha pandelwa ṱaḓulu vha poswa kha ḽifhasi nahone a vha tsha kona u humela ṱaḓulu.​—Nzumb. 12:7-9.

Vhaṅwe zwo vha konḓela uri vha ṱanganedze nḓila ntswa ye ha vha hu tshi khou pfeseswa ngayo  eneo mafhungo nga tshenetsho tshifhinga. Nga zwenezwo, yeneyo thero yo ri: “Arali hu na vhaṅwe vhane vha khou vhala enea mafhungo nahone vha sa khou tendelana nao, zwi nga vha zwavhuḓi uri vha fhulufhele Yehova na uri vha bvele phanḓa vha tshi khou mu shumela nga u fhulufhedzea vha sa fheli mbilu.”

Muṅwe muvulanḓila wa ngei Britain ane a pfi Tom Eyre o ṱalutshedza nḓila ye vhunzhi ha Vhagudi vha Bivhili vha ḓipfa ngayo nga yeneyo thero. O ri: “Vhahashu vho vha vho takala musi vha tshi pfa hu tshi ṱalutshedziwa Nzumbululo ndima ya 12. Musi ri tshi zwi ṱhogomela uri Muvhuso wa Mudzimu wo no thoma u vhusa ngei ṱaḓulu, zwo ita uri ri ṱoḓe u huwelela nga hawo nga u fhisea. Zwo dovha zwa ri thusa u vhona uri Yehova u ḓo ri itela zwithu zwavhuḓi tshifhingani tshi ḓaho.”

VHO ṰANZIELA NGA HA YEHOVA

Ṋamusi, Ṱhanzi dza Yehova vha a ḓivha maipfi a re kha Yesaya 43:10 ane a ri: “Yehova u ri, ‘Inwi ni ṱhanzi dzanga,’ ‘Mushumeli wanga we nda mu nanga.’” Fhedzi musi 1925 i sa athu swika, lwonolo luṅwalo lwo vha lu sa anzeli u ambiwa kha khandiso dzashu. Fhedzi zwenezwo zwo vha zwi tshi ḓo shanduka. Nga 1925, luṅwalo lwa Yesaya 43:10 na 12 lwo haseledzwa kha Zwiingamo zwa 11.

Mafheleloni a August 1925, Vhagudi vha Bivhili vho ya buthanoni Indianapolis ngei Indiana. Kha mbekanyamushumo ho vha hu na mulaedza u bvaho kha Vho Joseph F. Rutherford une wa ri: “Ro ḓa fhano kha ḽino buthano u itela uri . . . Murena a ri ṋee nungo uri musi ri tshi humela murahu, ri huwelele mafhungo maḓifha nga u fhisea ri tshi ḓivha uri ri ṱhanzi dzawe.” Kha ḽeneḽo buthano ḽe ḽa fhedza maḓuvha a malo, vhe vha vha vhe hone vho ṱuṱuwedzwa uri vha shumise tshibuli tshiṅwe na tshiṅwe u itela u ṋea vhuṱanzi nga ha Yehova.

Nga mugivhela nga dzi 29 August, Wahashu Vho Rutherford vho vhea nyambo i re na tshiṱoho tshine tsha ri, “A Call to Action.” Kha yeneyo nyambo vho ombedzela uri ndi ngani mushumo wa u huwelela u wa ndeme, vho ri: “Yehova u vhudza vhathu vhawe uri: ‘Ni ṱhanzi dzanga, ndi nṋe Mudzimu.’ U dovha a vha laya nga ho livhaho a ri: ‘Lugiselelani vhathu nḓila.’ A hu na vhaṅwe vhathu kha ḽifhasi vhane vha nga lugiselela vhathu nḓila nga nnḓa ha vhathu vha Yehova. Vhathu vha Yehova vha na muya wawe nahone vha dovha vha vha Ṱhanzi dzawe.”​—Yes. 43:12; 62:10.

 Musi Wahashu Vho Rutherford vha tshi fhedza u ṋekedza nyambo, vho vhala tshibammbiri tshine tsha vhidzwa “Message of Hope.” Kha tshenetsho tshibammbiri ho vha ho ṅwaliwa u pfi Muvhuso wa Mudzimu ndi wone u woṱhe une wa nga ṋea vhathu fhulufhelo ḽa uri vha wane “mulalo, vha bvelele, vha wane mutakalo wavhuḓi, vha wane vhutshilo, vha vhofholowe na u wana dakalo ḽa tshoṱhe.” Vhathu vhoṱhe vhe vha vha vhe hone kha ḽeneḽo buthano, vho tendelana na wonoyo mulaedza. Nga murahu, honovho vhurifhi ha thendelano ho ṱalutshedzelwa kha dziṅwe nyambo nahone ha printhiwa sa tshibammbiri. Ho phaḓaladzwa kopi dzi ṱoḓaho u vha miḽioni dza 40 dza tshenetsho tshibammbiri.

Ho fhela miṅwaha minzhi vhagudi vha Bivhili vha sa athu thoma u shumisa dzina Ṱhanzi dza Yehova. Fhedzi vho vha vha tshi vho zwi vhona uri vha na vhuḓifhinduleli ha u vha ṱhanzi dzawe.

U VHUYELELA KHA VHE VHA TAKALELA MULAEDZA WASHU

Nga nṱhani ha uri tshivhalo tsha Vhagudi vha Bivhili tsho vha tshi tshi khou engedzea u mona na shango ḽoṱhe, Vhagudi vha Bivhili vho mbo ḓi ṱuṱuwedzwa uri vha dovhe vha vhuyelele kha vhathu vhe vha sumbedza uri vha a takalela mafhungo maḓifha tshifhingani tsho fhiraho. Musi ho no itwa fulo ḽa u phaḓaladza tshibammbiri tshine tsha pfi Message of Hope, Bulletin a yo mbo ḓi ri: “Itani nzudzanyo ya u vhuyelela kha vhathu vhe na vha ṋea tshibammbiri Message of Hope.”

Bulletin ya January 1925, yo vha i na muvhigo u bvaho kha muṅwe Mugudi wa Bivhili a re Plano ngei Texas. O ri: “Zwo ri mangadza u vhona uri musi ri tshi ya u huwelela fhethu he ra hu huwelela tshifhingani tsho fhiraho, vhathu vha hone vha a takalela u fhira vha fhethu huswa hune ra vha ri tshi khou huwelela hone. Tsimu yashu i na ḓorobo ṱhukhu ye ra i huwelela luṱanu lwoṱhe miṅwahani ya fumi yo fhiraho. . . . Musi muṅwe wahashu ane a pfi Hendrix na mme anga vha tshi dovha vha ya u huwelela kha yeneyo ḓorobo, vho tshimbidza bugu dzi fhiraho dze vha vhuya vha dzi tshimbidza.”

Muṅwe muvulanḓila wa ngei Panama u ri: “Vhunzhi ha vhathu vhe vha mpandela musi ndi tshi huwelela khavho lwa u tou thoma, vho vha vho no shanduka musi ndi tshi vhuyelela khavho lwa vhuvhili kana lwa vhuraru. Uno ṅwaha, ndo ita zwoṱhe zwine nda nga kona uri ndi vhuyelele kha vhathu vhe nda huwelela khavho tshifhingani tsho fhiraho nahone vhunzhi havho vho sumbedza uri vha a takalela mafhungo maḓifha.”

MUSHUMO WE WA VHA U TSHI ḒO ITWA NGA ṄWAHA U TEVHELAHO

Mafheleloni a 1925, Wahashu Vho Rutherford vho ṅwalela vhavulanḓila vhoṱhe vhurifhi vha tshi khou vha vhudza nga ha zwe zwa itwa kha mushumo wa u huwelela wonoyo ṅwaha na zwine vha ḓo tea u zwi ita. Vho ri: “Uno ṅwaha ro vha na ndugelo ya u khuthadza vhathu vhanzhi vho ṱungufhalaho. U ita mushumo wa u huwelela, zwo ita uri ri takale. . . . Nga 1926 ri ḓo vha na zwibuli zwinzhi zwa u huwelela nga ha Mudzimu na Muvhuso wawe na u sumbedza uri ri vhashumeli vhawe vha vhukuma. . . . Kha ri bvele phanḓa ri tshi shumisa maipfi ashu u itela u renda Mudzimu washu na Khosi yashu.”

Mafheleloni a 1925, vhahashu vho vha vha tshi khou ita nzudzanyo dza uri hu engedzwe zwifhaṱo zwa Bethele ngei Brooklyn. Nga 1926 ho vha hu tshi ḓo thomiwa mushumo muhulwane wa u fhaṱa u fhiraho yoṱhe ye ndangulo ya vhuya ya i ita.