Ni Nga Vha Hani Na Dakalo Naho Hu Na Dzinndwa Na Dzikhakhathi?
Gary we a vha e swole u ri: “Musi ndi sa athu guda Bivhili ndo vha ndi sa ḓivhi uri ndi ngani vhathu vhe na tshiṱuhu nga u rali, vha tshi haṱula nga nḓila i songo teaho na uri ndi ngani hu na dzikhakhathi shangoni. Fhedzi zwa zwino a thi tsha vhilaela nga hazwo. Ndi a zwi ḓivha uri Yehova Mudzimu u ḓo ita uri ri tsireledzee shangoni.”
A si Gary fhedzi ane a ḓipfa nga yeneyi nḓila. Kha ri pfe uri vhaṅwe vho thusiwa hani nga Bivhili.
BIVHILI I RI: “Iwe Yehova, u wavhuḓi, wo ḓiimisela u hangwela.”—Phisalema 86:5.
LWONOLU LUṄWALO LWO THUSA HANI VHAṄWE: Wilmar wa Colombia u ri: “Lwonolu luṅwalo lwo nkhwaṱhisedza uri Yehova u a khathutshela. Ndi a zwi ḓivha uri o ḓiimisela u nkhangwela kha zwoṱhe zwe nda zwi ita musi ndi tshi shela mulenzhe nndwani tshifhingani tsho fhiraho.”
BIVHILI I RI: “Ndi khou sika ḽiṱaḓulu ḽiswa na ḽifhasi ḽiswa; zwithu zwa kale a zwi tsha ḓo humbulwa, na mbiluni ya muthu a zwi tsha ḓo vha hone.”—Yesaya 65:17.
LWONOLU LUṄWALO LWO THUSA HANI VHAṄWE: Zafirah wa Amerika u ri: “Ndi na vhulwadze ha muhumbulo vhune ha vha post-traumatic stress disorder na depression nga nṱhani ha zwithu zwe nda ṱangana nazwo musi ndi nndwani. Fhedzi lwonolu luṅwalo lu nkhumbudza uri hu si kale Yehova u ḓo ita uri ndi si tsha humbula zwithu zwi si zwavhuḓi zwe zwa itea musi ndi nndwani, ndi nga si tsha dovha nda vuwa ndo zwi humbula. Tshenetsho ndi tshifhiwa tshavhuḓi tshi bvaho ha Yehova.”
BIVHILI I RI: “Misini yawe muvhuya u ḓo bvelela, na mulalo u ḓo anda u swika ṅwedzi u si tsheeho.”—Phisalema 72:7.
LWONOLU LUṄWALO LWO THUSA HANI VHAṄWE: Oleksandra wa Ukraine u ri: “Ndi dzula ndi tshi humbula nga ha eneo maipfi. Hu si kale, nndwa na zwithu zwi si zwavhuḓi zwi ḓo vha zwi si tsheeho nahone ri nga si ḓo tea u vhilaela arali vhathu vhane ra vha funa vho tsireledzea.”
BIVHILI I RI: “Vhafu vhaṋu vha ḓo tshila. . . . Vuwani ni takale, inwi no dzulaho buseni!”—Yesaya 26:19.
LWONOLU LUṄWALO LWO THUSA HANI VHAṄWE: Marie wa Rwanda u ri: “Vhunzhi ha vhathu vha muṱa wahashu vho vhulawa nga tshifhinga tsha musi luṅwe lushaka lu tshi lingedza u vhulaya vhathu vhoṱhe vha lushaka lwa Vhatutsi. Fhedzi lwonolu luṅwalo lwo nkhwaṱhisedza uri ndi ḓo dovha nda vha vhona. Ndo lavhelela nga maṱo matswuku u vha pfa vho takala musi vha tshi vuswa.”
BIVHILI I RI: “Hu si kale vhavhi a vha tsha ḓo vha hone . . . Fhedzi vho vuḓaho vha ḓo vha vhaṋe vha ḽifhasi, vha ḓo takadzwa vhukuma nga muḓalo wa mulalo.”—Phisalema 37:10, 11.
LWONOLU LUṄWALO LWO THUSA HANI VHAṄWE: Daler wa Tajikistan u ri: “Naho zwa zwino nndwa yo fhela, vhathu vha kha ḓi haṱulwa nga nḓila i si yavhuḓi nahone hu na vhathu vhavhi. Lwonolwo luṅwalo lu a nthusa vhukuma. Lu nthusa u vha na vhungoho ha uri Yehova u vhona zwithu zwoṱhe na u pfesesa vhuimo hanga. U fhulufhedzisa uri zwoṱhe zwine zwa ita uri ri tambule zwi ḓo fhela na uri ri ḓo zwi hangwa.”
Vhathu vhe ra amba nga havho kha hoyu magazini ndi vhaṅwe vha Ṱhanzi dza Yehova dza dzimiḽioni vhe vha thusiwa nga Bivhili uri vha takale na u vha na mulalo. Vho guda u sa ṱalula vhaṅwe zwi tshi ya nga lukanda lwavho, hune vha bva hone, mvelele yavho na u sa vhenga vhaṅwe vhathu. (Vhaefesa 4:31, 32) Ṱhanzi dza Yehova a vha dzhii sia kha mafhungo a politiki nahone a vha sheli mulenzhe nndwani na kha dzikhakhathi.—Yohane 18:36.
Ṱhanzi dza Yehova ḽifhasini ḽoṱhe vha a tikedzana na u funana sa muṱa. (Yohane 13:35) Sa tsumbo, Oleksandra we ra amba nga hae mathomoni o tea u shavhela kha ḽiṅwe shango na mukomana wawe nga nṱhani ha nndwa. U ri: “Musi ri tshi tou swika kha ḽiṅwe shango, ro ṱavhanya ra ṱangana na Ṱhanzi dze dza vha dzo ḓa u ri ṱanganedza. Vho ri thusa uri ri ḓowelane na shango ḽiswa.”
Ri khou ni ramba uri ni ḓe miṱanganoni yashu hune ra vha ri tshi khou guda zwine Bivhili ya zwi funza na nḓila ine ra nga zwi shumisa ngayo. Ni nga ya kha website ya jw.org u itela u wana fhethu hune ra farela hone yeneyi miṱangano tsini na hune na dzula hone kana na shumisa yeneyi website u itela u humbela u gudiswa Bivhili nga mahala nga muṅwe wa Ṱhanzi dza Yehova a tshi shumisa bugu ine ya pfi Ḓiphiṋeni Nga Vhutshilo Lwa Tshoṱhe!
