Yesu o ombedzela ndeme ya u ḓiṱukufhadza zwifhinga zwinzhi vhuḓinḓani hawe. (Luka 14:8-11) O ḓiimisela u wana vhanna na vhafumakadzi vhane vha ṱoḓa u shumela Mudzimu nga u ḓiṱukufhadza. Vhaṅwe vhavho vha nga kha ḓi vha vhe vhaitazwivhi vha ḓivheaho.

Vhafarisei na vhamaṅwalo vha ṱhogomela uri vhenevha vhathu, vhane vha vha dzhia vhe si vha ndeme vha takalela Yesu na mulaedza wawe. Vha gungula vha ri: “Hoyu munna u konana na vhaitazwivhi na u ḽa navho.” (Luka 15:2) Vhafarisei na vhamaṅwalo vha a ḓidzhiela nṱha nahone vha fara vhathu zwavho nga lunyadzo na nga nḓila i si yavhuḓi. Vha tshi sumbedza lunyadzo lune vha vha nalwo kha vhenevha vhathu, vharangaphanḓa vha vha vhidza nga ipfi ḽa Tshihevheru ḽa ‛am ha·’a′rets ḽine ḽa amba “vhathu vha shango [ḽifhasi].”

Zwo fhambanaho na zwenezwo, Yesu u fara muthu muṅwe na muṅwe nga tshirunzi, vhulenda, nahone u a pfela vhuṱungu. Vhathu vhanzhi vhane vha ḓiṱukufhadza, u katela na vhaṅwe vhane vha ḓivhelwa u ita zwivhi, vha a fhisetshela u thetshelesa Yesu. Naho zwo ralo, Yesu o ḓipfa hani nahone a ita mini musi a tshi sasaladzwa nge a thusa vhenevha vhathu vha ḓiṱukufhadzaho?

Phindulo i wanala kha tshifanyiso tshawe tshi kwamaho mbilu, tshi fanaho na tshe a tshi anetshela ngei Kapernaume. (Mateo 18:12-14) Yesu o ṱalutshedza mafhungo nga nḓila ine zwa nga Vhafarisei vho luga nahone vho tsireledzea tshitumbani tsha Mudzimu. Fhedzi vhathu vha vhuimo ha fhasi vha ṱaluswa sa vho pambuwaho na vho xelaho.

Yesu o ri: “Ndi nnyi ane a vha na nngu dza 100, ane a tshi xelelwa nga nthihi, a si sie dza 99 sogani, a ya a ṱoḓa yo xelaho u swika a tshi i wana? Musi o no i wana, a i vhea kha mahaḓa o takala. Musi a tshi swika hayani, u kuvhanganya khonani dzawe na vhahura vhawe, a ri, ‘Takalani na nṋe, ngauri ndo wana nngu yanga ye ya vha yo xela.’”​—Luka 15:4-6.

Yesu u khou funza mini nga tshenetshi tshifanyiso? O ṱalutshedza a ri: “Ndi a ni vhudza ndi ri, musi muitazwivhi muthihi a tshi rembuluwa u ḓo takalelwa ngei ṱaḓulu u fhira vha 99 vho lugaho vhane zwa si ṱoḓee uri vha rembuluwe.”​—Luka 15:7.

Zwe Yesu a zwi amba malugana na u rembuluwa zwi fanela u kwama mbilu dza Vhafarisei. Vha ḓidzhia sa vho lugaho nahone a vha vhoni  ṱhoḓea ya uri vha rembuluwe. Musi vhaṅwe vha tshi sasaladza Yesu miṅwahani i si gathi yo fhiraho nga nṱhani ha uri o vha a tshi khou ḽa zwiḽiwa na vhathelisi u katela na vhaitazwivhi, o fhindula a ri: “Ndo ḓela u vhidza vhaitazwivhi, hu si vho lugaho.” (Marko 2:15-17) Vhafarisei vhane vha ḓiita vho lugaho vha kundelwa u vhona ṱhoḓea ya uri vha rembuluwe, zwenezwo zwi ita uri ṱaḓulu hu si vhe na dakalo. Zwenezwo zwo fhambana vhukuma na musi vhaitazwivhi vha tshi rembuluwa zwa vhukuma.

Musi Yesu a tshi ombedzela mbuno ya uri hu vha na dakalo ṱaḓulu musi vhaitazwivhi vha tshi rembuluwa, o amba tshiṅwe tshifanyiso tsha zwine zwa itea hayani a ri: “Ndi ufhio mufumakadzi a re na tshelede ya dirakima dza fumi, ane musi o xedza dirakima nthihi, a si funge luvhone a swiela nnḓu yawe, a sedza hoṱhe u swikela a tshi i wana? Musi o no i wana, u kuvhanganya khonani dzawe na vhahura, a ri, ‘Takalani na nṋe, ngauri ndo wana dirakima ye ya vha yo xela.’”​—Luka 15:8, 9.

Yesu a amba uri zwine ra zwi guda kha tshenetshi tshifanyiso zwi fana na zwe ra zwi guda kha tshifanyiso tsha nngu yo xelaho. O ri: “Ndi a ni vhudza ndi ri, na vharuṅwa vha Mudzimu vha a takala zwihulu musi muitazwivhi muthihi a tshi rembuluwa.”​—Luka 15:10.

Edzani u humbula nḓila ine vharuṅwa vha Mudzimu vha takala ngayo musi vhaitazwivhi vho xelaho vha tshi rembuluwa. Zwenezwo ndi zwithu zwi swayeaho vhukuma nga nṱhani ha uri vhaitazwivhi vhane vha rembuluwa nahone vha vha na vhudzulo Muvhusoni wa Mudzimu wa ṱaḓulu, vha ḓo vha na vhuimo vhu fhiraho na ha vharuṅwa. (1 Vhakorinta 6:2, 3) Naho zwo ralo, vharuṅwa a vha na vivho. Nga zwenezwo, ri fanela u ḓipfa hani musi muitazwivhi a tshi rembuluwa nga ho fhelelaho nahone a humela kha Mudzimu?