1-2. Ndi mini zwine na tea u zwi ita uri ni konḓelele thaidzo dzine na vha nadzo? (Sedzani tshifanyiso.)

 NAA ni khou pikiswa nga vha muṱani wahaṋu kana u tovholwa nga nṱhani ha lutendo lwaṋu? Naa ni khou farwa nga nḓila i si yavhuḓi? Naa a ni na mutakalo wavhuḓi kana ni khou sedzana na thaidzo dzi tshimbidzanaho na u vha mulala? Naa no lovhelwa nga muthu ane na mu funa kana no welwa nga iṅwe khombo-vho? Yehova u a dzhiela nṱha nngu dzawe, naho zwo ralo, vhutshilo hashu ho ḓala “maṱhupho na maṱungu.”​—Ps. 90:10.

² U itela uri ri kone u konḓelela thaidzo dzine ra ṱangana nadzo, ri tea u dzi dzhia nga nḓila ine Yehova a ṱoḓa ri tshi dzi dzhia ngayo. Ndi ngani zwi zwa ndeme? Thaidzo dzine ra vha nadzo ri nga dzi vhambedza na zwithu zwine ra nga ṱangana nazwo musi ri tshi khou reila, zwine zwa nga ri vhangela khombo. Arali mafasiṱere ashu a songo kuna kana e na tshika, ri nga si kone u vhona zwavhuḓi zwenezwo zwithu. Fhedzi arali mafasiṱere o kuna, ri ḓo kona u vhona na u dzhia vhukando ha uri zwenezwo zwithu ri zwi iledze. Nga nḓila i fanaho, u itela uri ri kone u sedzana na thaidzo dzashu nga nḓila i bvelelaho, ri khou tea u dzi dzhia nga nḓila ine Yehova a ṱoḓa ri tshi dzi dzhia ngayo. Kha ino thero, ri ḓo haseledza zwithu zwiraru. Tsha u thoma, ri ḓo haseledza uri ndi ifhio nḓila yavhuḓi ya u dzhia thaidzo dzine ra vha nadzo. Tsha vhuvhili, u dzhia thaidzo dzine ra vha nadzo nga nḓila i si yavhuḓi zwi nga ri kwama hani? Tsha vhuraru, ri ḓo guda uri ndi zwifhio zwine ra tea u zwi ita uri ri dzhie thaidzo dzashu nga nḓila ine Yehova a ṱoḓa ri tshi dzi dzhia ngayo.

DZHIANI MILINGO NGA NḒILA INE YEHOVA A ṰOḒA NI TSHI I DZHIA NGAYO

3. Ndi mini zwine ra tea u zwi ṱanganedza kha ḽino shango ḽine ra khou tshila khaḽo?

³ Ri nga si kone u iledza u ṱangana dzithaidzo. Samusi ri na tshivhi  nahone ḽino shango ḽi tshi khou vhuswa nga Saṱhane, ri kha ḓi ḓo ṱangana na dzithaidzo. Zwiṅwe hafhu, samusi ḽino shango ḽi tsini na u fheliswa, ri ḓo sedzana na dziṅwe thaidzo nnzhi, hu sa londwi uri dzi khou vhangwa nga khombo dza mupo kana khombo dzo bveledzwaho nga vhathu kana ri tshi khou ṱangana na khombo nga nṱhani ha vhathu vhane vha khou ita zwithu zwi si zwavhuḓi. (Mat. 24:8; 2 Tim. 3:13) Arali Yehova a lugise dzenedzo thaidzo zwino, zwi nga vhonala u nga u khou thusa Saṱhane u vhusa ḽino shango. Samusi shango ḽi tshi khou vhuswa nga Saṱhane, ri kha ḓi ḓo bvela phanḓa ri tshi ṱangana na zwithu zwi si zwavhuḓi.​—Muh. 9:12.

4. Ndi dzifhio dziṅwe thaidzo dzine Vhakriste vha ṱangana nadzo?

⁴ Vhakriste vha sedzana na thaidzo dzo engedzeaho. Kanzhi Yesu o vha a tshi vhudza vhatevheli vhawe uri vha ḓo tovholwa nga nṱhani ha uri vha na lutendo khae. (Mat. 24:9; Yoh. 16:2) U ḓivha zwenezwi zwi ḓo ri thusa uri lutendo lwashu lu sa thenga-thenge musi ri tshi sedzana na dzenedzi thaidzo. (1 Vhathes. 3:3, 4) Musi ri tshi konḓelela milingo nga nṱhani ha uri ri na lutendo lwo khwaṱhaho, zwi ita uri ri vhe na vhungoho ha uri ri kha ḓi vha kha nḓila i isaho vhutshiloni vhu sa fheli. Zwiṅwe hafhu, ri vha ri tshi khou sumbedza uri ri ima ngafhi kha khani ye Saṱhane a i vusa. Kha yeneyo khani, Saṱhane o tshinya Yehova dzina nga u amba uri vhathu vha shumela Yehova nga nṱhani ha uri vha vha vha tshi khou ṱoḓa u ḓivhuyedza. Nga nṱhani ha zwenezwo, Saṱhane u ṱhasela vhathu vha Yehova nga nḓila ya tshiṱuhu a tshi khou lingedza u sumbedza uri a vha nga ḓo fhulufhedzea kha Yehova musi vha tshi ṱangana na zwithu zwi konḓaho. (Yobo 1:9-11) Fhedzi musi ri tshi konḓelela thaidzo dzine ra vha nadzo nga nṱhani ha uri ri funa Yehova, zwenezwo zwi ita uri Yehova a takale.​—Mir. 27:11.

5. Ri nga guda mini kha nyeletshedzo ya Khosi Salomo i re kha Muhuweleli 7:13, 14? (Sedzani zwifanyiso.)

⁵ Yehova u tou tendela zwithu zwi si zwavhuḓi zwi tshi itea. Yehova a nga si vhuye a vuwa o ita zwithu zwivhi kana u linga vhathu nga zwithu zwivhi. (Yak. 1:13) Zwino ndi ngani Khosi Salomo o amba uri “ḓuvha ḽa khombo” ndi “mishumo ya Mudzimu wa ngoho?” (Vhalani Muhuweleli 7:13, 14.) Salomo o vha a sa khou amba uri Yehova ndi ene ane a ita uri ri welwe nga zwithu zwi si zwavhuḓi. Kanzhi musi Bivhili i tshi amba uri Mudzimu u khou ita zwithu, i vha i tshi khou amba uri u khou tou zwi tendela. Zwe Salomo a zwi amba ndi nyeletshedzo yavhuḓi ine ya nga ri thusa uri ri dzhie thaidzo dzine ra ṱangana nadzo nga nḓila ine Yehova a ṱoḓa ri tshi dzi dzhia ngayo. Zwi nga ri thusa hani? Tsha u thoma, zwi ḓo ri thusa u pfesesa uri samusi ri tshi khou tshila kha shango ḽa Saṱhane nahone ri na tshivhi, nga zwiṅwe zwifhinga zwithu zwi ḓo ri tshimbilela zwavhuḓi, nga zwiṅwe zwifhinga zwa sa tshimbile zwavhuḓi. Musi zwithu zwi tshi ri tshimbilela zwavhuḓi kana ri na ḓuvha ḽavhuḓi, ri tea u livhuwa zwine Yehova a ri itela zwone na u zwi dzhia zwi tshifhiwa tshi  bvaho khae. Tsha vhuvhili, Salomo o ri humbudza uri ri nga si “ḓivhe zwine zwa ḓo itea,” zwine zwa amba uri ri nga si kone u ḓivha uri ṋamusi zwithu zwi ḓo ri tshimbilela zwavhuḓi kana a zwi nga ḓo ri tshimbilela zwavhuḓi. Thaidzo dzi songo lavhelelwaho dzi wela vho lugaho na vha songo lugaho.

6. Ndi ngani Yehova a tshi nga tendela ri tshi ṱangana na dzithaidzo? (Vhahevheru 12:7, 11)

⁶ Arali ra dzhia thaidzo nga nḓila ine Yehova a ṱoḓa ri tshi dzi dzhia ngayo, Yehova a nga shumisa tshenetsho tshibuli u itela u ri gudisa uri ri ḓitike ngae nṱhani ha uri ri ḓitike nga riṋe vhaṋe. Yehova u a vhona thaidzo dzoṱhe dzine ra khou ṱangana nadzo nahone u ḓo dzula a tshi ri thusa. Naho a nga tenda ri tshi vha “govhani ḽa swiswi ḽihulu,” u ḓo dzula a tshi ri livhisa. U ri khwaṱhisedza uri u a ri funa na uri u ḓo ri ṋea maanḓa a uri ri kone u konḓelela. (Ps. 23:4) Thaidzo dzine ra ṱangana nadzo dzi nga ri thusa uri ri ḓivhe vhushayanungo hashu nahone Yehova a nga ri thusa uri ri kone u khwinisa kha zwine ra vha zwone. (Vhalani Vhahevheru 12:7, 11.) Sa tsumbo, Yobo o vha a tshi tea u ḓiṱukufhadza. Yehova a si ene we a ita uri Yobo a ṱangane na thaidzo, fhedzi o zwi tendela. Musi Yobo a tshi ṱangana na dzithaidzo, Yehova o mu gudisa zwithu zwa ndeme. (Yobo 42:1-6) Hu sa londwi thaidzo ine ra nga ṱangana nayo, ri a zwi ḓivha uri Yehova a nga si tendele ri tshi ṱangana na zwithu zwine zwa nga ri vhaisa lwa tshoṱhe. Musi ri tshi konḓelela na u fhulufhedzea kha Yehova musi ri tshi ṱangana na dzithaidzo, ri ḓo kona u “kunda kha zwithu zwoṱhe.”​—Vharoma 8:35-39.

7. Ndi ngani ni tshi nga takala naho ni tshi khou tovholwa?

⁷ Ri nga takala musi ri tshi khou tovholwa. Arali ni tshi khou tovholwa nga ṅwambo wa lutendo lwaṋu, ni songo humbula uri Yehova ha tsha ni takalela. Nṱhani hazwo, u tovholwa haṋu hu tou sumbedza uri u a ni takalela. (Mat. 5:10-12) Arali na dzhia u tovholwa nga nḓila ine Yehova a ṱoḓa ni tshi zwi dzhia ngayo, zwi ḓo ita uri ni takale u fana na vhaapostola ngauri ni ḓo vha ni tshi khou tovholwa ngauri ni Mukriste. (Mish. 5:40-42) Zwiṅwe hafhu, ni nga kha ḓi thusa na vhathu vhane vha si vhe Dziṱhanzi uri vha gude ngoho na uri vha “rende Mudzimu.” (1 Pet. 2:12) Humbulani nga ha tsumbo ya Yosefa, Yehova o thusa Yosefa na u mu lambedza musi a tshi khou ṱangana na milingo, ho ngo sokou mu lambedza fhedzi musi yeneyo milingo yo no fhela. Na inwi Yehova a nga ni thusa musi ni tshi khou ṱangana na milingo.​—Gen. 39:3, 23.

8. Ndi mini tshiṅwe tshine tsha ri ṱuṱuwedza uri ri konḓelele musi ri tshi ṱangana na milingo?

 ⁸ Thaidzo dzashu dzi ḓo fhela. Zwe zwa itea kha Yobo zwi ri humbudza uri thaidzo dzashu dzi ḓo fhela. Zwavhuḓi-vhuḓi Yehova o “fhaṱutshedza miṅwaha ya u fhedza ya vhutshilo ha Yobo u fhira ya u thoma.” (Yobo 42:12) Zwa zwino, vhutshilo hashu vhu nga vha ho ḓala dzithaidzo, fhedzi Yehova o fhulufhedzisa uri u ḓo fhaṱutshedza “miṅwaha ya u fhedza” ya vhutshilo hashu nahone zwenezwi zwi ḓo itea musi ri shangoni ḽiswa ri tshi khou tshila tshoṱhe. Zwenezwi zwi tea u ri ṱuṱuwedza roṱhe uri ri bvele phanḓa ri tshi konḓelela u swika vhufheloni.​—Mat. 24:13.

U SA DZHIA ZWITHU NGA NḒILA INE YEHOVA A ṰOḒA RI TSHI ZWI DZHIA NGAYO ZWI NGA ṊAṊISA MAFHUNGO

9. U dzhia thaidzo dzashu nga nḓila i songo teaho zwi nga ri ṋaṋisela hani thaidzo?

⁹ Musi ri tshi ṱangana na dzithaidzo, ri tea u dzi dzhia nga nḓila ine Yehova a ṱoḓa ri tshi dzi dzhia ngayo uri ri sa ṋaṋise mafhungo. Sa tsumbo, ri nga vhona u nga Yehova ndi ene ane a khou ita uri ri ṱangane na zwithu zwi si zwavhuḓi. Yobo na ene o vhuya a vhona u nga Yehova ndi ene ane a khou ita uri a ṱangane na zwithu zwi si zwavhuḓi nahone zwenezwo zwo ita uri Yobo a lingedze “u ḓiita o lugaho u fhira Mudzimu.” (Yobo 32:2) Naomi na ene o vhona u nga ndi Yehova we a vha a tshi khou ita uri a ṱangane na zwithu zwi si zwavhuḓi. (Ruṱe 1:13, 20, 21) Arali Yobo na Naomi vha vhe vho bvela phanḓa vha tshi ḓipfa nga yeneyo nḓila, zwo vha zwi tshi nga tshinya vhushaka havho na Yehova. (Mir. 19:3) Fhedzi Yehova o vha thusa uri vha dzhie thaidzo nga nḓila ine ene a dzi dzhia ngayo nahone o vha fhaṱutshedza nge vha dzula vha tshi fhulufhedzea khae.

10. Arali ri tshi khou ṱangana na zwithu zwi si zwavhuḓi, ri nga thoma u humbula mini?

¹⁰ Naho ri na vhungoho ha uri Yehova a si ene ane a ita uri ri ṱangane na zwithu zwi si zwavhuḓi, ri nga thoma u ḓivhudzisa arali e na ndavha na riṋe. U humbula nga yeneyo nḓila zwi nga ri kula nungo. (Mir. 24:10) Khosi Davida na muporofita Habakuku vho ṱangana na zwithu zwi si zwavhuḓi nahone nga zwiṅwe zwifhinga vho ḓivhudzisa arali Yehova a tshi fhindula thabelo dzavho. (Ps. 10:1; Hab. 1:2) Naho vho ḓipfa nga yeneyo nḓila, a vho ngo litsha u rabela. Nahone Yehova o fhindula thabelo dzavho, a bvela phanḓa a tshi vha tikedza. Na inwi Yehova u ḓo dzula a tshi ni thusa.​—Ps. 10:17.

11. Hu nga itea mini kha riṋe arali ri sa dzhii thaidzo nga nḓila ine Yehova a ṱoḓa ri tshi dzi dzhia ngayo?

¹¹ Musi ri sa dzhii thaidzo dzine ra vha nadzo nga nḓila ine Yehova a dzi dzhia ngayo, ri nga mangala vhukuma musi ri tsha vha na dzithaidzo, khamusi ra pfa na uri ro vha ri songo tea u ṱangana nadzo. (1 Pet. 4:12) Vhafunziwa vha Yesu zwo vha dzhiela tshifhinga u pfesesa uri ndi ngani Yesu o vha a tshi khou tea u tovholwa na u vhulawa. (Luka 18:33, 34) Naho Yesu o vha o vha ṱalutshedza zwine zwa ḓo itea khae, muapostola Petro o humbula u nga Mudzimu o vha a sa ḓo tendela Yesu a tshi tambula nga yeneyo nḓila. Yesu o vha a tshi zwi ḓivha uri eneo mahumbulele a nga ita uri a si ite zwine Yehova a ṱoḓa, ndi ngazwo o kaidza na u khakhulula Petro. (Marko 8:31-33) Na musi Yesu o no fa, zwo vha dzhiela tshifhinga u pfesesa zwe zwa itea kha Yesu. Naho zwo ralo, Yesu ho ngo vha fhelela mbilu. Musi a tshi vuswa, o amba navho a vha thusa uri vha pfesese uri ndi ngani o vha a tshi tea u tambula, o zwi ita nga u vha “ṱalutshedza Maṅwalo.” (Luka 24:25-27, 32, 44-48) Nga u elekanya nga ha zwe Yesu a vha funza zwone, zwo vha zwi tshi ḓo vha thusa u ḓilugiselela u tovholwa he vha vha vha tshi ḓo ṱangana naho samusi vho vha vhe vhatevheli vha Yesu. Na riṋe arali ra humbulisisa nga zwine Bivhili ya zwi amba zwi nga ri lugiselela thaidzo dzine ra ḓo ṱangana nadzo.

12. Arali ra sa dzhia thaidzo dzine ra vha nadzo nga nḓila ine Yehova a ṱoḓa ri tshi dzi dzhia ngayo, zwi nga ita uri ri ḓipfe hani?

¹² Musi ri sa dzhii thaidzo dzine ra vha nadzo nga nḓila ine Yehova a ṱoḓa, ri nga vhona u nga thaidzo dzine ra vha nadzo dzo hula vhukuma u fhira nḓila ine dza vha ngayo. Yesu o sumbedza uri zwenezwo zwi nga itea hani musi a tshi amba nga ha tshifanyiso tsha vhashumi vhe vha vha vha tshi khou shuma tsimuni ya minḓirivhe. Vhaṅwe vhashumi vho vha vha tshi khou gungula nahone vha songo takala nga nṱhani ha uri vho vha vha tshi khou humbula uri  muṋe wavho o vha fhura. Fhedzi muṋe wavho o vhudza muṅwe wavho a ri: “Khonani, a tho ngo u khakhela.” (Mat. 20:10-13) Muṋe wavho o vha a songo vha fhura. U sa takala havho ho itiswa nga nṱhani ha uri vho vha vho lavhelela u wana zwi fhiraho zwe vha vhudzwa uri vha ḓo zwi wana. Na ṋamusi hu na vhashumeli vha Yehova vhe vha ḓipfa nga yeneyo nḓila nga nṱhani ha u sa wana ndugelo ye vha vha vho lavhelela u i wana kana vho xelelwa nga ndugelo ye vha vha vho i wana. Ndi mini zwine ra nga zwi ita uri ri dzhie thaidzo dzine ra vha nadzo nga nḓila ine Yehova a ṱoḓa ri tshi dzi dzhia ngayo?

ZWINE RA NGA ZWI ITA MUSI RI TSHI ṰANGANA NA DZITHAIDZO

13. Hu nga itea mini musi ni tshi sedzana na dzithaidzo?

¹³ Ni nga vha ni tshi ḓivha Maṅwalo ane a amba nga ha uri ndi ngani ri tshi tambula. Ni nga vha no a vhudza na vhaṅwe u itela u vha thusa uri vha konḓelele thaidzo dzine vha khou sedzana nadzo. Fhedzi musi zwi tshi itea kha inwi, zwi nga ni konḓela uri ni zwi dzhie nga nḓila ine Yehova a ṱoḓa ni tshi zwi dzhia ngayo. Sa tsumbo, ni nga pfa u nga zwenezwo zwi khou itea nga nṱhani ha uri no khakhela Yehova kana nga nṱhani ha uri Yehova ha khou thetshelesa thabelo dzaṋu. Arali na humbula nga yeneyi nḓila, ndi mini zwine na nga zwi ita?

14. Musi ni tshi khou sedzana na dzithaidzo ni nga rabela nga ha mini? (Vhafilipi 4:13)

¹⁴ Humbelani Yehova uri a ni thuse. Vhudzani Yehova thaidzo dzine na khou ṱangana nadzo nahone ni mu vhudze nḓila ine na khou ḓipfa ngayo. Ni nga rabela nga ho livhaho uri ni khou ṱoḓa uri Yehova a ni thuse hani. Ni nga dovha na humbela muya wawe mukhethwa ngauri muya wawe mukhethwa u ḓo ni khwaṱhisa na u ni ṋea vhuṱali ha uri ni kone u konḓelela. Fhedzi dzulani ni tshi humbula uri Yehova a nga fhindula thabelo dzaṋu nga nḓila ye na vha ni songo i lavhelela. (Vhaef. 3:20) A nga dovha a shumisa vharuṅwa kana vhahaṋu u itela u ni tikedza. (Ps. 34:7) Zwino ṱanganedzani thuso iṅwe na iṅwe ine a ni ṋea yone, hu sa londwi uri u ni thusa hani. Yehova o ḓiimisela u ni ṋea muya mukhethwa uri u kone u ni thusa kha vhuimo vhuṅwe na vhuṅwe vhune na nga vha ni khaho.​—Vhalani Vhafilipi 4:13.

15. Ndi mini zwine zwa nga ni thusa u konḓelela thaidzo dzine na khou sedzana nadzo? (Sedzani tshifanyiso.)

¹⁵ Bvelani phanḓa ni tshi khwaṱhisa vhushaka haṋu na Yehova. Musi ni tshi khou sedzana na zwithu zwi konḓaho, zwi nga ni konḓela uri ni ite zwithu zwe na vha ni tshi zwi ita uri ni khwaṱhise vhushaka haṋu na Yehova. Musi no “tsikeledzea na u welwa nga zwithu zwi konḓaho,” ndi hone hune na tea u khwaṱhisa vhushaka haṋu na Yehova u fhira naho hu lini. (Ps. 119:143) Bvelani phanḓa ni tshi guda Bivhili ḓuvha ḽiṅwe na ḽiṅwe na u elekanya nga zwe na zwi guda. Bvelani phanḓa ni tshi huwelela mafhungo maḓifha, u ya miṱanganoni na u shela mulenzhe khayo. Fhedzani tshifhinga na vhahaṋu. Iledzani u ṱoḓa u fhedza tshifhinga tshinzhi ni noṱhe, naho ni tshi pfa u nga ndi zwine na ṱoḓa zwone.​—Mir. 18:1.

16. Ri nga ḓipfa hani musi ri tshi sedzana na thaidzo nahone ndi mini zwine ra nga zwi ita arali zwa nga itea? (2 Vhakorinta 10:4, 5)

 ¹⁶ Shumisani Bivhili uri i ni thuse uri ni si tsha timatima. Musi ni tshi welwa nga zwithu zwi si zwavhuḓi, ni nga vha na mahumbulele a si avhuḓi nga ha inwi muṋe kana nga ha Yehova, na thoma u timatima. Arali zwenezwo zwa itea, ndi mini zwine zwa nga ni thusa uri ni si tsha vha na eneo mahumbulele kana u timatima? (Vhalani 2 Vhakorinta 10:4, 5.) Ni nga vhala Bivhili na khandiso dzi bvaho ndanguloni ya Yehova u itela u “ḓivha nḓila ine Mudzimu” a humbula ngayo. Sa tsumbo, naa ni a timatima uri Yehova u kha ḓi ni funa? Arali zwo ralo, vhalani mafhungo a ambaho nga ha muapostola Paulo. Musi a tshi khou ita mushumo wawe wa u huwelela, o ṱangana na zwithu zwinzhi zwi konḓaho, fhedzi zwenezwo zwithu zwo mu khwaṱhisa zwa ita uri a vhe na vhungoho ha uri u mutevheli wa Kristo. (2 Vhakor. 11:23-27) Naa hu na tshifhinga tshine na ḓivhudzisa arali Yehova o ni hangwela zwa vhukuma vhukhakhi he na vhu ita kale? Arali zwo ralo, ṅwalani fhasi maṅwalo ane a sumbedza uri Yehova u a hangwela zwivhi. (Yes. 43:25) Musi ni tshi timatima, ni vhale dzenedzo vese nahone ni elekanye nga hadzo. (Ps. 119:97) Musi ni tshi sedzana na thaidzo, naa no vhuya na ḓivhudzisa arali nangoho Yehova a tshi tsireledza vhashumeli vhawe vha fhulufhedzeaho? Arali zwa nga itea, itani ṱhoḓisiso nga ha uri ndi ngani Mudzimu a tshi tendela tshengelo na uri a nga ri thusa hani u tsireledza vhushaka hashu nae. (Ps. 91:9-12) Dovhani ni vhale nga ha tshenzhelo dza vhahashu vhe vha bvela phanḓa vha tshi shumela Yehova vho takala naho vha tshi khou sedzana na zwithu zwi konḓaho. a

17. Ndi mini zwine ra tea u zwi ita musi ri tshi khou ṱangana na milingo?

¹⁷ Naa zwa zwino ni khou ḓiphiṋa nga ḓuvha ḽavhuḓi, kana zwithu zwi khou ni tshimbilela zwavhuḓi? Arali zwo ralo, livhuwani Yehova nahone ni shumise tshenetsho tshifhinga u humbula nga ha zwithu zwavhuḓi zwine a khou ni itela zwone. (Muh. 7:14) Fhedzi musi ni tshi ṱangana na milingo, i dzhieni nga nḓila ine Yehova a ṱoḓa ni tshi i dzhia ngayo nahone ni bvele phanḓa ni tshi fhulufhela Yehova nga o fhelelaho. Musi ni tshi ita zwenezwo, Yehova “u ḓo ni vulela nḓila ine na ḓo bva ngayo uri ni kone u konḓelela.” (1 Vhakor. 10:13) Hu pfi mini nga vhahashu? Ri nga vha thusa hani musi vha tshi sedzana na zwithu zwi konḓaho? Ri ḓo haseledza nga ha zwenezwo kha thero i tevhelaho.