Nga murahu ha muḽoro wawe wa tshifanyiso, Khosi Nebukadanetsara o ita tshifanyiso tshihulwane tsha musuku. A tshi vhea mudavhini wa Dura nahone a vhidza vhaḓivhalea vhoṱhe vha henefho shangoni, u katela na Shadaraka, Mishaka na Abedenego, u ri vha kuvhangane phanḓa hatsho. Khosi ya laedza ya ri: ‘Musi ni tshi pfa mibvumo wa zwiṱiringo, haripa na zwilidzo zwa dziṱhale, ni gwadame ni rabele tshifanyiso! Naho e nnyi ane a si gwadame a losha u ḓo poselwa ṋanḓoni ya mulilo u dugaho.’ Naa Vhahevheru vhararu vho vha vha tshi ḓo gwadama vha losha tshifanyiso, kana vha ḓo gwadamela Yehova fhedzi?

Nga murahu khosi ya laedza uri hu lidziwe muzika. Vhoṱhe vha gwadama nahone vha rabela tshifanyiso nga nnḓa ha Shadaraka, Mishaka na Abedenego. Vhaṅwe vhanna vha zwi vhona nahone vha vhudza khosi vha ri: ‘Havhaḽa Vhahevheru vhararu vho hana u rabela tshifanyiso tshau.’ Nebukadanetsara a ri vha yo vhidziwa nahone a ri: ‘Ndi ḓo ni fha tshiṅwe tshifhinga tsha u rabela hetshi tshifanyiso. Arali na sa ita nga u ralo, ndi ḓo ni posa ṋanḓoni. A huna mudzimu ane a nga kona u ni tshidza kha nṋe.’ Vha fhindula vha ri: ‘A ri ṱoḓi tshiṅwe tshifhinga. Mudzimu washu u ḓo ri tshidza. Fhedzi, naho Mudzimu a sa ri tshidza, a ri nga ḓo rabela tshifanyiso.’

Nebukadanetsara a sinyuwa vhukuma. A vhudza vhanna vhawe a ri: ‘Kutedzani mulilo u fhisese lwa sumbe u fhira lwa nga misi!’ Nga murahu a vhudza maswole a ri: ‘Vha vhofheni, nahone ni vha pose nga ngomu!’ Ṋanḓo yo vha i tshi khou fhisesa  vhukuma lwe musi maswole a tshi sendela tsini, a mbo ḓi fa na zwenezwo. Vhahevheru vhararu vha wela muliloni. Fhedzi musi Nebukadanetsara a tshi sedza nga ngomu, a vhona hu na vhanna vhaṋa vha tshi khou tshimbila nga ngomu ṋanḓoni nṱhani ha vhararu. A ofha vhukuma, nahone a vhudzisa vhaḓinḓa vhawe a ri: ‘Naa a ro ngo posa vhanna vhararu muliloni? Ndi khou vhona vhanna vhaṋa, muṅwe wavho u fana na muruṅwa!’

Nebukadanetsara a ya tsini na ṋanḓo nahone a vhidzelela a ri: ‘Bvelani nnḓa, vhoiwe vhashumeli vha Mudzimu wa Ṱaḓulu-ṱaḓulu!’ Vhoṱhe vho mangala musi vha tshi vhona Shadaraka, Mishaka na Abedenego vha tshi khou bva muliloni vha songo huvhala. Lukanda lwavho, mavhudzi, na zwiambaro zwavho zwi songo swa, nahone vho vha vha sa nukhi na mulilo.

Nebukadanetsara a ri: ‘Mudzimu wa Shadaraka, Mishaka na Abedenego ndi muhulwane. O rumela muruṅwa wawe uri a vha tshidze. A hu na mudzimu ane a fana na wavho.’

U fana na Vhahevheru Vhararu, naa no ḓiimisela u fhulufhedzea kha Yehova hu sa londwi zwine zwa nga itea?