Yesu na vhafunziwa vhawe vha ṱuwa vha ya Lwanzheni lwa Galilea vha tshi pfa uri Vhafarisei na tshigwada tsha vhatevheli vha Herode vho langana u mu vhulaya. Gogo ḽihulu ḽa ḓa khae ḽi tshi bva Galilea, miḓini ya Tiro na Sidoni, vhubvaḓuvha ha Mulambo wa Yorodane, Yerusalema na Idumea tshipembe. Yesu a fhodza vhanzhi. Nga zwenezwo, vhathu vhe vha vha vha tshi khou lwala nga maanḓa vho thoma u kwanyeledzana. Vho vha vha sa ṱoḓi u lindela Yesu a tshi vha kwama, vho ita zwoṱhe zwine vha nga kona uri vha mu kwame.​—Marko 3:9, 10.

Hu na vhathu vhanzhi lune Yesu a vhudza vhafunziwa vhawe uri vha mu lugiselele tshikepe tshiṱuku uri a sendele kule na vhenevho vhathu uri vha si mu kwanyeledze. Zwiṅwe hafhu, a nga vha funza e tshikepeni kana a ya huṅwe fhethu tsini na khunzi-khunzi u itela u thusa vhathu vhanzhi.

Mufunziwa Mateo o ṱhogomela uri mushumo wa Yesu u ita uri “zwe zwa ambiwa nga muporofita Yesaya” zwi itee. (Mateo 12:17) Yesu u khou ita uri hu itee vhuporofita vhufhio?

“Vhonani mushumeli wanga we nda mu nanga, ane nda mu funa, ane nda mu takalela! Ndi ḓo vhea muya wanga khae, uri a sumbedze dzitshaka khaṱhulo yo teaho. Ha nga ṱaṱi khani, ha nga zhambi, a hu na ane a ḓo pfa ipfi ḽawe nḓilani. Luṱanga lu re tsini na u vunḓea, ha nga lu vunḓi, luvhone lu re tsini na u dzima, ha nga lu dzimi, u swikela a tshi haṱula nga nḓila yo teaho. Tshaka dzi ḓo fhulufhela dzina ḽawe.”​—Mateo 12:18-21; Yesaya 42:1-4.

Yesu ndi mushumeli a funwaho ane Mudzimu a mu takalela. Yesu u bvisela khagala nḓila yo teaho ya u haṱula ine ya khou dzumbiwa nga masialala a vhurereli ha mazwifhi. Vha tshi shumisa Mulayo wa Mudzimu nga nḓila yavho yo khakheaho, Vhafarisei a vha thusi na muthu a lwalaho nga Savhatha. Yesu o sumbedza uri muya wa Mudzimu u khae nahone a sumbedza nḓila yo teaho ine Mudzimu a haṱula ngayo nga zwine a zwi ita. Nga yeneyo nḓila, o rula vhathu muhwalo wa u tevhedza mikhuvha i songo teaho. Ndi ngazwo vharangaphanḓa vha vhurereli vha tshi ṱoḓa u mu vhulaya. Zwenezwi zwi ṱungufhadza lungafhani.

Zwi amba mini uri “ha nga ṱaṱi khani, ha nga  zhambi, a hu na ane a ḓo pfa ipfi ḽawe nḓilani”? Musi Yesu a tshi fhodza vhathu, o vha a sa tendeli vhenevho vhathu kana madimoni vha tshi “vhudza muthu.” (Marko 3:12) Ha ṱoḓi vhathu vha tshi mu ḓivha nge vha tou pfa nga hae dzinḓilani kana nga mafhungo o shandiwaho a mavharivhari.

Zwiṅwe hafhu, Yesu u isa mulaedza wawe u khuthadzaho kha vhathu vhane vha fana na luṱanga lwo vunḓeaho, lwo khotheaho na lwo kandekanywaho. Vha fana na luvhone lu re tsini na u dzima. Yesu ha vunḓi luṱanga lwo vunḓeaho kana u dzima luvhone lu re tsini na u dzima. U thusa vho vuḓaho nga vhulenda, lufuno na nga vhuṱali. Yesu ndi ene ane tshaka dza nga mu fhulufhela.