Ndi tshifhinganyana Yesu e Perea, hune ha vha “seli ha Mulambo wa Yorodane.” (Yohane 10:40) Zwino o livha tshipembe u yela Yerusalema.

Yesu ha eṱhe. U na vhafunziwa vhawe, khathihi na “gogo,” u katela na vhathelisi na vhaitazwivhi. (Luka 14:25; 15:1) Vhafarisei na vhamaṅwalo, vhane vha sasaladza zwine Yesu a khou zwi amba na u zwi ita, na vhone vha henefho. Hu na zwithu zwinzhi zwine vha fanela u humbula nga hazwo nga murahu ha u pfa Yesu a tshi anetshela tshifanyiso tsha nngu yo xelaho, murwa o xelaho, khathihi na munna wa mupfumi na Lazaro.​—Luka 15:2; 16:14.

Khamusi a tshi kha ḓi humbula nga ha u sasaladzwa na u seiwa nga vhapikisi vhawe, Yesu a livhisa ṱhogomelo kha vhafunziwa vhawe. A amba nga ha dziṅwe mbuno dze a dzi funza musi e ngei Galilea.

Sa tsumbo, Yesu o ri: “Hu ḓo dzula hu na zwikhukhulisi. Naho zwo ralo, khombo kha ane zwa ḓa ngae! . . . Ni ṱhogomele. Arali wahaṋu a ni khakhela, ni mu kaidze, arali a rembuluwa ni mu hangwele. Naho arali a ni khakhela lwa sumbe nga ḓuvha, a ḓa kha inwi lwa sumbe, a ri, ‘Ndo rembuluwa,’ ni mu hangwele.” (Luka 17:1-4) Khamusi mbuno ya u fhedzisela kha enea mafhungo i humbudza Petro nga ha mbudziso ye a i vhudzisa malugana na u hangwela lwa sumbe.​—Mateo 18:21.

Naa vhafunziwa vho vha vha tshi ḓo kona u tshila u tendelana na maipfi a Yesu? Musi vha tshi vhudza Yesu uri: “Ri engedze lutendo,” o vha khwaṱhisedza uri: “Arali ni na lutendo lu linganaho na thoro ya luṋonya, no vha ni tshi nga amba na hoyu muthabeila na ri, ‘Tupuwa hafha, u ḓiṱavhe lwanzheni,’ wa ni thetshelesa.” (Luka 17:5, 6) Zwi khagala uri na lutendo luṱuku lu nga khunyeledza zwithu zwihulwane.

Yesu a bvela phanḓa a tshi funza nga ha uri ndi ngani u ḓiṱukufhadza zwi zwa ndeme. O vhudza vhaapostola vhawe uri: “Arali mulanda waṋu o vha a tshi khou lima tsimuni kana a tshi khou lisa, no vha ni tshi ḓo mu ṱanganedza hani musi a tshi vhuya? Naa no vha ni tshi ḓo ri, ‘Iḓa nga u ṱavhanya u ḽe zwiḽiwa’? Naa no vha ni sa ḓo ri, ‘Nndugisele zwiḽiwa zwa nga madekwana, u ambare zwiambaro zwa u shuma, u ḓe u ntshumele u swikela ndi tshi fhedza u ḽa na u nwa; u kone u ḽa na u nwa nga murahu’? Naa ni ḓo livhuwa onoyo mulanda nge a ni itela zwe na mu vhudza? Na inwi musi no no ita zwoṱhe zwe na vhudzwa uri ni zwi ite, ni ambe ni ri: ‘A ri vhalanda vha tshithu. Ro ita zwe ra vha ro fanela u zwi ita.’”​—Luka 17:7-10.

Mushumeli muṅwe na muṅwe wa Mudzimu u fanela u pfesesa uri ndi ngani zwi zwa ndeme u ita zwine Mudzimu a zwi funa u thoma. Zwiṅwe hafhu, muṅwe na muṅwe u fanela u humbula ndugelo ine a vha nayo ya u gwadamela Mudzimu e tshipiḓa tsha muṱa wawe.

Zwi vhonala u nga nga murahu ha zwenezwi, muthu we a rumiwa nga Maria na Marita o mbo ḓi swika. Ndi khaladzi dza Lazaro, vhane vha dzula Bethania kha ḽa Yudea. Onoyo muthu a ri: “Murena, uḽa muthu ane wa mu funa u khou lwala.”​—Yohane 11:1-3.

Musi Yesu a tshi pfa uri khonani yawe Lazaro u khou lwala nga maanḓa, ho ngo ṱungufhala lwo kalulaho. Nṱhani hazwo, o ri: “Hovhu vhulwadze a vhu nga ḓo mu vhulaya, fhedzi vhu ḓo ita uri hu rendwe Mudzimu na uri Murwa wa Mudzimu a rendwe ngaho.” O fhedza maḓuvha mavhili  e henefho nahone nga murahu a vhudza vhafunziwa vhawe uri: “Kha ri vhuyelele Yudea.” Vha tshi vhilaela vha ri: “Rabi, a si kale Vhayuda vha tshi khou ṱoḓa u u kanḓa nga matombo, naa u khou dovha wa vhuyelela henengei?”​—Yohane 11:4, 7, 8.

Yesu a fhindula a ri: “Kani ḓuvha a ḽi na awara dza 12? Ane a tshimbila masiari ha khukhulwi nga tshithu, ngauri u vhona tshedza tsha ḽino shango. Fhedzi ane a tshimbila vhusiku, u a khukhulwa, ngauri u khou tshimbila swiswini.” (Yohane 11:9, 10) Zwi vhonala u nga u khou amba uri tshifhinga tshe Mudzimu a tshi vhetshela vhuḓinḓa hawe a tshi athu u fhela. Yesu u tea u shumisa tshenetshi tshifhinga tshiṱuku-ṱuku tsho salaho nga vhuḓalo u swika tshi tshi fhela.

Yesu o dovha a ri: “Lazaro khonani yashu o eḓela, fhedzi ndi khou ya henengei uri ndi mu vuse.” Vhafunziwa vha nga vha vho humbula uri Lazaro o ḓiawetshela nahone u ḓo fhola, ndi ngazwo vho ri: “Murena, arali o eḓela u ḓo fhola.” Yesu a mbo ḓi vha ṱalutshedza zwine a khou amba zwone a ri: “Lazaro o fa . . . Fhedzi kha ri ye khae.”​—Yohane 11:11-15.

Musi Thomasi a tshi ṱhogomela uri zwi nga kha ḓi itea uri Yesu a vhulawe ngei Yudea, a tshi ṱoḓa u mu tikedza, a ṱuṱuwedza vhafunziwa ngae a ri: “Kha ri ye, uri ri fe nae.”​—Yohane 11:16.