Benaya o vha e swole ḽi re na tshivhindi. O shumela Khosi Davida, nga murahu, a shumela Khosi Salomo. Benaya o vha e murwa wa tshifhe. Vhotshifhe na Vhalevi kanzhi vho vha vha sa lwi nndwani nahone vha sa shumisi zwiṱhavhane. Fhedzi Benaya o vha a tshi zwi ita, o vha e na tshivhindi. Sa tsumbo, o dzhena tshisimani a vhulaya ndau nahone a dovha a vhulaya munna mulapfu-lapfu wa Muegipita. Davida o vha a tshi fhulufhela Benaya nga maanḓa lwe a mu vhea uri a vhe murangaphanḓa wa maswole e a vha a tshi mu linda.​—2 Sam. 23:20-23.

Na musi Abesalomo na Adonia vha tshi shandukela Davida, Benaya o bvela phanḓa a tshi fhulufhedzea kha Davida. (2 Sam. 8:18; 15:18; 1 Dzikh. 1:8) Musi Davida o no vha mualuwa, Benaya o bvela phanḓa a tshi tikedza na u fhulufhedzea kha Davida nga u ita vhungoho ha uri Salomo a vhewe sa khosi. (1 Dzikh. 1:32-40) Benaya o fhulufhedzea kha Yehova na kha khosi dze Yehova a dzi nanga naho vhaṅwe vhathu vha songo ita nga u ralo.

Na riṋe ri ṱoḓa tshivhindi tsha u lwa na Saṱhane na vhane vha mu tikedza. Ri tea u ḓiimisela u bvela phanḓa ri tshi tshila nga nḓila ine Yehova a ṱoḓa ri tshi tshila ngayo. (Vhaef. 6:11; 1 Pet. 5:8, 9) Naho vhaṅwe vhathu vha khetha u si tsha fhulufhedzea kha Yehova, riṋe kha ri bvele phanḓa ri tshi fhulufhedzea khae ri na vhungoho ha uri u ḓo ri lambedza.​—2 Sam. 22:26.