VHUḒINḒA hashu ndi ha ndeme. Fhedzi a si muṅwe na muṅwe ane ra huwelela khae ane a pfesesa zwenezwi. Naho vhathu vhe na dzangalelo kha zwine Bivhili ya zwi amba, vha vhona zwi songo tea u guda na riṋe Ipfi ḽa Mudzimu tshifhinga tshoṱhe.

Kha ri ṱhogomele tsumbo ya Gavin. O vha a tshi ya miṱanganoni Holoni ya Muvhuso, fhedzi o vha a sa ṱoḓi pfunzo ya Bivhili. Gavin o ṱalutshedza uri o vha a tshi ḓivha nyana nga ha Bivhili nahone o vha a sa ṱoḓi vhaṅwe vha tshi ḓivha zwenezwi. O vha a tshi ofha uri u ḓo humbelwa uri a vhe muraḓo wa vhurereli nahone o vha a sa ṱoḓi u fhurwa. Ndi afhio mavhonele aṋu? Naa zwo vha zwi tshi konadzea u thusa Gavin? Humbulani nga ha mvelelo dzavhuḓi dzine pfunzo yo thewaho Bivhilini ya nga vha nadzo kha muthu. Yehova o vhudza Vhaisiraele uri: “Ipfi ḽanga nga ḽi nge ṅwando: Ḽi nge tseula hatsini.” (Doiteronomio 31:19, 30; 32:2) Kha ri ṱhogomele zwiṅwe zwithu nga ha ṅwando nahone ri vhambedze vhuḓinḓa hashu nawo u itela uri ri thuse “vhathu vha mifuda yoṱhe” nga hu bvelelaho.—1 Timotheo 2:3, 4.

Ṅwando wo dzika. Hu vha na ṅwando nga zwiṱuku nga zwiṱuku musi maḓi a re muyani a tshi shanduka a vha mashotha. Maipfi a Yehova o wa hani sa “ṅwando”? O amba na vhathu vhawe nga vhuthu, vhulenda na nga nḓila ya vhulondi. Ri mu edzisa musi ri tshi sumbedza u ṱhonifha zwine vhaṅwe vha zwi tenda. Ri vha ṱuṱuwedza uri vha humbule nahone vha ḓidzhiele phetho. Musi ri tshi sumbedza dzangalelo ḽo raloho, vhathu vha ḓo ḓiimisela nga ho engedzeaho u ṱanganedza zwine ra amba nahone vhuḓinḓa hashu vhu ḓo vha vhu bvelelaho vhukuma.

Ṅwando u a homolosa. Vhuḓinḓa hashu vhu ḓo homolosa vhaṅwe musi ri tshi humbula nga ha nḓila dzo fhamba-fhambanaho dza u vha thusa u guda zwo engedzeaho nga ha ngoho. Wahashu wa tshinnani ane a pfi Chris, we a thoma u humbela Gavin pfunzo ya Bivhili, ho ngo mu kombetshedza uri a tende. Nṱhani hazwo, o lingedza u wana nḓila dzo fhamba-fhambanaho dza u ita uri Gavin a pfe o vhofholowa u haseledza nga ha Bivhili. Chris o vhudza Gavin uri hu na mulaedza wa ndeme une wa vha Bivhilini nahone u guda nga ha wonoyu mulaedza zwi ḓo mu thusa u pfesesa khwine miṱangano. Nga zwenezwo, Chris o ṱalutshedza uri vhuporofita ha Bivhili ho mu khwaṱhisedza uri Bivhili i amba ngoho. Nga ṅwambo wa zwenezwo, vho vha na nyambedzano nnzhi nga ha nḓila ye vhuporofita ha ḓadzea ngayo. Dzenedzo nyambedzano dzo homolosa Gavin nahone mafheleloni a ṱanganedza pfunzo ya Bivhili.

Ṅwando ndi wa ndeme vhutshiloni. Nga tshifhinga tsha tshilimo ngei Isiraele, mvula yo vha i sa ni lwa miṅwedzi yo vhalaho. Zwimela zwo vha zwi tshi oma zwa fa musi hu si na murongwe u bvaho kha ṅwando. Yehova o dzula o amba uri misini yashu zwi ḓo nga ho vha hu na gomelelo, zwine zwa amba uri vhathu vha ḓo farwa nga ḓora ḽa “u pfa fhungo ḽa Yehova.” (Amosi 8:11) O fulufhedzisa uri vhaḓodzwa vha ḓo “nga ṅwando u bvaho ha Yehova” musi vha tshi huwelela mafhungo maḓifha a Muvhuso, vha tshi tikedzwa nga vha “dziṅwe nngu.” (Mixa 5:6; Yohane 10:16) Mulaedza une ra u huwelela ndi tshipiḓa tsha ndugiselelo ya Yehova ya u ita uri vhane vha vha na ḓora ḽa ngoho vha tshile. Naa ri a dzhiela nṱha wonoyu mulaedza?

Ṅwando ndi phaṱhutshedzo i bvaho ha Yehova. (Doiteronomio 33:13) Vhuḓinḓa hashu vhu nga vha phaṱhutshedzo kana tshifhiwa kha vhane vha aravha zwavhuḓi. Pfunzo ya Bivhili yo vha phaṱhutshedzo kha Gavin ngauri yo mu thusa uri a wane phindulo dza mbudziso dzawe dzoṱhe. O ita mvelaphanḓa nga u ṱavhanya, a lovhedzwa nahone zwino ene na mufumakadzi wawe Joyce vha ḓiphina nga u huwelela mafhungo maḓifha a Muvhuso.

U vhambedza mushumo washu wa u huwelela na ṅwando zwi nga dovha zwa ri thusa u pfesesa uri vhuḓidini hashu vhuḓinḓani ndi ha ndeme. Nga nḓila-ḓe? Shotha a ḽi khunyeledzi tshithu, fhedzi musi o no kuvhanganywa a vha maḓi manzhi, hu vha na murongwe mavuni. Nga hu fanaho, zwine ra zwi ita vhuḓinḓani zwi nga vhonala zwi zwithu zwiṱuku vhukuma kha riṋe. Musi vhashumeli vha Yehova vha tshi ita mutingati, hu vha na u ṱanzielwa “kha tshaka dzoṱhe.” (Mateo 24:14) Naa vhuḓinḓa hashu vhu ḓo vha phaṱhutshedzo i bvaho ha Yehova kha vhaṅwe? Ee, mulaedza washu u ḓo nga ṅwando wo dzikaho, u homolosaho na une wa vha wa ndeme vhutshiloni!