Nga iṅwe Savhatha, Yesu o ya sinagogoni, khamusi ngei Galilea. Musi e henefho, a wana munna o omaho tshanḓa tsha u ḽa. (Luka 6:6) Vhamaṅwalo na Vhafarisei vha sedza Yesu. Ndi ngani? Vha sumbedza zwine vha vha na dzangalelo khazwo musi vha tshi vhudzisa uri: “Naa u fhodza nga Savhatha zwo tendelwa?”​—Mateo 12:10.

Vharangaphanḓa vha vhurereli ha Tshiyuda vha tenda uri u fhodza zwo tendelwa nga Savhatha arali fhedzi vhutshilo vhu khomboni. Sa tsumbo, a zwo ngo tendelwa nga Savhatha u tsiḓulula shambo kana u ḓi banditsha arali wo huvhala, ngauri honovhu ndi vhuimo vhu sa vhei vhutshilo khomboni. Zwi tou pfala uri vhamaṅwalo na Vhafarisei a vha khou vhudzisa Yesu dzimbudziso ngauri vha pfela vhuṱungu onoyu munna ane a khou tambula. Fhedzi vha khou lingedza u wana nḓila ine vha nga vhona ngayo Yesu mulandu.

Naho zwo ralo, Yesu u a zwi ḓivha uri vha humbula nga nḓila yo khakheaho. O ṱhogomela uri vha na mavhonele o kalulaho a sa tendelani na maṅwalo nga ha mishumo i songo teaho u itwa nga Savhatha. (Ekisoda 20:8-10) O no ḓi sasaladzwa nga nṱhani ha mishumo yawe yavhuḓi. Zwino Yesu u lugisela nḓila ine a nga vha fhindula ngayo nga u vhudza munna o omaho tshanḓa uri: “Takuwa u ḓe ngeno vhukati.”​—Marko 3:3.

A lavhelesa vhamaṅwalo na Vhafarisei a ri: “Arali ni na nngu nthihi, ya wela dindini nga Savhatha, naa ni nga si dzhene na i bvisa?” (Mateo 12:11) Nngu i imela lupfumo, ndi ngazwo vho vha vha si nga si i litshe i dindini u swikela ḓuvha ḽi tevhelaho ngauri yo vha i tshi nga fela nga ngomu nahone zwa ita uri vha xelelwe. Zwiṅwe hafhu, Maṅwalo a ri: “Muvhuya u ṱhogomela zwifuwo zwawe.”​—Mirero 12:10.

A tshi vhambedza honoho vhuimo, Yesu o dovha a ri: “Naa muthu a si wa ndeme u fhira nngu? Ngauralo, u ita zwithu zwavhuḓi nga Savhatha a zwo ngo khakhea.” (Mateo 12:12) Nga zwenezwo, Yesu u ḓo vha a sa khou pfuka mulayo wa Savhatha nga u fhodza onoyo munna. Vharangaphanḓa vha vhurereli vho kundelwa u hanedza wonoyo muhumbulo u pfalaho wa u pfela vhuṱungu. Vha sokou ṅo!

Yesu a vha sedza o sinyuwa na u ṱungufhadzwa nga mavhonele avho o khakheaho. A amba na munna a ri: “Onyolosa tshanḓa tshau.” (Mateo 12:13) Musi munna a tshi onyolosa tshanḓa tshawe tsho omaho, tsha fhola. Zwenezwo zwa ita uri onoyo munna a takale, fhedzi vhane vha khou lingedza u vhona Yesu mulandu vho ḓipfa hani?

Vhudzuloni ha u takalela uri tshanḓa tsha munna tsho fhola, Vhafarisei vha bva nga u ṱavhanya nahone vha fara muṱangano “na vhatevheli vha Herode uri vha langane u vhulaya Yesu.” (Marko 3:6) Vhuṱanzi vhu sumbedza uri tshenetshi tshigwada tsha politiki tshi katela miraḓo ya tshigwada tsha vhurereli tsha Vhasadukei. Vhasadukei na Vhafarisei vha dzulela u ṱaṱisana, fhedzi ndi madele mapfani kha u hanedza Yesu.