Nga murahu ha uri Davida a vhulaye Goliata, Khosi Saulo o mu vhea uri a lange maswole awe. Davida o kunda nndwa nnzhi nahone a thoma u vha na bvumo ḽihulwane. Tshifhinga tshoṱhe musi Davida a tshi vhuya hayani u bva nndwani, vhafumakadzi vho vha vha tshi bva vha tshi khou tshina na u imba vha tshi ri: ‘Saulo o vhulaya vha zwigidi nahone Davida o vhulaya zwigidi na zwigidi!’ Saulo a vha na vivho kha Davida nahone a ṱoḓa u mu vhulaya.

Davida o vha a tshi kona nga maanḓa u lidza haripa. Ḽiṅwe ḓuvha musi Davida a tshi khou lidzela Saulo haripa, khosi ya mu posa nga pfumo. Davida a tinya nahone pfumo ḽa rwa kha luvhondo. Nga murahu ha zwenezwo, Saulo a lingedza lunzhi u vhulaya Davida. Mafheleloni, Davida a shavha a ya u dzumbama sogani.

Saulo a dzhia maswole a 3 000 vha ya u ṱoḓa Davida. A dzhena bakoni ḽe Davida  na vhanna vhawe vha vha vho dzumbama khaḽo. Vhanna vha Davida vha ri: ‘Hetshi ndi tshibuli tsha uri ni vhulaye Saulo.’ Davida a dodela a ya kha Saulo a tumula tshipiḓa tsha tshiambaro tsha khosi. Saulo ho ngo zwi vhona. Nga murahu, Davida a ḓisola uri o nyadza khosi yo ḓodzwaho nga Yehova. Ho ngo tendela vhanna vhawe vha tshi vhulaya Saulo. O ita na u vhidzelela Saulo, a amba uri o vha a tshi nga kha ḓi vha o vhulaya Saulo arali o vha a tshi funa. Naa Saulo u ḓo shandula muhumbulo wawe nga ha Davida?

Hai. Saulo o bvela phanḓa a tshi ṱoḓa Davida. Vhuṅwe vhusiku Davida na Abishai vha dodela vha dzhena gammbani ya Saulo. Na Abinere, mulindi wa Saulo, o vha o eḓela. Abishai a ri: ‘Hetshi ndi tshibuli tshashu!’ Litshani ndi mu vhulaye.’ Davida a ri: ‘Yehova u ḓo dzhiela Saulo vhukando. Kha ri dzhie fhedzi pfumo ḽawe na tshikumbu tsha maḓi ri ṱuwe.’

Davida a gonya thavhani i re tsini yo sedzanaho na gammba ya Saulo. A vhidzelela a ri: ‘Abinere, ndi ngani ni songo tsireledza khosi yaṋu? Mudzio na pfumo zwa Saulo zwi ngafhi?’ Saulo a ṱhogomela ipfi ḽa Davida a ri: ‘No vha ni tshi nga vha no mbulaya, fhedzi a no ngo zwi ita. Ndi a zwi ḓivha uri ni ḓo vha khosi i tevhelaho ya Isiraele.’ Saulo a vhuyelela muḓini wawe. Fhedzi a si vhoṱhe kha muṱa wa Saulo vhe vha vha vha tshi vhenga Davida.