Vhuṅwe vhusiku, Khosi Nebukadanetsara a ḽora muḽoro u mangadzaho. Wo mu dina lwe a balelwa na u eḓela. A vhidza vhadzia manditi vhawe nahone a ri khavho: ‘Nṱalutshedzeni muḽoro wanga.’ Vha ri: ‘Khosi yashu kha i ri vhudze zwe ya ḽora.’ Fhedzi Nebukadanetsara a ri khavho: ‘Hai! Vhoiwe ni fanela u mmbudza zwe nda ḽora, zwa sa ralo ndi a ni vhulaya.’ Vha dovha vha ri: ‘Kha vha ri vhudze muḽoro wavho, nahone ri ḓo vha ṱalutshedza zwine wa amba zwone.’ A ri: ‘U nga ri noṱhe ni khou lingedza u mphura. Mmbudzeni zwe nda ḽora!’ Vha vhudza khosi vha ri: ‘A huna muthu na muthihi ane a nga kona u ita zwenezwo. Zwine vha khou humbela a zwi konadzei.’

Nebukadanetsara a sinyuwa vhukuma nahone a amba uri vhanna vhoṱhe vha vhuṱali vha henefho shangoni vha vhulawe. Zwenezwo zwo vha zwi tshi katela Daniele, Shadaraka, Mishaka, na Abedenego. Daniele a humbela uri khosi i mu ṋee tshifhinga tsho engedzeaho. Nga murahu ene na khonani dzawe vha rabela kha Yehova nahone vha mu humbela u ri a vha thuse. Yehova o ita mini?

Kha bono, Yehova a sumbedza Daniele muḽoro wa Nebukadanetsara na zwine wa amba zwone. Nga ḓuvha ḽi tevhelaho, Daniele a ya kha mushumeli wa khosi nahone a ri: ‘Ni songo vhulaya na muthihi wa vhanna vha vhuṱali. Ndi nga ṱalutshedza muḽoro wa khosi.’ Mushumeli a isa Daniele ha Nebukadanetsara. Daniele a vhudza khosi a ri: ‘Mudzimu o vha dzumbululela zwa matshelo. Khezwi zwe vha ḽora: Vho vhona tshifanyiso tshihulu tshi re na ṱhoho ya musuku, khana na zwanḓa zwa siḽiva, thumbu na zwirumbi zwa khopha, milenzhe ya tsimbi, nahone ṋayo dzi dza tsimbi yo ṱanganaho na vumba. Ha tsa tombo thavhani, nahone ḽa rwa ṋayo dza tshifanyiso. Tshifanyiso tsha pwashekana tsha vha buse nahone ḽa vhudzulwa nga muya. Tombo ḽa vha thavha khulu, ya ḓadza ḽifhasi ḽoṱhe.’

 Nga murahu Daniele a ri: ‘Muḽoro wavho u amba hezwi: Muvhuso wavho ndi ṱhoho ya musuku. Siḽiva ndi muvhuso une wa ḓo vha hone nga murahu ha wavho. Nga murahu ha tevhela une wa nga khopha, une wa ḓo vhusa ḽifhasi ḽoṱhe. Muvhuso u tevhelaho u ḓo khwaṱha u fana na tsimbi. Mafheleloni, hu ḓo vha na muvhuso wo fhandekanaho une zwiṅwe zwipiḓa zwawo zwa ḓo khwaṱha u fana na tsimbi, zwiṅwe zwa si khwaṱhe u fana na vumba. Tombo ḽe ḽa vha thavha ndi Muvhuso wa Mudzimu. U ḓo fhelisa yeneyi mivhuso yoṱhe nahone u ḓo vha wa lini na lini.’

Nebukadanetsara a gwadama phanḓa ha Daniele o kotamela fhasi. A ri: ‘Mudzimu waṋu o ni dzumbululela hoyu muḽoro. A huna muṅwe Mudzimu a fanaho nae.’ Nṱhani ha u vhulaya Daniele, Nebukadanetsara a mu vhea uri a lange vhanna vhoṱhe vha vhuṱali na uri a vhe muvhusi wa dzingu ḽa Babele. Naa ni a kona u vhona nḓila ye Yehova a fhindula ngayo thabelo ya Daniele?