Hu si kale Elisabetha u ḓo vha na ṅwana. Shaka ḽawe Maria, ḽo vha ḽi tshi khou dzula nae lwa miṅwedzi miraru. Zwino ndi tshifhinga tsha uri Maria a onese na u fara lwendo lulapfu lwa u ya hayani hawe ngei Nazaretha, devhula ha zwikwara zwa Yudea. Na ene vho u ḓo vha na murwa nga murahu ha miṅwedzi i ṱoḓaho u vha ya rathi.

Musi Maria a tshi tou ṱuwa, Elisabetha a beba. Zwi takadza lungafhani uri Elisabetha o beba zwavhuḓi na uri ene na ṅwana vha na mutakalo wavhuḓi! Musi Elisabetha a tshi sumbedza vhahura na mashaka awe murwa wawe muṱuku, vhoṱhe vha takala nae.

U ya nga Mulayo we Mudzimu a u ṋea Vhaisiraele, ṅwana wa mutukana o vha a tshi fanela u fumbiswa nga ḓuvha ḽa vhumalo nahone a irwa dzina. (Levitiko 12:2, 3) Vhaṅwe vha humbula uri u fanela u irwa dzina ḽa Sakaria khotsi awe. Fhedzi Elisabetha a hana a ri: “U ḓo pfi Yohane.” (Luka 1:60) Humbulani uri muruṅwa Gabriele o amba uri onoyo ṅwana u fanela u pfi Yohane.

Vhahura na mashaka vha vhilaela vha ri: “A hu na shaka na ḽithihi ḽau ḽine ḽa vhidzwa nga ḽeneḽi dzina.” (Luka 1:61) Vha amba na Sakaria nga zwanḓa, vha mu vhudzisa uri u ṱoḓa u ira murwa wawe dzina ḽifhio. Sakaria a humbela tsha u ṅwalela khatsho, a ṅwala uri: “U pfi Yohane.”​—Luka 1:63.

Sakaria o mbo ḓi dovha a kona u amba nga lwa vhuṱolo. Ni ḓo zwi elelwa uri ho ngo tsha kona u amba musi a tshi hana zwe muruṅwa a zwi amba zwa uri Elisabetha u ḓo vha na murwa. Zwino, musi Sakaria a tshi amba, vhahura vhawe vha akhamala nahone vha ḓivhudzisa uri: “Onoyo ṅwana u ḓo vha muthu-ḓe?” (Luka 1:66) Vha vhona maanḓa a Mudzimu kha nḓila ye Yohane a irwa ngayo dzina.

 Sakaria a ḓala muya mukhethwa, a ri: “Nga hu rendwe Yehova Mudzimu wa Isiraele, ngauri o pfela vhathu vhawe vhuṱungu a vha tshidza. O ri vusela luṋanga lwa u ri tshidza nḓuni ya Davida mulanda wawe.” (Luka 1:68, 69) Lwonolwu “luṋanga lwa u ri tshidza,” lu ambela kha Murena Yesu, ane a kha ḓi ḓo bebwa. Sakaria o amba uri nga nṱhani ha Onoyo, Mudzimu u ḓo “ri tshidza kha maswina ashu, u ḓo ri tendela ri tshi mu rabela ri sa ofhi, uri ri fhulufhedzee na u vha vho lugaho phanḓa hawe vhutshilo hashu hoṱhe.”​—Luka 1:74, 75.

Sakaria a amba nga ha murwa wawe a ri: “Fhedzi iwe ṅwananga, u ḓo pfi muporofita wa Wa-Ṱaḓulu-ṱaḓulu, ngauri u ḓo ranga phanḓa Yehova wa mu lugiselela nḓila, uri u ḓivhadze vhathu vhawe uri vha ḓo tshidzwa nga u hangwelwa zwivhi zwavho, ngauri Mudzimu washu u a pfela vhuṱungu. Honoho u pfela vhuṱungu hu bvaho ṱaḓulu hu ḓo nga tshedza tsha nga matsheloni, u itela u vhonetshela vho dzulaho swiswini na murunzini wa lufu na u ri tshimbidza nḓilani ya mulalo.” (Luka 1:76-79) Honoho vhuporofita vhu a khuthadza.

Nga tshenetsho tshifhinga, Maria ane zwa tou vha khagala uri ha athu u vhingwa, u swika hayani Nazaretha. Hu ḓo itea mini khae musi zwi tshi vho vhonala uri o vhifha muvhilini?