Ri tea u vha na lutendo uri ri kone u takadza Yehova. Fhedzi Bivhili i amba uri “a si vhoṱhe vha re na lutendo.” (2 Vhathes. 3:2) Musi muapostola Paulo a tshi amba zwenezwi, o vha a tshi khou ambela kha vhathu “vha re khombo na kha vhavhi,” vhe vha vha vha tshi khou mu tovhola. Fhedzi zwe a zwi amba nga ha lutendo zwo tou ralo na kha vhaṅwe vhathu. Vhaṅwe vhathu a vha ṱoḓi u tenda vhuṱanzi vhu re hone ha uri Mudzimu o sika zwithu zwoṱhe. (Vharoma 1:20) Vhaṅwe vhathu vha nga amba uri vha tenda kha tshiṅwe tshithu kana kha muṅwe muthu a re na maanḓa mahulu. Fhedzi lwonolwo a si lwone lutendo lu takadzaho Yehova.

Ri tea u vha na vhungoho ha uri Yehova u hone na uri u “lambedza” vha re na lutendo lwo khwaṱhaho. (Vhahev. 11:6) Lutendo ndi tshiṅwe tsha zwi aṋwiwaho nga muya mukhethwa wa Mudzimu. Uri ri wane wonoyo muya mukhethwa, ri tea u humbela Yehova nga thabelo uri a ri ṋee wone. (Luka 11:9, 10, 13) Iṅwe nḓila ya ndeme ine ra nga wana ngayo muya mukhethwa ndi nga u vhala Bivhili yo hevhedzwaho nga Mudzimu. Musi ro no vhala, ri nga humbulisisa nga ha zwe ra zwi vhala na u lingedza u shumisa zwe ra zwi guda. Musi ri tshi ita zwenezwi, ri ḓo vha ri tshi khou tendela muya wa Yehova u tshi ri thusa u tshila nga nḓila i sumbedzaho uri ri na lutendo lune lwa mu takadza.