Sumbedzani U Fulufhedzea Kha Yehova
“Ṱhanzi yazwo ndi Ene Yehova, na kha vhana vhanga na vhana vhau zwi khwaṱhe, na kha vhaḓuhulu vhanga na vhaḓuhulu vhau na lini na lini.”—1 SAMUELE 20:42.
1, 2. Ndi ngani vhukonani ha Yonathani na Davida ho vha hu tsumbo yavhuḓi ya u fulufhedzea?
YONATHANI a nga vha o mangadzwa nga nḓila ye Davida muṱuku a vha e na tshivhindi ngayo. Davida o vhulaha Goliata wa muswonḓa nahone a isa “ṱhóho ya Mu-Filisita” kha khotsi a Yonathani ane a vha Saulo Khosi ya Isiraele. (1 Samuele 17:57) Yonathani o vha a sa timatimi uri Mudzimu o vha e na Davida nahone u bva tsheetsho, Yonathani na Davida vho vha khonani dza tsini vhukuma. Vho fulufhedzisa uri vha ḓo dzula vha tshi fulufhelana. (1 Samuele 18:1-3) Yonathani o fulufhedzea kha Davida vhutshilo hawe hoṱhe.
2 Yonathani o dzula a tshi fulufhedzea kha Davida naho Yehova o khetha Davida uri a vhe khosi i tevhelaho ya Isiraele nṱhani ha Yonathani. Musi Saulo a tshi lingedza u vhulaha Davida, Yonathani o vha a tshi khou vhilaela nga ha khonani yawe. O vha a tshi zwi ḓivha uri Davida o vha e sogani ḽa Horeshe, nga zwenezwo, Yonathani o ya henefho u mu ṱuṱuwedza uri a dzule a tshi ḓitika nga Yehova. Yonathani o vhudza Davida uri: “U songo ofha. Tshanḓa tsha khotsi-anga Saulo a tshi nga U wani. U ḓo vhuya wa vha khosi ya Isiraele; nṋe ndi ḓo vha gota ḽau.”—1 Samuele 23:16, 17.
3. Ndi mini zwe zwa vha zwi zwa ndeme kha Yonathani u fhira u fulufhedzea kha Davida, nahone zwenezwo ri zwi ḓivha hani? (Sedzani tshifanyiso tsha u thoma.)
3 Kanzhi ri tama vhathu vhane vha fulufhedzea. Naa ri tama Yonathani fhedzi ngauri o vha a tshi fulufhedzea kha Davida? Hai, u fulufhedzea kha Mudzimu zwo vha zwi zwithu zwa ndeme vhukuma vhutshiloni ha Yonathani. Zwi re zwone ndi uri ndi tshone tshiitisi tshe tsha ita uri a fulufhedzee kha Davida nahone ho ngo mu itela vivho, naho Davida o vha a tshi ḓo vha khosi nṱhani hawe. Yonathani o dovha a thusa Davida uri a ḓitike nga Yehova. Vhenevho vhanna vho dzula vha tshi fulufhedzea kha Yehova na nga tshavho. Vho dzula vha tshi ita zwe vha zwi fulufhedzisa: “Ṱhanzi yazwo ndi Ene Yehova, na kha vhana vhanga na vhana vhau zwi khwaṱhe, na kha vhaḓuhulu vhanga na vhaḓuhulu vhau na lini na lini.”—1 Samuele 20:42.
4. (a) Ndi mini zwine zwa ḓo ita uri ri takale vhukuma na u fushea? (b) Ri ḓo ṱolisisa mini kha ino thero?
4 Na riṋe ri fanela u fulufhedzea kha miṱa yashu, khonani dzashu na vhahashu tshivhidzoni. (1 Vhathesalonika 2:10, 11) Fhedzi zwa ndeme u fhira zwoṱhe, ri fanela u fulufhedzea kha Yehova. Ndi ene we a ri ṋea vhutshilo! (Nzumbululo 4:11) Musi ri tshi fulufhedzea khae, ri a takala vhukuma na u fushea. Fhedzi ri a zwi ḓivha uri ri fanela u fulufhedzea kha Mudzimu naho hu zwifhinga zwi konḓaho. Kha ino thero, ri ḓo haseledza nga ha nḓila ine tsumbo ya Yonathani ya nga ri thusa ngayo u dzula ri tshi fulufhedzea kha Yehova kha zwiimo zwiṋa: (1) musi ri tshi vhona u nga muṅwe muthu ane a vha na ndugelo ho ngo tewa nga uri ri mu ṱhonifhe, (2) musi ri tshi fanela u khetha ane ra fanela u fulufhedzea khae, (3) musi wahashu ane a ranga phanḓa a sa ri pfesesi kana a sa ri fari zwavhuḓi, na (4) musi zwi tshi konḓa vhukuma u ita zwe ra zwi fulufhedzisa.
MUSI RI TSHI VHONA U NGA MUṄWE MUTHU ANE A VHA NA NDUGELO HO NGO TEWA NGA URI RI MU ṰHONIFHE
5. Ndi ngani zwo vha zwi tshi konḓela vhathu vha Isiraele uri vha fulufhedzee kha Mudzimu musi Saulo e khosi?
5 Yonathani na vhathu vha Isiraele vho vha vhe kha vhuimo vhu konḓaho. Khotsi a Yonathani ane a vha Khosi Saulo, o vha a sa fulufhedzei nahone Yehova o mu landula. (1 Samuele 15:17-23) Naho zwo ralo, Mudzimu o tendela Saulo a tshi bvela phanḓa na u vhusa lwa miṅwaha minzhi. Nga zwenezwo, zwo vha zwi tshi konḓela vhathu uri vha fulufhedzee kha Mudzimu ngauri khosi ye ya vha yo ṋangiwa uri i dzule kha “khulu-noni ya Yehova” yo vha i tshi ita zwithu zwivhi vhukuma.—1 Koronika 29:23.
6. Ndi mini zwine zwa sumbedza uri Yonathani o dzula a tshi fulufhedzea kha Yehova?
6 Yonathani o dzula a tshi fulufhedzea kha Yehova. Humbulani nga ha zwe Yonathani a zwi ita nga u ṱavhanya musi Saulo a tshi thoma u sa thetshelesa Mudzimu. (1 Samuele 13:13, 14) Nga tshenetsho tshifhinga, mmbi khulwane ya Vhafilisita yo ḓa na goloi dza nndwa dza 30 000 u itela u lwa na Vhaisiraele. Saulo o vha e na maswole a 600 fhedzi nahone ndi ene na Yonathani fhedzi vhe vha vha vhe na zwihali. Fhedzi Yonathani o vha a sa ofhi. O humbula maipfi a muporofita Samuele we a ri: “Ngauri Yehova ha nga laṱi vhathu vhawe, u itela dzina ḽawe ḽihulu.” (1 Samuele 12:22) Yonathani o amba na ḽiṅwe swole a ri: “A hu na tshi kundisaho Yehova a tshi lamulela kana nga vhanzhi kana nga vha songo anda.” Nga zwenezwo, ene na swole vho lwa na tshigwada tsha Vhafilisita nahone vha vhulaha vha 20. Yonathani o vha na lutendo kha Yehova nahone Yehova o mu fhaṱutshedza. Yehova o ita uri hu vhe na mudzinginyo nahone Vhafilisita vha dzhenwa nga nyofho. Nga zwenezwo, vho lwa na u vhulahana nga tshavho nahone Vhaisiraele vha kunda nndwani.—1 Samuele 13:5, 15, 22; 14:1, 2, 6, 14, 15, 20.
7. Yonathani o fara hani khotsi awe?
7 Naho Saulo o bvela phanḓa na u sa thetshelesa Yehova, Yonathani o bvela phanḓa a tshi thetshelesa khotsi awe nga hune zwa nga konadzea ngaho. Sa tsumbo, vho ya vhoṱhe nndwani u itela u lwela vhathu vha Yehova.—1 Samuele 31:1, 2.
8, 9. Ri fulufhedzea hani kha Mudzimu musi ri tshi ṱhonifha vhane vha vha na ndugelo?
8 U fana na Yonathani, ri nga fulufhedzea kha Yehova nga u thetshelesa muvhuso wa shango ḽine ra dzula khaḽo nga hune ra nga kona ngaho. Yehova u tendela vhenevho “vhavhusi” vha tshi ri langa nahone u ṱoḓa ri tshi vha ṱhonifha. (Vhalani Vharoma 13:1, 2.) Ndi ngazwo ri tshi fanela u ṱhonifha mushumeli wa muvhuso naho a sa fulufhedzei na musi ri tshi vhona u nga ho ngo tewa nga u ṱhonifhiwa. Zwi re zwone ndi uri ri fanela u ṱhonifha vhoṱhe vho ṋewaho ndugelo nga Yehova.—1 Vhakorinta 11:3; Vhaheberu 13:17.
Iṅwe nḓila ine ra nga dzula ri tshi fulufhedzea ngayo kha Yehova ndi nga u ṱhonifha mufarisi washu naho a sa shumeli Yehova (Sedzani phara 9)
9 Wahashu Olga wa ngei Amerika Tshipembe, o sumbedza u fulufhedzea kha Yehova nga u ṱhonifha munna wawe naho o vha a sa mu fari zwavhuḓi. [1] (Sedzani notsi dza u fhedzisela.) Nga zwiṅwe zwifhinga, munna wawe o vha a sa ambi nae kana a tshi mu ṱhavha nga maipfi nga nṱhani ha uri ndi muṅwe wa Ṱhanzi dza Yehova. Munna wawe o dovha a mu vhudza uri u ḓo mu ṱutshela nahone a dzhia vhana. Fhedzi Olga ho ngo “lifhedza vhuvhi nga vhuvhi.” O ita zwine a nga kona u itela u vha mufumakadzi wavhuḓi. O mu bikela, u mu kuvhela na u ṱhogomela mashaka a munna wawe. (Vharoma 12:17) Nahone musi munna wawe a tshi ya u dalela muṱa wa hawe na khonani dzawe, Olga o vha a tshi ṱuwa nae musi zwi tshi konadzea. Sa tsumbo, musi munna wawe a tshi ṱoḓa u ya mbulungoni ya khotsi awe kha iṅwe ḓorobo, Olga o dzudzanya zwoṱhe zwine vha zwi ṱoḓa u itela u fara lwendo. Nga zwenezwo, musi vhe mbulungoni, Olga o lindela munna wawe nnḓa ha kereke. Nga murahu ha miṅwaha minzhi, munna wa Olga o thoma u mu fara khwine ngauri o vha a sa fheli mbilu nahone o vha a tshi mu ṱhonifha tshifhinga tshoṱhe. Zwino munna wawe u mu ṱuṱuwedza uri a ye miṱanganoni nahone u a mu fhelekedza. Nga zwiṅwe zwifhinga, u ya miṱanganoni nae.—1 Petro 3:1.
MUSI RI TSHI FANELA U KHETHA ANE RA FANELA U FULUFHEDZEA KHAE
10. Yonathani o vha a tshi ḓivha hani ane a fanela u fulufhedzea khae?
10 Musi Saulo a tshi amba uri u ṱoḓa u vhulaha Davida, Yonathani o vha a tshi fanela u dzhia phetho i konḓaho. O vha a tshi ṱoḓa u fulufhedzea kha khotsi awe, fhedzi o vha a tshi dovha a ṱoḓa u fulufhedzea kha Davida. Yonathani o vha a tshi zwi ḓivha uri Mudzimu o vha e na Davida hu si Saulo, nga zwenezwo, o khetha u fulufhedzea kha Davida. O sevha Davida uri a dzumbame nahone a vhudza Saulo uri ndi ngani a songo fanela u vhulaha Davida.—Vhalani 1 Samuele 19:1-6.
11, 12. Nḓila ine ra funa ngayo Mudzimu i ri thusa hani uri ri dzhie phetho ya u fulufhedzea khae?
11 Wahashu Alice wa ngei Australia, o vha a tshi fanela u khetha ane a fanela u fulufhedzea khae. Musi a tshi khou guda Bivhili, o vhudza muṱa wa hawe nga ha zwithu zwe a vha a tshi khou zwi guda. O dovha a vha vhudza uri a nga si pembelele Khirisimusi navho nahone a vha ṱalutshedza uri ndi ngani. Mathomoni, miraḓo ya muṱa wa hawe a yo ngo zwi takalela nahone nga murahu vha mu sinyutshela vhukuma. Vho pfa u nga Alice ha tsha vha ṱhogomela. Nga zwenezwo, mme awe vho ri a vha tsha ṱoḓa u dovha vha mu vhona. Alice o ri: “Ndo vha ndo tshuwa nahone ndo vhaisala vhukuma ngauri ndi a funa vhukuma muṱa wa hashu. Naho zwo ralo, ndo dzhia phetho ya uri Yehova na Murwa wawe vha ḓo vha vha u thoma mbiluni yanga nahone ndo lovhedzwa kha guvhangano ḽi tevhelaho.”—Mateo 10:37.
12 Ri songo tendela u fulufhedzea hashu kha zwiṅwe zwithu zwi ngaho tshigwada tsha mitambo, tshikolo kana shango zwi tshi vha zwa ndeme vhukuma kha riṋe u fhira u fulufhedzea hashu kha Yehova. Sa tsumbo, Henry o vha a tshi takalela u tamba chess na tshigwada tsha tshikolo tshawe nahone o vha a tshi ṱoḓa u wanela tshikolo tshawe tshiphuga. Fhedzi ngauri o vha a tshi tamba chess mafheloni a vhege iṅwe na iṅwe, ho ngo vha na tshifhinga tsho eḓanaho tsha u ya vhuḓinḓani kana miṱanganoni. Henry o amba uri u fulufhedzea kha tshikolo zwo vha zwo no vha zwa ndeme vhukuma khae u fhira u fulufhedzea kha Mudzimu. Nga zwenezwo, o khetha u litsha u tambela tshikolo tshawe chess.—Mateo 6:33.
13. U fulufhedzea kha Mudzimu zwi ri thusa hani u sedzana na thaidzo dza muṱa?
13 Nga zwiṅwe zwifhinga, zwi nga konḓa u takadza miraḓo ya muṱa yo fhamba-fhambaho nga tshifhinga tshithihi. Sa tsumbo, Ken o ri: “Tshifhinga tshoṱhe ndo vha ndi tshi ṱoḓa u dalela mme anga vha mualuwa nahone ndi tshi ṱoḓa uri vha dzule na riṋe nga zwiṅwe zwifhinga. Fhedzi mme anga na mufumakadzi wanga vho vha vha sa dzuli murunzi muthihi.” O dovha a ri: “Ndo vha ndi sa koni u vha takadza vhoṱhe nga tshifhinga tshithihi.” Ken o humbula nga ha zwine Bivhili ya zwi amba nahone a ṱhogomela uri kha honovhu vhuimo, u fanela u takadza mufumakadzi wawe na u fulufhedzea khae. O wana thandululo ye ya takadza mufumakadzi wawe. Nga zwenezwo, o ṱalutshedza mufumakadzi wawe uri ndi ngani a tshi fanela u sumbedza mme awe vhuthu. O dovha a ṱalutshedza mme awe uri ndi ngani vha tshi fanela u ṱhonifha mufumakadzi wawe.—Vhalani Genesi 2:24; 1 Vhakorinta 13:4, 5.
MUSI WAHASHU A SA RI PFESESI KANA A SA RI FARI ZWAVHUḒI
14. Saulo o fara hani Yonathani nga nḓila i si yavhuḓi?
14 Ri nga dovha ra fulufhedzea kha Yehova arali wahashu ane a khou ranga phanḓa a sa ri fari zwavhuḓi. Khosi Saulo o vha o nangiwa nga Mudzimu, fhedzi o vha a sa fari murwa wawe zwavhuḓi. O vha a sa pfesesi uri ndi ngani Yonathani o vha a tshi funa Davida. Nga zwenezwo, musi Yonathani a tshi lingedza u thusa Davida, Saulo o sinyuwa vhukuma nahone a shonisa murwa wawe phanḓa ha vhathu vhanzhi. Fhedzi Yonathani o bvela phanḓa a tshi ṱhonifha khotsi awe. Nga tshenetsho tshifhinga, o dzula a tshi fulufhedzea kha Yehova na Davida we a nangwa nga Mudzimu uri a vhe khosi i tevhelaho ya Isiraele.—1 Samuele 20:30-41.
15. Arali wahashu a tshi ri fara nga nḓila i si yavhuḓi, ri fanela u aravha hani?
15 Ṋamusi zwivhidzoni zwashu, vhahashu vhane vha ranga phanḓa vha lingedza u fara muṅwe na muṅwe nga nḓila yavhuḓi. Fhedzi vhenevho vhahashu a vho ngo fhelela. Nga nṱhani ha zwenezwo, zwi a konadzea uri vha si pfesese uri ndi ngani ro ita tshiṅwe tshithu. (1 Samuele 1:13-17) Nga zwenezwo, arali ro haṱulwa nga nḓila i songo teaho kana ri songo pfeseswa, kha ri dzule ri tshi fulufhedzea kha Yehova.
MUSI ZWI TSHI KONḒA VHUKUMA U ITA ZWE RA ZWI FULUFHEDZISA
16. Ndi kha vhuimo vhufhio vhune ra fanela u fulufhedzea kha Mudzimu na u sa vha na tseḓa?
16 Saulo o vha a tshi ṱoḓa uri Yonathani a vhe khosi i tevhelaho nṱhani ha Davida. (1 Samuele 20:31) Fhedzi Yonathani o vha a tshi funa Yehova nahone a tshi fulufhedzea khae. Nga zwenezwo, nṱhani ha uri a vhe na tseḓa, Yonathani o vha khonani ya Davida nahone a dzula a tshi ita zwe a mu fulufhedzisa. Zwi re zwone ndi uri muṅwe na muṅwe ane a funa Yehova na u fulufhedzea khae, a nga “si shanduke naho zwe a ana zwi tshi konḓa.” (Psalme ya 15:4) Nga nṱhani ha uri ri a fulufhedzea kha Mudzimu, ri ḓo dzula ri tshi ita zwe ra zwi fulufhedzisa. Sa tsumbo, arali ra ita thendelano ya zwa mabindu, ri ḓo ita zwe ra zwi fulufhedzisa naho zwi tshi konḓa. Nahone arali ri na thaidzo mbinganoni dzashu, ri ḓo sumbedza u funa Yehova nga u dzula ri tshi fulufhedzea kha vhafarisi vhashu.—Vhalani Maleaxi 2:13-16.
Arali ro ita thendelano ya zwa mabindu, ri ḓo ita zwe ra zwi fulufhedzisa ngauri ri a fulufhedzea kha Mudzimu (Sedzani phara 16)
17. Ino thero yo ni thusa hani?
17 Ri ṱoḓa u fulufhedzea kha Mudzimu naho ro sedzana na zwiimo zwi konḓaho u fana na Yonathani. Nga zwenezwo, kha ri dzule ri tshi fulufhedzea kha vhahashu musi vha tshi ita zwithu ri sa zwi takaleli. Nga zwenezwo, ri ḓo takadza Yehova nahone zwenezwo ndi zwine zwa ri takadza vhukuma. (Mirero 27:11) Ri nga vha na vhungoho ha uri u ḓo dzula a tshi ri itela zwa khwine na u ri ṱhogomela. Kha thero i tevhelaho, ri ḓo ṱolisisa zwine ra nga zwi guda kha vhaṅwe vhe vha fulufhedzea na vhe vha si fulufhedzee misini ya Davida.
^ [1] (phara 9) Maṅwe madzina o shandulwa.

