1. Ndi ngani khonani dzavhuḓi dzi tshifhiwa tshi bvaho kha Yehova?

 KHONANI dzavhuḓi ndi tshifhiwa tshi bvaho kha Yehova. (Yak. 1:17) Vha a ri funa, vha dovha vha funa na Mudzimu. Vha a takala musi ro takala, na u ri khuthadza musi ro bilufhala. Vha dovha vha ri eletshedza nahone a vha shavhi u ri vhudza ngoho musi zwi tshi ṱoḓea. Vha a fhulufhedzea nahone ri nga vha fhulufhela. Khonani dzo raloho dzi “takadza mbilu.”​—Mir. 27:9.

2. Ndi ngani zwi zwa ndeme uri vhavhingani vha khwaṱhise vhukonani havho? (Mateo 19:6)

² Ndi zwa ndeme uri munna na mufumakadzi vha vhe khonani dza tsini-tsini. A vho ngo tea u dzhiela fhasi vhukonani havho, vha tea u shuma nga maanḓa u vhu khwaṱhisa. Arali vha dzhiela fhasi vhukonani havho, vha nga thoma u ḓipfa vhe na vhuludu, vha songo takala na u sinyuwa vha nga sinyuwa. Fhedzi arali vha bvela phanḓa vha tshi vhu khwaṱhisa, vha ḓo ḓiphiṋa nga vhukonani ha tsini vhune vhathu vhavhili vha nga vha naho. (Vhalani Mateo 19:6.) Kha ino thero, ri ḓo vhona uri vhavhingani vha nga khwaṱhisa hani vhukonani havho. Fhedzi kha ri thome ri haseledze uri Vhakriste vha siho mbinganoni vha nga khetha hani mufarisi ane a ḓo vha khonani yavho ya tsini lwa vhutshilo havho hoṱhe.

RI NGA KHETHA HANI KHONANI YA VHUTSHILO HASHU HOṰHE?

3-4. Ndi mini zwine zwa nga thusa muthu uri a wane mufarisi wavhuḓi? (Mirero 18:22)

³ Musi ri sa athu dzhia phetho ya ndeme, ri khou tea u thoma ra humbula nga ha zwithu zwavhuḓi na zwithu zwi si zwavhuḓi zwine zwa nga itea arali ra dzhia yeneyo phetho. Phetho khulwane dzi  nga ri kwama vhutshilo hashu hoṱhe, ndi ngazwo zwi zwa ndeme uri ri thome ri humbulisise musi ri sa athu i dzhia.

⁴ Musi ri tshi khetha mufarisi wa mbingano, ri vha ri tshi khou khetha khonani ine ra ḓo tshila nayo vhutshilo hashu hoṱhe. U khetha mufarisi wa mbingano ndi iṅwe ya phetho dza ndeme dzine ra nga dzi dzhia vhutshiloni. Samusi Yehova hu ene Muthomi wa mbingano, zwi nga vha zwavhuḓi uri hu vhe ene ane a ri livhisa u khetha mufarisi wa mbingano. Yehova u ṱoḓa uri munna a wane mufumakadzi wavhuḓi, na uri mufumakadzi a wane munna wavhuḓi. U dovha a ḓivha zwo ri teaho. (Vhalani Mirero 18:22; Yes. 48:17, 18) Mafhungo a re Bivhilini a nga thusa Mukriste uri a wane mufarisi o mu teaho.

5. Ndi ngani zwi zwa ndeme u pfana kana u vhingwa nga muthu o lovhedzwaho?

⁵ Musi ri tshi lovhedzwa, ri mbo ḓi vha khonani dza Mudzimu. (Ps. 25:14) Arali ni tshi takalela u vhinga kana u vhingwa, ni khou tea u khetha muthu ane na ene a vha khonani ya Yehova. (1 Vhakor. 7:39) Musi ni tshi ita zwenezwo, ni ḓo vha ni khou sumbedza uri ni ṱhonifha milayo ya Yehova nahone ni ḓo dzhia mufarisi waṋu sa tshifhiwa tshi bvaho khae. (Mir. 19:14) Ni ḓo dovha na iledza thaidzo dzine dza vhangwa nga u “hwala dzhogo na vha sa tendiho.” (2 Vhakor. 6:14) Naho na vhona u nga a hu na Ṱhanzi ine ya nga vha mufarisi waṋu, zwi ḓo vha zwi si vhuṱali u humbula u pfana na muthu ane a si vhe Ṱhanzi ya Yehova. Zwiṅwe hafhu, zwi ḓo vha zwi si vhuṱali u humbula uri zwo luga u pfana na muthu ane a si vhe Ṱhanzi ngauri ḽiṅwe ḽa maḓuvha a nga kha ḓi guda ngoho na ene a vha Ṱhanzi.

6-7. Ndi dzifhio mbudziso dzine na tea u ḓivhudzisa dzone musi hu na ane na khou pfana nae?

⁶ Ndi ngoho uri a si muṅwe na muṅwe o lovhedzwaho ane a nga vha mufarisi o teaho. Arali hu na muthu ane na khou pfana nae, zwi nga vha zwavhuḓi uri ni ḓivhudzise dzimbudziso. a Ni nga ḓivhudzisa uri: ‘U fara hani vha muṱani wahawe? Naa u a ṱhonifha na u humbulela vhaṅwe? Khonani dzawe ndi vhonnyi? U ita mini musi hu na dziphambano? Naa u ṱoḓa hu tshi pfiwa ene fhedzi kana u a thetshelesa na vhaṅwe arali zwi sa lwisani na milayo ya Yehova? U dzhia hani tshelede?’

⁷ Ni nga dovha na ḓivhudzisa uri: ‘Naa onoyo muthu u a funa Yehova nga mbilu yawe yoṱhe? Naa u ita zwoṱhe zwine a nga kona uri a “ambare vhumuthu vhuswa”? Naa u ḓo nthusa uri ndi bvele phanḓa ndi tshi shumela Yehova? Naa zwipikwa zwine nṋe nae ra vha nazwo tshumeloni ya Yehova zwi a fana? Naa nṋe nae ri nga vha khonani dza tsini-tsini?’ (Vhakol. 3:9, 10) Arali ni wahashu wa tshifumakadzini, ni nga ḓivhudzisa na uri: ‘Naa wahashu wa tshinnani ane nda pfana nae a nga vha khonani yanga yavhuḓi na ṱhoho ya muṱa yavhuḓi?’ (1 Vhakor. 11:3) Arali ni wahashu wa tshinnani ni nga ḓivhudzisa na uri: ‘Naa wahashu wa tshifumakadzini ane nda khou pfana nae u ḓo kona u ntikedza na u nṱhonifha sa ṱhoho yawe ya muṱa naho ndi na vhushayanungo?’ Zwi a dzhia tshifhinga u fhindula mbudziso dzo tou raloho. Nga zwenezwo, ḓiṋeeni tshifhinga tsha u ḓivhana khwiṋe musi ni tshi khou pfana.

8-9. Ndi mini zwine zwa nga thusa vhathu vhane vha khou pfana uri vha ite phetho ya vhuṱali? (Sedzani tshifanyiso.)

⁸ Musi ni tshi khou pfana, lingedzani u guda nḓila ine onoyo muthu a vha ngayo zwa vhukuma. Zwenezwo zwi nga kha ḓi ni thusa uri ni ite phetho ya vhuṱali. Dovhani ni ḓivhe uri vhathu vha mu dzhia hani. Ni nga kha ḓi vhudzisa nḓila ine a vha ngayo na uri u ḓivhelwa mini. Sa tsumbo, naa u ḓivhelwa u vha muthu ane a ḓiṱukufhadza, a re na vhuthu na ane a humbulela vhaṅwe? Wahashu wa tshifumakadzini ane a pfi Sarah wa ngei French Guiana we a vhingwa nga Wahashu Daniel u ri: “Uri ndi ḓivhe Daniel khwiṋe, ndo vhudzisa muṅwe wahashu wa tshinnani we a vha a tshi dzula nae na we a vha a tshi vula  nḓila nae. Ndo dovha nda vhudzisa muhulwane wa tshivhidzoni tshawe, nda vhudzisa na khonani dzine dza ḓivha nṋe nae, nda dovha nda vhudzisa na vhaṅwe vhahashu vha tshifumakadzini vha tshivhidzoni tshawe.” Ni nga dovha na vhudzisa onoyo ane na khou pfana nae uri naa hu na zwithu zwine na khou tea u zwi ḓivha nga hae zwe zwa itea kale kana zwine zwa khou itea zwino, samusi zwenezwo zwithu zwi tshi nga kha ḓi vhanga thaidzo musi no no vhingana.

⁹ Arali hu na zwiṅwe zwithu zwine zwa khou ita uri ni timatime nga ha muthu ane na khou pfana nae, kana no pfa zwiṅwe zwithu nga hae zwine zwa khou ita uri ni timatime, ni songo zwi dzhiela fhasi. Arali na zwi dzhiela nṱha, zwi ḓo ita uri ni kone u ḓivha arali zwi vhuṱali u bvela phanḓa ni tshi khou pfana nae kana hai. b Zwa zwino, kha ri haseledze nga ha vhathu vhane vho no vhingana.

KHWAṰHISANI VHUKONANI HA VHOIWE NGA U FHEDZA TSHIFHINGA NOṰHE

10. Ndi ngani zwi zwa ndeme uri vhavhingani vha fhedze tshifhinga vhoṱhe?

¹⁰ Munna na mufumakadzi vha nga khwaṱhisa mbingano yavho na vhukonani havho nga u fhedza tshifhinga vhoṱhe hu sa londwi uri vho farekanea hani. Zwenezwo zwi ḓo vha ṋea tshibuli tsha uri vha ambedzane nga ha zwe zwa itea khavho ḽeneḽo ḓuvha, vha somolelane zwa haṋwani, vha sumbedzane lufuno na u ḓiphiṋa vhe vhoṱhe.

11. Ndi mini zwine zwa nga tshinya vhukonani vhune vhavhingani vha vha naho?

¹¹ Munna na mufumakadzi vhane vha vha na vhukonani ha tsini-tsini vha takalela uri tshifhinga tshoṱhe vha vhe vhoṱhe. Ndi ngoho uri hu ḓo vha na zwifhinga zwine vha ḓo vha vhe si vhoṱhe. Fhedzi arali vha fhedzesa tshifhinga tshilapfu vhe si vhoṱhe, hu nga vha na masiandoitwa a si avhuḓi. Sa tsumbo, vhaṅwe vho ṱanganedza mishumo ine vha tea u shuma kha maṅwe mashango, zwenezwo zwa ita uri vha vhe kule na miṱa yavho lwa tshifhinga tshilapfu. Ndi ngoho uri zwenezwo zwi nga vha thusa zwi tshi ḓa kha mafhungo a zwa masheleni, fhedzi u fhedzesa tshifhinga tshilapfu vhe si vhoṱhe zwi nga tshinya mbingano yavho.

12-13. (a) Ndi mini zwe vhaṅwe vhavhingani vha zwi ita uri vha fhedze tshifhinga vhoṱhe? (Sedzani tshifanyiso.) (b) Vhushaka haṋu na mufarisi waṋu wa mbingano vhu tea u vha ha ndeme lungafhani kha inwi? (Sedzani bogisi “ Mufarisi Waṋu Wa Mbingano U Tea U Vha Wa Ndeme Lungafhani Kha Inwi?”)

¹² Ṱhogomelani uri vhaṅwe vhavhingani vho ita mini u itela u ita vhungoho ha uri vha fhedza tshifhinga vhe vhoṱhe. Leah wa ngei Guam u ri: “Nṋe na mukalaha wanga ri takalela u ita zwithu zwinzhi ri roṱhe. Musi ri tshi tea u ya huṅwe fhethu kana ro rambiwa huṅwe fhethu, kanzhi ri ṱuwa roṱhe.” Roxanne wa ngei Amerika ene u ri: “Samusi tshifhinga tshoṱhe hu tshi dzula hu na zwithu zwine ra tea u zwi ita, ro vhona uri ndi khwiṋe ri tshi ḓivhetshela tshifhinga tsha u ita zwithu roṱhe, u fana na musi ri tshi ḓivhetshela  tshifhinga tsha u ita zwithu zwa ndeme.” (Vhambedzani Amosi 3:3.) Damien wa ngei Fura ene u ri: “Ro guda u funa zwine muṅwe muthu a zwi funa u itela uri ri kone u ḓiphiṋa roṱhe ngazwo.” (Mat. 7:12) Katie ane na ene a bva ngei Amerika u ri: “Tshiṅwe tshifhinga ri vhetshela na founu dzashu kule u itela uri dzi sa ri thithise musi ri roṱhe.”

¹³ Tsha ndemesa tshine vhavhingani vha nga tshi ita, ndi u fhedza tshifhinga vhoṱhe vha tshi khou ita zwithu zwine zwa khwaṱhisa vhushaka havho na Yehova. Myriam wa ngei Fura u ri: “Tshithu tsha u thoma tshine muṅwe na muṅwe washu a tshi ita nga matsheloni ndi u vhala Bivhili, ri tshi fhedza u vhala ri haseledza zwe ra zwi guda na uri ri nga zwi shumisa hani vhutshiloni hashu. Tshenetshi tshifhinga tshine ra tshi fhedza ri roṱhe, ndi a tshi takalela vhukuma.” O dovha a ri: “Ndi dovha nda takalela u thetshelesa munna wanga musi a tshi rabela, zwi a ntakadza u pfa nḓila ine a funa ngayo Yehova.” Katie we ra amba nga hae, ene u ri: “Tshifhinga tshine nda tshi takalela vhukuma ndi musi ri tshi ṱuwa roṱhe  vhuḓinḓani. Zwi a homolosa u pfa mufarisi wau a tshi gudisa vhaṅwe nga ha Yehova nahone u guda zwiṅwe zwithu zwiswa khae.”​—Mir. 27:17.

MUSI HU TSHI VHA NA DZITHAIDZO, NI SONGO FHANDEKANA

14-15. Ndi ngani vhavhingani vha tshi tea u ita zwoṱhe zwine vha nga kona u itela u tandulula thaidzo dzine dza nga vha hone mbinganoni yavho? Ṋeani tsumbo.

¹⁴ Samusi roṱhe ri na tshivhi, vhavhingani vha ḓo sedzana na thaidzo mbinganoni yavho. Bivhili yo tou zwi amba khagala uri vhavhingani “vha ḓo pfa vhuṱungu ṋamani.” (1 Vhakor. 7:28) Study note tsha heyi vese tsho amba uri enea maipfi a “ambela kha thaidzo dzine kanzhi dza anzela u vha hone mbinganoni.” Musi dzenedzo thaidzo dzi tshi vha hone, vha tea u ita zwoṱhe zwine vha nga kona uri vha kone u kunda dzenedzo thaidzo na u dzula vhe na vhushaka ha tsini. Ndi ngani?

¹⁵ Kha ri ite tsumbo. Arali tshifhaṱo tsha ndeme vhukuma kana tshiṅwe tshithu tsha thengo khulu tsha nga tshinyala, zwi tou pfala uri muṋe watsho u ḓo ṱoḓa uri tshi lugiswe. A nga fhedza tshifhinga tshinzhi vhukuma na u shumisa tshelede nnzhi u itela u lugisa tshenetsho tshifhaṱo kana tshenetsho tshithu naho zwa nga dzhia miṅwaha minzhi-minzhi. Ndi ngani? Ndi nga nṱhani ha uri tshenetsho tshifhaṱo kana tshithu tsha thengo khulu ndi tsha ndeme khae. Nga nḓila i fanaho, mbingano dzoṱhe ndi dza ndeme. Na vhavhingani vhane vha vha na vhukonani ha tsini-tsini vha a ṱangana na dzithaidzo. Naho zwo ralo, samusi tshifhaṱo na tshithu tsha thengo khulu tshi tshi kona u lugiswa, na vhavhingani vha nga kona u lugisa thaidzo dzine vha vha nadzo mbinganoni yavho. U tandulula dzenedzo thaidzo zwi nga dzhia tshifhinga nahone zwa ṱoḓa uri vhavhingani vha shume vhukuma u itela u dzi tandulula. Fhedzi Yehova u ḓo takala vhukuma arali vhavhingani vha tshi shuma nga maanḓa u itela u khwaṱhisa mbingano yavho na u dzula khayo. (Maḽ. 2:16) Musi vha tshi ita zwenezwo, vha ḓo vha vha tshi khou sumbedza uri vha a funana na u ṱhonifhana, vha dovha vha funa na u ṱhonifha Yehova ane a vha Muthomi wa mbingano.

16. U ya nga 1 Vhakorinta 13:4-8a, ndi mini zwine zwa nga thusa vhavhingani u tandulula thaidzo dzine dza nga vha hone mbinganoni yavho? (Sedzani tshifanyiso na bogisi “ Zwine Zwa Nga Ni thusa U Khwaṱhisa Vhukonani Ha Vhoiwe.”)

¹⁶ Musi hu tshi vha na dzithaidzo mbinganoni ya vhoiwe, ni songo ṱavhanya no fhandekana. (1 Vhakor. 7:10, 11) Nṱhani hazwo, ḓivhudziseni uri: ‘Ndi mini zwiṅwe zwine nda nga zwi ita u itela u khwaṱhisa vhukonani hashu?’ Gudani zwine Bivhili ya zwi amba nga ha u sumbedza lufuno. Ni nga vhala 1 Vhakorinta 13:4-8a u itela u vhona uri ni nga khwinisa hani kha zwe lwonolwo luṅwalo lwa zwi amba. (Vhalani.) Nṱhani ha uri ni ṱoḓe zwiitisi zwa uri ni fhandekane, ndi khwiṋe u ṱoḓa zwiitisi zwa uri ndi ngani ni tshi tea u dovha na funana. Livhisani ṱhogomela kha zwine inwi  na nga zwi ita u itela u khwaṱhisa vhushaka ha vhoiwe. Rabelani kha Yehova uri a ni thuse. Ni nga dovha na wana thuso kha khandiso dzashu, dzividio, u katela na kha vhahulwane na vhaṅwe Vhakriste vhane vha shumisa zwine Bivhili ya zwi amba mbinganoni yavho. Bivhili i amba uri mbingano i fana na “thambo dzo lukiwaho dzi tharu.” Kha dzenedzo thambo tharu, Yehova ndi ene thambo yo khwaṱhesaho na ine ya vha ya ndeme mbinganoni ya vhoiwe. Zwino arali na ita zwithu nga ndila ine Yehova a ṱoḓa, mbingano ya vhoiwe i ḓo khwaṱha.​—Muh. 4:12.

17. Vhane vha vha mbinganoni na vhane vha khou humbula u vha mbinganoni, vha nga wana hani dakalo mbinganoni yavho?

¹⁷ Yehova u khou ṱoḓa uri vhashumeli vhawe vhoṱhe vha takale, u katela na vha re mbinganoni na vhane vha khou ṱoḓa u vha mbinganoni. Zwino arali ni tshi khou ṱoḓa u vha mbinganoni, khethani nga vhuṱali ngauri onoyo muthu u ḓo tea u vha khonani yaṋu ya tsini ya vhutshilo haṋu hoṱhe. Nahone arali ni mbinganoni, bvelani phanḓa ni tshi khwaṱhisa vhukonani ha vhoiwe. Itani zwoṱhe zwine na nga kona u itela u tandulula thaidzo dzine dza nga vha hone mbinganoni ya vhoiwe nahone ni ḓitike nga Yehova. Musi ni tshi ita zwenezwo zwithu zwoṱhe, ni ḓo ‘ḓiphiṋa nga vhutshilo’ na mufarisi waṋu wa mbingano.​—Muh. 9:9.