6-12 APRIL 2026
LUIMBO 82 “Tshedza Tshaṋu Kha Tshi Vhonetshele’
Ni Nga Vha Hani Na Vhushaka Havhuḓi Na Mashaka Aṋu Ane A Si Vhe Dziṱhanzi?
“Ri songo litsha u ita zwo lugaho.”—VHAGAL. 6:9.
ZWINE RA ḒO ZWI GUDA
Ri ḓo vhona uri ri nga ita mini uri ri dzule ri na vhushaka havhuḓi na mashaka ashu ane a si vhe Dziṱhanzi, na uri ri nga huwelela hani khavho arali vha tshi ṱoḓa u thetshelesa.
1-2. Musi ri tshi thoma u guda ngoho, ndi mini zwine khamusi zwa nga vha zwo ita uri ri si tsha vha na vhushaka havhuḓi na mashaka ashu?
YESU o vhudza munna we a vha a tshi khou ṱoḓa u vha mutevheli wawe maipfi a tevhelaho, o ri: “Iya kha mashaka au, u vha vhudze zwithu zwoṱhe zwe Yehova a u itela zwone.” (Marko 5:19) Yesu o amba zwenezwo ngauri o vha a tshi zwi ḓivha uri arali vhathu vha pfa mafhungo a takadzaho, vha a ṱoḓa u vhudza mashaka avho nga hao.
2 Naa ni kha ḓi humbula nḓila ye na ḓipfa ngayo musi ni tshi thoma u guda Bivhili? Khamusi no takalela zwe na zwi guda lwe na ṱoḓa u vhudza na vhaṅwe nga hazwo. Fhedzi khamusi mashaka aṋu ho ngo takalela zwe na vha ni tshi khou zwi guda na Ṱhanzi dza Yehova. Kana khamusi nḓila ye na vha ṱalutshedza ngayo ngoho i re Bivhilini i nga vha yo ita uri hu vhe na khuḓano vhukati haṋu navho. Arali zwo ralo, ni nga ita mini u itela u lugisa vhushaka haṋu navho na u ita uri honoho vhushaka vhu dzule vhu havhuḓi ngeno ni sa khou tshinya vhushaka haṋu na Yehova?
3. Ri ḓo haseledza mini kha ino thero?
3 Kha ino thero ri ḓo guda zwithu zwiṋa zwine ra nga zwi ita uri ri dzule ri na vhushaka havhuḓi na mashaka ashu ane a si vhe Dziṱhanzi. Tsha u thoma, ri ḓo vhona uri u vha pfela vhuṱungu zwi nga ri ṱuṱuwedza hani uri ri vhe na dzangalelo khavho naho vha sa ṱoḓi u guda nga ha Yehova. Tsha vhuvhili, ri ḓo guda uri ri nga ita mini musi vha tshi amba kana u ita zwine zwa ri vhaisa. Tsha vhuraru, ri ḓo vhona uri u sa vha fhelela mbilu na u vha na fhulufhelo ḽa uri ḽiṅwe ḽa maḓuvha vha ḓo vhuya vha ṱanganedza ngoho, zwi nga vha thusa hani. Tsha vhuṋa, ri ḓo guda uri ri nga vha sumbedza hani lufuno.
U VHA PFELA VHUṰUNGU ZWI ḒO NI ṰUṰUWEDZA URI NI VHA THUSE
4. Yesu o ita mini musi vhathu vha sa khou vha na dzangalelo kha mulaedza wawe?
4 Yesu ho ngo ṱavhanya u litsha u thusa vhathu vhe vha vha vha si na dzangalelo kha mulaedza wawe. O ḓifanyisa na munna ane a shuma kha tsimu ya minḓirivhe we a ita zwoṱhe zwine a nga kona u itela u thusa muhuyu uri u aṋwe. (Luka 13:6-9) Musi Yesu a tshi ita tshenetshi tshifanyiso, o vha o no fhedza miṅwaha i fhiraho miraru a tshi khou lingedza u thusa Vhayuda ngae uri vha vhe na lutendo khae. Ndi ngani o bvela phanḓa a tshi lingedza u vha thusa? Ndi ngauri Yesu o vha a tshi pfela vhathu vhuṱungu, ndi ngazwo a songo vha fhelela mbilu.
5. Ndi mini zwe zwa ṱuṱuwedza Yesu uri a pfele vhathu vha lushaka lwa hawe vhuṱungu?
5 Yesu o vha a tshi pfela vhathu vha lushaka lwa hawe vhuṱungu ngauri vharangaphanḓa vha vhurereli vho kundelwa u vha thusa uri vha vhe na lutendo kha Mudzimu. Yesu o vhona vhenevho vhathu vha tshi nga “nngu dzi si na mulisa.” (Marko 6:34) Musi a sa athu fa, Yesu o ita na u lila musi a tshi humbula nga ha muḓi wa Yerusalema ngauri o vha a tshi zwi ḓivha uri vhunzhi ha vhathu vhane vha dzula khawo vha ḓo lovha nga nṱhani ha u sa vha na lutendo. (Luka 19:41-44) Arali na riṋe ra ḓipfa nga nḓila i fanaho nga ha mashaka ashu, zwi ḓo ri ṱuṱuwedza uri ri vha thuse.
6. Ndi ngani ri songo tea u fhelela mbilu mashaka ashu ane a si vhe Dziṱhanzi? (Vhagalata 6:9)
6 Vhalani Vhagalata 6:9. Naho zwa zwino mashaka ashu a sa takaleli u guda nga ha Yehova, ri songo vha fhelela mbilu nahone ri songo “litsha u ita zwo lugaho.” Ri a zwi ḓivha uri zwi a dzhia tshifhinga uri muthu a shandule zwithu zwine a zwi tenda zwo no goḓombelaho khae na uri a vhe na lutendo kha Yehova. Khamusi na inwi tshifhingani tsho fhiraho no vha “ni tshi tshila shangoni ni si na fhulufhelo, ni sa ḓivhi Mudzimu.” (Vhaef. 2:12) Fhedzi ha vha na muṅwe muthu we a ni thusa. Naa zwenezwi a zwi ni ṱuṱuwedzi uri na inwi ni ṱoḓe u thusa mashaka aṋu u guda nga ha Yehova?
MUSI VHA TSHI AMBA KANA U ITA ZWITHU ZWINE ZWA RI VHAISA
7. Ndi mini zwine zwa nga vha zwo thivhela vharathu vha Yesu uri vha vhe na lutendo khae?
7 Vharathu vha Yesu vha nga vha vho pfa nga ha vhuṱolo he Yesu a vhu ita Galilea. (Luka 4:14, 22-24) Fhedzi a vho ngo ṱavhanya vho vha na lutendo khae. (Yoh. 7:5) Ndi ngani? Bivhili a i ri vhudzi. Fhedzi i ri vhudza zwithu zwivhili zwine zwa nga vha zwo ita uri vhaṅwe Vhayuda vha si vhe vhafunziwa vha Yesu. Tshiṅwe tsha hone ndi uri vhaṅwe vho vha vha tshi khou ofha uri arali vha vha na lutendo kha Yesu, vha ḓo tovholwa nga vhahura vhavho. (Yoh. 9:18-22) Tshiṅwe ndi uri vhaṅwe vho ḓivha Yesu u bva a tshi kha ḓi vha muṱuku, nga zwenezwo, zwo vha konḓela u tenda uri Yesu a nga vha Messia. (Marko 6:1-4) Vharathu vha Yesu vha nga kha ḓi vha vho ḓipfa nga nḓila i fanaho. Khamusi na mashaka aṋu vha nga vha vha sa takaleli mulaedza washu nga nṱhani ha zwiitisi zwi fanaho.
8. Ndi mini zwine zwa nga ita uri mashaka ashu ane a si vhe Dziṱhanzi vha ambe kana u ita zwithu zwi si zwavhuḓi?
8 Humbulani uri ndi mini zwine zwa khou ita uri mashaka aṋu vha ambe kana u ita zwithu zwi si zwavhuḓi. Vharathu vha Yesu vha nga vha vho vha vhe maṅwe a mashaka awe vhe vha amba uri “u khou penga.” (Marko 3:21) Ndi mini zwine zwa nga vha zwo ita uri vha ambe zwenezwo zwithu? Kha eneo mafhungo ri kona u vhona uri Yesu o vha o farakanea zwihulu nga tshenetsho tshifhinga nga u huwelela na u fhodza vhathu lwe a sa vhuye a wana na tshifhinga tsha u ḽa. (Marko 3:20) Zwi nga kha ḓi itea uri vharathu vhawe vho vhona u nga u khou zwi ṋaṋisa. Na riṋe mashaka ashu vha nga humbula u nga ri fhedzesa tshifhinga tshinzhi ri tshi khou ita zwithu zwa vhurereli. Arali vha tshi ḓipfa nga yeneyo nḓila, ri tea u zwi sumbedza nga zwine ra zwi ita uri ri a linganyisela na uri ri a vha humbulela.
9. Ndi mini zwine zwa nga thusa mashaka ashu uri a shandule nḓila ine a dzhia ngayo Ṱhanzi dza Yehova? (1 Petro 3:1, 2) (Sedzani zwifanyiso.)
9 Ivhani na vhuthu nahone ni vha humbulele. Musi ni tshi amba na u ita zwithu nga nḓila ya vhuthu, zwi nga ita uri mashaka aṋu a shandule nḓila ine vha ḓipfa ngayo nga ha Ṱhanzi dza Yehova. (Vhalani 1 Petro 3:1, 2.) Sa tsumbo, munna ane a si vhe muṅwe wa Ṱhanzi dza Yehova, ane a vha na mufumakadzi wa Ṱhanzi a nga ḓipfa e na vhuludu kana u sa zwi takalela musi mufumakadzi wawe a tshi ya miṱanganoni kana tsimuni. Mufumakadzi wawe a nga dzudzanya zwithu nga nḓila yavhuḓi uri a kone u vha na tshifhinga tsho engedzeaho tshine a ḓo tshi fhedza na munna wawe. Sa tsumbo, a nga dzudzanya u ya tsimuni nga tshifhinga tshine munna wawe a ḓo vha o farakanea nga zwiṅwe kana e siho hayani. Musi mufumakadzi wa Mukriste a tshi dzudzanya vhuimo hawe zwavhuḓi na u humbulela munna wawe, zwi nga thusa munna wawe uri a shandule nḓila ine a dzhia ngayo Ṱhanzi dza Yehova.
U amba nga vhuthu na zwine ra zwi ita zwi nga ita uri mufarisi ane a si vhe Ṱhanzi a shandule nḓila ine a dzhia ngayo Dziṱhanzi (Sedzani phara 9) f
10. Musi ri tshi sasaladzwa ri nga edzisa hani Yesu?
10 A si tshifhinga tshoṱhe hune na tea u ḓiimelela musi mashaka aṋu a tshi ni sasaladza. Musi vhathu vha tshi amba uri Yesu u a ḽesa na u nwesa, ho ngo ḓiimelela. Nṱhani hazwo, o ṱuṱuwedza vhathu uri vha ṱolisise mafhungo oṱhe nga vhuḓalo u itela u vhona arali zwenezwo zwi ngoho. (Mat. 11:19) O dovha a zwi sumbedza nga nḓila ye a vha a tshi tshila ngayo uri u a linganyisela. (Vhambedzani Yohane 2:2, 6-10.) U fana na Yesu, musi vhathu vha tshi amba zwithu zwi si zwavhuḓi nga ha riṋe, a ni tei u ḓiimelela tshifhinga tshoṱhe. Nṱhani hazwo, ni nga sumbedza mashaka aṋu uri ni a linganyisela, vhone vhaṋe vha ḓo zwi vhona uri ni khou tshila nga nḓila yavhuḓi na uri no ḓitakalela. Zwi nga ita na uri vha si tsha tenda mazwifhi e vha a pfa nga ha Ṱhanzi dza Yehova.
IVHANI NA FHULUFHELO NAHONE NI SONGO VHA FHELELA MBILU
11. Yesu o fara hani vharathu vhawe?
11 Bugu dza Evangeli dzi sumbedza uri Yesu o bvela phanḓa a sa khou fhelela mbilu vharathu vhawe. Sa tsumbo, zwi vhonala u nga vharathu vha Yesu vho vha vhe hone ngei Kana musi a tshi ita vhuṱolo hawe ha u thoma. (Yoh. 2:11, 12) Naho vho vhona honoho vhuṱolo, a vho ngo vha na lutendo khae sa izwi ro no ḓi zwi amba. Fhedzi Yesu ho ngo vha laṱa. Bivhili i sumbedza uri musi ho no fhela miṅwaha i ṱoḓaho u vha miraru u bva tshee a ita vhuṱolo ha u thoma ngei Kana, Yesu o amba nga nḓila ya vhuthu musi a tshi amba na vharathu vhawe.—Yoh. 7:5-8.
12. Ndi mini zwine zwa nga ri thusa uri ri sa laṱe fhulufhelo ḽa uri vhaṅwe vha mashaka ashu vha nga ṱoḓa u shumela Yehova?
12 U pfesesa nḓila ine Yehova a khathutshela ngayo zwi nga ri thusa u dzula ri na fhulufhelo ḽa uri ḽiṅwe ḓuvha mashaka ashu a nga shumela Yehova. Musi hu tshi fheliswa vhurereli ha mazwifhi, mashaka ashu vha nga kha ḓi humbula uri ro vha vhudza uri zwenezwo zwithu zwi ḓo itea. a (Nzumb. 17:16) Vha nga kha ḓi ita phetho ya u gwadamela Yehova na riṋe musi maṱungu mahulu o no thoma. Arali mashaka ashu vha tshi khou sedzana na zwi konḓaho zwa zwino, ri ita zwoṱhe zwine ra nga kona u itela u vha thusa. Khamusi zwi ḓo ita uri vha ṱoḓe u guda zwo engedzeaho nga ha Bivhili musi vha tshi vhona uri ri a vha funa zwa vhukuma na uri ri na vhuthu.
VHA SUMBEDZENI URI NI A VHA FUNA
13. Naho ro farakanea nga u shumela Yehova, ri tea u iledza u ita mini?
13 Naho ro farakanea nga u shumela Yehova, a ri ṱoḓi uri mashaka ashu a vhone u nga a ri tsha ṱoḓa u fhedza tshifhinga navho kana uri a ri tsha vha funa. (Mat. 7:12) Ri nga sumbedza hani uri ri na ndavha navho? Ṱhogomelani zwithu zwi si gathi zwine ra nga zwi ita.
14-15. Ndi ifhio iṅwe nḓila ine ra nga sumbedza ngayo mashaka ashu ane a si vhe Dziṱhanzi uri ri a vha funa? Ṋeani tsumbo.
14 Ni dzule ni tshi amba na mashaka aṋu na u vha sumbedza uri ni a vha funa. Ri sumbedza mashaka ashu uri ri a vha funa nga u dzula ri tshi vha vhudza nga ha zwine zwa khou itea vhutshiloni hashu. Sa tsumbo, musi ro ya madaloni kana ri tshi khou ita zwiṅwe zwithu zwavhuḓi na khonani dzashu, ri nga vha rumela mulaedza na zwifanyiso. Ri nga vha ṋea tshifhiwa naho tshi sa ḓuri kana ra vha ṅwalela vhurifhi u itela u khwinisa vhushaka hashu navho. Musi ri tshi ita vhuḓidini ho raloho, ri vha ri tshi khou vha vhudza uri ri a vha funa.
15 Ṱhogomelani tsumbo ya wahashu Anna wa ngei Armenia. Vha muṱa wawe vha fhedzesa tshifhinga vhe vhoṱhe nga tshifhinga tsha dziholodei na maḓuvha a mabebo. Musi Anna a tshi wana ngoho, mashaka awe o thoma u vhilaela nga ha uri u vha hawe Ṱhanzi zwi ḓo kwama hani vhushaka havho nae. Vho dovha vha vhilaela nga ha uri yeneyo phetho ye a i ita i ḓo kwama hani vhumatshelo hawe. Anna u ita mini uri vha si vhilaele? U ri: “Musi ndi tshi vha dalela, ndi a vha vhudza nga ha zwine zwa khou itea vhutshiloni hanga. Ndi a vha ramba muḓini wanga na u vha sumbedza khonani dzanga. Zwenezwi zwi ita uri vhunzhi ha mashaka anga vha ḓivhe khonani dzanga nahone vha pfa vho vhofholowa musi vhe navho.” U dovha a ri: “Vhunzhi ha mashaka anga vha amba uri vha a zwi vhona uri ndo takala nahone a vha tsha vhilaela nga ha nṋe.”
16. Yesu o sumbedza hani u vha na ndavha na murathu wawe Yakobo? (Sedzani ṱhaluso i re magumoni a siaṱari.)
16 Sumbedzani mashaka aṋu uri ni na ndavha na zwine zwa khou itea vhutshiloni havho. Musi Yesu o no vuswa, o sumbedza u vha na ndavha na murathu wawe Yakobo nga u ya khae a amba nae. (1 Vhakor. 15:7) Humbulani uri Yakobo a nga vha o ḓipfa hani musi a tshi vhona uri Yesu ho ngo mu laṱa. Zwi nga vha zwo ita uri Yakobo a tende uri Yesu ndi Messia. Nga murahu ha zwenezwo, Yakobo a nga vha o thusa maṅwe mashaka awe uri na vhone vha zwi vhone uri Yesu ndi Messia. b—Mish. 1:14.
17. Ri nga shumisa hani zwine zwa vha kha Vharoma 12:15? (Sedzani tshifanyiso.)
17 Vhalani Vharoma 12:15. Ri nga sumbedza mashaka ashu uri ri na ndavha navho nga u vha thusa musi vha tshi ṱoḓa thuso, zwenezwo zwi nga ita uri vha shandule nḓila ine vha ḓipfa ngayo nga ha Ṱhanzi dza Yehova. Ri nga vha thusa musi vha tshi ṱoḓa thuso kana ra takala navho musi zwithu zwi tshi khou vha tshimbilela zwavhuḓi. c Sa tsumbo, musi hu na shaka ane a kha ḓi bva u vha na ṅwana, ri nga takala nae na u mu ṋea tshifhiwa u itela u sumbedza nḓila ye ra takala ngayo. Musi hu na shaka ḽo lovhelwaho, ri nga mu rumela mulaedza kana ra mu khuthadza, kana ra mu thusa nga dziṅwe nḓila. Nahone ri tea u dzula ri tshi vha founela, u vha rumela mulaedza kana u vha dalela, zwihuluhulu musi vhe kha zwiimo zwi konḓaho.
Arali na sumbedza uri ni na ndavha na vhane na vha funa, vha nga shandula nḓila ine vha ḓipfa ngayo nga ha inwi na zwine na zwi tenda (Sedzani phara 17) g
18. Ri nga edzisa hani zwe Andrea a zwi ita?
18 Dzudzanyani uri vha ḓivhane na Dziṱhanzi. Musi Andrea a tshi wanulusa uri Yesu ndi Messia, o mbo ḓi mu isa kha mukomana wawe Petro uri a mu vhone. (Yoh. 1:40-42) Naa na riṋe ri nga ita zwi fanaho? Sa tsumbo, ri nga ita ri tshi ramba shaka ḽashu uri a ṱuwe na riṋe miṱanganoni kana a ḓe musi ro ḓigeḓa ri tshi khou ḽa zwiḽiwa na khonani dzashu dza Ṱhanzi. Musi ri tshi ita uri mashaka ashu a ḓivhane na Dziṱhanzi, vha ḓo zwi vhona uri Dziṱhanzi ndi vhathu vhavhuḓi vho ḓoweleaho.
19. Arali mashaka ashu vha sa pfesesi nga vhuḓalo zwine ra zwi tenda, ri tea u vha fara hani? (1 Petro 3:15)
19 Vhalani 1 Petro 3:15. Mashaka ashu vha nga si pfesese nga vhuḓalo uri ndi ngani ri sa iti zwiṅwe zwithu navho, fhedzi arali ra vha sumbedza vhuthu nahone ra vha ṱhonifha, vha ḓo dzula vha tshi zwi humbula. Naho ri sa ḓo pembelela navho dziholodei na u ita navho miṅwe mikhuvha ine ya sa tendelane na Bivhili, vha nga takala arali ra nga ita zwine ra nga kona u itela u fhedza tshifhinga navho. Sa tsumbo, ri vha nga dalela, ra ḽa zwiḽiwa navho na u vha fha zwifhiwa nga maṅwe maḓuvha ane a si vhe a dziholodei.
KHA RI BVELE PHANḒA RI TSHI ITA VHUḒIDINI
20. Ndi ngani tsumbo ya Yakobo i tshi ri khuthadza?
20 Yakobo o xelelwa nga tshibuli tsha u shuma na Yesu musi Yesu e kha ḽifhasi, fhedzi o guma o vha mufunziwa wa Yesu. (Vhagal. 1:18, 19; 2:9) Naho Yakobo a songo vha mufunziwa wa Yesu musi Yesu a kha ḓi vha kha ḽifhasi, o guda zwithu zwinzhi zwe Yesu a zwi funza musi a tshi kha ḓi vha kha ḽifhasi. Sa tsumbo, musi a tshi ṅwalela Vhakriste vhurifhi, o katela na zwithu zwe Yesu a zwi funza musi a tshi khou funza vhathu e Thavhani. d
21. Ndi ngani ri tshi tea u bvela phanḓa ri na fhulufhelo ḽa uri mashaka ashu a nga khetha u shumela Yehova?
21 Hu sa londwi vhuḓidini vhune ra nga vhu ita u itela u sumbedza mashaka ashu uri ri na ndavha navho, zwi nga kha ḓi itea uri vha nga bvela phanḓa vha sa takaleli Ṱhanzi dza Yehova kana vha sa funi u guda nga ha Yehova. Ndi ngani ri tshi tea u bvela phanḓa ri tshi vha sumbedza vhuthu? Ndi nga nṱhani ha uri musi ri tshi sumbedza mashaka ashu vhuthu, ri vha ri tshi khou edzisa Yehova Mudzimu wa khathutshelo na Murwa wawe Yesu. (Luka 6:33, 36) Arali ra bvela phanḓa ri tshi funa mashaka ashu, nga u ya ha tshifhinga vha nga shandula nḓila ine vha dzhia ngayo Dziṱhanzi nahone vha humbula zwoṱhe zwe ra vha vhudza nga ha Yehova na zwine a zwi fhulufhedzisa. Kha ri bvele phanḓa ri tshi vha sumbedza uri ri a vha funa. Zwi ḓo ri takadza vhukuma musi vha tshi khetha u shumela Yehova nga nṱhani ha vhuḓidini he ra vhu ita.
LUIMBO 60 Zwi Amba Vhutshilo Havho
a Vhalani thero “Ri Ḓivha Mini Nga Ha Nḓila Ine Yehova A Ḓo Haṱula Ngayo Tshifhingani Tshi Ḓaho?” i re kha Tshiingamo tsha May 2024 siaṱari 11, dziphara 11-13.
b Vharathu vha Yesu vhavhili, Yakobo na Yuda, vho vha Vhakriste musi Yesu o no vuswa.
c Sedzani bogisi “ Naa Ni Ḓo Ya Munyanyani Kana Mbulungoni Ya Shaka Ḽine Ḽa Si Vhe Ṱhanzi?”
e U itela u wana zwo engedzeaho nga ha enea mafhungo, sedzani “Mbudziso Dzi Bvaho Kha Vhavhali” kha Tshiingamo tsha 15 May 2002 na thero ya “Questions From Readers” kha Tshiingamo tsha Tshiisimane tsha 15 November 2007.
