Yesu u kha ḓi tou bva u dovholola zwe a zwi amba nga ha u rabela, fhedzi a si zwone fhedzi zwe a dovholola u amba nga hazwo vhuḓinḓani hawe. Musi Yesu a tshi khou ita vhuṱolo ngei Galilea, o pomokwa uri u khou ita honovho vhuṱolo nga maanḓa a bvaho ha muvhusi wa madimoni. Zwino musi e ngei Yudea, u dovha a pomokwa.

Gogo ḽa vhathu ḽo mangala musi Yesu a tshi pandela dimoni ḽe ḽa vha ḽi tshi ita uri muṅwe munna a si kone u amba. Fhedzi vhane vha mu sasaladza a vho ngo mangala. Vho mu pomoka nga nḓila i fanaho vha ri: “U pandela madimoni nga maanḓa a Belesebubu, muvhusi wa madimoni.” (Luka 11:15) Vhaṅwe vhathu vha mu humbela uri a vha sumbedze tshiga tshi bvaho ṱaḓulu ngauri vho vha vha tshi ṱoḓa u vha na vhuṱanzi ho engedzeaho ha uri Yesu ndi nnyi.

Musi Yesu a tshi ṱhogomela uri vha khou ṱoḓa u mu linga, o vha fhindula nga nḓila i fanaho na ye a fhindula ngayo vhe vha mu sasaladza ngei Galilea. A amba uri muvhuso muṅwe na muṅwe wo fhandekanaho u ḓo wa, a ri: “Arali Saṱhane o fhandekana, naa muvhuso wawe u nga ima?” Yesu a amba nga ho livhaho a ri: “Arali ndi tshi pandela madimoni nga maanḓa a Mudzimu, zwi amba uri Muvhuso wa Mudzimu wo swika ni si zwi ṱhogomele.”​—Luka 11:18-20.

Zwe Yesu a zwi amba nga ha “maanḓa a Mudzimu,” zwi fanela u humbudza vhathetshelesi vhawe nga ha zwe zwa itea mathomoni kha ḓivhazwakale ya Isiraele. Vha re pfamoni ya Farao vhe vha vhona Mushe a tshi ita vhuṱolo vho ri: “Ndi maanḓa a Mudzimu!” Ndi “munwe wa Mudzimu” kana maanḓa awe e a dovha a shumiswa u ṅwala Milayo ya Fumi kha mbaba mbili dza matombo. (Ekisodo 8:19; 31:18) Nga hu fanaho, “maanḓa a Mudzimu” ane a vha muya wawe mukhethwa kana maanḓa awe ane a a shumisa, ndi one ane a khou ita uri Yesu a kone u pandela madimoni na u fhodza vhathu vha lwalaho. Nga zwenezwo, Muvhuso wa Mudzimu wo kunda vhenevha vhane vha u hanedza, ngauri Yesu ane a vha Khosi yo vhewaho ya Muvhuso, u henefho nahone u khou ita yeneyi mishumo.

Vhukoni ha Yesu ha u pandela madimoni ndi vhuṱanzi ha uri u na maanḓa u fhira Saṱhane, u fana na musi munna a re na maanḓa a tshi kunda munna o ḓiṱamaho vhukuma o lindaho pfamo. Yesu o dovha a amba nga ha tshifanyiso tsha munna we dimoni ḽa bva khae. Arali onoyo munna a sa ita uri hu vhe na zwithu zwavhuḓi fhethu ho bvaho dimoni, ḽeneḽo dimoni ḽi ḓo vhuya ḽi na maṅwe a sumbe zwa ita uri vhuimo hawe vhu ṋaṋe u vhifha u fhira u thomani. (Mateo 12:22, 25-29, 43-45) Zwenezwi ndi zwine zwa khou itea na kha lushaka lwa Isiraele.

Mufumakadzi we a vha o thetshelesa Yesu o kwamea a ri: “Hu takala mufumakadzi we a u beba na we a u mamisa!” Vhafumakadzi vha Vhayuda vho vha vha tshi ṱoḓa u vha mme a muporofita, zwihuluhulu mme a Messia. Nga zwenezwo, onoyo mufumakadzi a nga vha a tshi khou humbula uri Maria o takala nga maanḓa nge a vha mme a muthu ane a kona u funza nga yeneyo nḓila. Fhedzi Yesu a khakhulula onoyo mufumakadzi, a mu vhudza zwine zwa ita uri muthu a takale zwa vhukuma, a ri: “Hu takala vhane vha pfa ipfi ḽa Mudzimu, vha tevhedza zwine ḽa amba!” (Luka 11:27, 28) Yesu ho ngo vhuya a amba uri Maria u fanela u huliswa nga nḓila yo khetheaho. Nṱhani hazwo, muthu muṅwe na muṅwe a nga takala zwa vhukuma nga u shumela Yehova nga u fhulufhedzea, hu si nge a vha shaka ḽa muṅwe muthu kana u khunyeledza zwiṅwe zwithu.

Yesu a kaidza vhathu vha ṱoḓaho u itelwa vhuṱolo vhu bvaho ṱaḓulu, samusi o zwi ita na ngei Galilea. O amba uri a hu na vhuṱolo vhune vha ḓo vhu vhona nga nnḓa ha “vhuṱolo he ha itea  kha Yona.” Vhuṱolo he ha itea kha Yona ndi musi a tshi dzula thumbuni ya khovhe maḓuvha mararu na u funza Vhaninive nga tshivhindi, zwa ita uri vha rembuluwe. Yesu o ri: “Fhedzi a fhiraho Yona u fhano.” (Luka 11:29-32) Yesu u fhira na Salomo, we a vha e na vhuṱali he khosi ya mufumakadzi ya Sheba ya tshimbila lwendo lulapfu u itela u vhu thetshelesa.

Yesu a dovha a ri: “A hu na ane a nga funga luvhone a lu dzumba kana a lu vhea fhasi ha manngi, fhedzi u lu vhea khagala.” (Luka 11:33) A nga vha a tshi khou amba uri u funza na u ita vhuṱolo phanḓa ha vhenevha vhathu zwi fana na u dzumba tshedza tsha luvhone. Ngauri maṱo avho ha koni u vhona zwavhuḓi nga lwa pfanyisedzo, zwenezwo zwi ita uri vha kundelwe u pfesesa uri ndi ngani a tshi khou ita mishumo yawe.

Yesu u kha ḓi tou bva u pandela dimoni na u ita uri munna we a vha a sa koni u amba a ambe. Zwenezwo zwi fanela u ṱuṱuwedza vhathu uri vha rende Mudzimu na u vhudza vhaṅwe nga ha zwine Yehova a khou zwi khunyeledza. Nga zwenezwo, Yesu a sevha vhane vha mu sasaladza a ri: “Ni ṱhogomele uri tshedza tshi re kha inwi tshi sa vhe swiswi. Arali muvhili waṋu woṱhe u na tshedza, u ḓo penya woṱhe u fana na luvhone lu tshi vhonetshela.”​—Luka 11:35, 36.