ZWINE NA NGA ZWI GUDA BIVHILINI

Donngi Ya Bileamu I Ya Amba

Luvenda
Donngi Ya Bileamu I Ya Amba
https://cms-imgp.jw-cdn.org/img/p/1102016038/univ/art/1102016038_univ_sqr_xl.jpg
lfb ngudo ya 28 masiaṱ. 70-71

NGUDO 28

Donngi Ya Bileamu I Ya Amba

Donngi Ya Bileamu I Ya Amba

Vhaisiraele vho no fhedza miṅwaha i ṱoḓaho u vha 40 vhe sogani. Vho no kunda miḓi minzhi i re na maanḓa. Zwino, samusi vho gammba midavhini ya Moaba vhubvaḓuvha ha Mulambo wa Yorodane, tsho vha tshi tshifhinga tsha uri vha dzhene Shangoni ḽo Fhulufhedziswaho. Balaka, khosi ya Vhamoaba, o vha o tshuwa uri vha ḓo mu dzhiela shango. Nga zwenezwo a vhidza munna we a vha a tshi pfi Bileamu uri a ḓe Moaba nahone a seme Vhaisiraele.

Fhedzi Yehova a vhudza Bileamu a ri: ‘Ni songo sema Vhaisiraele.’ Ngauralo Bileamu a hana u ya. Khosi Balaka ya mu vhidza lwa vhuvhili nahone ya mu fhulufhedzisa uri i ḓo mu ṋea zwoṱhe zwine a zwi ṱoḓa. Bileamu a dovha a hana. Nga murahu Mudzimu a ri: ‘Ni nga ya, fhedzi ni fanela u amba zwine nda ḓo ni vhudza.’

Bileamu a ṋamela donngi yawe nahone a livha Moaba hu re thungo ya tshipembe. O vha o humbula u yo sema Vhaisiraele, naho Yehova o vha o mu vhudza uri a songa ita nga u ralo. Muruṅwa wa Yehova a bvelela luraru nḓilani. Bileamu ho ngo kona u vhona muruṅwa, fhedzi donngi yawe yo mu vhona. Lwa u thoma donngi yo bva nḓilani ya dzhena tsimuni. Lu tevhelaho donngi ya bva nḓilani ya kuḓana na mutsheṱo, ya pwanyeledza mulenzhe wa Bileamu na luvhondo. Lwa u fhedzisela donngi ya gwadama fhasi vhukati ha nḓila. Tshifhinga tshoṱhe, Bileamu o vha tshi rwa donngi nga thonga.

Nga lwa vhuraru, Yehova a ita uri donngi i ambe. Donngi ya vhudzisa  Bileamu ya ri: ‘Ndi ngani ni tshi khou bvela phanḓa ni tshi khou nthwa?’ Bileamu a ri: ‘No nnyita tshiḓahela. Arali ndo vha ndo fara banga ndo vha ndi tshi ḓo vha ndo ni vhulaya.’ Donngi ya ri: ‘No nṋamela miṅwaha minzhi. Naa ndo no vhuya nda ni fara nga yeneyi nḓila?’

Nga murahu Yehova a ita uri Bileamu a vhone muruṅwa. Muruṅwa a ri: ‘Yehova o ni sevha uri ni songo sema Isiraele.’ Bileamu a ri: ‘Ndo khakha. Ndi ḓo vhuyelela hayani.’ Fhedzi muruṅwa a ri: ‘Ni nga ya Moaba, fhedzi ni fanela u amba zwine Yehova a ḓo ni vhudza zwone.’

Naa hu na zwe Bileamu a guda? Hai. Nga murahu ha zwenezwo, Bileamu o lingedza u sema Vhaisiraele luraru, fhedzi nṱhani hazwo Yehova a ita uri a vha fhaṱutshedze. Mafheleloni, Vhaisiraele vha kunda Vhamoaba nahone Bileamu a vhulawa. Naa Bileamu o vha a sa ḓo vhuyelwa arali o vha o thetshelesa Yehova u bva mathomoni?

“Ni ḓilinde uri ni si vhe na tseḓa, ngauri naho muthu e na zwinzhi, ha tshili nga zwine a vha nazwo.”—Luka 12:15